Luukeꞌ 18

Teni Naaro Ereana Bauko Ee'noko Tee Kara-simpe'

1Ee'noko Jiisuu'ke nauvuru'nung kara dikito' baito-koo date'pariri doong kante kunsiarimatoo'naang kontevoroa'. 2Aa'puu'nung, “Nii'namono-koo naning narung kara-simpe' otoko'nung, aa'nung Kumponing-koo avoroaruko', nantoong noru'uriaruko'. 3Ee'noko temono-koo nani manikuma naaro otoko', tee-anko doong kante poma aa'puko'nani, ‘Donkomei pakumeai ning naninge turamumaatoinani.’ 4Tutuna'namu'pi-koo taaravuaruko'nung, teka dama'ke baka karoma aa'puu', 5‘Ai, ning aa' Kumponing-koo amoromparukoo' ee'noko nantoong noru'aramparukoo', nka makosi anie naaroi ereanamumaung-koo donkompampaing pore'antamumaato'neenga tee' nari' poi otoma.’”

6Teketa Ovoringe aa'puu', “Tasi'peri noru'eriai tee aung naning kara-simpe' orara nkoaru'na'. 7Ee'noko Kumponinge ee aarumo koonto' kansi'koo donkompevuriaroo'naang bakaning miru'nii'nanka tee-koo bokiaamaing doong ee'noko muung nantoonge oraka' nkoaarimaung-koo? Ai' pankaroong tamung taaravuri otopeu'? 8Ninge ee' naurampimang, teie tee namu'ke aarumo koonto' donkompevuriaing. Teka bane tee'koo, ning Tee Naning-naumpo' Paning-etaing napo' kansi'koo mora arekee', nantoong mme' baitoariri otoroko ooarampaing e?”

Boto Keperuu'navitu-koong Ee'noko Tee Taakisi Nkanuka-koong Kunsiaretu'na'

9Napo' nii'nung narung kara dikito' Jiisuu'ke nauvuru'nung aunge too'puri teing nantoong bii'ka koonto'nuka tamparimaing ookara oovuning doonko ooaarima, 10“Kenaanka naninka nanuretu'nung dootuu'nava pankava-koo kunsiaree'naang, narung Boto Keperuu'navitu-koong ee'noko nii'nung taakisi nkanuka-koong. 11Tee Boto Keperuu'navitu-koong donkonui kunsiarama aa'puu', ‘Kumponing, ninge tampara tantamang da'koo, ai' ning tee nii'ning nantoong-pina' deea' aa'ning oko'okonuka, tosi ninka bakiaa' nkonuka, nampeesi orarinuka, napo' bakei aung-pina' taakisi nkanuka-koong-pina' deea'. 12Ning tee kemu'kai unkumomaramaung uiki kante tampa' kunsimaraa'naang. Kapoo'koo kompamaing-koo Kumponing bakaning avonkoo'.’

13“Teka tee nii'nung isipo' donkonura, domang putu'arama, deto ankamparava' paning-aape aa'puu', ‘Kumponing ee, piaamera tonta'meai ning naning oreng nkoamaung.’ 14Tee aung naning naurampimang Kumponing bakaang duta-koo koonto' deempari duparu'nung, tee nii'nung deea'. Ai' ookara nantoong bii'ka detoarimaing Kumponinge doonko batarivuriaing, ee'noko baa tee naning baka depetoaramaung Kumponinge deto sipuaing.”

Jiisuu'ke Toire' Oki'nareka' Biraankevuru'na'

(Mat 19:13-15; Mak 10:13-16)

15Enang teing nantoonge toire' nerakau'nanka ninka Jiisuu'anko po'antavaariko' teie kompurira biraankevurii'naang. Ee'noko tenang teinge bakaning barevare-nupoonge ooaarira poteaaru' teing. 16Teka Jiisuu'ke toire' bokuvurima bakaning barevare-nupoong aa'puru'nung, “Toire' taura'perereriko poroai ning-anko, para'ereria', ai' Kumponing bakaang muu' nantoong amurii' okovuriaing. 17Masika' naurampimang ninge dii', baa tee naning Kumponing bakaang muu' tooto'ke bauta' nkavui aroo'aramana' kompuarura tee bakei tumparavauka'nung te' Kumponing bakaang muu'koo.”

Tee Naning Pankaing Kavo Mmau'po'nung Jiisuu' Ninka Minkuaretu'nung

(Mat 19:16-30; Mak 10:17-31)

18Teketa tee naning pankainge nia'uu'nung Jiisuu', aa'puma, “Da' nau-anta tampara, ninge aming nkoamira domaang oparavaung okomupeu'?” 19Ee'noko Jiisuu'ke maku'uma aa'puu' tee, “Arekee'koo dake ning tampara tammemang? Nii'nara naning tampara otoa'. Kumponing narung tampara. 20Dake Moosesi bakaang boto noru'ei otong, ee' minkuvumaung,

‘Nampeesi orarieauka', naning dupisi'eauka', bakiaa' nkoveauka', daang-koo tuutunampeauka', daumararing deto noru'eresi pakuereaing.’” (Toro 20:12-16)

21Ee'noko teie aa'puu', “Aing ookara ninge tanatavantu'ning ning oki'na'noo'keta.” 22Ee'noko tenang Jiisuu'ke taaravura aa'puu' tee, “Da' narung kapoo'koo makosia'. Baaveveaing ookara kapoo'nanka dakaning, ee'noko mooni' nkavera tankaampeai teing-koo ata'oi'nuka-koo. Tee' nkovera paning-koong kavonanka oto'deruaing. Ee'noko ning siomei poai.”

23Teka teie tee' taaravura orarunsiaru' tee, ai' tee aung tee kavo mmau'po'nung. 24Jiisuu'ke tenkenuko oovuma aa'puu'nung, “Bakei pore' masikung teing-koo kavo mmau'po'nupoong-koo muu' Kumponing bakaang-koo tung-koo. 25Kaameli'navoro' bamaru'koong busie tumparavarupeu'na' bakei naning kavonanka-po'nung dau basinoo' makotua' Kumponing bakaang muu'koo tung-koo.”

26Teinge taaravau'ninge aa'pau', “Arekee'? Kavo mmau'po'nupoong domaang moo'ariarupeu'ning deeko' enang baa domaang moo'aravaing?” 27Teka teie aa'puu', “Kapoo' nantoonge nko-koo makosiaavaung tee, teie Kumponinge nko-koo makosi.”

28Ee'noko Piitai aa'puu', “Aung ee, teka nii'ke siparampiru'nung niikaning osinanka-po' da' siontampima.” 29Ee'noko Jiisuu'ke aa'puru' teing, “Masika' naurampimang ninge dii', baa tee naning aing aa'ning sipuu'nung: pava, ba'aang, ba'marang, nii'noo' baurukaa' Kumponing bakaang muu' bereng-anta-koo, napo' tee temurii' mmau' oto'evuaing emu'naroong-koo kansi'koo otoitaa'; 30ee'noko dama'naroong-koo napo' domaang oparavaung okovuainge.”

Jiisuu'ke Dama'ke Boo'antavaavaing Beemu'pina' Sira'puu'noo'

(Mat 20:17-19; Mak 10:32-34)

31-32Ee'noko bakaning poka'urira nanai'keta kenaanka aa'puru' teing, “Aing ee, Jerusalema'aape deto merii'naang ee'noko ookutunung kapoo'nanka ning-koo, Tee Naning-naumpo' Paning-etaing-koo, nakaro-nupoonge teroita minkumaama daariako'ning teke dupearaa'naang, aa'nora: Ju'koong ovontunge si'maavaing Ju'deeaing-anko, ee'noko teka teinge akapeu'maama maimaia'na' nkomaavaing tutupee'maama. 33Teinge ning mura'maara dupisi'maavaing, teketa beenang doong deemparako napo' daa'maravaing.” 34Teka teinge tasi'paava' teing aing kapoo'nanka. Aung minkunaa tee teing-koo baku'aru'nung, noru'ke nkavaava' teing kapoo' minkuvuu'ning.

Tee Naning Kaputu' Jerikoo'nung

(Mat 20:29-34; Mak 10:46-52)

35Teketa Jiisuu' Jerusalema'aape nari' bema Jerikoo'navuntu'koo due'aru'nung teke kaputu', eenta bauko, taung miiringe ba'nampari otoko. 36Ee'noko teie kaputu'ke nantoong karika' tee-koo miiringe tankinaako taaravuru'nung ee'noko nia'kuma aa'puu', “Aung naampa aming-koo?” 37Teinge aa'pau', “Jiisuu', Nasareti'nung tankinumaang.” 38Teketa bokuma aa'puu', “Jiisuu', Deevita' bakanaving-koong, piaameai ning!” 39Ee'noko teinge ureai nanaako'ninge orokoau' tee aa'paama, “Dooroontaravai!”

Teka tee baru' aa'na' bokuu' aa'puma, “Ovoring Deevita' bakanaving-koong, piaameai ning!”

40Ee'noko Jiisuu' nasinura po'anta-koo botoaru' tee-anko. Ee'noko tenang due' poio' Jiisuu'ke nia'uu' tee, 41“Arekee' nkorama'naang piaromaang da', ninge?” Ee'noko teie aa'puu', “Ovoring ee, duta ning bantang-antameaing.” 42Ee'noko Jiisuu'ke aa'puu' tee, “Banteaing, dakaang baitoi tamparu'kiing.” 43Ee'noko namu'ke bantora tee Jiisuu' siompuu' Kumponing daangampuma. Ee'noko ookara nantoonge teie ooaara Kumponing daangampau'.

Tans Gekies:

Luukeꞌ 18: nasNTpo

Kleurmerk

Deel

Kopieer