2 AmaKhosi 5:1-19
2 AmaKhosi 5:1-19 IsiZulu 2020 (ZUL20)
UNahamani, umkhuzi wempi yenkosi yase-Aramu, wayengumuntu omkhulu phambi kwenkosi yakhe, otusekayo, ngokuba uSimakade wayenze ukuba i-Aramu linqobe ngaye, futhi wayeyiqhawe elinamandla, kodwa wayenochoko. Ama-Aramu ayephume ngamaviyo ukuyophanga, abuya kwa-Israyeli nentombazana encane eyayiyincekukazi yomkaNahamani. Yathi enkosikazini yayo: “Sengathi inkosi yami ingaya phambi komphrofethi oseSamariya, khona eyakuyiphilisa ochokweni lwayo.” Yangena, yatshela inkosi yayo yathi: “Intombazana yakwa-Israyeli yasho ukuthi nokuthi.” Inkosi yase-Aramu yayisithi: “Hamba uye khona; ngizakuthumela incwadi enkosini yakwa-Israyeli.” Wahamba, wathatha amathalenta esiliva alishumi nezinhlamvu zegolide eziyizi-6 000, nezingubo ezilishumi zokuphendulela. Waletha incwadi enkosini yakwa-Israyeli, ethi: “Manje, lapho le ncwadi ifika kuwe, yazi ukuthi ngithumele kuwe uNahamani, inceku yami, ukuba umphilise ochokweni lwakhe.” Kwathi inkosi yakwa-Israyeli isiyifundile incwadi, yaklebhula izingubo zayo, yathi: “Mina nginguNkulunkulu yini ukuba ngibulale, ngiphilise, ukuze lo athumele kimi umuntu ukuba ngimphilise ochokweni lwakhe na? Ake niqonde, nibone ukuthi ufuna ithuba lokulwa nami.” Kwathi ukuba u-Elisha, umuntu kaNkulunkulu, ezwe ukuthi inkosi yakwa-Israyeli iziklebhulile izingubo zayo, wathumela enkosini, wathi: “Uziklebhuleleni izingubo zakho na? Makeze kimi, yikhona ezokwazi ukuthi kukhona umphrofethi kwa-Israyeli.” Wayesefika uNahamani namahhashi akhe nezinqola zakhe, wema ngasemnyango wendlu ka-Elisha. U-Elisha wathumela isithunywa kuye, wathi: “Hamba ugeze kasikhombisa eJordani; inyama yakho izobuyela esimweni sayo, uhlambuluke.” Kepha uNahamani wathukuthela, wahamba, wathi: “Mina bengithi impela uzophuma eze kimi, ame abize igama likaSimakade, uNkulunkulu wakhe, aphunge ngesandla sakhe phezu kwaleyo ndawo, aphulukise onochoko. I-Abhana neFariphari, imifula eseDamaseku, ayingcono yini kunawo wonke amanzi akwa-Israyeli na? Bengingegeze yini kuyo, ngihlambuluke na?” Wayesephenduka, wahamba ethukuthele. Kepha izinceku zasondela, zakhuluma kuye, zathi: “Baba, ukuba umphrofethi ubekhulume kuwe into enkulu, ngabe ungayenzanga yini na? Kakhulu kangakanani-ke, uma ethi kuwe: ‘Geza, uhlambuluke’ na?” Wayesehla, wazicwilisa kasikhombisa eJordani njengokusho komuntu kaNkulunkulu; inyama yakhe yabuya yaba njengenyama yomntwana omncane, wahlambuluka. Wayesebuyela kumuntu kaNkulunkulu, yena nabantu bakhe bonke, weza, wema phambi kwakhe, wathi: “Uyabona-ke, sengiyazi ukuthi akekho uNkulunkulu emhlabeni wonke, kodwa kwa-Israyeli kuphela, ngakho-ke ake wamukele isipho encekwini yakho.” Kepha, wathi: “Ngifunga ngiyagomela phambi kukaSimakade, angiyukwamukela lutho.” Wamncenga ukuba asamukele, kodwa wenqaba. Wayesethi uNahamani: “Uma kungenjalo, inceku yakho mayinikwe umthwalo weminyuzi emibili womhlabathi, ngokuba inceku yakho ayisayukunikela ngomnikelo wokushiswa nomhlatshelo kwabanye onkulunkulu, kodwa kuSimakade kuphela. Kulokhu uSimakade makayithethelele inceku yakho lapho inkosi yami ingena endlini kaRimoni ukuyokhuleka khona, yencike esandleni sami, nami ngiguqe endlini kaRimoni; lapho ngiguqa endlini kaRimoni, uSimakade makayithethelele inceku yakho kulokho.” Wathi kuye: “Hamba ngokuthula.” Wahamba, wasuka kuye ibangana.
2 AmaKhosi 5:1-19 IBHAYIBHELI ELINGCWELE (ZUL59)
UNahamani induna yempi yenkosi yase-Aramu wayengumuntu omkhulu phambi kwenkosi yakhe, otusekayo, ngokuba uJehova wayenikile i-Aramu ukunqoba ngaye; futhi wayeyiqhawe elinamandla, kepha wayenochoko. Ama-Aramu ayephumile ngamaviyo, abuya ezweni lakwa-Israyeli enentombazana encane; yayiyincekukazi yomkaNahamani. Yathi enkosikazini yayo: “Sengathi inkosi yami ingaba phambi komprofethi oseSamariya; khona ibiyakuphiliswa ochokweni lwayo.” Yangena, yatshela inkosi yayo, yathi: “Intombazana yasezweni lakwa-Israyeli yasho ukuthi nokuthi.” Inkosi yase-Aramu yayisithi: “Yiya khona; ngizakuthuma incwadi enkosini yakwa-Israyeli.” Wasuka, wahamba namatalenta* ayishumi esiliva nezinhlamvu eziyizinkulungwane eziyisithupha zegolide, nezingubo eziyishumi zokuphendulela. Waletha incwadi enkosini yakwa-Israyeli, ethi: “Manje, lapho le ncwadi ifika kuwe, bheka, ngithumile uNahamani inceku yami kuwe ukuba umphilise ochokweni lwakhe.” Kwathi inkosi yakwa-Israyeli isiyifundile incwadi, yaklebhula izingubo zayo, yathi: “Mina nginguNkulunkulu yini ukuba ngibulale, ngiphilise, ukuze lo athumele kimi umuntu ukumphilisa ochokweni lwakhe, na? Ake niqonde, nibone ukufuna kwakhe ithuba lokulwa nami.” Kwathi u-Elisha umuntu kaNkulunkulu esezwile ukuthi inkosi yakwa-Israyeli iklebhulile izingubo zayo, wathumela enkosini, wathi: “Uklebhuleleni izingubo zakho na? Makeze kimi, aze azi ukuthi kukhona umprofethi kwa-Israyeli.” Wayesefika uNahamani namahhashi akhe nezinqola zakhe, wema ngasemnyango wendlu ka-Elisha. U-Elisha wathuma isithunywa kuye ngokuthi: “Hamba ugeze kasikhombisa eJordani; kuyakuthi inyama ibuyele kuwe, uhlambuluke.” Kepha uNahamani wathukuthela, wahamba, wathi: “Bheka, bengithi uyakuphumela nokuphumela kimi, eme abize igama likaJehova uNkulunkulu wakhe, aphunge ngesandla sakhe phezu kwaleyo ndawo, aphilise onochoko. O-Abana noFariphari, imifula yaseDamaseku, abangcono kunawo onke amanzi akwa-Israyeli na? Ngingegeze kuyo yini, ngihlambuluke, na?” Wayesephenduka, wahamba ethukuthele. Kepha izinceku zasondela, zakhuluma kuye, zathi: “Baba, uma umprofethi ebekhulume kuwe into enkulu, ngabe ungayenzanga na? Kakhulu kangakanani, uma ethi kuwe: ‘Geza, uhlambuluke,’ na?” Wayesehla, wazicwilisa kasikhombisa eJordani njengezwi lomuntu kaNkulunkulu; inyama yakhe yabuya yaba njengenyama yomntwana omncane, wahlambuluka. Wayesebuyela kulowo muntu kaNkulunkulu, yena nabantu bakhe bonke, weza, wema phambi kwakhe, wathi: “Bheka, sengiyazi ukuthi akakho uNkulunkulu emhlabeni wonke, kwa-Israyeli kuphela; ngakho ake wamukele isipho encekwini yakho.” Kepha wathi: “Kuphila kukaJehova engimi phambi kwakhe, angiyikwamukela lutho.” Wamncengisisa ukuba asamukele, wenqaba kodwa. Wayesethi uNahamani: “Uma kunjalo, inceku yakho mayinikwe umthwalo weminyuzi* emibili womhlabathi, ngokuba inceku yakho ayisayikunikela ngomnikelo wokushiswa nomhlatshelo kwabanye onkulunkulu, kuJehova kuphela. Kule nto uJehova makayithethelele inceku yakho: ekungeneni kwenkosi yami endlini kaRimoni ukukhuleka khona, isencika esandleni sami, ngiguqe nami endlini kaRimoni, lapho ngiguqa endlini kaRimoni, uJehova makayithethelele inceku yakho le nto.” Wathi kuye: “Hamba ngokuthula.” Wahamba, wasuka kuye ibangana.
2 AmaKhosi 5:1-19 Contemporary Zulu Bible 2024 (CZB24)
UNahamani induna yempi yenkosi yase-Aramu wayengumuntu omkhulu enkosini yakhe nodumo, ngokuba ngaye uJehova wanikela kuma-Aramu; naye wayeyiqhawe elinesibindi, kodwa enochoko. Ama-Aramu aphuma ngobunengi, athumba incekukazi ezweni lakwa-Israyeli; wamlinda umkaNahamani. Yathi enkosikazini yayo: “Sengathi uNkulunkulu, inkosi yami, ube nomprofethi oseSamariya! ngoba wayezasinda ochokweni lwakhe. Wasengena omunye watshela inkosi yakhe wathi: Itsho njalo intombi evela elizweni lakoIsrayeli. Inkosi yase-Aramu yathi: “Hamba, hamba, ngithumele incwadi enkosini yakwa-Israyeli.” Wahamba, wathatha amatalenta ayishumi esiliva namashekeli ayizinkulungwane eziyisithupha egolide nezingubo eziyishumi zokuphendulela. Waletha incwadi enkosini yakwa-Israyeli, wathi: “Uma le ncwadi ifika kuwe, bheka, ngiyakuthumela kuwe inceku yami uNahamani ukuba umpholise ochokweni lwakhe.” Kwathi inkosi yakwaIsrayeli iyifunda incwadi, yaklebhula izingubo zayo, yathi: “NginguNkulunkulu yini ukuba ngibulale futhi ngiphilise, ukuthi lo muntu athumele kimi ukuba ngiphilise umuntu ochokweni lwakhe.”? ngalokho qaphelani nibone ukuthi ufuna ukuxabana nami. Kwathi u-Elisha umuntu kaNkulunkulu esezwile ukuthi inkosi yakwa-Israyeli iklebhulile izingubo zayo, wathumela enkosini wathi: “Uklebhulelani izingubo zakho na? akeze kimi manje, futhi uzokwazi ukuthi kukhona umprofethi kwa-Israyeli. UNahamani wayesefika namahhashi akhe nezinqola zakhe, wema ngasemnyango wendlu ka-Elisha. U-Elisha wathuma isithunywa kuye, sokuthi: “Hamba ugeze kasikhombisa eJordani, inyama yakho ibuyele kuwe, uhlambuluke.” Kepha uNahamani wathukuthela, wahamba, wathi: “Bheka, bengithi uyakuphumela nokuphuma eze kimi, ame, abize igama likaJehova uNkulunkulu wakhe, ashaye isandla sakhe phezu kwaleyo ndawo naphezu konochoko.” OAbana noFariphari, imifula yaseDamaseku, abangcono yini kunawo wonke amanzi akwa-Israyeli? anginakugeza kuwo, ngihlambuluke, na? Ngakho waphenduka wahamba ngokucasuka. Izinceku zakhe zasondela zakhuluma kuye, zathi: “Baba, uma umprofethi ebekutshele into enkulu ukuba ukwenze, ubungayikuyenza na?” kakhulu kangakanani kunalokho asho kuwe ukuthi: Geza, uhlambuluke, na? Wehla, wabhapathizwa kasikhombisa eJordani njengezwi lomuntu kaNkulunkulu; inyama yakhe yabuya yaba njengenyama yomntwana omncane, wayesehlambulukile. Wabuyela kumuntu kaNkulunkulu, yena nesixuku sakhe sonke, weza, wema phambi kwakhe; wathi: Bheka, manje ngiyazi ukuthi akukho Nkulunkulu emhlabeni wonke, ngaphandle kwa-Israyeli; Khuleka, uthathe isibusiso encekwini yakho. Kodwa wathi: Kuphila kukaJehova engimi phambi kwakhe, kangiyikwamukela muntu. Wamncenga ukuba asamukele; kodwa wala. Wayesethi uNahamani: “Inceku yakho ayiyikunikwa iminyuzi emibili yomhlaba na? ngoba inceku yakho ayisayikunikela umnikelo wokutshiswa lomhlatshelo kwabanye onkulunkulu ngaphandle kweNKOSI. Kulokhu, uJehova uyakuthethelela inceku yakho ukuthi uma inkosi yami ingena endlini kaRimoni ukukhonza khona, yeyame esandleni sami, mina ngikhothame endlini kaRimoni; uma ngikhothama endlini kaRimoni, uJehova athethelele inceku yakho kule ndaba. Wathi kuye: “Hamba ngokuthula.” Ngakho wasuka kancane kuye.