UHabakuki 3:1-19
UHabakuki 3:1-19 IBHAYIBHELI ELINGCWELE (ZUL59)
Umkhuleko kaHabakuki umprofethi; ngeShigiyonoti.* Jehova, ngizwile umbiko ngawe, ngiyesaba izenzo zakho; zivuselele phakathi kwale minyaka, wenze ukuba zaziwe kule minyaka, ukhumbule umusa nasolakeni. UNkulunkulu uvela eThemani, oNgcwele uphuma entabeni yasePharanu. Sela* Udumo lwakhe lusibekela amazulu, nomhlaba ugcwele indumiso yakhe. Kuqhamuka ukubengezela kunjengokukhanya; imisebe ivela esandleni sakhe, efihla lapho amandla akhe. Ngaphambi kwakhe kuhamba isifo, amalangabi aphuma ezinyathelweni zakhe. Uyema, uzamazamisa umhlaba; ubuka, uthuthumelisa izizwe; izintaba zaphakade ziyahlakazwa, namagquma amandulo akhothama yizindlela zakhe zaphakade. Ngibona amatende aseKushani ephansi kosizi, izilenge zezwe lakwaMidiyani ziyathuthumela. UJehova uyathukuthelela imifula na? Ulaka lwakho luvuthela imifula, nentukuthelo yakho ulwandle, lokhu ukhwele amahhashi akho, nezinqola zakho zokunqoba, na? Umnsalo wakho uvele obala, wambuliwe, usuthile ngemicibisholo yesambo sakho. Sela* Uqhekeza umhlaba ube yimifula. Izintaba ziyakubona, zithuthumele; isikhukhula samanzi siyadlula; utwa luzwakalisa izwi lalo, luphakamisela phezulu izandla zalo. Ilanga nenyanga kwema endaweni yakho ngokukhanya kwemicibisholo yakho egijimayo nangokubengezela kwemikhonto yakho ecwebezelayo. Udabula umhlaba ngokuthukuthela, ubhula izizwe ngolaka. Uphumela ukusindiswa kwabantu bakho, yebo, ukusindiswa kogcotshiweyo wakho; uphohloza uphahla endlini yababi, wambula isisekelo kuze kube sentanyeni. Sela* Ugwaza ikhanda lomholi wabo ngeyakhe imicibisholo, lapho besondela njengesivunguvungu ukungihlakaza, bejabula njengabayakudla ompofu ngasese. Unyathela ulwandle ngamahhashi akho, inqaba yamanzi amaningi. Ngiyezwa, kuyathuthumela okuphakathi kwami, izindebe zami ziyaqhaqhazela ngenhlokomo; ukubola kungena emathanjeni ami, ngithuthumela endaweni lapha ngimi khona, ngilindela usuku lokuhlupheka ukuze kukhuphuke lokhu okuyakucindezela abantu. Noma umkhiwane ungakhahleli, kungabikho izithelo emvinini, umsebenzi womnqumo uphuthe, amasimu angavezi ukudla, izimvu zinqunywe esibayeni, kungabikho nkomo ezibayeni, nokho mina ngiyakuthokoza ngoJehova, ngijabulele uNkulunkulu wokusindiswa kwami. UJehova, iNkosi yami, ungamandla ami, wenza izinyawo zami zibe njengezezindluzelekazi, angenze ukuba ngihambe ezindaweni zami eziphakemeyo. Kumholi wokuhlabelela. Ngogubhu.
UHabakuki 3:1-19 IsiZulu 2020 (ZUL20)
Umkhuleko kaHabakuki umphrofethi ngeshigiyonothi. Simakade, ngizwile umbiko ngawe, ngiyawesaba Simakade umsebenzi wakho; uvuselele nakule minyaka, wenze ukuba waziwe kule minyaka, ukhumbule isihawu sakho nasolakeni. UNkulunkulu uvela eThemani, oNgcwele uphuma entabeni iPharanu. Sela Inkazimulo yakhe isibekela amazulu, udumo lwakhe lugcwele umhlaba. Ukukhanya kwakhe kufana nelanga liphuma, imisebe ivela esandleni sakhe, kulapho amandla akhe efihlwe khona. Phambi kwakhe kuhamba ubhubhane, kulandele isifo ezinyaweni zakhe. Uyama, azamazamise umhlaba; uyabuka, athuthumelise izizwe; izintaba zakudala ziyabhidlizwa, namagquma asemandulo ayakhothama, yizindlela zakhe zaphakade. Ngibona amathende aseKhushani ekhungethwe wusizi, amakhethini akwaMidiyani ayathuthumela. Simakade, ngabe ubuyithukuthelele yini imifula na? Ngabe ulaka lwakho belumelene yini nemifula noma intukuthelo yakho nolwandle, ukuba ugibele amahhashi akho, nezinqola zakho zokunqoba, na? Umnsalo wakho usulungile, uvele obala, ubize imicibisholo emgodleni, wadabula umhlaba ngemifula. Sela Izintaba zikubona qede ziyobayobe; isikhukhula siyadlula; izinzulu zizwakalise ukuhlokoma kwazo, ziphakamisele phezulu izandla zazo. Ilanga nenyanga kwama nse endaweni yakho ngokubenyezela kwemicibisholo yakho eshwezayo nangokunyazima komkhonto wakho okhanyayo. Udabula umhlaba ngentukuthelo, ugxobagxobe izizwe ngolaka. Uphumele ukusindiswa kwabantu bakho, ukusindiswa kogcotshiweyo wakho; uphohloza umholi endlini yababi, umhlubule kusukela phansi kuze kube sentanyeni. Sela Ugwaza ikhanda lomholi wabo ngeyakhe imikhonto, lapho amabutho akhe engithelekela ukuba angihlakaze, ejabula njengazoshwabadela ompofu esithe. Unyathela ulwandle ngamahhashi akho, amanzi amaningi agubhayo. Ngezwa, qede kwathuthumela izibilini zami, izindebe zomlomo wami zaqhaqhazela ngomsindo; ukuvendlezela kwangena emathanjeni ami, ngathuthumela lapho ngimi khona, ngizothula ngilinde kuze kufike usuku lwenhlupheko kubantu abasihlaselayo. Noma umkhiwane ungeqhakaze, nemivini ingabi nazithelo, nomsebenzi womnqumo ungaphumeleli, amasimi angabi nasivuno, kungabi bikho mhlambi wezimvu nezimbuzi esibayeni nazinkomo esibayeni, nokho mina ngiyakujabula ngoSimakade, ngithokoze ngoNkulunkulu wensindiso yami. USimakade iNkosi, ungamandla ami, wenza izinyawo zami zibe njengezendluzela, enze ngihambe ezindaweni zami eziphakemeyo. Kumholi wokuhlabelelisa ngohabhu lwami.
UHabakuki 3:1-19 Contemporary Zulu Bible 2024 (CZB24)
Umkhuleko womprofethi uHabakuki phezu kweShigiyoni. Jehova, ngizwile izwi lakho, ngesaba; Jehova, mawuphile umsebenzi wakho phakathi kweminyaka, wazise phakathi kweminyaka; olakeni khumbula umusa. UNkulunkulu uvela eThemani, oNgcwele evela entabeni yasePharanu. Sela. Inkazimulo yakhe yasibekela amazulu, futhi umhlaba ugcwele indumiso yakhe. Ukukhanya kwakhe kwakunjengokukhanya; kwaphuma izimpondo esandleni sakhe, futhi kwakukhona ukufihlakala kwamandla akhe. Isifo sahamba phambi kwakhe, namalahle avuthayo aphuma ezinyaweni zakhe. Wema walinganisa umhlaba; izintaba zaphakade zahlakazwa, amagquma aphakade akhothama; izindlela zakhe ziphakade. Ngabona amatende akwaKushani ecindezelwe, nezilenge zezwe lakwaMidiyani zithuthumela. UJehova wathukuthelela imifula na? Intukuthelo yakho yayiphezu kwemifula na? Intukuthelo yakho yayivuthela ulwandle, ukuthi ugibele amahhashi akho nezinqola zakho zokusindisa na? Umnsalo wakho unqunulwe ngokuphelele, njengesifungo sezizwe, yebo, nezwi lakho. Sela. Wahlukanisa umhlaba ngemifula. Izintaba zakubona, zathuthumela; isikhukhula samanzi sadlula; uZamcolo waphakamisa izwi lakhe, waphakamisa izandla zakhe phezulu. Ilanga nenyanga kwema endaweni yakho yokuhlala, ngokukhanya kwemicibisholo yakho yadlula ngokubenyezela komkhonto wakho. Udabule izwe ngokuthukuthela, ubhula izizwe ngolaka. Waphuma ukusindisa abantu bakho, yebo, ukusindisa kanye nogcotshiweyo wakho; Ulimele ikhanda endlini yomubi ngokuvula isisekelo kuze kufike entanyeni. Sela. Washaya inhloko yemizi yakhe ngezinduku zakho; njengesivunguvungu baphuma ukungihlakaza; ukujabula kwabo kwakunjengokudla abampofu ngasese. Wadabula ulwandle namahhashi akho, inqwaba yamanzi amaningi. Lapho ngizwa lokhu, isisu sami sathuthumela; izindebe zami zathuthumela ngezwi; ukubola kwangena emathanjeni ami, ngaqhaqhazela phakathi kwami, ukuze ngiphumule ngosuku losizi; Noma umkhiwane ungakhahleli, kungabikho sithelo emvinini; umsebenzi womnqumo uyophela, namasimu awayikuthela ukudla; imfuyo encane kufanele iqedwe esibayeni, futhi akufanele kube nezinkomo ezibayeni; Kepha mina ngiyakuthokoza ngoJehova, ngijabule kuNkulunkulu wensindiso yami. UJehova uNkulunkulu ungamandla ami, wenza izinyawo zami zibe njengezezindluzele, angihambise ezindaweni zami eziphakemeyo. Kumholi wokuhlabelela ngezinsimbi zami zomculo ezinezintambo.