Nugunu - 2017 CABTAL (NT) Non-Drama

Nugunu - 2017 CABTAL (NT) Drama

Naá goɛ́na gá bitúu bitúu bá batɔ bɛ́ɛbɔ, Yésusu go bólɛga naá ogɔndɔ mmoɛná, gɛ́hɛ́ go lukumene, behúúní bɛ́hɛ́ bá báá mo báyɛkɛ́ná. Kɔ́ɔ a gɔ́lɔmɔ́ dogálɔ, go ɛ́da go bó húunenye a amɔ́:
«Besé makɔ́nɔ́ na batɔ báaba bá lɔ́mɔ́ na odɛ́má yá gosóga, Bufuŋe bá mmoɛná bó lɛ́ gáábɔ́.
Besé makɔ́nɔ́ na bɛpɔ́ɔ́ bá batɔ, bá ŋga dáŋábá cí yɛ́ɛyɛ Asaŋa a mbaá dáná.
Besé makɔ́nɔ́ na batɔ báaba bá baŋamɔ́, Asaŋa a ŋga bó bobío odɛ́má.
Besé makɔ́nɔ́ na batɔ báaba bɔ́ ɔ́bɔnɔmɔ́ ncaná na inyúidi go masɛnɛ má botɛ́nɛ́ɛ, Asaŋa a ŋga bó fáá bá hóogio.
Besé makɔ́nɔ́ na batɔ báaba bá gɔ́lɔnɔmɔ́ basɔ́gɔ́ɔ mahana, Asaŋa a ŋga bó gɔ́lɔ́ tɔ́nɔ mahana.
Besé makɔ́nɔ́ na batɔ bá ɛdɛ́má immúmpúu, bá ŋgɛ ɛ́ná Asaŋa. Besé makɔ́nɔ́ na batɔ báaba bá yɔgɔnɔmɔ́ goŋaá buumbénú bó bɛ́ɛmba naá boayá bábɔ́, bá ŋga bó dɔ́ŋɔ́nɔ́ɔ baaná bá Asaŋa.
Besé makɔ́nɔ́ na batɔ báaba basɔ́gɔ́ɔ batɔ bá bó séesenyemú go masɛnɛ má botɛ́nɛ́ɛ, Bufuŋe bá mmoɛná bó lɛ́ gáábɔ́.
Besé makɔ́nɔ́ na bɛɛnyɔ́ɔ báaba batɔ bá nyó sɛgamɔ́, bá nyó séesenyemú, bá gɔnɔ nyó básómbanɛna mbɔ́dɔ iŋkimée go ufíno yámɛ. Békelényéemú nɔnɔ no gunde no aŋgana, bɛsoɛná bɛ́nyɔ́ bɛ́ lɛ́ makɔ́nɔ́nɔ́ɔ naá mmoɛná. Mammana, nɔ́ɔnɔ gɔ́ɔ bá mbaá séésényée mbúsí sá Asaŋa sɛ́ɛsɛ sɛ́ mbaá dóáná gɛ́nyɔ́.»


«No lɛ́ masɛgɛ má cí. Kanɛ́ masɛgɛ má amɔ́ má sola, na akɛ́ bá gaá ná gɔnɔ́ má simidie o? Hɔ́ɔlɔ́ má ɛ́yá boóma bá dugúnú, bá má dɛ́a go nnyaáŋgadɛ́ɛ, batɔ bɛ́ ɛ́da go má bínde.»
«No lɛ́ gise gá batɔ. Tɛ́sɔnɔ fóágáalú naá ogɔndɔ mmoɛná, ɛ dɛ báá ɔsɛ́gɔ́ɔlú. Bá dɛ nébígényée lámba go go yɛ ága naá iséní gadɛ́ɛ, kanɛ́ bá yɛ dálanamɔ́ naá gɛdálɛ́ná gá yɛ́, ɛ seemenye mɔtɔ uŋkimée mɔ́ɔnyɔ a lɔ́mɔ́ naá nnyaŋá. Caŋa táŋɛ́ mmue, bonyáa nɔnɔ naá oŋgíso yá batɔ. Bó gaá ŋaáa goŋaá bɛ́ ɛ́nana bɛnɔ́gɔ́ bɛ́nyɔ́ bá meŋiigíe, bɛ́ ɛ́da go gúmenye Isée bɛnyɔ́ mɔ́ɔnyɔ naá mmoɛná.»

«No béeniŋenye no amɔ́ ndɔ́mɔ́ úléelú go go nco go úlie gicele gá Mɔ́sɛsɛ na gohúunenye gá mbúsí sá Asaŋa o? Akɛ́ɛ, ndɛ́ kanɛ go úle go go nco mó úlie, mmbuú úlé go go nco mó hóogio. Mammana ŋgaá nyó oyáná daŋɛ́daŋɛ caá, otóotoɛ yá mmoɛná na cí go dómba, akɛ́ ɛnandáda, akɛ́ hɛómaŋkóma há hímmue, bá dɛ ŋgá mó úlie naá kálata ya gicele gó ɛ́da húme aŋa buimée bó ŋgaá bóhóógío. A dúme godɔ́ɔdɔ, mɔ́ɔnyɔ a ŋgaá dómbá ɛndɔndɔ́sɛnɔ táŋɛ́ hímmue, a húunenye batɔ go ŋa nɔ́ɔ caŋa mmue, bendiemi a ŋga bɛ́ɛ́mbá hɛómaŋkóma naá Bufuŋe bá mmoɛná. Kanɛ́ mɔ́ɔnyɔ a ŋgɔɔ́ ɔyɔ́ɔ aŋa bɛlɔsɛnɔ bɛ́ɛbɛ bɛ́ oyamɔ́, a bɛ́ húunenye go batɔ, bendiemi bá ŋga mo gɔ́lɔ́ gɛantáa naá Bufuŋe bá mmoɛná. Ŋgaá nyó oyáná caá, ɛ́na mbɔ́dɔ yɛnyɔ́ ya go gumbene bɛlɔsɛnɔ ɛ dɛ dómbá yɛ́ɛyɛ ya muloodio má bicele na Befelisiéŋe, no do ŋgá bóso go bɛa undukí naá Bufuŋe bá mmoɛná.»


«No mbɔ ɔ́bɔ́ bá bóó oyáná batɔ bá cóá goŋaá: “O do óná mɔtɔ; mɔ́ɔnyɔ o ónamɔ́ mɔtɔ, bɛ́ ɛ́da nɛhɛ́ naá nɛgála”. Kɔ́ɔ yɔmɔ́ɔ ŋgaá nyó oyáná caá: uŋkimée mɔ́ɔnyɔ ɔ ɔ́bɔmɔ́ mpímí na ondimóní, a ŋgɛ ɛ́dá básáaga naá nɛgála; uŋkimée mɔ́ɔnyɔ a dɔ́ŋɛnɔmɔ́ ondimóní a amɔ́ “nnyama”, a ŋgɛ ɛ́dá básáaga naá Nɛgála Nɛgɔ́nɔ́. Mɔ́ɔnyɔ a ŋgaá dɔ́ŋɛ́nɔ́ ondimóní a amɔ́: “uŋgegeegú”, bendiemi a háanana goŋaá bá mo nɔɔ naá gɛbɔlɔ́gɔdɔ gá íyuke há kanɛ go fúenene. Kanɛ́ go amɔ́ go ɛ́da fadɛgɛna go go nco fáa Asaŋa gɛbáágá gáhɔ naá gɛdálɛ́ná, o báá bééníŋínyée hɔ́ɔ goŋaá tɛ́ɔbɛnɔ a bɛanana gɛsɛnɛ nahɔ, síé o báá dɛ́ɛ́ná gɛbáágá gáhɔ naá boayá bá gɛdálɛ́ná, o manɛ go ɛ́da bégedie na tɛ́ɔbɛnɔ, o lo go nco gunde kanɛ́ o fáa gɛbáágá gáhɔ. Gɛcamɛna gɛ́ɛgɛ o gá lɔ́mɔ́ go pɛ́ na mɔtɔ bahɔ ba gɛsɛnɛ, bégedíemú fɛaŋɔ nɛhɛ́, go goŋaá a dɛ ɛ́dá nahɔ naá usúmbí bɛsɛnɛ, usúmbí bɛsɛnɛ a go íŋene go gisimbi gɛ́ go nɔɔ naá ncíbo ya gɛaŋɔ́. Mammana, ŋgaá go oyáná caá, o do ná húme naá ncíbo ya gɛaŋɔ́ yɛ́ɛyɔ, aáŋa o gá lɛ́ o do soáa ufínó yáhɔ yɔ́ɔyɔ akɛ́ faláŋa ummue ɛ dɛ síéné.


«No mbɔ ɔ́bɔ́ bá bóó oyáná batɔ bá cóá goŋaá: “O do ŋaáa gɛdáŋa”. Kanɛ́ yɔmɔ́ɔ ŋgaá nyó oyáná caá: mɔ́ɔnyɔ a núunidemú okɔ́dɔ ba sɔ́gɔ́ɔ na mbééníŋínyí ya ŋaá a bɛ́dɛmɛna nɛhɛ́, a báa go ŋa gɛdáŋa nɛhɛ́ naá odɛ́má yɛ́hɛ́.
«Aáŋa niíso náhɔ ná ombɔ́gɔ onɔ́mɛ nɛ́ go dómana goŋaá o lɔgɔ, nɛ́ báláamɔ́ o nɛ́ umbe halaháláa; bó lɛ́ bese go busío báhɔ goŋaá gɛnamá gáhɔ gímmue gɛ́ yíme, gó dómba goŋaá bá nɔɔ nnyɔ́dɔ yahɔ iŋkimée naá gɛbɔlɔ́gɔdɔ gá íyuke há kanɛ go fúenene. Aáŋa ombɔ́gɔ yáhɔ yá onɔ́mɛ yó go dómana goŋaá o lɔgɔ, yó sómbáamɔ́ o yó umbe halaháláa; bó lɛ́ bese go busío báhɔ goŋaá gɛnamá gáhɔ gímmue gɛ́ yíme, gó dómba goŋaá nnyɔ́dɔ yahɔ iŋkimée yɛ ɛ́da naá gɛbɔlɔ́gɔdɔ gá íyuke há kanɛ go fúenene.


«No mbɔ ɔ́bɔ́ tɔ́nɔ bá bóó oyáná batɔ bá cóá goŋaá: Mɔ́ɔnyɔ i inyemú ogɛ́ a háanana go mo íŋene kálata yɛ́ɛyɛ ɛ dúfenyemú goŋaá nɛbáná nábɔ́ nɛ́ á maná. Kanɛ́ yɔmɔ́ɔ ŋgaá nyó oyáná caá: “Mɔtɔ mɔ́ɔnyɔ i inyemú ogɛ́, aáŋa caá goŋaá a á hémé hanyɔ́, a á mo dómá goŋaá a ŋanana gɛdáŋa; tɔ́nɔ, mɔtɔ mɔ́ɔnyɔ a giŋemú okɔ́dɔ mɔ́ɔnyɔ bá mo inyemú, a á ŋaáa gɛdáŋa”.

«No mbɔ ɔ́bɔ́ gɔnɔ́ bá bóó oyáná batɔ bá cóá goŋaá: “O do hóámá o do lɔbɛ́nɔ́ kanɛ go hóogio mbálɛɛná yahɔ; kanɛ́ hóógío bɔ́ɔbɔ o mbaá dáná naá mbálɛɛná yahɔ naá oŋgíso yá Daadáa”. Kanɛ́ yɔmɔ́ɔ ŋgaá nyó oyáná caá, no do bálɛáa akɛ́ sɔŋɛ: no do bálɛáa akɛ́ mmoɛná, goakɛ́ ɛ lɛ́ oŋgɛ́yɔ́ yá Asaŋa. No do bálɛáa akɛ́ cí, goakɛ́ ɛ lɛ́ gɛdálɛ́ná bɛgɔ́ndɔ́ bɛ́hɛ́; no do bálɛáa akɛ́ Yolósalɛmɛ, goakɛ́ bó lɔ́mɔ́ tɛ́sɔnɔ ya ufuŋe ogɔ́nɔ́. O do bálɛáa akɛ́ go odóɛ yáhɔ, goakɛ́ o do bósó bá go gundie cóɛ mmue mmúmpúu ɛ́na lí piídidi naá odóɛ yáhɔ. Ŋgáa ɛɛ́ɛŋ bahɔ a bɛ́ɛmba “ɛɛ́ɛŋ”, akɛ́ɛ bahɔ a bɛ́ɛmba “akɛ́ɛ”; bɔ́ɔbɔ bó bádálanamɔ́ hɔ́ɔ búntió bó ɛ́damɔ́ go úlene naá Ohándá.


«No mbɔ ɔ́bɔ́ goŋaá bá mbo oyɛ́dá bá amɔ́: “Niíso nɛ́ bégundie go niíso, niínyo nɛ́ bégundie go niínyo”. Kanɛ́ yɔmɔ́ɔ ŋgaá nyó oyáná caá, o do bááŋɛ́gá ombɛ́. Mɔtɔ a amɔ́ a go góba ombɔ́lɛ́ naá ɛdáma ná ombɔ́gɔ onɔ́mɛ, mo sɛncɛ́gɛ́náamɔ́ nɛ́ɛnɛ níntió. Aáŋa mɔtɔ a lɛ́galɛga go ɛ́da nahɔ naá usúmbí bɛsɛnɛ go go bɔgɔ gɛla gáhɔ gɛ́ɛgɛ o bááganamɔ́ naá cí, mo dɛ́ɛ́nɛ́náamɔ́ tɔ́nɔ gɛ́ɛgɛ gá isió. Mɔtɔ a amɔ́ a go gaŋa goŋaá o bádóɛgɛna gɛnóɛ́, go ɛnda kɛ́lɔmɛ́da mmue, ɛndáa kɛ́lɔmɛ́da ɛ́handɛ́ olɔŋɔ nɛhɛ́. Fáá mɔ́ɔnyɔ a go ɔŋɔnɔmɔ́, gɔnɔ́, o do fíídíe nnyimé mɔtɔ mɔ́ɔnyɔ a lɛ́galɛgamɔ́ go bɔlɔ boóma naá maamɔ́ɔ.


«No mbɔ ɔ́bɔ́ goŋaá bá mbo oyɛ́dá bá amɔ́: “O maamana sɔ́gɔ́ɔ bahɔ, o bɛlabɛla obɛlɔ́bɛlɔ bahɔ”. Kanɛ́ yɔmɔ́ɔ ŋgaá nyó oyáná caá, maamánáa nɔnɔ babɛlɔ́bɛlɔ bɛ́nyɔ́, no bósógolonyo go báaba bá nyó séesenyemú. Nɔ́ɔ gɔ́ɔ, no gaá ná bɛ́ɛ́mbá baaná bá Isée bɛnyɔ́ mɔ́ɔnyɔ naá mmoɛná, goakɛ́ a numenye buisí bɛ́hɛ́ go babɛ́ na besi, a gɔnɔ niigenye nobólá go batɔ báaba bá ŋananamɔ́ besé na báaba bá ŋananamɔ́ gɛbɛ́. Moatɛ́, no amɔ́ no maamana báaba bá nyó maamanamɔ́, kasɛ́á bɛsoɛná no gaá ná bɛáa o? Bogólí tásɛ bá ŋanana nɔ́ɔ caŋa mmue. Gɔnɔ́, no amɔ́ no bédíigenye goana bolimóní bɛ́nyɔ́, no ŋananamɔ́ ɛkádɛ gá go békúke o? Bindiíyímé Asaŋa bɛ́ ŋanana nɔ́ɔ caŋa mmue. Bɛɛnyɔ́ɔ kanɛ́, bɛ́ɛ́mba nɔnɔ bɛgɔ́nɛ́naga, aŋa Isée bɛnyɔ́ mɔ́ɔnyɔ naá mmoɛná a lɔ́mɔ́ gɛgɔ́nɛ́naga.

Luister na Motíosi 5