Matiu 4
4
Seitan pusi warup Iesu inap taiwandin
1Boge God Guewa Woup Seni Iesu nau pua aen, Seitan pusi warup tayawapen menan. 2Taba uon sinunu in doreni wam ge mum apane dere uon tani ewap me enup aren. 3Seitan, pusi warup taini apanewa, me inap taue anega wan, “Ge God Otua wanigewa, gwat ma diamo taba buredi venat musep na.” 4Go Iesu gare anega wan, “God nop mega ok anega seane,
Waenapan inak muga ibariwa taba naine megenat uon,
go God nop waini gapan inak wariwanum,”
ap anega wan. 5Boge Seitan sia nau pa sewa Ierusalem dot ae ware God Paewa aigarip aigap iragenawa gapan baraen ap mepe yaoyao yonen. 6Seitan anega dieni, “Ge God Otua wanigewa, map mepe bup ta wa kugunak aipa piupa wanik, iwa God nop mega ok anega seane,
God wap anea mega upi taue,
genan kwayupaga yaentuk ta naugep vitai,
Anea nanimup di warak nauge vise pia bat gimagain,
pusiga agima ya en manamai.”
7Seitan ame wani Iesu gare wadien, “Ne ap ya tain, iwa God nop mega ok anega seane,
Ayop gega God irewa yawapen menan ya nanamasewa.”
8Sia Seitan Iesu wat naue tunup ideve aigapewa dot ae, boge piup at at iragi toemu kakae guragut muga muga ewasen. 9Ewase Iesu anega dien, “Ge iak poe inanap ta wa taragat nimanegewa, toemu mame iravi genain,” ap anega wan. 10Go Iesu gare anega dien, “Seitan, ae venek, asira ak! God nop mega ok anega seane,
Nu Ayop nuga God megenat wa taragaset,
ayamat mega taivinait.”
11Boge Seitan Iesu ae ve aen, amba anea tauan Iesu wat agoasen.
Iesu nao mega erewa at Galili gapan watapen
12Wam ame ewap, Ayop Erot ita mega nagirewa Dion, waenapan dup iamuini apanewa, waran gwat nokap baraene. Iesu oit ame anuni gapan, me ewagai at Galili sia aen. 13Me at Galili taueni, me pa sewa mega Nasaret gapan ya wanden go ae ve aen pa sewa da, kaum awan etope, yaua Kaponiam gapan iniwandin. At ame dugup Sebulon ge Naptali arik muga aen. 14Ap venaseni gapan God nop mega watagaet waiwandini apane Aisaya wani tavewa tauen. Aisaya ok anega sen,
15At Sebulon ge at Naptali,
negin aen awan bawarewa tauiniwa,
kaum Diodan asepa gan,
at Galili ian ugupe aruga wanumuine arewa.
16Waenapan ameme imu pose mum tauen iniwanumune,
ganat baware yawain.
Bop guewa inamup wandini nagirewa,
ganat inamup taueta.
Aisaya ok anega sen. 17Wam ame use aeniwa, Iesu opata mega erewa wan, “Koewa ega gapan imuya entan tan, toemu kimaniwa onen mananiwan.”
Wa ewamot venamu erewa waiwandin
18Iesu kaum awan Galili etop ap aiwandini, me apan tase gwani dere yawamon, Saimon, yaua dawa Pita, amba me gwaniwa Anduru. Mu ia muga kauma uariwanum, mu meo dawane taine nagirewa. 19Iesu anega wan, “Ewanap onaen, ta ewaepen gapan e waenapan dawane tan.” 20No utap, mu ia muga ae vean amba me ewap amon.
21Ap mepe use amonewa, me tase gwani derewa sia yawamon, yaumua Diemis ge Dion, ame apan Sebedi otu waiwa. Mu kabum muga gwanap ia muga nadi waran tata kakayat taiwanunum. Amba Iesu venamu wan. 22Ap gine tutup kabum muga ge mamamua ae vemon amba Iesu ewap amon.
Iesu vek nagirewa wat inakam mumiwandini
23Iesu at Galili iravi tau ge tau aen. Diu nagirewa iup anuine paewa gwanap wadidiam wandin. God toemu mega Oise Kakaewa opata gapan waiwandin. Amba waen apan enkana ankana nagirewa amba vek gine ugup ugup iragi wat inakam mumiwandin. 24Me ap taiwandini oisewa, at Siria iragi senare tau aen. Menan waenapan vek muga ugup ugup iragi tambumon me inap tauane. Ame ugu vegaek baware anuine nagirewa, airampu wa guguramoniwa, wam wam gapan vek daram daram taine nagirewa, amba pusi nani itani waniwa, me iragi wat inakam mumen. 25Waenapan arugataet at ugup ugup gapan tauane ewap amuiwanumun. At ugup ugup ame yaumua, at Galili ge at Diudia amba pa sewa yaua Pa Aonagaet, amba pa sewa Ierusalem, amba kaum Diodan asepa gan wanumuinewa.
Okuqokiwe okwamanje:
Matiu 4: dgz
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2013, Wycliffe Bible Translators, Inc. All rights reserved.
