 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

ࢡَاوٛ مَنْ، جُولْدٜ يَحُودُعٜنْ وَطِ، عِيسَى بٛو يٜحِ عُرُسَلِيمَ؞ حَا عُرُسَلِيمَ تٛنْ، کٛمْبِ دَمُّغَلْ بَالِ، وٛودِ وٜىٰندُ وِعٜتٜىٰندُ بَيْتِجَتَ بٜى عِبْرَنِنغْکٜىٰرٜ، ندُ وٛودِ دَنغْطٜ جٛوِ؞ لٜسْ دَنغْطٜ طٜعٜ، ࢩَوْࢡٜ طُوطْࢡٜ طٛنْ مبَالِ‏: وُمْࢡٜ عٜ وٛوسْࢡٜ عٜ وَاتَ-تٜرْطٜعٜنْ؞ ‏[‏ࢡٜطٛنْ ندٜىٰنَ حَا تٛ ندِيَمْ ڢُطِّ دِمْبَاغٛ، نغَمْ سَاعِ ڢٜىٰرٜ مَلَاعِکَاجٛ جَوْمِرَاوٛ طٛنْ جِݠّٛ ندٜرْ وٜىٰندُ مَنْ، دِمْبَ ندِيَمْ؞ ࢩَوْطٛ مٛ عَارْتِ نَسْتُغٛ ندِيَمْ ࢡَاوٛ طَمْ دِمْبَکٜ ڢُو، يَمْطِتِ ࢩَوُ مُوطُمْ کٛو نغُيٜ ڢُو؞]‏ وٛودِنٛ تٛنْ ࢩَوْطٛ مٛ وَطِ بَاکِنْ دُوࢡِ شَݠَّنْطٜ تَتِ عٜ جٛوٜىٰتَتِ؞ ندٜ عِيسَى يِعِمٛ عٛطٛنْ وَالِ، عِيسَى عَنْدِ عٛدُورِ بٜى ࢩَوُ مَاکٛ، عٛࢨَمِمٛ‏: «عَيِطِ يَمْطِتِنٜىٰغٛ نَ؟» ࢩَوْطٛ جَابِمٛ‏: «مٛودِبّٛ، مِوَلَا غٛطّٛ مٛ نَسْتِنْتَمِّ ندٜرْ ندِيَمْ سَاعِ طَمْ طٛنْ دِمْبٛ؞ يَاکٜ مِطٛنْ حَࢡْدَ يَحُغٛ تٛنْ، غٛطّٛ ڢٜىٰرٜ طٛنْ عَارْتَمِّ نَسْتُغٛ ندِيَمْ؞» عِيسَى وِعِمٛ‏: «عُمَّ، حٛوشُ لٜىٰسٛ مَ، يَحْ‏!» لَوْ غٛطّٛ عٛو يَمْطِتِ، عٛحٛوسِ بٜعِّتّٜ مَاکٛ، عٛطٛنْ يَحَ؞
عَمَّا ࢩَلَادٜ مَنْ طُمْ ࢩَنْدٜ سِوْتٛرْدٜ ؞ نغَمْ مَاجُمْ يَحُودُعٜنْ مبِعِ جَمْطِتِنَاطٛ مَنْ‏: «حَنْدٜ طُمْ ࢩَنْدٜ سِوْتٛرْدٜ، تَوْرٜىٰتَ دُنغَنَاکِ مَ رٛونْدَاغٛ بٜعِّتّٜ مَ؞» عٛجَابِ ࢡٜ‏: «مٛ يَمْطِتِنِ يَمْ، وِعِ يَمْ‏: حٛوشُ بٜعِّتّٜ مَ، يَحْ‏!» ندٜنْ ࢡٜࢨَمِمٛ‏: «طُمْ مٛيْجٛ وِعِ مَ حٛوشُ بٜعِّتّٜ مَ، يَحْ؟» عَمَّا عٛعَنْدَا مٛيْ يَمْطِتِنِمٛ، نغَمْ عِيسَى عَشِّ نٛکُّورٜ مَنْ، دِلِّ، نغَمْ يِمْࢡٜ طُوطْࢡٜ طٛنّٛ تٛنْ؞
ࢡَاوٛطٛنْ عِيسَى تَوِمٛ ندٜرْ حَيْکَلِيرُ، وِعِمٛ‏: «ندَا، جٛنْتَ عَيَمْطِتِ، تَا مٜىٰتُ وَطُغٛ حَکّٜ، نغَمْ تَا کٛ تُلِّ وَرَ دٛوْ مَاطَ؞» غٛطّٛ عٛو يٜحِ، عٛوِعِ يَحُودُعٜنْ، طُمْ عِيسَى يَمْطِتِنّٛ مٛ؞ نغَمْ مَنْ يَحُودُعٜنْ ݠُطِّ تٛوࢩَاغٛ عِيسَى، نغَمْ عٛوَطِ طُمْ ࢩَلَادٜ سِوْتٛرْدٜ ؞ عَمَّا عِيسَى جَابِ ࢡٜ‏: «بَابِرَاوٛ عَمْ طٛنْ حُووَ ڢٛرٛيْ، مِنْ بٛو مِحُووَنْ؞»
نغَمْ دَلِيلَ بٛلّٜ طٜعٜ يَحُودُعٜنْ ࢡُرْتِ وَطُغٛ عَنِّيَ مبَرُغٛ مٛ، نَا نغَمْ عٛلُوتِ عُمْرٛورٜ ࢩَلَادٜ سِوْتٛرْدٜ تَنْ، عَمَّا نغَمْ عٛطٛنّٛ وِعَ اَللَّه وٛنِ بَابِرَاوٛ مَاکٛ، عٛڢٛتْنِ حٛورٜ مَاکٛ کَلْ-کَلْ بٜى اَللَّه؞

نغَمْ مَنْ عِيسَى وِعِ ࢡٜ‏: «غٛونغَ مِوِعَتَ عٛنْ، ࢡِطّٛ وَاوَتَا وَطُغٛ کٛو طُمٜ بٜى حٛورٜ مُوطُمْ، عَمَّا سٜيْ کٛ عٛيِعِ بَابِرَاوٛ طٛنْ وَطَ؞ کٛ بَابِرَاوٛ وَطَتَ ڢُو، کَنْجُمْ ࢡِطّٛ بٛو وَطَتَ؞ نغَمْ بَابِرَاوٛ يِطِ ࢡِطّٛ، عٛطٛنْ حٛلَّ مٛ کٛ عٛوَطَتَ ڢُو؞ عٛحٛلَّنْ مٛ کُوطٜ ࢡُرَنْطٜ طٜعٜ مَوْنُغٛ بٛو، نغَمْ حَا عٛنْ کَيْطِنَ؞ بَنَ بَابِرَاوٛ طٛنْ عُمِّتِنَ مَايْࢡٜ، يٜىٰطِتِنَ ࢡٜ، بَنَ نٛنْ ࢡِطّٛ بٛو حٛکِّرْتَ نغٜىٰندَمْ حَا مٛ عٛيِطِ ڢُو؞ بَابِرَاوٛ حِيتَتَاکٛ کٛو مٛيْ، عَمَّا بَاوْطٜ حِيتَاغٛ، عٛحٛکِّ طٜ ڢُو حَا ࢡِطّٛ، نغَمْ حَا يِمْࢡٜ ڢُو تٜدِّنَ ࢡِطّٛ بَنَ ࢡٜتٜدِّنِرْتَ بَابِرَاوٛ نٜلْطٛ مٛ؞ کٛو مٛيْ سَلِ تٜدِّنْغٛ ࢡِطّٛ، تٜدِّنْتَا بَابِرَاوٛ نٜلْطٛ مٛ؞
«غٛونغَ مِوِعَتَ عٛنْ‏: مٛ طٛنْ نَنَ بٛلّٜ عَمْ، مٛ نُطِّنِ نٜلْطٛ يَمْ، حٜࢡِ نغٜىٰندَمْ ندُومِيطَمْ، کِيتَ دٛعَّتَا مٛ، عٛسَالَکٜ مَايْدٜ، عٛيٛتَّکٜ نغٜىٰندَمْ؞ غٛونغَ مِوِعَتَ عٛنْ‏: سَاعِ وَرَنْ، طُمْ وَطِ جٛنْتَ مَا، حَا مَايْࢡٜ نَنَ سَوْتُ ࢡِطّٛ اَللَّه ، نَنْࢡٜ مٛ ڢُو نغٜىٰطَنْ؞ بَنَ بَابِرَاوٛ وٛنِ سٜىٰࢡٛورٜ نغٜىٰندَمْ، بَنَ نٛنْ عٛحٛکِّ ࢡِطّٛ بٛو بَاوْطٜ لَاتَاغٛ سٜىٰࢡٛورٜ نغٜىٰندَمْ؞ عٛحٛکِّ ࢡِطّٛ بَاوْطٜ حِيتَاغٛ نغَمْ عٛ ࢡِي-نٜطّٛ ؞ تَا طُمْ حَيْطِنَ عٛنْ، نغَمْ سَاعِ وَرَنْ، حَا مَايْࢡٜ ندٜرْ غٜنَالٜ ڢُو نَنَ سَوْتُ مَاکٛ، نغُرْتٛ طٜ؞ وَطٛوࢡٜ بٛوطُّمْ عُمِّتِتّٛ نغَمْ حٜࢡُغٛ نغٜىٰندَمْ، عَمَّا وَطٛوࢡٜ کَلُّطُمْ عُمِّتِتّٛ نغَمْ حِيتٜىٰغٛ؞»

«مِنْ مِوَاوَتَا وَطُغٛ کٛو طُمٜ بٜى حٛورٜ عَمْ؞ مِطٛنْ حِيتٛ ڢٛدّٜ کٛ اَللَّه وِعِ يَمْ؞ کِيتَ کَ مِحِيتٛتٛ، کَ عَدِلِيحَ، نغَمْ مِطَࢡَّتَا وَطُغٛ مُويٛ عَمْ، عَمَّا مُويٛ نٜلْطٛ يَمْ؞ تٛ مِسٜىٰدَنَکٜ حٛورٜ عَمْ، سٜىٰدَمْکُ عَمْ لَاتَتَاکٛ غٛونغَ؞ عَمَّا وٛودِ شٜىٰدٛووٛ يَمْ ڢٜىٰرٜ، مِعَنْدِ سٜىٰدَمْکُ نغُ عٛسٜىٰدَنْتٛ يَمْ، طُمْ غٛونغَ؞ عٛنْ نٜلِ نٜلَاࢡٜ حَا يُحَنَّ، کَنغْکٛ عٛسٜىٰدَنِ غٛونغَ؞ مِنْ نَا دِغَ نٜطّٛ مِحٜࢡَتَ سٜىٰدَمْکُ، عَمَّا مِوِعِ طُمْ بَنَ نِي نغَمْ حَا عٛنْ کِسَ؞ يُحَنَّ لَاتِنٛ بَنَ ݠِتِّرْلَ کُࢡَّانغَ، طٛنّٛ يَيْنَ، عٛنْ شٜيٛرِ أَلنّٛورَ مَاکٛ وَکَّتِ سٜطَّ؞ عَمَّا مِنْ مِوٛودِ سٜىٰدَمْکُ ࢡُرْنغُ نغُ يُحَنَّ‏: نغَمْ کُوطٜ طٜ بَابِرَاوٛ حٛکِّ يَمْ نغَمْ مِحٜبِّتِنَ طٜ، وَاتٛ کُوطٜ طٜ مِحُووَتَ، کَنْجٜ سٜىٰدَنْتٛ يَمْ، طُمْ حٛلِّ بَابِرَاوٛ نٜلِ يَمْ؞ بَابِرَاوٛ نٜلْطٛ يَمْ بٛو عٛسٜىٰدَنَکٜ يَمْ؞ عٛنْ مٜىٰطَايْ نَنُغٛ سَوْتُ مَاکٛ، عٛنْ نغِعَايْ مٛ بٛو؞ عٛنْ نجٛغَاکِ وٛلْدٜ مَاکٛ ندٜرْ ࢡٜرْطٜ مٛوطٛنْ، نغَمْ عٛنْ نُطِّنَايْ مٛ عٛنٜلِ؞ عٛنْ طٛنْ نجَنغَ دٜڢْتٜ شٜنِيطٜ، نغَمْ عٛنْ طٛنْ تَمّٛ حٜࢡُغٛ نغٜىٰندَمْ ندُومِيطَمْ ندٜرْ مَاجٜ؞ دٜڢْتٜ شٜنِيطٜ مَنْ طٛنْ شٜىٰدَنٛ يَمْ؞ عَمَّا عٛنْ نغِطَا وَرْغٛ حَا عَمْ نغَمْ عٛنْ کٜࢡَ نغٜىٰندَمْ؞
«مِطَࢡَّتَا تٜدُّنغَلْ حَا يِمْࢡٜ؞ عَمَّا مِعَنْدِ عٛنْ، عٛنْ نغِطَا اَللَّه؞ مِوَرِ بٜى عِنْدٜ بَابِرَاوٛ عَمْ، عٛنٛنْ بٛو عٛنْ نجَࢡَايْ يَمْ؞ عَمَّا تٛ غٛطّٛ ڢٜىٰرٜ وَرِ بٜى بَاوْطٜ حٛورٜ مُوطُمْ، کَنغْکٛ عٛنْ نجَࢡَتَ؞ بَنَ نٛيْ عٛنْ مبَاوْرَتَ نُطِّنْغٛ، ندٜ نِي عٛنْ طٛنْ طَࢡَّ تٜدُّنغَلْ دِغَ وٛطْࢡٜ، عَمَّا عٛنْ طَࢡَّتَا تٜدُّنغَلْ غَرَنْنغَلْ دِغَ اَللَّه غٛوتٛ؟ تَا نُمٜ مِنْ مِوُلّٛتٛ عٛنْ يٜىٰسٛ بَابِرَاوٛ؞ مُوسَى مٛ عٛنْ طٛنْ تَمّٛرٛ، کَنغْکٛ وُلّٛتٛ عٛنْ؞ نغَمْ تٛ عٛنْ نُطِّنّٛ مُوسَى، عٛنْ نُطِّنْتَمْ مِنْ بٛو، نغَمْ دٛوْ عَمْ عٛوِنْدِ؞ عَمَّا تٛ عٛنْ نُطِّنَايْ کٛ عٛوِنْدِ، نٛيْ عٛنْ نُطِّنِرْتَ بٛلّٜ عَمْ؟»

Luister na يُحَنَّ 5