Matiu 9
9
E Iesu e kato haniga poutsi a katuun a matekata
(Mak 2:1-12, Luk 5:17-26)
1Be Iesu e osana tara tolaala, me kopis sila poutsuna i hapalana a ramun a perperere mena tukuna tara taun hamatskö i tanen. 2Ba u katuun e söata menarimei a katuun a matekata i tanen, e opöma tara pöapöa. A pöata te tareia e Iesu u nihamana i taren, ba nonei e poeiena tara katuun a matekata, “A tsi pien, a torimölö e tatei tagolala poutsuna. A man markato a man omi i tamölö e luba hakapa nalila.” 3Ba palair u tson hihatuts tara Lo e hakats tunur me poeier, “A katuun teka e katsin gulena a nitsunono tere Sunahan.”
4Kaba e Iesu e atei sil hakapi u hakhakats i taren me poeiena, “Taraha tsiponi ba limiou te ka memiou u hakats homi i torimilimiou? 5Alimiou ema hanigami te poei mena gulei lia, ‘A markato a omi i tamölö e luba nalila?’ Tsi alia go pei aha? ‘Alö go takei bate lam?’ 6Alia e haröto ragi limiou u mirakol teka, alia tu butun Katunuma e ka has megu a nitagala i puta teka tego luba menai lia a man markato a man omi.” Be Iesu e poeiena tara katuun a matekata, “Alö go takei bate söatem a pöapöa i tamölö ba lö te lam i han.”
7Ba nonei e takeina me lauana i han i tanen. 8Pöata ti tareia u katuun u parpara koru a ka teka ba nori e matout korur. Taraha nori i tari te hala menai e Sunahan a mar nitagala teka tara katuun, ba nori e töan soloseier e Sunahan.
E Iesu e ngöi e Matiu
(Mak 2:13-17, Luk 5:27-32)
9A pöata te tataalaia e Iesu ba nonei e tareiena a töa katuun a solonen e Matiu bate gumna tara luman lulu takis. Be Iesu e poeiena i tanen, “Alö go kukutie mou lia.” Ba nonei e takeina me kukutienen. 10Be Iesu ena nou gono meraiena u katuun u parpara koru ti ron lului a takis na palair u katuun has i luma tere Matiu. Ba nori e gum gono mer e Iesu na u katunun tsitsilo i tanen me nou gono meraren. 11Ba pöata ti tareia u Parasi a ka teka ba nori e poeier turu katunun tsitsilo tere Iesu, “E hana ba Tson Hihatuts i tamilimiou te nou gono meraiena u katuun te luluer a takis na u palair u katuun u omi?” 12Kaba e Iesu e hengoe a ka teka me poeiena i taren, “U katuun te moar ta siki ema tatei la uari tere dokta. E möa. U katuun lasi te ka mer a siki te tatei la uar tere dokta. 13Alimiou gona lue mia ta niatei temar mouna uana u raranga teka turu Buku u Göagono: ‘Alia ema ngilegi u haats tuun. Alia e ngilegu u katuun egi taatagin a taina katuun.’ Alia uma la silemei tegomi ngö merai u katuun u niga. Alia u la silema tegomi ngö merai u katuun u omi.”
A markato te agono menari a kannou
(Mak 2:18-22, Luk 5:33-39)
14Tara pöata teka ba u katunun tsitsilo tere Jon a Tsonun Baptais e la uarima tere Iesu memi poeier, “Taraha tsiponi ba lam na u Parasi te roron agono nem a kannou te singo uamulam tere Sunahan, ba u katunun tsitsilo i tamölö tema agonori?” 15Ba e Iesu e ranga palis ranen me poeiena, “U katuun te karia tara hahitöl, e tatei taatagi hasir tara pöata te kagono merien a tson te hitöluna? Kaba e kamena a man lan e la nama romana ba tson te hitöluna te luba rarien. Ba nori te töan agonor romana.”
16Be Iesu e poeiena, “A katuun ema tatei hasamapenei a makumun labalaba a tsi tsimus tara tabutu turu labalaba u toutounei. Te markato uanen teka ba pöata te galuse rien ba makumun labalaba a tsimus te roropitsina bate takis ba nena a makumun labalaba a toutounei, ba tabutu te pan koru len talanou. 17Na tegi osuleia uain u tsimus tara pikpiköna meme a toutounei. Ba pikpiköna meme te takalana ba uain te tatsuna ba pikpiköna meme te omi hasina. Kaba te osule mialö a uain a tsimus tara kaan osul a tsimus, ba huol te ka haniga habotor.”
A pien tahol tara tson pepeito na tahol te hasebeleia turu hasobö tere Iesu
(Mak 5:21-43, Luk 8:40-56)
18Pöata te ranga noa naien a manka teka, ba töa tson pepeito turu Jiu e tasu nama me hatukunna i matanen me poeiena, “A pien tahol i tar e mate lala eni tuun. Kaba lö gona hatakopeia a limamölö i tanen ba nonei te töatöa poutsuna.” 19Be Iesu e takeina me la gono menen na u katunun tsitsilo has i tanen.
20Ba töa tahol te posa nitöan u rahatsing turu töa u maloto na u huol u hiningal e la silanama i murina e Iesu me sebelena a runguna u hasobö i tanen. 21A tahol e mar ranga uu teka turu hakats i tanen pouts, “Te sebele tuun goua lia turu hasobö tere Iesu balia te niga pouts gou.” 22Be Iesu e habiritsina me tara uana i tanen me poeiena, “E nigana, u nihamana i tamölö e kato haniga poutse lalou lö.” Ba nonei tara tsi pöata puku has teka ba tahol e niga poutsuna.
23A pöata te tasuia e Iesu i luma tara tson pepeito me hengoena ti tabe uu katuun bate getar. 24Ba nonei e poeiena, “Laiam. A pien tahol ema mate nei. Nonei e soho tununa.” Pöata ti hengoeien temar ranga uu e Iesu teka, ba nori e golgol sileren. 25Kaba pöata ti halakasa merai u katuun ielesala, be Iesu e tasuna me luena a limana pien tahol, ba pien tahol e takeina be niga poutsuna. 26Ba u bulungana tara ka teka e tasata uana tara mamana han.
E Iesu e kato haniga poutsi a huol a katuun a matakiou
27A pöata te la ba naia e Iesu a han teka, ba huol a katuun a matakiou e kukutie ren me ku hapanir me poeier, “A Hatutubunei tere Devit alö go taatagi ramou lam!” 28Be Iesu e tasuna tara luma ba u matakiou e la uarima i tanen ba nonei e poeiena i taren, “Alimiou e hamanemiou, alia e antunan kato negu a ka te ngile milimiou?” Ba nori e poeier i tanen, “Aa, O Tsunono.”
29Ba nonei e sebeleiena a mataren me poeiena, “E tatei mar butu uana turu nihamana i tamilimiou.” 30Ba man mata i taren e takalatana! Be Iesu e ranga hatagala mera nen me poeiena, “E möa tegona hatei mena milimiou ta katuun a ka teka!” 31Kaba nori i lala mena habulungana laner e Iesu tara mamana a man han hoboto.
E Iesu e kato haniga poutsi a katuun a biru
32A pöata ti lalen, ba u katuun emi piou ner a töa katuun a biru te kamei a liliahanei, tere Iesu. 33Be Iesu e tsuga ba nena a liliahanei a omi ba katuun e töan ranga poutsuna. Ba u katuun e asingoto korur me poeier, “E möa koru ta töa ta marka teka tego butu noa buia i Israel!” 34Kaba u Parasi i ranga me poeier, “A tsunono turu liliahanei te haleien a nitagala tego tsuga ba meraien u liliahanei u omi!”
E Iesu e taatagir u katuun
35E Iesu e hula laia tara mamana taun na man han hoboto. Ba e hihatuts lana tara man luman lotu turu Jiu bate habulungana la nena u Bulungana u Niga tara Nipepeito tere Sunahan. Na nonei e kato haniga pouts hasir u katuun ti kamei a mamana mar siki. 36Pöata te tara raien u katuun u parpara ti gonogono, ba nonei te taatagi koru ranen, taraha nori i kaan tutu here rai u sipsip te möa ta katunun taratarakap i taren. 37Be Iesu e poeiena turu katunun tsitsilo i tanen, “A kannou a parpara koru te tangohona, kaba e möa ta katunun kui ta parpara tega hagaleien. 38Nonei tego singo beiam limiou tara katuun te hatamana nena a kui, bate halane nama ta katunun kui tega gono beien a kannou.”
Okuqokiwe okwamanje:
Matiu 9: HLA 2020
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© (Active) Wycliffe Bible Translators, Inc. All rights reserved.
