U-Eksodusi 39:32-43
U-Eksodusi 39:32-43 IsiZulu 2020 (ZUL20)
Waphothulwa kanjalo-ke wonke umsebenzi wethabanakeli lethende lokuhlangana; abantu bakwa-Israyeli benza njengakho konke uSimakade ayemyale ngakho uMose. Baliletha ithabanakeli kuMose, ithende, nayo yonke impahla yalo: izinkintsho, amapulangwe, imishayo, izinsika nezisekelo zazo, okokufulela okwakwenziwe ngezikhumba zezinqama ezidaywe zaba bomvu, okokufulela kwezikhumba zamahlengethwa, ikhethini lokuhenqa, umphongolo wobufakazi, izingongolo zawo, isembozo esiyisihlalo somusa; itafula nayo yonke impahla yalo, nesinkwa soBukhona bukaSimakade; uthi lwezibani olwenziwe ngegolide elicwengekileyo nezibani zalo zihleliwe, nakho konke okuhambisana nalo, amafutha okukhanyisa, i-althare legolide, amafutha okugcoba, impepho enuka kamnandi, isihenqo ekungeneni kwethende, i-althare lethusi, inetha lalo lethusi, izingongolo zalo, nazo zonke izimpahla zalo, umcengezi nesinqe sawo, amakhethini egceke, izinsika nezisekelo zalo, ikhethini elihenqa isango legceke, izintambo zalo, izikhonkwane zalo, nakho konke okusetshenziselwa inkonzo yethabanakeli ethendeni lokuhlangana, izingubo zokukhonza endaweni engcwele ezenziwe ngokulukiwe, izingubo ezingcwele zika-Aroni umphristi, nezamadodana akhe zokukhonza bengabaphristi. Abantu bakwa-Israyeli bawenza wonke umsebenzi njengalokhu uSimakade ayemyalile uMose. UMose wawuhlola wonke umsebenzi, wawubona ukuthi wenziwe njengalokhu uSimakade ayemyalile, ngakho-ke uMose wababusisa.
U-Eksodusi 39:32-43 IBHAYIBHELI ELINGCWELE (ZUL59)
Njalo-ke kwaqedwa wonke umsebenzi wetabernakele* letende lokuhlangana; abantwana benza njengakho konke uJehova amyale ngakho uMose; benze njalo-ke. Baliletha itabernakele kuMose, itende nempahla yalo yonke, nezinkibaniso zalo, namapulangwe alo, nemishayo yalo, nezinsika zalo, nezinyawo zalo, nesifulelo sezikhumba ezibomvu zezinqama, nesifulelo sezikhumba zamatahasi,* nesihenqo seveli, nomphongolo wobufakazi, nezinti zawo, nesihlalo somusa; itafula nezinto zonke zalo, nezinkwa zokubukwa; uthi olucwengekileyo lwezibani nezibani zalo, izibani zihleliwe, nezinto zonke zalo, namafutha okukhanyisa, ne-altare legolide, namafutha okugcoba, nempepho ethaphukayo, neveli lomnyango wetende; i-altare lethusi, nehele lalo lethusi, nezinti zalo, nezinto zonke zalo, nomcengezi nesinqe sawo; izilenge zegceke, nezinsika zalo, nezinyawo zalo, neveli lesango legceke, nezintambo zalo, nezikhonkwane zalo, nempahla yonke yenkonzo yetabernakele, netende lokuhlangana; izambatho ezenziwe kahle zokukhonza endaweni engcwele, nezambatho ezingcwele zika-Aroni umpristi, nezambatho zamadodana akhe zokukhonza esikhundleni sobupristi. Njengakho konke uJehova amyale ngakho uMose, benze njalo abantwana bakwa-Israyeli wonke umsebenzi. UMose wabona wonke umsebenzi; bheka, babewenzile; njengalokho uJehova eyalile, bawenza kanjalo; uMose wababusisa.
U-Eksodusi 39:32-43 Contemporary Zulu Bible 2024 (CZB24)
Waqedwa-ke wonke umsebenzi wetende lokuhlangana; abantwana bakwa-Israyeli benza njengalokho uJehova emyalile uMose, benze njalo-ke. Baliletha itabernakele kuMose, itende, nayo yonke impahla yalo, nezisekelo zalo, nezinsika zalo, nemishayo yalo, nezinsika zalo, nezinyawo zalo, nesembozo sezikhumba zamanqama ezidaywe zaba bomvu, nesembozo sezikhumba zamatahasi, nesihenqo sengubo; umphongolo wobufakazi nezinti zawo nesihlalo somusa; itafula nezitsha zalo zonke nezinkwa zokubukwa, uthi lwezibani oluhlanzekile nezibani zalo, nezibani zokulungiswa, nezinto zalo zonke, namafutha okukhanyisa, ne-altare legolide, namafutha okugcoba, nempepho yamakha, nezilenge zomnyango wetabernakele; i-altare lethusi, nehele lalo lethusi, nezinti zalo, nazo zonke izinto zalo, nomcengezi, nothi lwawo, Izilenge zegceke, nezinsika zalo, nezinyawo zalo, nezilenge zesango legceke, nezintambo zalo, nezikhonkwane zalo, nezinto zonke zenkonzo yetabernakele letende lokuhlangana, Izingubo zomsebenzi wenkonzo endlini engcwele nezingubo ezingcwele zika-Aroni umpristi nezingubo zamadodana akhe zokukhonza ubupristi. Njengakho konke uJehova amyale ngakho uMose, abantwana bakwa-Israyeli bawenza wonke umsebenzi. UMose wawubheka wonke umsebenzi, bheka, bawenza njengokuyala kukaJehova, bawenza; uMose wababusisa.