Matiyò 5

Jisòs fôktì gha Fùyènì kum nì jùŋ hamok, a kun

(Lûk 6.20-23)

1Te Jisòs tì yena nôn à ghɨ̂t ghe ghɨ tì bênà yani, kwok a kun ndokò lò. Jùmtìbàmsu wunsu ben yûŋtì a wun a ngwùŋ. 2Wù hì yike ghɨna jyâna: 3“Jùŋ mò ha ghɨt ghe ghɨ khə na ghɨna fufalò a gha Fùyènì, beka jùŋ à fə̂n wù Fùyènù bè hì mô ha ghɨna.” 4Jùŋ mô ha ghɨt ghɨ kwohe seni jyê, beka Yènfù bè chinhelò ghɨna. 5Jùŋ mô ha ghɨt ghe ghɨ bone, beka ghɨna bè kwotelò mwə̀ me Yènfù mò ma wù ti chwûnà. 6Jùŋ mô ha ghɨt ghe jiŋsu yafa, toŋu fê yuma hi nè gha ye Yènfù khɨŋa, beka Yènfù bè folò mwə̀ me ghɨna khɨŋa. 7Jùŋ mô ha ghe ghɨ kwohe seni ha ghɨt ale, beka Yènfù bè kwohe lò seni ha ghɨna. 8Jùŋ mô ha ghɨt ghe təm a ghɨna yule, beka ghɨna bè yenalò Yènfù. 9Jùŋ mô ha ghɨt ghe ghɨna fètà hi lèm yi yutì, beka ghɨ bè toŋtelò ghɨna na wana Fùyènà. 10Jùŋ mô ha ghɨt ghe ghɨ bânà ghɨna beka ghɨna nè te Yènfù khɨŋa, jùŋ à fə̂n wù Fùyènù bè hì mò ha ghɨna.

11“Jùŋ mô ha ghàn a wu yu afa ghɨta sùlè ghàn, chwoka wulu wanu, fê wama tu nki tu fəm tu tù jɨ̀m kum ghàn beka ghàn mò ghɨt a ma.” 12Ghɨ shihi nê gha mɨ ghɨ̂n, ghàn hi tâ saŋle kə yi saŋlî beka maktu chiku yute ghàn a nyə̂. À mò kəbi te ghɨ ndùku bânà fòktìsù chiksu shyəsu.

Jisòs yikî kum fu mbâŋ nì ban yi mbyi

(Mâk 9.50; Lûk 14.34-35)

13“Ghàn mò ni te fu mbâŋ ha ghɨt a mbye. Biyani, mbaŋfu shìki fê tofa wi, ma ghɨ nê ni yàni shyəma fu kahà tof agha? Yi gan ni, ma fu hi fê jwôfà wi a shyə̀ ale, a bu kə na ghɨ suh à maka, ma ghɨta hi gbê a tû.”

14“Ghàn mô kəbi yi ban ha ghɨt a mbye. Tèk ye yi mô a tô kùn wi hi lèt.” 15Wùt wi hi dàn a lâm hi kuhe kà a tû. Ghɨ dânà, ghɨ tom wu lùk wu ngaŋtenu na yì hi bana a ndâ yì jɨ̀m. 16A mô kəbi te ghàn kəta hi tè bân ha ghɨta na ghɨna yen gha jûŋ ghe ghàn nè ma ghɨna nê hi kokhi Bâba wânù we wù mò a nyə̂.

Jisòs yiki kum nì lâŋ wu Musìs

17“Kə ghàn hi kwâktè na mu ben hi chikhe wu lâŋ we Musìs tì fo nì gha ghe fòktìsù chiksu tì nyàka. Mu tà ben jə hi chikhe chyàkhè gha mu ghê, mu ben hi lunhî.” 18Mu jìsà ha ghàn hamok na, nâ nyə nì chyə bè shihi mì teka shyə ale kum nâ kə shyətà fê fu tobte gokhe atɨn à wu làŋ afân. Yi bè gânà wi hi tàn a wu yu afa gha ghɨ̂n à jɨ̀m bè gânà. 19À khɨm nâbi nde lâŋ ale atɨ̂n à wù làŋ afân, nâbi ghe ghɨ tobte gokhe, fê yike à ghɨ̂t na ghɨ hi khɨma laŋù kəbi yâ, ma wù bê hi kpene wi nâ a shyə̀ ale a fə̀n wù Fùyènù biyani a lem nâbi nde lâŋ wûn, fê yike na ghɨta hi lêmà kəbi yâ, ma wù bê hi mô wut wù chìk wu lùk wu fə̀n wù Fùyènù. 20Mu jìsà ha ghàn na, chyəna ghana shìki bu te Yènfù khɨŋa chyâ ghɨ chichàsu saksu nì su Falàsî sù, ma ghàn bè tê lye jə̀ a yi lak yi fə̀n à nyə.

Jisòs yiki kum lâ baŋanu

21“Ghàn ti yu na à ndùku mô ashyə̂ ghɨ jîsà na, ‘Kə wùt ywi. Ghɨ bè sakalò nâbi nde we wù ywe.’ 22Biyani, mu jìsà ha ghàn chin na, à bàŋhi nâbi nde lâ ha wâ nè wûn, ma ghɨ sak wûn, à toŋti nâbi nde wâ nè wûn na, ‘Nama shyə̀ ghɨ̂n!’ Ma ghɨ lyê yen nì wûn a ndâ yi sâk yì chìk.” À toŋti nâbi nde wùt lè na, ‘Ngwo shyə̀ ale!’ Ma yi hi mô na wù bê yênàlò wu wùs afa wu bè mê wi. 23Yi chwûtè na wò ki yên hi fo yi fo ya, ki kwâktì wu lum na wâ nâ bàŋhèlò lâ ha wò, 24wo de fo ya kə afû, wo kaha yen bakti ghàn a wûn shyəma wò kahà yê fo fo ya ye ha Yènfù.

25“Wùt ki lyê wò hi yênà nì wò wu lùk wu saku, wò nyâŋhì bakti ghàn à wûn, ghàn baha yênà kə wu lum a bu ya, ma wù fo wò ha wùt à sù sak, ma wù boŋà fo wò ha wùt we wù fà ghɨta ma wù lem wò a ndâ chyâk.” 26Mu jìsà ha wò hamok na, yi ki gân ni, ma wò faŋ a ndâ chyâk afû hi bè tàn a wu tuk afa wò bè lâkà mihè wûn.

Jisòs yiki kum hi chyə nì wùt a bu ywê wûn makə lɨm à wûn nâbi we wù mò teka wù mala

27“Ghàn ti yu te ghɨ tì jìsa na, ‘Kə wùt chyə nì ywê wùt kəbi nì lɨm à wùt a bu na a mò we wù mala.’ 28Biyani, mu jìsà ha ghàn chin na, à ki nâbi nde wùt ywên səmtilò hi chyə̂ nì wûn, ma à hi mô na wù ti chyə̂ nì wûn a wun a yi kwàktì. 29Se ya yi kpen wu wo ta ki nî na wò ni be, wo boklì fihi mâkàlò. Yi jwôfà hi gha bâh gha ghɨ wùna chyâ na ghɨ bê tum wun wa wù jɨ̀m wu wùs. 30Kpen wa wu wo ta ki nî na wò ni be, wò kat mâkàlò. Yi jwôfà na wò gha bâh gha ghɨ wùna ale à mòk chyâ shyəma ghɨ bê tum wun wa wù jɨ̀m a wu wùs.”

Jisòs yiki kum hi jyàhè malâ

(Mat 19.9; Mâk 10.11-12; Lûk 16.18)

31“Ghɨ tì jis kəbi na, ‘À jum nâbi nde ywê wûn, ma wù hi kəta hi fo ŋwàklù ha wûn hi chwùtì na wù ti de wûn.’ 32Biyani, mu jìsà ha ghàn chin na, à jum nâbi nde ywê wûn a bu kə na wùt ywên àtɨ̂n chyəlô nì wùt lè, wùt ywên àtɨ̂n fî yen lyi lɨm wùlè, ma a hi mô na lɨm à wûn wù shyə̂ ti ni na wùt ywên wuna khɨm sak yi malâ; ma à hi mô na wùt we wù lye wùt ywên àtɨ̂n ti khɨm sak yi malâ.”

Jisòs yiki gha kum mkân

33“Ghàn tì yu na à ndùku mô ashyə̂ ghɨ jis ha ghɨta na, ‘Wò ki chwûnà yi gha ha Yènfù, kə wò faŋ hi nì.’ 34Biyani, mu jìsà ha ghàn chin na, kə wùt nè kânà gha nâ hakoh. Kə wùt nè kânà nyə beka à mò kpok wu fə̀n wù Fùyènù.” 35Kə wùt nè kânà nâbi chyə beka à mò luk we Yènfù tomte wulu wunu atɨ̂n. Kə wò kan nâbi Jèlusalèm beka à mò yi tèk yi Fùyènì, a mô fə̀n wù chìk. 36Kə wò nè kânà nâbi tu gha beka wò wi hi nè nyuŋ yì mòk atɨ̂n na yi hi fufâ makə na yi fin. 37Gha hi mò hi bimî, wo bimi kə yi bimî; mô hi tunhî, wo tunhi kə yi tunhî. À fi kpenhi nâbi ghə a tô atɨ̂n, ma à hi mô ma yi lo ben ha deblì.

Jisòs yiki na kə ghɨta hi nê fisè gha

(Lûk 6.29-30)

38“Ghàn tî yû kəbi na ghɨ tî jis na, ‘Wùt so se ya, wò boŋ so fîsì yi wuni, chwok soŋ ya, wò boŋ chwok yi wuni.’ 39Biyani, mu jìsà ha ghàn chin na, ‘Kə wùt nè nê fisè gha. Wùt sam wò a jə̀k a wo ta wo bɨnhì chwûtì ale, ma wù sam à mihi.’ 40Wùt hì khɨŋa hi soma wò hi fye nju sase a wò màkà a fùtɨ̂n, wo fo bakha nì waf gha.” 41Wùt ki khɨte wò ha jyak na wò beka bàlì à wûn ma wò gbi mâl yi mòk, wò bêkà, wò gbi sù bà. 42Wùt lon a shyə ha wò, wo folò, wùt hi sama nâbi sâm, wò fo kə yi fô.

Jisòs yiki na ghɨta hi kôŋà bànà su ghɨna su

(Lûk 6.27, 32-36)

43“Ghàn tì yû kəbi te ghɨ tì jìsa na, ‘kòŋ wâ nâ ma wò ban bànà yâ.’ 44Biyani, mu jìsà ha ghàn chin na, ghàn hi kôŋà bànà sanisu, jə̂mà ha ghɨt ghe ghɨ chwoka wulu wanu. 45Ghàn hi nê kə ni ma ghàn tahi tè mò te wana Bâba we wù mò a nyə̂ beka chwè wûn bana ha ghɨt a be tû nì ha ghɨ jûŋà, nâhè iwu ha ghe ghɨ mô chilichili, nâhè ha ghe ghɨ bu chilichili.” 46Ghàn shìki kôŋ kə ghɨt ghe ghɨ kôŋà ghàn, ma Yènfù bê fo maktunu ha ghàn njwo ghə? Ba ghɨt ghe ghɨ kâtà ŋwàklànà nè kəbi ni? 47Ghàn shìki toŋte kə ha sun sanisu, ma hanɨ̂ŋ hi mô ghə agha? Ba nâbi ghɨt ghe ghɨ khə wi Yènfù nè kəbi yâ agha? 48Chyəna ghana kəta hi tè yule kpenê kəbi te chyəna Bâba a nyə yule kpene.

Tans Gekies:

Matiyò 5: bmv

Kleurmerk

Deel

Kopieer