Kinga: Ʉtesitamentɨ Ʉmpya mu nzovele jya Kɨkɨnga (New Testament+)

Ʉtesitamentɨ Ʉmpya mu nzovele jya Kɨkɨnga

ɄYɨɨsʉ akiingila mu vʉtsenge wa Yeliko, akava ilʉtɨngʼania pagati pa vʉtsenge vʉlya. Mu vʉtsenge vʉlya, aalemwo ʉmuunu mpamato, ʉvɨ aatambʉlwagwa vɨ Zakayo. ɄZakayo aale mbaha va vasangʉtsi va songo, ikange aale mmosu. Ʉmuunu ʉjʉ akava inogwa ʉkʉmbona ʉYɨɨsʉ ʉkʉta alɨ ndeeti. Lɨno ʉlwakʉva avaanu vaale vongosu siitso, nʉ mwene aale nsupi, aalemilwe ʉkʉmbona. Pwʉ akalʉta lʉvɨlo, akakɨlongola ɨkɨpʉga, akatoga kʉkyanya kʉ mʼbɨkɨ ʉnkʉjʉ, pakʉta ambone ʉYɨɨsʉ wʉ ilʉtɨngʼania palya. ɄYɨɨsʉ wʉ asiike palya, akalola kʉkyanya kʉ mʼbɨkɨ, akambona ʉZakayo, akambʉʉla akata, “Zakayo! Ika ngʼaningʼaani, manya wɨgane wa Ngʉlʉve ʉkʉta ɨleelo, ʉne ndɨlɨnde mu nyumba jyako.” ɄZakayo akiika ngʼaningʼaani, akantoola ʉYɨɨsʉ akalʉta nave kʉ nyumba jya mwene, akamwambɨlɨla nʉ lʉhekelo.
ɄYɨɨsʉ wʉ ikwingila ʉmwa, avaanu vooni vakambona. Pwʉ vakatengʉla ʉkwɨngʼuula, valɨkʉta, “Kɨki alʉtile mu kʉkina mu muunu ʉntulanongwa!” ɄZakayo akɨɨma, akambʉʉla ʉNtwa ʉYɨɨsʉ akata, “Gwe Ntwa! Lɨno, isiinu syango ndigava pagati, ɨligavo lipamato jʉndikʉvapa avagatsu. Ikange, kʉ muunu ʉvɨ ndɨndyovile ɨkɨveetsaga, ndikʉnʼgelelaga kanni mu siinu isyʉ ndɨpokile kʉ mwene.”
ɄYɨɨsʉ akambʉʉla akata, “Ɨleelo, ʉvʉpoki witsile kʉ vaanu va nyumba ɨjɨ. Lɨno, ʉmuunu ʉjʉ namwene va kɨkolo kya Abulahamu, manya ʉMwana va Muunu itsile kukʉvalonda nʉ kʉvapoka avaanu ʉwʉ vajagile.”


Avaanu ʉwʉ vaampʉlɨhɨtsaaga ʉYɨɨsʉ vaasaagaga ʉkʉta ʉLʉdeeva lwa Ngʉlʉve lʉlɨ piipi, ʉlwakʉva ʉYɨɨsʉ aale pawiipi ʉkʉsika kʉ Yelusalemu. Pwʉ ʉYɨɨsʉ akavavʉʉla ɨkɨhwananitso, akata, “Aalepwo ʉmuunu mpamato ʉva kɨkolo kya vanyalʉdeeva. Ʉjwa aalʉtile kʉ kɨlʉnga kya kʉvʉtale, pakʉta akatavʉlɨlwe ʉkʉva nkʉlʉdeeva, pwʉ akilivuke kulongotsa ɨkɨlʉnga kya mwene.
“Wʉ akaanale ʉkʉhega, aavɨɨlangile avavombi va mwene kɨtsigo (10), nʉ jyʉnge akampa indalama nyongosu. Akavavʉʉla akata, ‘Mwɨtsuluusaage ni ndalama itsi pakʉta mwolose ʉkʉsikila ʉpwʉ ndɨlakilivuka.’ Ʉmuunu ʉjwa aasʉʉlilwe na vaanu va kɨlʉnga kya mwene. Pwʉ kʉmbele wʉ alʉtile, avaanu va kɨlʉnga kya mwene, vakavasuungʼa avajyavo avange kʉ kɨlʉnga kɨlya ɨkya kʉvʉtale kwita ndee, ‘Ʉwe natunogwa ʉmuunu ʉjʉ, ave nkʉlʉdeeva vaawe!’ Ndavɨvave vaatsovile ɨlyo, ʉmwene aatavʉliilwe ʉkʉlongotsa ʉlʉdeeva ʉlwa. Wʉ akiliwiike, akavɨɨlanga avavombi va mwene valya ʉwʉ aavapye indalama, pakʉta alʉmanye ʉmwʉ nʉ jyʉnge olosehiitse.
“Ʉmbombi ʉvaatalile, akambʉʉla akata, ‘Gwe nkʉlʉdeeva, indalama itsʉ waamye, ndyolwise itsinge, amagavo kɨtsigo.’ Ʉnkʉlʉdeeva ʉlya akambʉʉla akata, ‘Ʉvombile vʉnonu, ʉve ʉlɨ mbombi nnonu. Ʉkaale mmʉʉgʉ mu siinu isidebe siitso, lɨno ndikʉkʉpa ʉkʉlongotsa ʉvʉtsenge kɨtsigo.’ Ʉmbombi ʉva vɨɨlɨ namwene akasika, akambʉʉla akata, ‘Gwe nkʉlʉdeeva, indalama itsʉ waamye, ndyolwise itsinge, amagavo gahaano.’ Ʉnkʉlʉdeeva akambʉʉla namwene ʉjʉ akata, ‘Najyʉve, ndikʉkʉpa ʉkʉlongotsa ʉvʉtsenge vʉhaano.’
“Ʉmbombi ʉva daatu akasika, akata, ‘Gwe nkʉlʉdeeva, indalama tsyako itsi apa. Ndɨkakʉngile mu kɨtambala, pakʉta tsileke ʉkʉjaga. Ndyavombile ɨlyo ʉlwakʉva ndikʉkʉdwada, ʉve ʉlɨ muunu ntalamu. Vutoola isyʉ nʉvɨɨkili, ikange wibena isyʉ nʉvyalili.’
“Ʉnkʉlʉdeeva akambʉʉla akata, ‘Vɨ mbanda vɨ mbiivi ʉve! Lɨno, ndikʉkʉhɨga ʉkʉkongana na mamenyu gaako ʉgwʉ ʉtsovile. Ʉkalʉmanyile ʉkʉta ʉne ndɨlɨ muunu ntalamu, nditoola isyʉ nandɨvɨɨkili, ikange ndibena isyʉ nandɨvyalili. Lɨno kɨki nʉkavɨɨke indalama tsyango kʉ vaanu avikwolosa? Apo jɨkaale jiiva, wʉ ndikwitsa kutoola, ndɨkaale nditoola paninie ni tsa pakyanya itsʉ tsyongelye.’
“Pwʉ akavavʉʉla avaanu ʉwʉ vɨɨmile palya akata, ‘Tooli indalama itso, impi ʉmbombi ʉvɨ olwise kɨtsigo (10).’ Vakambʉʉla vakata, ‘Gwe nkʉlʉdeeva, mbona ʉlya alɨ natso kɨtsigo!’
“Akata, ‘Ndikʉvavʉʉla ʉkʉta, ʉmuunu ʉvaveetsaga ʉvɨ ivombela vʉnonu ɨkyʉ apeevilwe, ikwongeletsiwaagwa isinge. Lɨno ʉvɨ nivombela ɨkyʉ apeevilwe, na kɨɨkyo ikwʉpwagwa. Paninie naago, muvaleete apa avalʉgʉ vango valya ʉwʉ navakanogwe ʉne ndɨve nkʉlʉdeeva va veene, mubude wʉ ndilola!’ ”


ɄYɨɨsʉ wʉ atsovile ago, akava igendelela ʉkʉlʉta kʉ Yelusalemu kʉnʉ alongwe pa kɨpʉga kɨlya kya vaanu. Wʉ ahegelye kʉ litsumbe lya kʉ Betifage nɨ lya kʉ Betaniya, mu kɨdugala ɨkyʉ kyatambʉlwagwa Mizeituni, akavasuungʼa avakongi va mwene vavɨlɨ, akavavʉʉla akata, “Mulʉtage mu litsumbe ɨlyʉ lɨlɨ kʉvʉlongolo kwanyie. Wʉ mukwingila mulya, mukʉjɨvona ɨpunda ɨjipikʉla jɨkʉngilwe, ɨjyanagelili ʉmuunu ʉkwɨtoga. Muhʉdʉle, mwitse najyo apa. Angave ʉmuunu jiikʉvavʉʉtsa iita, ‘Kɨki mukʉjɨhʉdʉla?’ Mumbʉʉle muteetsage, ‘ɄNtwa viitu alɨ nʉ vʉsumbe najyo.’ ”
Pwʉ avakongi valya vakalʉta, vakatsikʉtsivona tsyoni ndʉwʉ ʉYɨɨsʉ akavavʉʉlile. Wʉ vikʉjɨhʉdʉla ɨpunda jɨlya ɨjipikʉla, avenenajyo vakavavʉʉtsa vakata, “Kɨki muhʉdʉla ɨpunda ɨjyo?” Vakavaanda vakata, “ɄNtwa alɨ nʉ vʉsumbe najyo.” Pwʉ vakammɨlɨkɨla ʉYɨɨsʉ, vakatandɨka ɨmisabwa gya veene pakyanya pa punda, vakantotsa ʉYɨɨsʉ pa jyene.
ɄYɨɨsʉ wʉ ilʉtɨngʼania, avaanu vakava vitandɨka ɨmisabwa gya veene mu nzɨla.
Wʉ alɨ pa kʉtengʉla ʉkwika ɨkɨdugala ɨkya Mizeituni, ɨkɨpʉga kyoni kya vakongi va mwene vakatengʉla ʉkʉluluutila, valɨkʉnʼginia ʉNgʉlʉve kʉ mbombo tsyoni itsa kʉdega itsʉ vaatsiweene. Vakava vikʉnʼginia siitso viita,
“Inʼgatalʉsu ʉNkʉlʉdeeva ʉvɨ ikwitsa mu litaawa lya Ntwa ʉNgʉlʉve.
Lɨno palɨ lʉnotsehetso kwa Ngʉlʉve na vaanu va mwene.
Ikange ʉwɨɨmɨkiwa alɨ nawo ʉNgʉlʉve ʉNdʉti va syoni.”
Mu kɨpʉga kɨlya, vaalemwo aVafalisayo vaninie, vakambʉʉla ʉYɨɨsʉ vakata, “Mmanyisi, ʉvatanile avakongi vaako, vɨlekelwe ʉkʉtsova ago!” ɄYɨɨsʉ akavaanda akata, “Ndikʉvavʉʉla ʉkʉta, ɨngave ava vinuunala, amaganga ago jʉgikwoveela siitso!”

ɄYɨɨsʉ wʉ ahegelye, ikʉvʉvona ʉvʉtsenge ʉwa Yelusalemu, akatengʉla ʉkʉlɨla kʉ nongwa jya vʉkʉvɨlwa ʉwaale pakuwitsila ʉvʉtsenge ʉwa. Akavavʉʉla akata, “Lʉkaale lwiva lʉnonu ɨleelo ʉve ʉlʉmanyile itsʉ ʉnogye ʉkʉvomba pakʉta ʉveetsage nʉ lʉnotsehetso! Lɨno tsisihiime pamiiho gaako. Mu sigono isikwitsa, avalʉgʉ vaako valatsenga ʉlʉvɨgo ʉlʉkangasu ʉkʉtsʉngʉtɨla ʉvʉtsenge waako wooni. Apo pwʉ valakwʉvʉkɨla ʉkʉhʉma imbasu tsyoni. Valakʉgwisa paasi, ʉve na vaanu vaako vooni. Navalakʉlekele nalɨ liganga ɨlyʉ lɨlasigala pakyanya pa lɨnge mu vʉtsenge wooni, ʉlwakʉva ʉnsɨkɨ ʉgwʉ ʉNgʉlʉve aakʉleetelaga ʉvʉpoki, nawaagʉmanye!”


ɄYɨɨsʉ akiingila mu lʉvɨgo lwa tembile, akatengʉla ʉkʉswɨma avaanu ʉwʉ vaale mulya, mu kʉgʉtsa isiinu. Akavavʉʉla akata, “Jɨvɨgilwe mu Vʉvɨge ʉVʉvalatse, ‘Ɨnyumba jyango jiveetsaga nyumba jya kwɨsajɨla.’ Ʉnyie muhambwe ʉkʉva ‘manga jya vanyambuda!’ ”
ɄYɨɨsʉ akava imanyiisa avaanu ɨkɨgono nɨ kɨgono mu tembile. Pwʉ avavaha va vateeketsi, paninie na vamanyisi va ndagɨlo na vanzagɨla va Vayahudi, vakava vilonda ɨnzɨla jya kʉmʼbuda. Napeene, valɨkʉlemwa ʉkʉvomba ɨlyo ʉlwakʉva avaanu vooni vaankongaga ʉYɨɨsʉ kʉnʉ vitsingahɨtsa vʉnonu amamenyu ʉgwʉ aavavʉʉlaga.

Luister na Luuka 19