UGenesise 37:19-28
UGenesise 37:19-28 IBHAYIBHELI ELINGCWELE (ZUL59)
Bakhulumisana omunye nomunye, bathi: “Bhekani, inyanga yamaphupho iyeza. Ngalokho wozani, siyibulale, siyiphonse komunye wemigodi, bese sithi: ‘Isilwane esibi siyidlile,’ sibone ukuthi azakuba yini amaphupho ayo.” URubeni wakuzwa, wamophula esandleni sabo ngokuthi: “Asingambulali.” URubeni wathi kubo: “Ningachithi gazi; mphonseni kulo mgodi osehlane, ningabeki isandla kuye,” ukuba amophule esandleni sabo, ambuyisele kuyise. Kwathi uJosefa esefike kubafowabo, bamkhumula ingubo yakhe, leyo ngubo enemikhono emide ayeyigqokile. Bamthatha, bamphonsa emgodini; umgodi wawungenalutho, kungekho manzi kuwo. Bahlala phansi ukuba badle isinkwa; baphakamisa amehlo abo, babona; bheka, kwafika ihele labakwa-Ishmayeli livela kwaGileyadi, linamakamela alo ethwele inhlaka nebhalisamu* nemure,* likwewusela eGibithe. Wayesethi uJuda kubafowabo: “Kuyakusizani, uma simbulala umfowethu, sifihle igazi lakhe, na? Wozani sithengise ngaye kwabakwa-Ishmayeli, isandla senu singabi phezu kwakhe, ngokuba ungumfowethu, uyinyama yethu.” Abafowabo bamlalela. Kwase kudlula abathengi bakwaMidiyani; bamdonsa uJosefa, bamkhuphula emgodini, bathengisa ngoJosefa kwabakwa-Ishmayeli ngezinhlamvu ezingamashumi amabili zesiliva. Labo-ke bamusa uJosefa eGibithe.
UGenesise 37:19-28 Contemporary Zulu Bible 2024 (CZB24)
Basebekhulumisana besithi: Khangelani, nangu umphuphi esiza. Wozani manje simbulale, simphonse emgodini othile, sithi: ‘Udliwe yizilwane ezimbi, sibone ukuthi ayakuba yini ngamaphupho akhe.’ URubeni wakuzwa, wamsindisa esandleni sabo; wathi: “Masingambulali.” URubeni wathi kubo: “Ningachithi gazi, kepha mphonseni kulo mthombo osehlane, ningabeki isandla kuye; ukuze amkhulule esandleni sabo, ambuyisele kuyise. UJosefa esefikile kubafowabo, bamhlubula uJosefa ingubo yakhe, ingubo yakhe enemibala eyayimbethe; Bamthatha, bamphonsa emthonjeni; umthombo wawungenalutho, kungekho manzi kuwo. Bahlala phansi ukuba badle isinkwa, baphakamisa amehlo abo, babheka, bheka, kwafika isixuku sabakwa-Ishmayeli bevela kwaGileyadi namakamela alo ethwele izinongo, nebhalisamu, nomure, behlela ukukwehlisela eGibithe. UJuda wasesithi kubafowabo: Kuzasizani ukuthi sibulale umfowethu, sifihle igazi lakhe? Wozani simthengise kwabakwa-Ishmayeli, isandla sethu masingabi phezu kwakhe; ngokuba ungumfowethu nenyama yethu. Abafowabo basutha. Kwase kudlula abathengi bakwaMidiyani; bamkhipha uJosefa emgodini, bakhuphula uJosefa, bathengisa ngoJosefa kuma-Ishmayeli ngamashekeli angamashumi amabili esiliva; bamyisa uJosefa eGibithe.
UGenesise 37:19-28 IsiZulu 2020 (ZUL20)
Bathi omunye komunye: “Nansi inyanga yamaphupho iza. Wozani siyibulale, siyiphonse komunye wemigodi, bese sithi kubaba: ‘Udliwe yisilwane esibi sasendle,’ sibone-ke ukuthi amaphupho akhe ayofika kuphi.” URubeni ekuzwa lokho, wazama ukumphephisa kubo, wathi: “Asingambulali. Ningalichithi igazi! Mphonseni emgodini khona lapha ehlane, ningambeki isandla!” Wayefuna ukumphephisa kubo ukuze amphindisele kuyise. Uthe lapho uJosefa efika kubafowabo, bamhlubula ingubo yakhe ayeyigqokile embalabala, enemikhono emide. Bamthatha, bamphonsa emgodini owawomile, ungenamanzi. Bahlala phansi, badla; kuthe bephakamisa amehlo, babona ihele labakwa-Ishmayeli liqhamuka kwaGileyadi, amakameli abo ethwele inhlaka, nebhalisamu, nemure, bekwehlisela eGibhithe. UJuda wathi kubafowabo: “Siyozuzani ngokubulala umfowethu, bese sifihla igazi lakhe na? Asimthengisele abakwa-Ishmayeli engenamyocu, ngokuba ungumfowethu, uyinyama yethu.” Abafowabo bamlalela. Kwathi lapho kwedlula abahwebi bakwaMidiyani, bamkhipha uJosefa emgodini, bamthengisa kwabakwa-Ishmayeli ngezinhlamvu zesiliva ezingama-20, ababe sebemthatha bahamba, baya naye eGibhithe.