Mewari 2010-2017 NLCI; Non-Drama (NT)

Mewari 2010-2017 NLCI; Drama (NT)

ईंका केड़े पुवितर आत्मा ईसू ने हुन्ना कांकड़ में लेगी, ताँके सेतान का हाताऊँ वींकी जाँच-परक किदी जा सके। चाळीस रात-दन भुको रिया केड़े ईसू ने जोरकी भूक लागी। तो वींकी परक करबावाळो वींका भड़े आयो अन क्यो, “यद्याँ थूँ परमेसर को पूत हे तो अणा भाटा ने के, ईं रोट्याँ बण जावे।”
ईसू क्यो, “सास्तर में ओ लिक्यो हे के,
“‘मनक बेस रोट्याऊँईस ने जीवे हे
पण हरेक बचनऊँ जीं परमेसर का मुण्डाऊँ निकळे हे, जीवतो रेई।’”
पछे सेतान वींने पुवितर नगर यरूसलेम में लेग्यो। वटे मन्दर का हाराऊँ ऊँचा गुम्बद पे ऊबो किदो। पछे सेतान वणीऊँ क्यो, “यद्याँ थूँ परमेसर को पूत हे तो अटेऊँ रेटे कुद जा, काँके सास्तर में ओ लिक्यो हे,
“‘वीं थारी हार-हमाळ का वाते हरग-दुताँ ने खन्दाई
अन वीं थने हातु-हात तोक लेई
ताँके थाँरा पगाँ के भाटा की ने लाग जावे।’”
ईसू वींने क्यो, “पण सास्तर यो भी केवे हे के,
“‘थूँ आपणाँ परबू परमेसर की परक मती कर।’”
ईंका केड़े सेतान ईसू ने हाराऊँ ऊँचा मंगरा पे लेग्यो अन वाँने दनियाँ का हाराई राज अन मानता बताई। सेतान वींने क्यो, “ईं हारई चिजाँ थने दी देवूँ यद्याँ थूँ मारा पगा में पड़न मने माने।”
पछे ईसू वींने क्यो, “हे सेतान, छेटी वेजा। सास्तर यो केवे हे,
“‘थूँ आपणाँ परबू परमेसर ने मान
अन बेस वाँकीईस सेवा-चाकरी कर।’”
पछे सेतान ईसू ने छोड़न भागग्यो अन हरग-दुत आन वाँकी सेवा-चाकरी करबा लागा।


जद्याँ ईसू हुण्यो के, यहुन्नो पकड़ाग्यो हे, तो वो गलील में परदेस परोग्यो। पण वो नासरत नगर में ने रियो अन जान कफरनूम नगर में, ज्यो जबलुन अन नप्ताली हाकम का देस में गलील समन्द का अड़े-भड़े हो, वटे रेवा लागो। यो ईं वाते व्यो, ताँके परमेसर का आड़ीऊँ बोलबावाळा यसाया ज्यो क्यो हो वो पूरो वेवे के,
“जबलुन अन नप्ताली का देस
समन्द का गेला पे, यरदन नंदी का आतमणी दसा में,
ज्यो यहूदी ने हे वाँका देस गलील में।
ज्यो लोग अंदारा में जीरिया हा
वाँकाणी एक मोटो ऊजासो देक्यो
अन ज्यो मोत की दरप में जीरिया हा,
वाँका पे भाग फाट्या को उजितो चमके।”
वीं टेमऊँ ईसू हव हमच्यार की सरुआत कर दिदी के, “पापऊँ मन फेरो, काँके हरग को राज आबावाळो हे।”


जद्याँ ईसू गलील का समन्द का नके वेन जारियो हा। वटे वणा दो हगा भई समोन ज्यो पतरस केवातो हो अन वींका भई अन्दरियास ने समन्द में आपणाँ जाळ नाकता तका देक्या। काँके वीं माछळी पकड़बावाला हा। ईसू वाँने क्यो, “मारा पाच्छे आवो, मूँ थाँने हिकाऊँ के, लोगाँ का वाते माछळी पकड़बा के वजे मनकाँने परमेसर का राज में कस्यान लावे हे।” वीं तरत आपणाँ जाळ वटेई छोड़न ईसू का लारे वेग्या।
पछे वी वटेऊँ आगे चाल पड़्या अन वणा देक्यो के, जबदी को छोरो याकूब अन वींको भई यहुन्नो आपणाँ बाप जबदी का हाते नाव में बेट्यो तको आपणी जाळाँ ने हळजारिया हा। ईसू वाँने भी बलाया। अन वीं तरत नाव अन आपणाँ बापू जब्दी ने वटेई छोड़न वींका पाच्छे वेग्यो।


ईसू हाराई गलील देस में यहुदया का परातना घर में हरग का राज को हव हमच्यार को उपदेस देतो अन तरे-तरे का रोगा ने हव करतो तको फरबा लागो। हाराई सिरिया देस में वाँको हव हमच्यार फेलग्यो। ईं वाते लोग अस्या हाराई मनकाँ ने ज्यो तरे-तरे की मांदकीऊँ माँदा हा, जणामें हुगळी-आत्मा, जाँने मरगी का जोला आता हा, अन जीं लकवा का माँदा हाँ, वाँने ईसू का नके लाया अन ईसू वाँने हव किदा। ईं वाते गलील देस, दस नगराँ को गामाँ की जगाँ जिंने दिकापुलिस केता हा, यरूसलेम, यहूदियाँ अन यरदन नंदी की पेले पाल्डे का मनकाँ की मोटी-मोटी टोळी वाँका नके आबा लागी।

Luister na मत्ती 4