Luukeꞌ 24

Jiisuu' Boo'keta Daa'aru'na'

(Mat 28:1-10; Mak 16:1-8; Jon 20:1-10)

1Teka Saandei-na'mung tero maata teing maniku' berou' te' kuvi dako'doma, duuni numpompo'ning maamu-antavau'ning nkavai, Jiisuu'koong mono sisi'aava'naang. 2Ee'noko teinge kapang kuvi dako'doma karanaang-eta korimpario' ooau'. 3Teka tenang kuung tumparira Ovoring Jiisuu'koong mono ooaava'. 4Tenang noru' tee-koo paapaa'ariri otoroko bakei ta'nina' kenaanka naninka teing-koo due' donkonuretu' mononopa' sisisiisie nopa'aresi. 5Ee'noko teketa avoreaara teing te' doonko kansi'koo kinkinau'nung, ee'noko tenaankai aa'paaretu', “Aming-koo dii'ke tee domantoo' anka boo'nuka biikanoo'ka besi'erimang? 6Tee a' otoa'; tero daa'aring; 7Napo' noru'eriai tee' Kaaleli' otori naururu'na', tee tee Naning-naumpo' Paning-etaing tavo'aavaing orananka biikaang bireng-koo ee'noko aa'barata'koo taakavaako beenang doong deemparako napo' daa'aravai.” (Luk 9:22; 18:31,33)

8Ee'noko teinge tenang noru'au' tee bakaang kara.

9Ee'noko kuvi dako'doma-ita osi duparira teinge teing nanai'keta narung nauaaru' tee aung kapoo'nanka, ee'noko napo' teing nii'ning ookara barevare-nupoong nari'. 10Ainge manii'ke dooreaaru' teing kara okovuri nkanuka, ainge aa'noko Meeri' Ma'dala-nani, ee'noko Joana ee'noko Meeri' teni Jeemisi bauko, ee'noko nii'ning maniku' napo' nari'. 11Teka tee aung karananka teinge nauaaru'ning minkunaa boturopa-pina' noru'au'. Ee'noko teinge masika'antavaaria' teing. 12Teka Piita i'amparara kuvi-aape kua'paru', ee'noko kinkinura daanto kuung oovuma baarong teka oovuu' boo'nuka dai'koong baka otoko. Ee'noko teketa osi duparu' paapaa'ari tee-koo kapoo' nkoaru'nung-koo.

Jiisuu'ke Emeasi-navung-koo Kenaankara Kune'uretu'na'

(Mak 16:12-13)

13Teketa te'mung ee'na'mung Jiisuu' bakaning barevare-nupoong-koo kenaanka nanuretu' nii'namono-koo miring Emeasi aa'noo' Jerusalema'keta kenaanka aua makosinoo' nanu'koo. 14-15Ee'noko tee kapoo'nanka nkoaru'ning-koo nari' minkuarema nanureko Jiisuu' baka due' pora nari' nanaako'. 16Teka beekaang duta dootai tavuretu' tee tasi'koo. 17Ee'noko teie aa'puretu' tenaanka, “Aung minkunaa aremurii' dee'ke orarunsiraresi minkuerema naniremaang?” Ee'noko te' dantavaretu' tenaanka orarunsi-po'naanka-pina' oro'paresi. 18Tenang narunge tenaanka-koo miring Kiliopasi'ke aa'puu' tee, “Arekee' minkuemaang? Da' ee Jerusalema'ke aing-koo doompeto otoitaa' taarakia' teing-koo kapoo' nkoarieening-koo?”

19Ee'noko teie aa'puretu' tenaanka, “Aming kapoo'nanka?” Ee'noko tenaankai tee nauvurema aa'puretu', “Jiisuu' Nasareti'nung bakaang minkunaa, tee nakaronara karoma nko-koo purinto'po'nung Kumponing-koo ee'noko ookara nantoong-koo uro'kanoo'ke. 20Tee ee'nung niikaninge piristi'nanka-koo ovontunge ee'noko tare-nupoong aa'ninge tavo'au'nung kavumani-aape simpe'ai orara tampaara dupisi'aava'naang, ee'noko aa'barata'koo taakavau'. 21Teka nii'ke ee' noru'ampiko'nung tee tee ee'nung nii' Isireeli-nupoong napo' donkomuriaing. Ee', teketa tee aung ookara nkoarieenoo'keta e'mung tee beenang doong deemparing. 22Aa'noing nii'ninge maniku'ke nii'kooninge ta'ning-antamaaring. Tane'ke tero berorai'nange kuvi dako'doma ee'noko teinge ooaavaruing bakaang mono; 23Ee'noko teinge toroarira aa'paing, ‘Nii'ke koosinunka noone-pina' ooarampiring, aa'puresinaanka, “Tee domamparing.” ’ 24Teketa barevare-nupoong-koo nii'ning te' kuvi dako'doma-aape beroing, ee'noko tee' nari' ooai maniku'ke minkuaina', teka tee ooaava' teinge.”

25Ee'noko teie tenaanka aa'puretu', “Bakei kanu'ka ee'noko domange masika'anta-koo ana'kai tee kapoo'nanka Kumponing-etaing nakaro-nupoonge tero minkuau'nanka-koo. 26Arekee', tee' ee teing aing baikenanka kune'uarupeu' teie domang-anta-koo Pako'pari'nii'ke aarenuu'naang bakaang nerang-koo kuung?” 27Ee'noko ookutunairu Daari Meekunge tee baka-koo minkuvui otoinairu tasi'antavuretu' Moosesi bakanarong-eta tutumpura doonko teing nakaro-nupoong biikanaronge basivuma nauvuretu'.

28Tee' minkuarima osinamono-koo due' porou' tenaanka bereko'namono-koo. Ee'noko basiarima tankinuu'naang-pina' nkoarako teka tenaankai datevuretu' tee. 29Aa'puretu', “Nee' ninka o'noreai, ai' aung muung-aapevuing, doong pankarong oparing.” Tee tee nari' tenaanka ninka berou' teke nari' otoroo'naang.

30Tenang taamantomai otoroitaa' teka berete'nu nkavura biraankevura ee'noko pisi'ura tenaanka avuretu'. 31Ee'noko beekaang duta tenang daate'arara tasi'puretu' tee, ee'noko tee teke paa'aru' tenaanka-koo dutakanoo'keta. 32Tenaanka bee'ka karorema aa'paretu', “Maiko', nee'koo tee domang-koo nta' betu'antamuresing taunge nee' karamurema Daari Meekung-kooning kara nee'koo sira'puma!”

33Ee'noko tenaanka tenang tee batei-koo i'ampareta Jerusalema'aape toroaretu' ee'noko bereta teing nanai'keta narung kune'aareta nari' oosiariri otoroko napo' nii'ning ninka nari'. 34Ee'noko teinge tenaanka aa'paaretu', “Ovoring bakei masika' daa'aring. Saimoni'koo oro'pari.” 35Ee'noko tenaankai napo' teing nauaaretu' teing kapoo' tenaanka-koo taunge nkoaru'ning, ee'noko tenaanka-koo tasi'paru'na' berete' pisi'uu'noo'ke.

Jiisuu' Bakaning-koo Oro'paru'na' Tautauvurima

(Mat 28:16-20; Mak 16:14-18; Jon 20:19-23)

36Tee tee tenaankai tee' minkuvuresi otoreko tee Jiisuu' baka te' teing-koo meu' donkonura aa'puu', “Tampara, ee aing! Mooa tee dii'koo otoaing!” 37Teka teing domang ta'ninaara avoreau' tanuaang ooau'nung-pina' noru'aama. 38Ee'noko teie aa'puru' teing, “Nko dii' aming-koo avoro'ke tairurimang? Aming-koo noru' keekoo'dariri? 39Oomeriai bireng ee'noko kau' tasi'meri, ning tee ning. Io' komerira oomeriai, ai' tanuaang tee aa'ning bio' ee'noko koo' otoaung tee' ning oomerimatomana'.”

40Ee'noko tee' minkuvurira nau-antavuru' bakaang bireng ee'noko kau' niirie too'pau'nairu. 41Ee'noko tee' nari' dotue maanto'urira noone-pina' noru'ai masika'antavaava' papaaravaririo' aa'puru' teie teing, “Kapoo' ee nai-koo makosi anke otomang?” 42Ee'noko teinge tavi'noo' ua'nii'noo' avau', davainta nari'. 43Ee'noko teie nkavura tee teinge ooaio' maa'uu'.

44Teketa tenang aa'puru' teing teie, “Aing teing nkaning kara dii' naurampiru'ning tenang dii' ninka nari' o'noi aa'pama: Ookara tee kapoo'nanka Daari Meekunge ning-koong tero minkuvuu'nung koonto' dupearavaining aa'noo'ke Moosesi bakaang boto, nakaro-nupoong biikaang kara, ee'noko ookara kenananka otoinoo'ke.”

45-47Tenang tee' minkuvura biikaang onou daate'antavuru' noru'aava'naang tee Daari Meekung-koong karananka aa'purima, “Teroita ee' daariari otomaung, tee Domang-anta Kumponinge Pako'pari'uu'nung˜ pora baike kune'ura beenang doong deemparako boo'keta daa'aravai, ee'noko napo' tee domang bere'anta ee'noko tonta'anta oraka' nko-ita daankiaavaing bakaang miring-koo ookara kansi'koo-nupoong-koo Jerusalema'keta tutumpaara. 48Ee'noko ninge aa'dampimang, ninge tenaare dupeanko ooverimaing deentaririo' dii' ee'ning teing daanki nkonuka miru'dampimang aing kapoo'nanka sira'periaining. 49Ee'noko ee aing, ninge tee Tanuaang Meekung Mma'ke maraka-antavuu'nung botoampaing dii'koo dau oto'koo. Teka anke osi pankamono-koo otoriaing dii' bera purinto'ke paning-etainge maanto'duriainoo'ke basi.”

Jiisuu' Deto Paning-aape Koinuu'na'

(Mak 16:19-20; Nka 1:9-12)

50Teketa temono-ita bakaning barevare-nupoonge Jiisuu' siompai berou' bera Beetani-navuntu'koo, ee'noko bakaang bireng toonura biraankevuriko' teing bakaning barevare-nupoong. 51Ee'noko biraankevurima tee deto i'amparara paning-aape tenkenuu' teing-ankoita. 52Ee'noko teinge pankaing-antavaara tee toroariru' Jerusalema'aape aa'na' doturotuarima. 53Ee'noko be'nu'ai Kumponing daangampaama ee'noko biraankeaama otoroko' pava dootuu'nava pankava-koo.

Tans Gekies:

Luukeꞌ 24: nasNTpo

Kleurmerk

Deel

Kopieer