Акълова 12

12 къаьм

1Насигьат баццалал илмо-лъайна бацца,

кантӀизи о̄йолъи йатӀеэшна аьбдал гей.

2КӀетӀа сукӀокьа БетӀергьан рази ахъца,

симо-шайтӀан гаьгьийал Гьолцо тамбигь бо̄с.

3Лъаькъейа сукӀола хоьхи хемуха йеᵸйагьаъас,

муъмилла̄ла хоьхиш хемуха йилӀа̄ йа̄хъца.

4Аьмал кӀетӀо гаьгьийо ахъо гьинила бетӀергьаллила къаьмкьа гулцас таж йахъца,

йаьгь-ламус гаьччо ахъо гьолцос лӀоьᵸва̄ кӀовакӀолцас унти бахъца.

5Муъмин-сукӀос къас-ният ритӀухълъилаъ муьхойо бахъца,

лъаькъейа̄ ишла̄ъ гьилла-макро бахъца.

6Лъаькъейа сукӀола сикӀас калам аьдамла̄ш гьеᵸ къе̄ мегьцас жо гей,

муъмилла̄ла сикӀа аьдамла хъосар бо̄с.

7Лъаькъейо сукӀо къаьм лӀийода̄ экца,

гьолцос иш болъос, муъмин-сукӀола билӀос бигъа билӀа̄ бахъца.

8Инсан кӀетӀо гейлӀо нисос гьолцос цӀодорлъи йегана,

йакӀиъ гьилла-макрона, хиянатлъина гаьгьийо халкъилаъ нуькучӀ ахъца.

9Гьинилзу жу лӀийода̄на эгана,

гьинизу жу лагълъилаъ икъеллолъи ахо гей,

баьбалаш лукӀмана гаьчӀел букъо аьмал бо̄вагъалгъа.

10Муъмин-сукӀол йикъеш гьинила саконелийал йаццас жо,

лъаькъейа сукӀос йакӀо цӀоцӀойо йахъца.

11Гьинис маьче богьдагулцалал оᵸх йоцӀлал оьлло баьба михъос,

йочӀчӀа̄ хиялла̄кьа оьмро богьцас сукӀо аᵸкъло гаьччо сукӀо гей.

12Лъаькъейа сукӀоба̄с хъала мосона гугьцас мисо гей,

муъмилла̄ла хоьхис хемух билӀа̄ мизаъ бахъца.

13Лъаькъейа сукӀол гьинила мунагьла гаьгьийа сикӀа къор гулца,

муъмин-сукӀо балагьлис тиса уьᵸхош.

14Ко̄да йикье-йаькье гуванна михъоваъцой,

сикӀала каламлиъкьа̄ михъос инсаллил боцӀи-ризкъи.

15Аьбдаллил гьинис гьино гицца йаᵸкъойцӀойо гейлӀона,

цӀодораб сукӀо бацола аᵸкълолахъа энекзи ахъца.

16Аьбдалли йаьже нисослаъзу йегалца жу рази ахъеэшлъи,

аᵸкъилли жу нукучӀ о̄вал жавабна нилӀаъас.

17РитӀухъабли нуьъли битӀараб нисос,

оᵸтӀолаги нуьъ оᵸтӀолас.

18Ургъизи ахъечӀе нисова йаьжи, балъай йаькьеллаъцой, лъукъзи о̄с,

аᵸкъилабла̄ла сикӀаъас дару гӯс.

19КӀетӀо йаьже нитоназу гьихлъос,

оᵸтӀола̄лъи гьоᵸс лагьзатлиъ йикъеш.

20Кешлъилал иᵸгьолдабаца̄ла гьиделзу гьилла-макро бо̄с,

маслаъатлъи йогьцала сукӀоба̄ла йакӀиъ рохел бахъца.

21Муъмин-сукӀокьа балагь мокъаъас,

лъаькъейа̄ сукӀоба балагьлиъ багъойба̄цӀна ба̄хъца.

22ЙоᵸтӀолацас сикӀо БетӀергьаллил йатӀаъас,

ритӀухъабла сукӀоба̄кьа Гьули рази ахъца.

23ЦӀодорабли гьинис илмо-лъай муцос,

аьбдаллила йакӀи аьнтлъи гиса чӀалӀеш.

24Йикье-йаькьецас ко̄ ханлъилаъ йахъца,

кӀаълъила лагълъилаъ кези бовагьца.

25Ургъеллихъа аьдамли къаьм йохолца,

кӀетӀа йаьжи гьули рази о̄с.

26Муъмин-сукӀо мадугьаллил гьино йегалца,

лъаькъейа сукӀоба̄ла аьмал-хасиятли жуво̄лзу къосси бовагьца.

27КӀаъаб сукӀо гьинила билъолис хо зиза̄ъас,

кӀаълъи гаьччал боцӀи-ризкъи ками бахъаъас.

28РитӀухълъилас гьино чӀаголъилас гьино гей,

чикейа гьиноли хеллиъ бейажеш.

Tans Gekies:

Акълова 12: KapPROLUK

Kleurmerk

Deel

Kopieer

Акълова 12

Gewilde Bybelverse vanaf
Акълова 12

Bybel:

бежкьалас миц

Weergawe: Анкълова, Лука - KapPROLUK