Jesu koty rewarà kõ 18
18
Korĩtu taa pè ekoi remẽwarà
1Aja paire Pauru ojisyry oo Atena taa pe wyi ky'y. Korĩtu taa kyty oo. 2A'e pè Juteu mõ ekoi, Akira eu erà pè mã'ẽ. Põtu taa wãnerà tè a'e. Itaria yvy wãnerà. Noiko pukuive Korĩtu taa pè, werekwarà reve. Erekwarà rerà pè, Pirisira eu. Jypy remẽ Romã wãnà rõvijã Karautiu, “Juteu kõ tojisyry pirujẽ ike Romã taa pe wyi ikenẽ”, e'i maekwerà. Ajawyi tè Akira kõ Korĩtu taa pè oo ojimoena ky'y. A'e kõ resa Pauru oo ãmẽ. 3Ipyri kõ opyta rã'ĩ. Tetã ropa reinõgarà kõ a'e kõ. Pauru okuwa teve tetã ropa reinõa. Ajawyi oposiko eeve kõ.
4Jimoava 'arà upi upi, oo Janejare'e ayvu rè jimo'ea retã wyry pè ipi. A'e pè Jesu rewarà omojenu ipi. Ojiayvuvaja vaja teve. Ajaate Juteu kõ “aje” e'i ijayvu renu. Juteu rõwã mãe kõ ve “aje” e'i enu.
5Ajaate Sirasi kõ ovãema Masetonia yvy pe wyi, Timoteu reve. Aja paire Pauru noposikoi tetã ropa reinõa rè ky'y. Jesu rekoa kõrijõ tè omojenu erokwa ky'y.
– Janejare'e Remimuurerà tè Janerõvijã ywete rõmõ Jesu, e'i imojenu Juteu kõ pè erokwa.
6Ajamã'ẽ ãmõgwerà ojikõ'õ Pauru rè. Ajawyi oporegeta teiteteay ee kupa. Ajawyi kee e'i ijupe kõ:
– Napepotai sire'e eayvu renu remẽ, pevote peiko karuarua rã peitytà. Ije rõwã a'evookatà poroereko. Ajawyi age'e paire Juteu rõwã mãe kõ motekokuwa tè aatà ky'y, e'i ijupe kõ.
Aepo e'i remẽ ojiyrumõpã mõpã iku'ikwerà reity. 7Ajaire ojisyry oo. Tisiujusitu retã mè oo ojimoena. Juteu rõwã Tisiujusitu. Janejare'e omoe'e mã'ẽ teve a'e. A'e retã Janejare'e ayvu rè jimo'ea retã pyri'ĩje'ẽ. 8Kiripu eu Janejare'e ayvu rè jimo'ea retã rõvijã pè. A'e Jesu rè ojirovija oõvijã ywete rõmõ mã'ẽ teve, opyriwarà kõ revejẽ. Ãmõ, mõa'ãrõwã Korĩtu taa wãnà kõ “aje” e'i Janejare'e ayvu pè, Pauru omovyvy remẽ. Ojimojãmorĩoka teve Jesu koty rewarà kõ rõmõ ãmẽ kupa ky'y.
9Ãmẽ ãmõ okery pè Pauru opouvai mijẽ. Kee e'i Janerõvijã ywete ijupe ikery pè:
– Nekyje tite ne! Nepi eayvu mojenua wyi ne! e'i ijupe. Teremojenu jẽ ikõ eayvu neiko nẽ. 10Nerevejẽ aiko ipi. Ava nanemoai'ãi, aã taa pè oiko mõa'ãrõwã ekoty rewarà kõ rewarà mõ, e'i ijupe ikery pè.
11Pauru oiko puku sa'u rã'ĩ a'e taa rupi iko. Werywete mõrijõ kwaray ekoi a'e pè. Janejare'e ayvu rè poromo'e rã'ĩ a'e rupi iko.
12Ajaire Kariu eu erà pè mã'ẽ ojimojõvijã Akaja yvy pè. Kovenatu rõmõ ekoi. A'evo remẽ Juteu kõ ojikõ'õ mijẽ Pauru rè. Ojimoaty ojimokasi ee kupa. Ajaate opyy tesõ eraa tekoua kuwapa rena kyty kupa ky'y. 13A'e pè kee e'i kovenatu pè kupa:
– Aã kwaima'e ãmõ rupi tè poromo'e iko Janejare'e moe'ea rè, ãwisõ janerõvijã kõ ayvu rupi tijaiko e'ã ky'y, e'i tite kupa.
14Ãmẽ Pauru oporegetatà remẽ, kovenatu Kariu jẽ wayvuenone'a javo Juteu kõ pè. Kee e'i ijupe kõ:
– Juteu kõ, kee a'età pejẽ. Ãwĩ nivoi ekoi remẽ tè kuwa ajapyaka peayvu rè! a'e pejẽ. 15Ajamã'ẽ ayvu e'e rewarà mõ kõrijõ tè aepo pejẽ ipe eupe. Penãmõi kõ ayvukwerà kõrijõ tè noerovijai kupa remẽ nimanyvoi. “Aepo e'i mãe kõ rè tajapyaka katu”, na'ei ajupa. Ajawyi pejẽ tè tapekuwa, pevote ãwĩvoa! e'i ijupe kõ.
16Ajawyi:
– Pejisyry awi ike wyi! e'i kõrijõ ijupe kõ.
Ameve ojisyry oo ãmẽ kupa ky'y. 17Ojisyry kupa remẽ, Kereku kõ opyy Janejare'e ayvu rè jimo'ea retã jarà, Soteni eu erà pè mã'ẽ. A'e onõpã nõpã tekoua kuwapa retã rovake kupa. Ajamã'ẽ a'evo ekoi kupa remẽ, kovenatu Kariu manyvo ne'i.
Ãtiokia taa kyty ojivytà remẽwarà
18Ãmẽ Pauru opyta puku rã'ĩ Korĩtu taa pè, Jesu koty rewarà kõ pyri. Aja paire:
– Ajivytà rã'ĩ aa ky'y, e'i ijupe kõ.
Aepo e'i paire, oo jãemijarà kyty. Sẽkereja eu a'e taa pè. A'e pè opo nawiu pupe oo Sirija yvy kyty. Pirisira ve oo upi, omẽnà Akira reve. Ajamã'ẽ nooive remeve, ojiapiraeta rã'ĩ Pauru, Juteu kõ tomã'ẽ ee. A'evo Janejare'e pè awyje ojiayvume'ẽma mã'ẽ mojikuwaparà rõmõ ekoi.#P.Moirõ. 6.18
19Ajaire Epesu taa pè ovãe kupa. A'e pè Pirisira kõ opyta awyje ky'y, omẽnà reve. Ãmẽ Pauru oo rã'ĩ oike Janejare'e ayvu rè jimo'ea retã mõ pupe Juteu kõ mo'e. A'e kõ:
20– Epyta puku rã'ĩ ike orepyri, e'i epe Pauru pè mijã.
Ajamã'ẽ Pauru:
– Ãnĩ, e'i. 21Ajamã'ẽ Janejare'e opota remẽ, ajivy tarà mijẽ ajo ike kyty kãramõ, e'i oo.
Aepo e'i paire oo nawiu rupi ky'y, Epesu taa pe wyi. 22Ajaire Sesareja taa pè oo ovãe ky'y. A'e pe wyi oo jẽ Jerusarẽ taa kyty ky'y. [Pee rupi tè.] A'e pè ovãe remẽ, oo rã'ĩ Jesu koty rewarà kõ resa. A'e pe wyi oo jẽ, ajaate wena pè ovãe, Ãtiokia taa pè. A'e Sirija yvy pewarà.
PAURU OO MIJẼ MOAPY 'ARÀ TESÕ REMẼWARÀ
(18.23–21.17)
23Pauru oiko puku sa'u rã'ĩ wena pè, Ãtiokia taa pè. Aja paire oo mijẽ. Karasia yvy rupi oo Jesu koty rewarà kõ resa. Ãmõ, Pirija yvy rupi oo. Taa taa kõ rupi oo remẽ, Jesu koty rewarà kõ omoryoka imokasi kõ.
Aporu oo Janejare'e ayvu mojenuarà rõmõ remẽwarà
24Ãmẽ jakatu oiko Juteu mõ, Aporu eu erà pè mã'ẽ. A'e kwaima'e Aresãtiria taa wasu pè isaky maekwerà tè. A'e oo Epesu taa kyty ojimoena. Mira katuay wete a'e. Oporegeta katuay wete mã'ẽ teve a'e. Janejare'e ayvu okuwa katu mã'ẽ teve. 25Janerõvijã ywete tekoua rè ojimotekokuwa teve. Ajawyi opota katu Jesu rekoa omojenu jane kõ pè imotekokuwa kõ ipi. Ivo katuay Jesu rekoa rè omotekokuwa jane kõ ipi. Ajamã'ẽ Juwão poromojãmorĩ maekwerà rè kõrijõ tè otekokuwa. Nokuwaive Jesu koty rewarà kõ py'a pupe Janejare'e 'Ãg oike mã'ẽ rewarà. 26Ãmẽ ojimokasi tesõ oporegeta Janejare'e ayvu rè jimo'ea retã wyry pè ipi. A'e pè poromo'e upa remẽ, Pirisira wenu upa, omẽnà reve, Akira reve. A'e kõ weraa Aporu wetã gyty imotekokuwavay Janejare'e rekoa rè ky'y.
27-28Ãmẽ aja paire Aporu opota Akaja yvy kyty oo Janejare'e ayvu mojenu ky'y.#18.27-28 Kereku kõ yvy tè Akaja. Ãmẽ Epesu wãnà kõ Jesu koty rewarà kõ opãtavõ ijopa rè. Kareta okusiwa imonooka upi, a'e yvy wãnà kõ pè kupa, a'e Jesu koty rewarà kõ pè. Kee e'i ikusiwa imonooka kupa:
– Ãwĩ ikatu too opyta pepyri, e'i imonooka kupa.
Oo Aporu ãmẽ Epesu taa kyty. Jesu koty rewarà kõ wesa, Janejare'e remireko katu kõ. Omokasi kõ ywete. A'e kõ ojirokyje tite Jesu nopotai mãe kõ wyi mijã. Nokuwai ijayvuvaja kupa. Ajamã'ẽ Aporu uu remẽ, oporegeta kasi Juteu kõ Jesu nopotai mãe kõ reve. Janejare'e ayvu jikusiwarerà rupi omotekokuwa kõ, ãwisõ ijayvu rupi, “Aje ywete, Janejare'e Remimuurerà tè Jesu Janerõvijã ywete rõmõ”, te'i kupa.
Ovake kõ aepo e'i. A'e rupi omokasiay wete Jesu koty rewarà kõ a'e pè. Aja paire Aporu oo jẽ Korĩtu taa kyty.
Tans Gekies:
Jesu koty rewarà kõ 18: oymNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2013, Wycliffe Bible Translators, Inc. All rights reserved.
