Gewilde Bybelverse vanaf O Kandɔɔ 1

Deel

Mí Hala dimi aa: «N cɔwnun vanacieo a velan naa, mò vel naa, mì vanaciee kon va vana bɛndoo suvaa co o mɛnndan nin-nda, yovaa co coocoo-a, visia cieeninnda, visia co o lɛŋnden coo-a kpow a visia pɔmbɔa kela lɛŋ-nda coo.» Mí Hala cɔaw vanndacieea a velan ndɔɔ, a velan ndɔ ndu pilaa o cɔw nda ni, vanapɔnɔɔ a vanalanɔɔ o cɔw ni.

Mó dɔaw nda duaa, mó dimul nda aa: «La náŋ ipúlú, la kuí, la pei lɛŋnden ca mì la va vanaa bɛndua lecoo. La tosá masalen suvaa co o mɛnndan nin-nda, yovaa co coocoo-a a visia pɔmbɔa kela lɛŋ-nda kpow coo.»

O kandɔɔ tasoo, mí Hala cɔaw halataalaa a lɛŋnden.

Lɛŋnden le va tulumasaa, ɲɛ-ɲɛ ve lecoo le. Ɲumma bɛndu-bɛnduan ma va matoalaa kpingbi o mɛnndan coo. Kɔl Hala-o va o pɛɛngaa o mɛmma man coo.

Mí Hala dimi aa: «Ɲɔ́ɔ́ téngá!» Mí ɲɔɔ tèngà.

Mí Hala mɛɛndan ɲɛm o cɔw-von kpow, mó ca maa n naŋ taw. Mí ɲɔɔ yɔŋnun icɔllo a ipalaa. Paale ŋɔmpumndɔlen le yɔŋnun nden ni.

Mí Hala ca maa ɲɛ-tengaa naŋ. O kon, mó sɛi ɲɛ-tengaa a ɲumndan.

Mí Hala dimul nda vɛlɛ aa: «I yɔngu niaa bil oo bil koam kullon o lɛŋnden coo kpow a yɔm oo yɔm koamaa, haliko mi la va baloo dɔwnɔnndo a kon.

Mó ke ɲɛ-tengaa diolan aa ipala, ɲumndan aa icɔl. Mí ɲɔɔ yɔŋnun icɔllo a ipalaa. Paale taselen le yɔŋnun nden ni.

Mí Hala dimi vɛlɛ aa: «Ɲɛ pandonndo fulá tɛ́ngɛ̀-tɛ́ngɛ̀ le mɛnndan sɛiyo tɛɛn kundala bɛndulan tan tiɔn.»

I yɔngu vɛlɛ niaa visia co o lɛŋnden coo-a, yowva coocoo, visia pɔmbɔa kela lɛŋ-nda a ɲaa yoomaa kpow, bil kiyɛiyo a yɔmii kiyɛiye, haliko mi la dɔwnun balo a kon.» Mí ɲɔɔ tosan lende.

Mí Hala dimi aa: «Ɲɛm pangelon fulá o halataala le paalen sɛiyo a ɲumndan, mì ɲɛm pangelen mun cɔm telennda vɔsio, palɛi a vɔsilan.

Mó dimi aa: «Yondoo fulá mò kumbu kɔngɔ vesɛiyo. Billo fulá a cuulu ndɔɔ mɛɛ súúla ndɔlan la co yɛ, yɔmnde bɛɛ fulá a kɔmnde ndalen mɛɛ súúla ndalan la co yɛ o lɛŋnden kpow coo.» Mí ɲɔɔ tosan lende.

Mí Hala soli ɲɛ pandonndo, mó handu ndu pɛɛngulan mɛmma co lebɛngu-an a mɛmma co lecoo-an tɛɛn. Mí ɲɔɔ tosan lende.

Mí yondo kiyɛiyo fula o lɛŋnden coo, mí billo vul súúla yɛ́-yɛ́lan a cuulu ndɔɔ, mí yɔmnde bɛɛ vul súúla yɛ́-yɛ́lan a kɔmnde ndalen. Mí ɲɛ-ɲɛ vul a kɔmnde ndɔlen. Mí Hala ca maa o naŋ.

Mí Hala toosiaa ɲɛm pangelen bɛndon mún miun: mí pangele hiow vaa o bɔɔ-o, o co paalen-ndo va ɲɔɔ teengiaa ipala o ceendo coo, mí pangele pɔmbɔɔ, o co paangei-yo va diondɔɔ icɔl. Mó toosiaa vɛlɛ loeon.

Mí Hala dimi aa: «Mɛmma co o lɛŋnden coo-an mà diinún nɛɛ pilɛ mì kɔngɔ vesɛiyo lo baa pilɔɔ.» Mí ɲɔɔ tosan lende. Mí Hala ke kɔngɔ vesɛi fula-o diolan aa lɛŋnden, mó ke mɛmma diinun man nɛɛ pilɛ-an diolan aa mɛmma ihɛllan. Mí Hala ca maa ɲɔɔ naŋ.

Mí Hala dɔaw nda duaa, mó dimi aa: «La naŋ ipúlú, la kuí taw, mì la pɛ cá o mɛmma ihɛllan nin a o peelan nin. Yowva bɛɛ kuí taw o lɛŋnden coo.»

Mí Hala dimi aa: «Ɲaa yoomaa súúlan kpow a fulá o lɛŋnden coo: cɔlua cieeninnda, visia pɔmbɔa kela lɛŋ-nda a visia yondoa súúlan kpow.» Mí ɲɔɔ tosan lende.

Mí Hala dimi aa: «Ɲaa yoomaa fulá taw-taw o mɛnndan nin, yowva fulá coocoo taw mà va kelaa.»

Mí Hala toosiaa visia yondoa mɛɛ nda co a súúlan yɛ, mó toosiaa cɔlua cieeninnda mɛɛ nda co a súúlan yɛ, mó toosiaa visia pɔmbɔa kela lɛŋ-nda mɛɛ nda co a súúlan yɛ. Mó ca maa a naŋ.