Dit sal ook nie goed gaan met die wingerdstok wanneer die tweede arend hom op 'n nuwe plek plant nie. Wanneer die oostewind begin waai, dan sal die wingerdstok heeltemal droog word. Dit sal droog word daar waar dit gegroei het.”
Ek het gehoor die Here sê vir my: “Jy moet asseblief vir die opstandige volk vra: ‘Weet julle wat dit beteken?’ Jy moet dit vir hulle verduidelik en jy moet sê: ‘Die koning van Babel het na Jerusalem gekom. Hy het die koning en die amptenare gevat en hy het hulle na hom toe geneem in Babel. En toe het hy iemand uit die koningshuis geneem. Die koning van Babel het 'n ooreenkoms met hom gemaak en hy het gesê die man moet belowe om hom, die koning van Babel, te dien. Die koning van Babel het die belangrike mense weggeneem uit die land sodat die nuwe koning van Jerusalem sal weet dat hy nie belangrik is nie en dat hy nie moet probeer om belangrik te wees nie. Hy moes doen wat hy en die koning van Babel in die ooreenkoms besluit het, dan kon hy koning in Jerusalem bly. Maar toe het die koning van Jerusalem opstandig geword teen die koning van Babel en hy het boodskappers na Egipte gestuur om perde en baie soldate te kry. Sal dit goed gaan met hom? Nee! Iemand wat so iets doen en wat 'n ooreenkoms breek, sal nie vry wegkom nie.’ ”
Die Here, Hy wat Here is, sê: “Hierdie nuwe koning van Jerusalem sal in Babel sterf. Dit is seker, so seker soos Ek lewe. Hy sal in Babel sterf, daar waar die koning is wat vir hom koning gemaak het. Hy het nie gedoen wat hy vir die koning van Babel belowe het nie. Hy het 'n ooreenkoms gemaak met die koning van Babel, maar hy het die ooreenkoms gebreek. Die koning van Babel sal grond gooi teen die muur van Jerusalem en hy sal 'n grondwal bou. Hy sal die stad van al die kante aanval sodat hy baie mense kan doodmaak, maar die farao sal nie sy baie soldate stuur om die koning van Jerusalem te kom help in die oorlog nie. Die koning van Jerusalem het nie gedoen wat hy belowe het nie, hy het die ooreenkoms gebreek. Hy het belowe en hy het die koning van Babel se hand geskud, maar toe doen hy al hierdie ander dinge. Daarom sal hy nie vry wegkom nie.”
Die Here, Hy wat Here is, sê: “Hy het nie gedoen wat hy vir My belowe het nie. Daarom sal Ek hom straf. Dit is seker, so seker soos Ek lewe. Hy het my verbond gebreek. Ek sal my vangnet oor hom gooi en Ek sal hom na Babel bring. Daar sal Ek hom straf omdat hy My verraai het. Die vyande sal al sy soldate doodmaak wat saam met hom vlug, en hulle sal die mense wat oorbly, na al die kante toe jaag. Julle sal weet dat Ek gepraat het, Ek, die Here.”
Die Here, Hy wat Here is, sê: “Ek sal self die boonste stukkie van die sederboom neem en Ek sal dit plant. Ek sal 'n klein takkie van sy boonste punt afbreek en Ek sal dit plant op 'n hoë en belangrike berg. Ek sal die takkie plant op die hoë berg van Israel, en die plant sal takke kry en vrugte dra. Dit sal 'n groot en belangrike sederboom word. Al die voëls sal onder die boom kom sit, alles wat vlieg, sal kom sit in die skaduwee van sy takke. Al die bome in die veld sal weet dat Ek die Here is wat groot bome klein maak en wat klein boompies groot maak. Hulle sal weet dat Ek die Here is wat groen bome droog laat word en wat droë bome weer groen laat word. Ek, die Here, het gepraat, en Ek sal dit doen.”
Bybeltoep
Bybel App vir Kinders
