Matiu 6
6
A asaer ana artabar
1“Mulor tumarang mulo sur gong mulo tol anumulo a wakak a titol na matan a tarai ka, sur lar oroi i pa lar atong aitna pas mulo. Ning mulo toli larne, bel ta arlou anumulo tana Tamamulo ning i kes saot na langit. 2Pa ur tabar a kapan a taraila, gong u warwara nigo sur a tarai lar oroi u. A tarai ning bel la artabar ana momol a balanla, la sira warwara nigo ana anunla a artabar ting na rumai lotula pa ting na ngasla otleng, sur a tarai lar atong aitna pas la ono. Gong mulo toli arlar onla. A atong momoli ta mulo, ning a tarai la aitna pas la, i ot ning anunla a kidol a arlou. 3Ning ur tabar a kapan a taraila, gong a kair a kum i tasman asaning a sot a kum i toli, 4sur ur artabar kumna ka. Pa e Tamam ning i oroi asaning u tol kumnani, ir saran a arlou tam.
A asaer ana nunung
(Lk 11:2-4)
5“Ning mulor nunung, gong mulo arlar ana tena asasongola. La mang kol sur lar tur pa lar nunung ting na rumai lotu, pa ting na pukpuknala ning a tarai la hanan taum tingia, sur a tarai lar oroi la pa lar atong aitna pas la. A atong momoli ta mulo, ning a tarai la aitna pas la, i ot ning anunla a kidol a arlou. 6Ika u, ning ur nunung, ur kas ting na num a rumai pa ur tagar alar pas u, pa ur nunung tetek e Tamam ning bel tik i oroi i. Pa e Tamam ning i oroi asaning u tol kumnani, ir saran anuma arlou.
7“Ning mulor nunung, gong mulo abereng wara oros ka, arlar ana nunung ana taraila ning bel la tasman e God. La nuki mang dir longor la anasa la atong a galis a warwara. 8Gong mulo arlar onla, anasa a Tamamulo ka tasman tar asa rop ning mulo kapan suri, ning belot mulo nunung.
9“Mulor nunung larne,
‘Tamamila saot na langit,
i wakak ning dir hanrawai a risam.
10I wakak ning anuma matanitu ir hanot.
I wakak ning dir mur a nuknukim te na rakrakan hanua,
arlar onoi ning di sira muri saot na langit.
11A pukakiar ne ur tabar mila ana utna na hangan amilai.
12Ur kepsen anumila na toltol laulaula,
larning mila otleng milar nuk duman sen anunla na toltol laulaula tetek mila.
13Gong u ben mila uting na arlam.
Ur alaun mila kusun a Tena Laulau.’#6:13 Dingla na tena tastasmai ana Buk Tabu la nuki mang dingla na warwarala otleng i kes te na ves ne. I larne: Anasa anumi ka a matanitu pa rakrakai pa matatar, onone pa lamur pa bel ir rarop. Amen
14“Ning mulor nuk duman sen na toltol laulaula ning a tarai la toli tetek mulo, e Tamamulo, ning i kes saot na langit, ir kepsen anumulo na toltol laulaula otleng. 15Ika, ning bel mulo nuk duman sen na toltol laulaula, ning a tarai la tol tari tetek mulo, e Tamamulo otleng bel ir kepsen anumulo na toltol laulaula.
A asaer ana tamai
16“Ning mulor tamai sur mulor nunung, gong mulo tai arlar ana tena asasongola, anasa la tai na bal maris sur a tarai lar oroi i mang la tamai. A atong momoli ta mulo, ning a tarai la aitna pas la, i ot ning anunla a kidol a arlou. 17Ning ur tamai, ur kom a pukulum, pa ur damus a patarim, 18sur gong a tarai la tasmani mang u tamai. E Tamam ka, ning bel tik i oroi i, ir tasmani. Pa e Tamam ning i oroi asaning u tol kumnani, ir saran anuma arlou.
Na ututnala saot na langit
(Lk 12:33-34)
19“Gong mulo suah taum a gongonla te lapiu, ning a koropos pa ros diar alaulau sen la ka, pa na tena kinkinaula lar kas pa lar kinau i. 20Mulor suah taum a ututnala saot na langit, ning a koropos pa ros bel diar alaulau i, pa na tena kinkinaula otleng bel lar kinau lar pasi. 21Anasa ting na hanua ning anuma gongonla kaning ia, anuma lalaun otleng kaning ia.
A lam ana palaondala
(Lk 11:34-36)
22“Naur a matandala dia arlar ana lam ana palaondala. Ning naur a matam dia wakak, a palaom rop ir bukus ana talapor. 23Ika, ning naur a matam dia laulau, a palaom rop ir bukus ana mormorom. Ning anuma talapor i mormorom ka, a mormorom ning ir itna kol!
Gong mulo nuknuk kol sur ta utna
(Lk 16:13; 12:22-31)
24“Bel tik ir titol lar pas tetek ir naur a ningnigo. Ir nget ning a halindiau, pa ir mang sur ning a halindiau, ir katnan ning, pa takai ir saran a kaba hina kusuni. Bel mulor titol lar pas tetek e God pa tetek a mani otleng.
25“I maining, a atongi ta mulo mang, gong mulo nuknuk kol ana numulo a lalaun mang asaning mulor ieni, pa sa mulor gangi. Pa gong mulo nuknuk kol ana palaomulo otleng mang asa mulor mermer ono. A lalaun i itna tana utna na hangan, gepi? Pa a palaondi otleng i itna tana kaenla, gepi? 26Mulor oroi a manila. Bel la oman tar ta utna, pa bel la sol tar al utna, pa bel la susuah taum ana ta rumai, ika e Tamamulo ning i kes saot na langit, i sira tabar la. Pa mulo, mulo itna kol tanla. 27Esi ta mulo ning i nuknuk kol ana nuna lalaun, ir tolsot sur ir tugus barah siklik anuna lalaun? Belal.
28“Sur asaning mulo nuknuk kol sur a kaenla? Mulor oroi a wakak a purpurla misa na bual, mang la gomo mangmangasa. Bel la sira titol pa bel la sira tol kaen. 29Ika a atongi ta mulo, e King Solomon ot ning anuna mermer rop i tai wakak, ika bel i tai wakak arlar ana purpurla ning. 30E God i amermer a ulai sakas na bual ana wakak a purpurinla, ning anone i tapalas, pa latu dir tun seni ting na iah. Ning i toli larning ana ulai, i momol kol mang ir amermer mulo otleng. Anumulo a tortorot i natarna kol. 31Gong mulo nuknuk kol pa mulo atongi mang, ‘Asa dalar ieni?’, o ‘Asa dalar gangi?’, o ‘Asa ning dalar mermer ono?’ 32Anasa a taraila ning bel la tasman e God la rakrakai sur a ututnala rop ning, ika e Tamamulo ning i kes saot na langit i tasmani mang mulo kapan sur a ututnala rop ning. 33Mulor tai nigo sur anuna matanitu pa anuna tostos a toltol, pa ir tabar mulo otleng ana ututnala rop ne. 34Pa gong mulo nuknuk kol sur a pukakiar latu, anasa latu ir nuknuk ot suri. A mamahatla ona taktakai a pukakiar i to pasi ot a pukakiar ning.
Tans Gekies:
Matiu 6: lbb
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2019, Wycliffe Bible Translators, Inc. All rights reserved.
