Matiu 5
5
E Iesu e hihatutsia turu pokus
1-2A pöata te tareia e Iesu u katuun u parpara koru i gonoma, ba nonei e sei uana iasa turu pokus, me gumuna ba u katunun tsitsilo i tanen e larima, ba nonei e tanian hihatutsna i taren.
A nisasaala hamana
(Luk 6:20-23)
3Ba nonei e poeiena,
“U katuun te kato hateteneier a peisaren egi sasaala.
E Sunahan e ngö raneien u katunun sasaala,
taraha a Nipepeito tere Sunahan e ka uana i taren.
4Na u katuun te taatagir egi sasaala.
E Sunahan e ngö raneien u katunun sasaala,
taraha nonei e kato hagigaha poutse nou a nitaatagi i taren.
5Na u katuun te kakamotor batema tatei raharahari egi sasaala.
E Sunahan e ngö raneien u katunun sasaala,
taraha nori e lue riou a han i puta.
6Na u katuun te ngil korueier a markato te matsköna i matana e Sunahan egi sasaala.
Nori e here rari u katuun te besir na te maka siler a ka a niga.
E Sunahan e ngö ranoien u katunun sasaala,
taraha nori e masul riou.
7Na u katuun te taatagi rer a palair u katuun egi sasaala.
E Sunahan e ngö ranoien u katunun sasaala,
taraha nonei e taatagi has ranoien.
8Na u katuun a toriren te gogosona egi sasaala.
E Sunahan e ngö ranoien u katunun sasaala,
taraha nori ena tare roien.
9Na u katuun te nolo pouts rer a pala te hiaraharahar egi sasaala.
E Sunahan e ngö ranoien u katunun sasaala,
taraha nonei e ngö has ranoien romana a galapien i tanen.
10Na u katuun te kato hamatskö ria i matana e Sunahan
ba palair u katuun te kato homi raren egi sasaala.
E Sunahan e ngö ranoien u katunun sasaala,
taraha a Nipepeito tere Sunahan e ka uana i taren.
11“Alimiou te ka uamiou tara pala i tar, ba nori te ranga hohomi rariou limiou, bate kato hohomi rariou limiou, bate saka rari limiou u mamana u mar ranga u gamo, alimiou e tatei sasaala noahas miou. 12Alimiou go sasaala koruiam, taraha alimiou ena lue mou u hamatana pan koru i Kolö. Nonei ti markato hohomi has merai u propet ti ka i manasa.”
U sol na u ualesala
(Mak 9:50, Luk 14:34-35)
13E Iesu e ranga lel me poeiena, “Alimiou e here rami u soluna i puta. Kaba te tia banena u sol a nimal i tanen, e möa len ta maroro tegi markato menaien bate mal poutsina.#5:13 U sol hamana, a nimal i tanen ema tatei tianei, kaba u sol gamogamo a nimal i tanen e tatei tiana. E gi ba lasiin ba u katuun te tötö ria i oulunen.
14“Alimiou e here hasemi u ualesala tara mamana makum. Na taun te kana i ouluna u pokus ema antunan hamous nari. 15Na u katuun ema ron hakuluperi u lam bate kopo kap narien a sosopene. E möa. Nori e haka seie rien tara makumun gumgum turu lam bate alesala uana turu katuun hoboto te ka ria iahana luma. 16Na u ualesala i tamilimiou ega kato has uu iesana bate alesala uana turu katuun. Ba nori te tare riou a markato a niga i tamilimiou bate soloseier e Tamamilimiou i Kolö.”
U hihatuts tara man Lo tere Mosis
17E Iesu e ranga me poeiena, “Alimiou goma poeiemi alia u la silema tegomi luba menai a man Lo tere Mosis na u raranga turu propet. E möa. Alia u la silema tegomi kato hamouna koru menaien. 18Na lia e hatei hamana ragou limiou, u kolö na u puta e tatei kapa nou, kaba e möa ta tsi töa ta tsi makumun raranga tega tia iou tara man Lo, e antunana tara pöata te butu hakapa noa a mamanaka. 19Ba katuun te hipus nena a tsi tabubun makumun raranga tara man Lo bate las rena a palai egi markato has uu te markato uanen, nonei e katuun papala koru noa tara Nipepeito tere Sunahan. Kaba a katuun te hengoena a man raranga tere Sunahan, bate hatuts rena a palai egi markato has uu te markato uanen, nonei ena katuun pan noa tara Nipepeito tere Sunahan. 20Alia e hatei ragou limiou, te ngilin tasu mia limiou tara Nipepeito tere Sunahan, alimiou ego kukute hanigeiam u raranga i tanen, kaba te kukute mia limiou a markato turu tson hihatuts tara Lo na turu Parasi, alimiou ema antunan tasu moi tara Nipepeito tere Sunahan.”
U hihatutsina tara hiaraharaha
21Be Iesu e ranga lenina me poeiena, “Alimiou u hengo hakapa naiam u raranga ti hengoen u tuburara i manasa te poeiena, ‘Alö goma hihipuli ii. A katuun te hihipulina e la uanou turu kout.’ 22Kaba alia e hatei ragou limiou, te raharahe mia lö e toulamölö, alö e la mou turu kout. Na te ranga hohomi koru namia lö e toulamölö, alö e la uamou turu kout pan. Na katuun te ngöe nei e toulanen a momolö ena mots lauana turu tulana i hel. 23-24Kaba te katsin hatsunono mialö tere Sunahan balö te hakats sabe nem e toulamölö e raharahe noulö, kopis pouts uu i tanen balö tena ranga haniga pouts bumia tere toulamölö. Ba lö tena töan hatsunono uamou tere Sunahan.
25“Na tego katsin kout naia lö ta katuun, balö te ranga haniga pouts boroboro mia i tanen i mamuna tena butu möa limiou turu kout. Te moa talanen, ba nonei te kout nanoa lö tara tsonun hahamou, ba tsonun hahamou te hala menanoi lö tara polis, ba polis tena hake noa lö tara karabus. 26Na lia e hatei hamana korue goulö, alö ema antunan halakase roi tara karabus e antunana te hole moa lö u kout.”
U hihatutsina tara tou tsikolo
27Be Iesu e ranga lenina me poeiena, “Alimiou u hengo hakapa naiam u raranga te poeiena, ‘Alimiou goma tsikolomi.’ 28Kaba alia e hatei ragou limiou, a tson te tara uana tara tahol bate ka mena u hakats u omi i torinen, nonei e kato hakape lala a markato a omi. 29Tega kato homieia a pal mata tara pal matou i tamölö, balö te hasemen bate ba namen! Taraha, ema niga korunei tegi lapo ba mei u tuenrei hoboto i tamölö turu tula i hel, kaba ema omi bala nei tego tia uu a tsi töa a tsi makum turu tuenrei i tamölö. 30Tega kato homieia ualima tara pal matou i tamölö, balö te ngats kotsemen bate ba namen! Taraha, e omi koruna tegi lapo ba menai u tuenrei hoboto i tamölö turu tulana i hel, kaba ema omi bala nei tego tia uu a tsi töa puku a tsi makum turu tuenrei i tamölö.”
U hihatutsina turu katuun u hitöl te hialala kalakalar
(Matiu 19:9, Mak 10:11-12, Luk 16:18)
31Be Iesu e ranga lenina me poeiena, “Alimiou u hengo hakapa naiam u raranga te poeiena, ‘A tson te laba nena a tahol i tanen ego haleien u pepa te hatei nena a hitöl e kapana.’ 32Kaba alia e hatei ragou limiou, a tson te laba nena a tahol i tanen kaba tahol ema lue ii ta taina ta tson, a ka teka e kato here nanei a tahol teka a tahol a omi. Na tson te tölena a tahol a hitöl te laban a tson i tanen, a tson teka e here hase nei a tson te tsikolona.”
U hihatutsina turu ranga te mana uana iasa
33Be Iesu e ranga lenina me poeiena, “Alimiou u hengo has naiam u raranga ti hengoen u tuburara i manasa te poeiena, ‘Alö goma gamo ii te hamana uamölö iasa, kaba lö go kato hamani a ka te hamana sile mölö i matana a Tsunono.’ 34Kaba lia e hatei ragou limiou, alimiou goma hamana uami i Kolö, taraha u Kolö a makum tara nitsunono tere Sunahan. 35Na limiou goma hamana uami tara han i puta, taraha u puta e here nei u tötö te haholena e Sunahan a mounen. Na limiou goma hamana has uami i Jerusalem, taraha nonei a taun tara King a kapan. 36Na limiou goma hamana has uami i baku milimiou, taraha alimiou ema antunan kato hahiake mien, tsi ema antunan kato haruruhana nami ta tsi töa ta tsi hulu. 37Alimiou go poe tuun laseiam, ‘Aa’ tsi ‘E möa.’ Ta saha ta ka te ranga lel namou limiou e la hamanasa tala nama tere Satan.”
U hihatutsina tara hipou
(Luk 6:29-30)
38“Alimiou u hengo naiam u raranga te poeiena, ‘Tego kato homiea a katuun a matamölö, balö te kato homi hasem a matanen, na tego kato homi haseien a lihomölö balö te kato homi hasem a lihonen.’ 39Kaba alia e hatei ragou limiou, alimiou goma palisemi a katuun te kato homina i tamilimiou. E möa. Te tapalena a katuun a abuabu mölö tara pal matou, habirits balö te hatapala nem a hapala. 40Na te kout nena lö a töa katuun bate katsin luena u siot i tamölö, hala hasei u hasobö u ngahangaha i tamölö. 41Na te hasöate na lö a polis ta ka balö te tataala memien a töa kilomita, söata noahasi bate tataale mula a huol a kilomita. 42Pöata te harangata silena a katuun ta ka i tamölö, halei a ka te ngile nen. Na pöata te katsin haroho nena a katuun a ka i tamölö, alö goma tatei peits naien.”
Aragi ngilir u katuun te pakö rarioura
(Luk 6:27-28,32-36)
43Be Iesu e ranga lenina me poeiena, “Alimiou u hengo hakapa naiam u raranga te poeiena, ‘Alö go ngilir a man hahikapien i tamölö balö te pakö rem u katuun te paköe riou lö.’ 44Kaba alia e hatei ragou limiou, alimiou go ngil raiam u katuun te pakö rariou limiou, ba limiou te singo sile miou u katuun te kato hakamits rariou limiou. 45Te kato uamou limiou teka, ba limiou te haröto namou alimiou a galapien tere Tamamilimiou te kana i Kolö. Taraha, nonei e roron hapirena a pitala i tanen tara katuun a niga na tara katuun a omi has, na nonei e roron hapolena a langits tara katuun te kato hamatsköna na tara katuun tema kato hamatskö has nei. 46Aha te hala sile noi e Sunahan u hamatana i tamilimiou, te ngil puku merami limiou u katuun te ngil rariou limiou? U katuun te lulu takisir e markato has uar iesana. 47Na te kato haniga peisa mia limiou tara man hahikapien i tamilimiou, ga limiou e mar halhal uamiou ime tara palai? Te markato has uer u katuun u omi koru tema hamana uari tere Kristo. 48A markato i tamilimiou ega matskö nitöa, te markato has uana e Tamamilimiou i Kolö a markato i tanen e matskö nitöana.”
Okuqokiwe okwamanje:
Matiu 5: HLA 2020
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© (Active) Wycliffe Bible Translators, Inc. All rights reserved.
