Ntandiliko 49
49
Yakobo àvabaliki vana vake
1Bahi Yakobo nkuvachema vana vake nkuvahaulila kuchidoni, “Idang'ana apano ninnyaulilange mambo lambenkojanga mmaduva laîda.
2“Idang'ana mupilikanile, mwenu mmana mma Yakobo,
mungupilikanile nangu Isilaeli atata wenu.
3Wako Lubeni mwanangu ntandi kuvelekwa,
mwana wa ujana wangu, na chihepo cha ujana wangu.
Wako ùnivapunda anung'unuvako kwa ukulu na dimongo.
4Henga ùvele muchi medi lakádivilika la livambwe.
Wako nanga paumbekuva kavila mwanangu ntandi,
kwa kuva, úlele na n'jangu ntumwa, nkuutaya najisi ulombi wangu.
5Simeoni na Lawi ni munu na nnung'une,
vanang'o vàtumila vikomanilo vyao kuvalagiha vanu chikalalihi,
6henga nangu nanga panimbekumila njama dyao dibaya.
Nangu nanga panimbekumila makojano lao,
kwa kuva, kwa kuvisa kwavo vávawalele vanu,
na kwa kutamwa kwavo vene váchekete minanga ya ang'ombe.
7Ivisi yavo ilaniwe, kwa kuva nni ing'ali namene,
na gasabu yavo nni ya chikalalihi.
Nnungu avamwadilihanye vanu va ding'olo dyavo muvanu va ding'olo dyangu dinji.
Na avamwadilihanye nchilambo cha Isilaeli.
8Wako Yuda#49:8 Lidi lya lina Yuda, lìpilikanika muchi lilove lya Chieblaniya livêle na mana ya “kulombolela.” chalumo na vanu va nnukolo lwako, vanu va n'ding'olo dya anung'unuvako vàmbennombolelanga.
Vanu va n'ding'olo dya anung'unuvako vàmbenhunamila mwenu,
kwa kuva, mùmbevalema amongo venu.
9Yuda mwanangu, wako na vanu va nnukolo lwako mùvele muchi uhimba,
amalidîle kuntang'una nnyama wammwalele.
Uhimba aneyo àhwena unalinyoloja na kulala,
na nanga munu alînga kuntakatuha.
10Isimbo ya chifalume nanga paimbeuka kwa vanu va nnukolo lwanga Yuda,
wala isimbo ya utawala nanga paimbeuka mmakono#49:10 Kwa Chieblaniya apano pàlembwije “isimbo ya utawala nanga paimbeuka mmadodo langa Yuda,” yani utawala ùmbekuva chihi wa vanu va nnukolo lwanga Yuda. lavo,
mpaka pambeida ayula mwene isimbo,
uvambempilikana vanu va vilambo.
11Vanu va nnukolo lwako vàmbebalikiwa namene.
Kupapatana na anelyo, vanu anevo vàmbevahungangila punda vao mmizabibu yambone namene.
Vàmbechapa dinguwo dyavo n'divayi,
na majoho lavo n'divayi dyanahuvi.
12Meho lavo làmbekunduvala ing'anya ya divayi kuva dyohe namene,
na meno lavo làmbeswelela ing'anya ya mavele kuva lohe namene.
13Zabuloni, vanu va nnukolo lwako vàmbeikala nnyenje bahali,
na pwani yavo ìmbekuva pachinu pakuyamija dingalava.
Na chilambo chavo chìmbedambaluka mpaka ku Sidoni.
14Isakali, vanu va nnukolo lwako vàmbekuva muchi punda avêle na dimongo,
alilâja ching'ati misigo yake.
15Kwa kuva, vàmbepona pachinu pao pakuikala kuva pambone namene,
na vàmbechona chilambo chao kuva chìnikatapala namene.
Bahi vàmbeitepya myongo yavo uchinga vanyakule misigo iidôpa namene,
na kukolokohwa kukola madengo lakamajânga namene.
16Dani, ikànava lukolo lwako lujoko, henga vakulu vake vàmbevatawala vanu vao,
muchi vakulu va ding'olo dinji dya Isilaeli chivavatawala vanu vao.
17Vanu va nnukolo lwako vàmbekuva muchi nnyongo nndila,
nnyongo avêle na sumu nnyenje indila,
alûma vikotwa vya falasi,
na munu ankwedîle nkumotoka luwali.
18Yahwe, nangu ngùlindilila ungupohe kuhaloka kwa amongo vangu!
19Gadi, vanu va nnukolo lwako vàmbehavilwa na vakúpakanyola,
henga vanang'o vàmbevapapatilila anevo vanu kwa nnyuma na kuvahavila.
20Chilambo cha Asheli chìmbehumya vilyo vyambone namene,
na vilyo anevyo vìmbefala kumwing'a nfalume.
21Nafutali, vanu va nnukolo lwako vàvele muchi umbavala avêle hulu,
avavelêka vana vakatapêle namene.#49:21 Malove la apano lakávele mwandu. Ìnahululika kuva làvele na mana la “Àhumya malove lakatapâla.”
22Yusufu àvele muchi nzabibu ûpa vihepo pepi na chimbwimbwi,
na dinavi dyake dìnakulumuka mpaka kuhulula kuhavila na kuyomboka lingongo.
23Amongo vake, vatalamu va kuyela myumba, vánintunduwilila namene,
nkunnyelangila myumba na kunhavila kwa ukatili.
24Henga upinde wake únihwinga,
na makono lake nkutaywa dimongo,
kwa kuhululihwa na Nnungu wa Yakobo, Nnungu Avêle Na Dimongo Dyammalele,
Nnungu avêle muchi Nchunga, na Mwamba#49:24 Kuhaula kuva “mwamba wa Isilaeli,” ìnahululika kuva na mana ya Nnungu nni nlinzi wa Isilaeli au Nnungu nni wa kulisingila. wa Isilaeli.
25Nnungu wa atatako achiakuyangate,
Nnungu Avêle Na Dimongo Dyammalele#49:25 Apano pàlembwije “El-Shadai.” Mana la El-Shadai lola chitabu cha Ntandiliko 17:1. achiakubaliki,
uchinga upate balaka dya kuhaloka muha kulihunde
na balaka dya medi la vimbwimbwi vivêle pahi,
na balaka dya kuvelekana kwa vanu na anyama.
26Balaka dyang'une atatako nni ding'ulu namene kupunda adila dihalôka mmachinga la kala.#49:26 Apano àvele na mana kuva, balaka dya Yusufu dìmbekuva ding'ulu kupunda balaka dya akuluvake na nnung'une.
Na balaka anedyo dìnnyidilile Yusufu,
kwa kuva, nang'e njo nkulu wa akuluvake na nnung'une.
27Benjamini, vanu va nnukolo lwako vàvele muchi lihoha ayôha namene,
ulyamba àvalya anyama vavalumbête,
na lyulo àyavanya vitukutuku vyake vyavitwete litwala.”
28Anelo njo matawa kumi na mbili la Isilaeli. Na anelo njo malove lanatangwele atatawao pachim'baliki kila mwana kupapatana na namuna chachilembelewa.
Kuhwa kwanga Yakobo
29Bahi Isilaeli nkuvalaija vana vake wachidoni, “Nangu ngùvele pepi na kuhwa na kuhwena unaikala na anyakala vangu vahidîle kala. Nikàhwa, ngusike pachinu pavasikwije anakuluvangu, nnipanga livêle mmwelu mwa Efuloni Mhiti, 30aneko ku Makipela, pepi na ku Mamle, nchilambo cha ku Kanaani. Iblahimu ásumile lipanga na welu anewo kuhaloka kwa Efuloni, Mhiti, uchinga pààve pachinu pake pakusikila. 31Aneko njo kwasikwije Iblahimu na Sala n'jawe, na njo kwasikwije Isaka na Labeka n'jawe, na njo kuninsikile Leya. 32Welu anewo pamo na lipanga livêle mmwelu anewo, vísumwije kwa Vahiti.”
33Yakobo pamalidile kuveng'a vana vake malaijo, nkuuiha madodo lake nchinanda, nkuhila. Nkuhwena unaikala pamo na anyakala vake vahidîle kala.
Tans Gekies:
Ntandiliko 49: Chimakonde
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020 Pioneer Bible Translators