Madiu 7
7
Yesu dewa ana ailaga fa'ina gilukahihi.
Luke 6:37-42
1 #
Lo 2:1; Ye 4:11-12 Kadu'e, keke tovehimeya amine yo tobohiya yana dewa unalagani be Yaubada kadu o keke ginalaga. 2Au gavaiya'amine tobohiya uhawavekoyoyena, medede amine Yaubada ginahawavekoyoye. Kadu gavaiya'amine kaliva unaveledi, medede amine Yaubada ginavele.
3Gavadi-yo ai ulana vaita koyona kabi'ona amine tobohiya matane u'ita'itani, tu ai-mo'ena vaita koyona lakahina amine tauni mataniya keke udanuwenuweni? 4Ka'i ai-mo'ena o mataniya gidadauda, keke-mo'a afaiweya tobohiya unagaheni unagayo, Tobohiyaku, ai ulana mataniya ganavaihegena. 5O meya luhei. Nagona ai-mo'ena tauni mataniya unavaihegena, higa ya dewa koyo-mo'ena unahegena, ada au afaiweya una'ita-hagihagiyena be ai ulana tobohiya matane unavaihegena, higa yana dewa koyona fa'ina unakivetuvetununa.
6Tu Yaubada yana gaitoma keke kaliva koyodiyao yadi huluva vaita galu'eta amine wanaveledi. Ka'i badi agaidiya wanalukahihiyena, au hinahagaviladi be hinakivekoyomi. Ka'i odo'odo yamumu-mo'ena bawe agaidiya wanahegena, au agediya hinavagagologolohina. Meda anafaiweya ka'i Yaubada bonana kaliva koyodiyao agaidiya wanahawavemogatalena, au hinahawave'iyohoyohoyena.
Yesu ve'o'ola toyogina fa'ina gilukahihi.
Luke 11:9-13
7 #
Mk 11:24; Yo 14:13-14 Kadu'e, wanave'ove'o'ola be Yaubada ginavelemi. Wanalelele be wananuhagana. Wanakikifisifisi'a be Yaubada wana ginayauna. 8#Ye 1:5; 1Yn 5:14-15Wa'ita, gaveyao hive'ove'o'ola medema Yaubada nimane hinavaina, kadu gaveyao hilelele medema hinanuhagana, ada gaveyao hikikifisifisi'a medema agaidiya Yaubada wana ginayauna. 9Omi kaliva wanogali! Ka'i natumiyao hida'ela hidagayo, Kamaku, ma'i a'a, ka'i kabala wadaveledi? Keke. 10O ka'i hidave'o'ola hidagayo, Kamaku, tamo igana gada'ana, ka'i oloto wadaveledi? Keke. 11#Ye 1:17Omi tokoyona tu nuwakabubu yamumuna natumiyao waveleveledi. Atu ka'i Tamada lobameya wanave'ove'o'olena amine, Bana'e nuwakabubu yamumu-mo'ena ginavelevelemi. 12#Lu 6:31; Lo 13:8-10Gavaiya'amine nuwanuwami kaliva omi hinahuluvimi, au medede amine kadu badi wanahuluvidi. Mosese yana vehimeya ana nuwanuwa kadu Yaubada bonana ana to'awatalatalaina yadi vehawala au hidede amine.
Yesu eda luhei fa'ina gilukahihi.
Luke 13:22-24
13Kadu'e, eda'awana kabi'ona againe wanaluku, fa'ina abaga koyona ana eda'awana lalafana kadu ana eda lakahina, ada kaliva moya'aidi edai-nadi againe hinanauna. 14#Yo 10:9; Af 14:22Tu yawai-vagata ana eda'awana au kabi'ona kadu eda vitana, ada keke kaliva moya'aidi edai-nadi hidanuhagani.
Yesu kaliva yadi dewa ai guwana againe giluvefosena.
Luke 6:43-45
15 #
Af 20:29; 2Fi 2:1 Kadu'e, wana'itave'avimi be badi Yaubada bonana ana to'awatalatalaina ve'alololodiyao wanahalamanedi. Kebuladiya sifi amidiya hihuluva higa vaita Yaubada yana kaliva tu kaliva-mo'edi yadi nuwanuwa vaita galu'eta manimaninidiyao adi egana wolivi amine. 16#Ye 3:12Au guwadi againe wanahalamanedi. Kelefi keke ai-kawowo againe kadakoluni, kadu fiki keke aboda againe kadakoluni. 17Ka'i ai yamumuna, au guwana yamumuna. Ka'i ai koyona, au guwana koyona. 18Ai yamumuna keke koyona ginaveguweni, kadu ai koyona keke yamumuna ginaveguweni. 19#Yo 15:6Hai ai guwana keke yamumuna, medema hinatalana be ai'ala'alata againe hinahegena. 20Ada au to'awatalatalaina ve'alololodiyao, guwadi againe wanahalamanedi.
Tobona'abi gagana lobameya hinaluku.
Luke 13:24-27
21 #
Lu 6:46; Ye 1:22,25 Tu keke wananuwanuwa vaita kaliva gaveyao moya'aidi aku egana hiyakayakahina higagayo, Kaiwabu, Kaiwabu, ma Yaubada yana yo'ogaga agaidiya hinaluku, keke. Au gaveyao Kamaku lobameya bonana hi'abi'abina, badi'iyaogaga Yaubada yana yo'o agaidiya hinaluku. 22Aimo tova mulina vedewayauga ana toveya moya'aidi Iya agaikuya hinagahe hinagayo, Kaiwabu, Kaiwabu, a eganeya Yaubada bonana alumamalena, kadu a eganeya yafune awavidi, kadu a eganeya aituha fifiwalana moya'aina afifaisewana. 23#2Ti 2:19Hidedemi badi hinagahe tu Iya ganagahedi ganagayo, Omi keke gadahalamanemi. Omi tokoyona, au wana.
Yesu manuwa ana to'aiyogona adi'iselu fa'idiya gilukahihi.
Luke 6:47-49
24Ada au gaveyao hida bonaku hinogalina be hi'abi'abina, medema vaita kaliva nuwanuwahuyana amine. Bana kalivai-nadi yana manuwa kuga againe gikivemididina. 25Muliya wehi gilugaga gufa gihobu bolimana lakahina gimadu be manuwa gitafitafina. Tu manuwa kuga againe gikivemididina fa'ina, keke gidabe'u. 26Tu gaveyao hida bonaku hinogalina tu keke hida'abi'abini, medema vaita kaliva kwavakwavana amine. Bana kalivai-nadi yana manuwa makameya giyogona, keke ogola gida'aiyala. 27Muliya wehi gilugaga gufa gihobu bolimana lakahina gimadu be manuwa gitafitafina, au manuwa gibe'u ada au gi'ayaweli-'owona.
28 #
Lu 4:32; Yo 7:46 Au hidedemi Yesu gigahe ada gilukahihi gihavaina, yo'o yana vehawala fa'ina hiyaulowoga. 29Keke yadi buki-vehimeya ana tovehawala amine gidavehawala, au vaita tovehimeya velemo'ena amine givehavehawala, yana vehawala ase'asedi gi'onana.
Tans Gekies:
Madiu 7: viv
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2003, Wycliffe Bible Translators, Inc. All rights reserved.