Newari - 1986 Edition (Drama NT)

उगु हे इलय्‌ बप्‍तिस्‍मा बीम्‍ह यूहन्‍नां यहूदियाया मरुभूमिइ वनाः थथे धकाः भिंगु खँ न्‍यंकाजुल –

“पश्‍चाताप या,
छाय्‌धाःसा स्‍वर्गयागु राज्‍य न्‍ह्यःने
थ्‍यंकः वःगु दु।”

थ्‍व हे यूहन्‍नायागु खँ यशैया अगमवक्तां थथे च्‍वया थकूगु दु –

“मरुभूमिइ छम्‍ह मनू थथे धकाः
हालाः वइ –
‘प्रभुयात लँ ब्‍यु,
वय्‌कःयागु लँ छिंकाब्‍यु।’”

थ्‍व यूहन्‍नां उँटयागु सं थानातःगु वसः पुनातःगु दु। अले जँय् छेंगूयागु जनी चिनातःगु दु। वयागु नसा क्‍वःबुइँचा व गुँ कस्‍ति खः। यरूशलेमं, यहूदियाया फुक्‍क गामं व यर्दन खुसिया जःखः च्‍वंपिं मनूत वयाथाय् वल। अले थथःगु पाप स्‍वीकार यानाः यर्दन खुसिइ यूहन्‍नापाखें बप्‍तिस्‍मा काल।
यक्‍व हे फरिसीत व सदुकीत नं बप्‍तिस्‍मा कायेत वयाच्‍वंगुलिं वं इमित थथे धाल – “हे सर्पया सन्‍तान, परमेश्‍वरयागु तंपाखें बिस्‍युं वनेत छिमित सुनां ख्‍याच्‍वः बिल? पश्‍चाताप याःथें छिमिसं थःगु चालचलन नं अथे हे या। ‘अब्राहाम हे जिमि बाः खः, उकिं जिमित छुं नं जुइ मखु’ धकाः धयाजुइ मते, छाय्‌धाःसा जिं छिमित धाये – परमेश्‍वरं अब्राहामया निंतिं थुपिं ल्‍वहँतं नं मस्‍त दय्‌कादी फु। सिमायागु हाप्‍वलय् पा लाये हे त्‍यंगु दु। उकिं भिंगु फल मसःगु सिमा पालाः छ्वय्‌काछ्वइ।
“जिं ला छिमित पश्‍चातापया निंतिं लखं बप्‍तिस्‍मा बियाच्‍वना। जिगु लिपा जि सिबय् तसकं तःधंम्‍ह झायाच्‍वंगु दु। जि ला वय्‌कःयागु लाकां ज्‍वनाजुइत तक नं मल्‍वः। वय्‌कलं हे छिमित पवित्र आत्‍मां व मिं बप्‍तिस्‍मा बियादी। वय्‌कलं ल्‍हातिइ हासा ज्‍वना तयादीगु दु। वय्‌कलं फुक्‍क छ्व हायाः थःगु धुकुतिइ स्‍वथनादी। अले छ्वस जुक्‍व गुबलें मसीगु मिइ छ्वय्‌कादी।”


येशू नं बप्‍तिस्‍मा कायेत गालीलंनिसें यर्दन खुसिइ यूहन्‍ना दुथाय् थ्‍यंकः झाल। यूहन्‍नां वय्‌कःयात थथे धकाः पनेत स्‍वल – “छिं जक जितः बप्‍तिस्‍मा बियादीमाः। छि जिथाय् झायादीयागु ला?”
वय्‌कलं लिसः बियादिल – “आःयात थथे हे थजु। थुकथं झीसं फुक्‍क धार्मिकता पूवंके माःगु दु।” अले वं “ज्‍यू” धाल।
वय्‌कः बप्‍तिस्‍मा कयाः उघ्रिमय् लखं थाहां झाल। उबलय् हे स्‍वर्ग चाल, अले वय्‌कलं परमेश्‍वरयागु आत्‍मा सुकुभतु थें जुयाः थःगु म्‍हय् जूवयाच्‍वंगु खन। अले स्‍वर्गं थथे धयाहल – “थ्‍व जि यःम्‍ह काय् खः, थ्‍व खनाः जि तसकं लय्‌ताः।”

Luister na मत्ती 3