MATA 20
20
MATA 20
1Yɔ anbɔ be, Bɛt wáátɔ riitin an wal za raatya yɔ tuu bi̧i̧ltɔnɔ an gi tɛb doodɛ gi loohi woosɛ hi basig tɛ̧ɛ̧huml bakɔ. 2Yɔ dag dood wɔ hi watin gi da̧a̧ a tus gaat gbunu gbunu ha an gi toohi ɔ̧t nuŋgo yaahi bak du an hi rek hi balɔ. 3Za̧a̧n bakya bɔ wɛɛ tuu bi̧i̧l du a kusaal ɓaat du, gbɛn dood zaadɛ hi erkig a luumha tɔs. 4Raahi a nɛya, rekin be bak du nɛ basib hin be toon anyɔ. Wɔrɔ hi rek woos bɔ a bak bɔ gedu hi wooko.
5Za̧a̧n bakya bɔ wɛɛ tuu a lurk teesdu, wɛɛ tuu ɓɛ a naaba̧a̧n du, woo anbɔ ɓɛ. 6Yɔ̧ɔ̧sumɔ wɛɛ tuu a lɛɛsig-gbarya̧ di zɛm dood zaadɛ hi erkig a luumha ɓɛ, warihi a nɔ nɛ erkig dihɛ lurknɔ gbɔɔl tɔs nɔ? 7Wɔrɔ hi ta̧a̧ a nɛ doo za loowi woos gɛ be, wi gɔ nɔ? Gii goohi a nɛ bɛɛrɔ! Nɛ yɛrɛ rekin be bak du nɛ woosib hin hɛw.
8Yɔ ɔ̧t legɔ, bakya bɔ raa gbɔɔlɔ zaa bɔ fɔg di a rekum mɔ elz woosya wɔ bak du mɔ toohi tusya̧ ma. Mɔ bààr mɔ too wɔ hi zaa woos kuudu, mɔ wɛɛ mɔ too wɔ hi doz woos du. 9Dood wɔ hi baar woos a lɛɛsigya̧ di hi zaa hi toohi tus gaat gbunu gbunu. 10Wɔ hi doz nɛ woos du hi zaa be, hi mɔk a ya̧nɛ hi dag gi daarɔ. Yɔ anbɔ hi toohi, bɔbe dag tus gaat gbunu gbunu.
11Yɔ hi look tus bɔ hin nɔɔhi a za̧a̧n bakya bɔ ge, 12hi raage a dood wɔ mɔ loozihi woos kuudu hi woo kaasi, wɛɛ mɔ toohi an wii yɔ wi mɔm ɔ̧t haalnɔ bɔ gi leguw geha, bɔ lab gi ri nɔ?
13Bakya bɔ ta̧a̧ zaa gbunu a sa̧a̧ɔ, bé gɔ̄sum ha̧a̧l gɛ. Yɔ wɛ watinu mɔ ta̧a̧ a be woo ɔ̧t nuŋg sɛw a tus gaat gbun ha gɛ ya, taa lab ya? 14Loom tus mɔ mɔ rekɔ. Yɛrɛ ha̧a̧be an be too wal yɔ be loozig woos kuudu an mɔɔ hɛw. 15Be taan gbɔnɔ an be woo hinyɔ ha̧a̧be hi tus be ya? Yɔ be gi doo rɔb gii mɔ gin kubl be zulha ya ri?
16Yeesu wɛɛ dɔgɔ
a yɔ anbɔ, wɔ hi gi kuudɛ hi wɛɛ doosɛ, doosɛ wɔ be hi wɛɛ kuudɛ be.
17Anyɔ Yeesu gi dɔɔk a Urusalima, loo walɛsɛrɛ wɔ koobl daa eer mukya̧ raahi gbɔnɔ di:
18a yɛrɛ wɛ dɔɔk gɛrɛ a Urusalima, Za̧a̧n Waa bɔ gi gaay ma a Bɛtmaakwookya gbɔlɛ wɔ hi Bɛtmaakdɔkya wɔ hi naandu an hi gbaasig dɔgl gi wɔrɔ, 19hi wɛɛ hi gaage dood wɔ hi mɛɛ Bɛt gɛ hi naandu hi kpɛ̧ɛ̧lige, hi lɛge hi wɛɛ hi dooge a dɔ̧ɔ̧r ha; gi wɛɛ gi rɛml a wɔrk du gi ɗund a ɔ̧t taasimɛ.
20Yɔ anbɔ Zebede nistɔ zaa Yeesu ge hi waatɔ walɛ wɔ elo, zagl gi muutdu zɔ̧g hinɛ. 21Yeesu warige
a ha̧a̧mɔ nɔ?
Nis bɔ goo raage:
a raamɔ an waat be eerɛ wɛrɛ, gbunu gi ɗɔɔt a mɔ naanrɔbo, zaa gbunu gi ɗɔɔt a mɔ naanyɛ̧li, a mɔ wáát du.
22Yeesu wɛɛ ta̧a̧
a nɛ́ mɛ̄ɛ̄ hinyɔ nɛ ɛrk gɛ. Nɛ ɗɛɛ an nɛ yɔ̧ ya̧a̧rhant a dakwaa ya̧a̧rhantya bɔ gɔ be yɔ̧ gedu ya?
Hi goo
a wi ɗɛɛɗɛ.
23Yeesu goohi
a oo, nɛ yɔ̧ ya̧a̧rhant bɔ a dakwaa be bɔ gedu. Yɛrɛ bé dāg gbɔnɔ an be gaa dood ɗɔɔtillɛl a be naanrɔbo hi a be naanyɛ̧l gɛ. Ɗɔɔtillɛl wɔrɔ, Baa be Bɛt gii gɛmsihi, gi wɛɛ gi gaa dood wɔ sɛ̧ɛ̧hi.
24Yɔ walɛsɛrɛ koobl wɔ hi kɛm dɔgl bɔrɔ kpoosya̧ nɔɔhinɔ a Zebede waatɔ eerɛ wɔ hi muulɛ. 25Hɔnɛ Yeesu wɛɛ elihi raahi
a nɛ mɛɛ a dood wɔ hi mɛɛ Bɛt gɛ hi teesdu waar ɛ gbɔlɛya̧ wɔ hi gisihi waar ums zuunuko, dood gbɔlɛya̧ wɔ hi gisihi tɛŋk zuunik be. 26Taa an hinɔ gi gi anbɔ nɛ teesdu; yɛrɛ za̧a̧nyɔ ha̧a̧ge an gi wɛɛ gbɔɔl a nɛ teesdu, gi wɛɛsin woosya̧ nɛ. 27Za̧a̧nyɔ ha̧a̧ge an gi wɛɛ zul a nɛ teesdu be gi wɛɛsin gbaar nɛ walɔ. 28Yɔ anbɔ, Za̧a̧n Waa bɔ zāā an dood hi woosigwoos gɛ, gii ɔnɛ zaa an gi woohinɛ gi wɛɛ gi gaa kolɔ gi wɔr an i̧i̧nisɛ an gi za̧a̧s dood kit a hinha̧a̧l du be.
29Yɔ Yeesu gi tuuzig a Zeeriko hi walɛsɛrɛ ɔ̧ɔ̧ wɔ, dood saal kittɔnɔ hi fɔbzige. 30Yɔ yɔ̧ɔ̧rɛ eerɛ wɔ hi ɗɔɔt a gbɔnɔya̧ hi lag a Yeesu gi daako, hi ɓooya̧a̧
a Hingokya , Dawda Waawalɔ, mɛɛsiwi ya̧a̧rɛ!
31Dood saal wɔ hi ya̧a̧l yɔ̧ɔ̧rɛ wɔ an hi waks ya̧a̧ya̧ɓoolik bɔ. Hii be hi wɛɛ hi ɓoolya̧a̧ ha̧a̧ltɔnɔ
a Hingokya , Dawda Waawalɔ, mɛɛsiwi ya̧a̧rɛ.
32Yɔ anbɔ, Yeesu erɔ elihi warihi hinɔ
a ha̧a̧nɛ an be woosin nɔ?
33Hi googe
a Hingokya gɔsuwi an lɔl wi gi gaa wi gbɛnɔ.
34Yɔ wɔrɔ hi ha̧a̧s Yeesu ya̧a̧rɛ ki̧i̧ lɔlya̧ bɔ; ɓɔrbɔ dood eerɛ wɔ hi gbɛnlɔlɛ hi wɛɛ hi fɔge.
Okuqokiwe okwamanje:
MATA 20: NTD
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Doyayo New Testament © Bible Society of Cameroon, 1991.
