UGenesise 44:14-34
UGenesise 44:14-34 IsiZulu 2020 (ZUL20)
UJuda nabafowabo bafika endlini kaJosefa, bamfica esekhona, base bezilahla phansi phambi kwakhe. UJosefa wathi kubo: “Kuyini lokhu enikwenzileyo na? Anazi yini ukuthi umuntu onjengami uyakwazi ukubhula na?” UJuda waphendula wathi: “Sizothini enkosini yami na? Sizakukhuluma sithini na? Sizakuzithethelela sithini na? UNkulunkulu uliveze obala icala lezinceku zakho. Bheka, silapha ukuba sibe yizigqila zenkosi yami, thina nalowo okutholakale kuye indebe.” UJosefa wathi: “Angikwazi ukwenza into enjalo. Umuntu etholakale kuye indebe yami uzokuba yisigqila sami, nina yenyukani, nibuyele kuyihlo ngokuthula.” UJuda wazidela amathambo, wakhuluma noJosefa wathi: “Ngicela uxolo, nkosi yami, yivumele inceku yakho ibeke libe linye nje enkosini yayo, ungayithukutheleli inceku yakho, ngokuba wena ulingana noFaro uqobo. Inkosi yami yazibuza izinceku zayo, yathi: ‘Ninaye yini uyihlo noma umfowenu na?’ Sathi enkosini yami: ‘Sinaye ubaba osekhulile, nendodana esencane ayizala esegugile. Umfowabo sewafa, sekusele yona yodwa esiswini sikanina futhi uyise uyayithanda.’ “Wawusuthi ezincekwini zakho: ‘Mletheni kimi ukuze ngimbone.’ Sathi enkosini yami: ‘Umfana akanakumshiya uyise, ngokuba uma engamshiya, uyise angafa.’ Wathi ezincekwini zakho: ‘Uma ningezi nomfowenu omncane, ngeke niphinde nibubone ubuso bami.’ Sakhuphuka sabuyela encekwini yakho, ubaba, sambikela okushiwo yinkosi yami. Ubaba wathi: ‘Buyelani niyosithengela ukudla.’ Thina sathi: ‘Asinakubuyela lapho uma umfowethu omncane engahambi nathi, ngokuba ngeke sibubone ubuso balowo muntu uma umfowethu omncane engekho.’ “Inceku yakho, ubaba, yathi kithi: ‘Niyazi ukuthi umkami wangizalela amadodana amabili; omunye sewangishiya, sengize ngakuvuma ukuthi impela sewafa, wadweshulwa yisilwane sasendle, futhi angikaze ngiphinde ngimbone kuze kube namuhla lokhu. Uma manje seningithathela nalena, bese yehlelwa yingozi, le mpunga niyoyehlisela kwelabafileyo igcwele usizi.’ “Manje uma ngibuyela encekwini yakho, ubaba, ngingabuyeli naye, lokhu inceku yakho imthanda kangaka lo mfana, kuyothi lapho ibona ukuthi umfana akekho, ivele ife. Izinceku zakho ziyokuba yimbangela yokwehlisela le mpunga kwelabafileyo inomunyu. Inceku yakho yethembisile kubaba ukuthi umfana uzophepha, yathi: ‘Uma ngingambuyiseli kuwe ephephile, lelo cala yimi engiyolithwala kuwe, baba, imihla yonke yokuphila kwami.’ “Ngiyacela ukuba uyivumele inceku yakho kusale yona esikhundleni somfana, ibe yisigqila sakho, kuthi umfana aphindele ekhaya nabafowabo. Ngingabuyela kanjani kubaba engekho umfana na? Funa ngibone okubi okungahle kwehlele ubaba.”
UGenesise 44:14-34 IBHAYIBHELI ELINGCWELE (ZUL59)
UJuda nabafowabo bafika endlini kaJosefa; wayesekhona lapho; bawa phansi phambi kwakhe. UJosefa wayesethi kubo: “Isenzo sini lesi enisenzileyo na? Beningazi yini ukuthi umuntu onjengami angabhula nokubhula na?” Wathi uJuda: “Sizakuthini enkosini yami na? Sizakukhulumani? Sizakuzihlanguza kanjani? UNkulunkulu ufumene ububi bezinceku zakho; bheka, siyizigqila zenkosi yami thina naye etholakele esandleni sakhe indebe.” Wathi: “Makube kude kimi ukwenze njalo; umuntu etholakele esandleni sakhe indebe uyakuba yisigqila sami, kepha nina manihambe kahle, nenyuke, niye kuyihlo.” UJuda wayesesondela kuye, ethi: “O nkosi yami, inceku yakho mayikhulume izwi ezindlebeni zenkosi yami, ungavuthi ulaka ngenceku yakho, ngokuba ungangoFaro wena. Inkosi yami yabuza izinceku zayo, yathi: ‘Ninoyihlo, ninomfowenu, na?’ Sase sithi enkosini yami: ‘Sinobaba, ixhegu, nomntwana wobuxhegu bakhe omncane; umnewabo ufile, usesele yedwa kwabakanina; uyise uyamthanda.’ “Wawusuthi ezincekwini: ‘Mehliseni kimi ukuba ngimbone ngamehlo ami.’ Sathi enkosini: ‘Umfana akanakumshiya uyise; uma emshiya, uyise uzakufa.’ Wathi wena ezincekwini zakho: ‘Uma umfowenu omncane engehli nani, anisayikubuye nibone ubuso bami.’ Kwathi sesikhuphukele encekwini yakho ubaba, samlandisa amazwi enkosi. “Wathi ubaba: ‘Buyelani, nisithengele ukudlana.’ Sathi thina: ‘Asinakwehla. Uma umfowethu omncane enathi, siyakwehla, ngokuba asinakubona ubuso balowo muntu, uma umfowethu omncane engenathi.’ “Yayisithi kithi inceku yakho ubaba: ‘Niyazi ukuthi umkami wangizalela amadodana amabili. Enye yaphuma kimi; ngathi: Impela idatshuliwe nokudatshulwa; angiyiboni kuze kube manje. Nanxa nithatha nalena, niyisuse kimi, yehlelwa yingozi, niyakwehlisela izimvi zami endaweni yabafileyo ngosizi.’ “Kalokhu nxa ngifika encekwini yakho ubaba, umfana engenathi, lokhu inhliziyo yakhe ibambelele enhliziyweni yomfana, kuzakuthi lapho ebona ukuthi umfana akakho, afe, izinceku zakho zibe zehlisela endaweni yabafileyo izimvi zenceku yakho ubaba ngosizi. Ngokuba inceku yakho yaba yisibambiso somfana kubaba, yathi: ‘Uma ngingambuyiseli kuwe, ngiyakuba necala kubaba kuze kube phakade.’ “Ngalokho inceku yakho ake ihlale esikhundleni somfana, ibe yisigqila senkosi, umfana akhuphuke nabafowabo. Ngokuba ngingakhuphukela kanjani kubaba, umfana engenami, funa ngibone okubi okuzakumehlela ubaba, na?”
UGenesise 44:14-34 Contemporary Zulu Bible 2024 (CZB24)
UJuda nabafowabo bangena endlini kaJosefa; ngoba wayeselapho, bawa phansi phambi kwakhe. UJosefa wayesethi kubo: “Yisenzo sini lesi enisenzile na? Anazi yini ukuthi umuntu onjengami angabhula na? UJuda wasesithi: Sizakuthini enkosini yami? sizokhuluma ngani? noma singazihlanza kanjani na? UNkulunkulu uthole ububi bezinceku zakho; bheka, siyizinceku zenkosi yami, thina naye okufunyenwe kuye indebe. Wathi: “UNkulunkulu makangenze ngikwenze lokho; kepha umuntu ofunyanwa esandleni sakhe indebe, uyakuba yinceku yami; wena-ke khuphuka uye kuyihlo ngokuthula. UJuda wayesesondela kuye, wathi: “Awu, nkosi yami, inceku yakho mayikhulume izwi ezindlebeni zenkosi yami, futhi intukuthelo yakho mayingayivuthi encekwini yakho, ngokuba unjengoFaro; Inkosi yami yasibuza izinceku zayo yathi: Lilobaba yini kumbe umfowenu? Sathi enkosini yami: ‘Sinobaba ixhegu, nomntwana wobungane bakhe omncane; umfowabo wafa, yena wasala yedwa kunina, uyise wamthanda. Wathi wena ezincekwini zakho: ‘Mehliseleni kimi, ukuze ngimbone ngamehlo ami.’ Sathi enkosini yami: Indodana ayinakumshiya uyise, ngokuba uma imshiya uyise, uyise uyakufa; Wathi wena ezincekwini zakho: ‘Uma umfowenu omncane engehli nani, anisayikubona ubuso bami futhi. Kwasekusithi ekunyukeni kwethu kunceku yakho, ubaba, samtshela amazwi enkosi yami. Wathi ubaba: “Buyelani, nisithengele ukudla.” Futhi sathi: Ngeke sisuse; uma umfowethu omncane enathi, siyakwehla; ngoba ngeke sibubone ubuso bendoda uma umfowethu omncane engekho kithi. Inceku yakho ubaba yathi kithi: ‘Niyazi nina ukuthi umkami wangizalela amadodana amabili. Enye yaphuma kimi, ngathi: Impela idatshuliwe; futhi angizange ngimbone kusukela ngaleso sikhathi. Futhi uma futhi nikususa kimi futhi ehlelwa okubi, niyokwehlisela izinwele zami ezimpunga endaweni yabafileyo ngokudabuka. Uma ngifika encekwini yakho, ubaba, futhi indodana ingekho kithi; ebona ukuthi impilo yakhe iboshelwe empilweni yomfana; Uma ebona ukuthi umfana akekho kithi, uzokufa; izinceku zakho ziyakwehlisela izinwele ezimpunga zenceku yakho, ubaba ethuneni ngosizi. Ngokuba inceku yakho yenze isibambiso sendodana nobaba, yathi: ‘Uma ngingayikumletha kuwe, ngiyakuthwala icala likababa kuze kube phakade. Manje ake inceku yakho ihlale esikhundleni somfana, isigqila senkosi yami; umfana akhuphuke nabafowabo. Ngoba ngingakhuphukela kanjani kubaba, umfana engekho nami? ukuze ngingabuboni ububi obehlela ubaba.