MATA 21

1Yɔ hi sɛ̧ɛ̧b a Urusalima ya̧di, hi zaa a Baytifaaze a Kɔ̧ɔ̧b Ga̧a̧t ha, Yeesu her walɛsɛrɛ eerɛ yaahi hi dorɔ, raahi

2a rekin a raat bɔ gi nɛ muut duge nɛ zɛm pɛɛzumnɔɔ za ha̧y hi waaɔ dɔɔ di, pidinɛge nɛ kamsibe, 3za̧a̧nza gi warin hinza raanɛg a ha̧a̧ Ɗɛnt bɔ giya, gɔ gi anbɔ ɓɔrbɔ gi ɔɔ pɛɛzum wɔ hi zaa.

4Hin bɔ lab gi tuur anyɔ Bɛtya̧a̧kɛŋkya bɔ dɔgɔ gi wooyyɔ

5a raasin Siyona Waasiŋ a seem Waar mɔ gbɔɔl bɔ gi zaak gɛrɛ a mɔɔge, doo zultiisigya kar a pɛɛzum yɛl ha, hi a pɛɛzumwaa yɛl ha.

6Walɛsɛrɛ eer wɔ hi rek hi woo hinyɔ Yeesu raa nɛko. 7Hi kamz pɛɛzumnɔɔ bɔ hi waaɔ dɔɔ di, hi zaa hi ɓuu gbanya̧ a pɛɛzum wɔ hi yɛl ha. Yeesu kar ɗɔɔt gɔ a gbandil wɔ hi ɓuu hage. 8Dood kittɔnɔ hi ɓuu gbanya̧ a gbɔnɔdu, zaadɛ hi gbobz tɛ̧ɛ̧kpas hi kamz hi ɓuuk a gbɔnɔ bɔ gedu an hi zuun hatya̧. 9Saal wɔ hi gi a Yeesu muutdu hi wɔ hi gig fɔk kuudu hi ya̧a̧ɓooluko

a Hozana! raakɔ a seko gbɔɔltɔnɔ, Dawda waawalɔ! An Bɛt gi rɔbs Za̧a̧nyɔ zaa a Waar Bɛt nuŋg du! An bant gi wooy a bɛtha a Bɛt ge!

10Yɔ Yeesu gul a Urusalima kɔms dood Urusalimaya wɔ sɛw gɛrsɛ hi warɔ

a bɔ wal yɛrɛ?

Dood saal hi ta̧a̧

11a Bɛtya̧a̧kɛŋkya bɔ nuŋgɔ a Yeesu yɔ fu̧u̧ a Nazarɛd a Galile hɛbtdu ga.

12Yeesu tal a Bɛtluk du nin dood hinriŋsya wɔ hi zekya wɔ hi gi duhɔ sɛw; bisil tus-i̧i̧kya wɔ silya̧ hi gutu zebtigya wɔ doolya̧ ɗɔɔtilya wɔ. 13Wɛɛ raahi

a Bɛt ɗɛɛrwolɔ raa a hi el luk be a Bɛtzɔ̧k luko. Wɛɛ nɛɛ be nɛ gig wɛɛnik luurɛ wa̧lɔ!

14Yɔ̧ɔ̧rɛ wɔ hi dɔɔ gumtilya wɔ hi zaak Yeesu ge a Bɛtluk du gihi za̧a̧sugo. 15Yɔ Bɛtmaakwookya gbɔlɛ wɔ hi Bɛtmaakdɔkya wɔ hi gbɛn gɛrs wɔ Yeesu gi wooko, wɛɛ hi lag ya̧a̧mwaat wɔ hi ya̧a̧ɓoolik a Bɛtluk du

a Hozana, raakɔ a seko gbɔɔltɔnɔ, Dawda Waawalɔ!

16nɔɔhinɔ, hi war Yeesu

a mɔ lag hinyɔ ya̧a̧mwaat wɔ hi raak ya?

Yeesu ta̧a̧

a hɔɔ be lagɔ. Nɛ nɛ́ zaŋga lɛlza bɔ hi bi̧i̧ hi dɔg a mɔɔ Bɛto mɔ tuts zul mɔ bant rɔb a ya̧a̧mwaat ya̧a̧ du hi waatyɛ̧s ya̧a̧ du ɔ̧tza gɛ ya?

17Kuudu wɛɛ tuu waal gbɔɔl bɔ ɔɔhi dihɔ rek da yoz a Betani.

18Yoosugɔ bi̧i̧l du yɔ Yeesu gi wɛɛzig a waal gbɔɔl bɔ gedu a̧a̧kil gi ha̧a̧ge, 19gbɛn yɔmntnɔ za a gbɔnɔya̧ sɔɔ an gi gbɛn humlɔ gi ha̧b gi le, gbɛn kpas gii kpɔd, huml taaro. Raa yɔmntnɔ bɔ

a bɔmɔ hum zaa nɛ zaŋ.

Ɓɔrbɔ yɔmntnɔ bɔ koot ɓaw. 20Yɔ walɛsɛrɛ wɔ hi gbɛn anbɔ hin gi kɔmsihi gɛrsɛ, hi war Yeesu

a yɔmntnɔ bɔ koot ri ɓɔriɓɔri lɛ be?

21Yeesu goohi

a be raasin rɔbo: gid nɛ ɗɔbsig nɛ kpoos du nɛ faa nɛ gɛ zaŋ, taa an nɛ ɗɛɛ hinyɔ be gɔs yɔmntnɔ bɔ gii gɔkɔ kpɔd, nɛ ɗɛɛ an nɛ raa ga̧a̧t yɛrɛ a ha̧sum hɛdi mɔ da mɔ gbaliy a mɛmbal du, hinɔ yɔ wooy hɛw. 22Gid nɛ ɗɔbsɔ nɛ dag hinyɔ nɛ zɔ̧k a Bɛt ge sɛw.

23Yɔ Yeesu re gi gul a Bɛtluk du gi yɛls dood hingoko, Bɛtmaakwookya gbɔlɛ wɔ hi Yahuduya ɗɛntɛ wɔ hi zaa hi war Yeesu

a mɔ wook hin wɛrɛ hi nɔ tɛŋkɔ? Bɔ gaamɔ gbɔnɔ an mɔ gɔ hin wɛrɛ anbɔ?

24Yeesu goohi

a ɔbe ɛrin hin gbun kpɔd, gid nɛ goosib lɛlɔge bee be wadsin tɛŋk yɔ be woonik hin wɛrɛ be. 25Bɔ yaaz Yohana an gi hotin dood Bɛtmɛm nɔ, Bɛt gii ya, dood ya ri?

Wɔrɔ hi

wɛɛ hi mɔk hin bɔrɔ hi watin hi teesdu a an wɛ ta̧a̧ a Bɛt gii yaazige, yɔ warɛ a nɛ nɛ ɔɔ Yohana ɗɔbsig ma nɔ? 26Wɛɛ an wɛ raa a dood yaazig be, wɛɛ hoobha̧a̧wɛ dood saal wɔ. Hii sɛw hi seek Yohana an Bɛtya̧a̧kɛŋkya be.

27Hi wɛɛ hi ta̧a̧ge

a wi mɛɛ gɛ.

Yeesu goohi be

a nɛ gi lab be bee hɛw be taasin wadig tɛŋk yɔ be woonik hin wɔrɔ be. 28Yeesu wɛɛ raahi a nɛ mɔk ri? Wal za gin waatwalɛ eerɛ, baaya̧ yɛɛl zaa a waawal gbɔɔl bɔ ge raage a waa be, nɛɛk mɔ re mɔ woosibhin bak du. 29Wala bɔ ta̧a̧ a ha̧a̧be gɛ. Kuudu wɛɛ mɔkɔ ɗund rek a bak bɔ gedu, da balɔ. 30Baatɔ wɛɛ rek a waa za wans bɔ ge raage a waa be, nɛɛk mɔ rek mɔ woosibhin a bakdu. Wala bɔ ta̧a̧ a hɔɔ baa, be rekɔ. Wɛɛ gɔ kuudu re gɛ be. 31Waat wɔ hi eerɛ nɔni woos hinyɔ baatɔ ha̧a̧g nɔ?

Hi ta̧a̧

a waa doos bɔ ga.

Yeesu wɛɛ raahi

a be raasin rɔbo: tooszekya wɔ hi nɛɛd kaatɛ ha̧a̧l wɔ hii gisin dork a Bɛt wáát du. 32Yɔ anbɔ, Yohana zaa nɛɛge an gi goksin gbɔnɔ yɔ rii, wɛɛ nɛ ta̧a̧g ɗɔbsig gɛ. Yɛrɛ tooszekya wɔ hi nɛɛd kaatɛ wɔ ya̧nɛ hi ta̧a̧gta̧a̧. Anyɔ nɛ gbɛn anbɔ hɛw, nɛ zɛmr kpoos nɛ kuudu an nɛ ɗɔbsig hɛw gɛ.

33Lagin ya̧a̧daanik za gɛrɛ: ɗɛnt raatyaza bal tɛ̧ɛ̧ huml-yaadɛ bakɔ, gɔ̧ɔ̧n rɔkili. Wɛɛ loo beto gɔ suknààli an gɔ gi ɓɔ̧ɔ̧ huml wɔ mɛkya̧ gedu, wɛɛ rɛɛ ooko. Wɛɛ loo woosɔ-yaadɛ, ɔɔ tɛ̧ɛ̧ wɔ hi naandu gii wɛɛ rek rɔbsi.

34Yɔ huml wɔ hi ɔ̧ɔ̧ ha̧kɔ gi rii, yaaz gbaarɛ ɔ̧ɔ̧ wɔ a tɛ̧ɛ̧-ookya wɔ hi an hi gaahi huml ɔ̧ɔ̧tɛ wɔ ɔnɛ be hi kamsige. 35Ookya wɔ hi wa̧a̧ gbaarɛ wɔ, zaabɔ hi lɛge, eesim bɔ hi gbɔŋge, taasum bɔ hi duutinge bet wɔrɔ. 36Za̧a̧n bakya bɔ wɛɛ yaaz gbaarɛ zaadɛ kitɛ hi daar wɔ hi doz nɛ hɛw. Bak-ookya wɔ hi wɛɛ hi wa̧a̧ wɔrɔ hi woosihi hin gbuna bɔ.

37Yɔ̧ɔ̧sumɔ wɛɛ yaasihi waawalɔ, raa a yɛrɛ hi ɗɔbs waa be yɛrɛ ɔnɛ. 38Wɛɛ yɔ bak-ookya wɔ hi gbɛn waawal bɔ gi zaako hi watinu a za̧a̧n bɔ gɔ gi yɛr bak bɔ kuudu gii yɔ, ɗɛnwɛ rek wɛ wa̧a̧ge wɛ gbɔŋge, bak bɔ gi wɛɛ wɛɛnɛ. 39Hi wa̧a̧ge hi tuunig a bak tɔlya̧ hi da hi gbɔŋge hi bisige.

40Yeesu warɔ

a za̧a̧n tɛ̧ɛ̧bakya bɔ gɔ gi zaa rɛ, gi woos nɔ dood bak-ookya wɔrɔ nɔ?

41Dood wɔ hi ta̧a̧

a gi gbɔm bak-ookya ha̧a̧l wɔrɔ, taasihi ya̧a̧rmɛɛko, gi wɛɛ gi looz dood bak-ookya zaadɛ hi zaa hi ha̧bsig tɛ̧ɛ̧huml ɔ̧ɔ̧tɛ wɔ hi yaasig a ɔ̧tyɔ ha̧a̧g gedu sɛw.

42Yeesu wɛɛ warihi

a nɛ zaŋg hinza Bɛt ɗɛɛrwol du a bet yɔ lukwɔŋkya wɔ hi bisige gii wɛɛ bet gbɔɔl tɛŋkya nɛ gɛ zaŋ ya? Waar Bɛt gii woo hinɔ anbɔ, yɔ wɛ gbɛn lɔl du gisɛ wɛnɛ gɛrsɛ!

43-44[Za̧a̧nyɔ gɔ gi mat a bet bɔ geha muulɔ gi ɓɛdɔ; bet bɔ gi mɛɛ a za̧a̧nza muul be gi hɔnsige an luusɛ. ] Wɛɛ dɔgɔ a hinɔ gii be raasinɛ a Bɛt gi wɔɔsin wáátɔ an hi gaa dood wɔ hi wook hinrɔbo hi wɛɛ hi tuusig wáát bɔ humlɔ.

45Yɔ Bɛtmaakwookya gbɔlɛ wɔ hi Farisaya wɔ hi kɛm Yeesu ya̧a̧daanikɔ wɔ hi mɛɛmɛ a gi book dɔgl ya̧a̧nɛ; 46hi tɛ gbɔnɔ an hi wa̧a̧ge, wɛɛ hoobha̧a̧hi saal wɔ be, anyɔ hi mɛɛ a dood hi seek Yeesu an Bɛtya̧a̧kɛŋkyayɔ.

Okuqokiwe okwamanje:

MATA 21: NTD

Qhakambisa

Dlulisela

Kopisha