Rafudoo Akarafa 6
6
1Yaaweefa Mooseena ufa iriseenoo qimaminau. Amana doo anee maqee qini oosana qafeennaranoo. Qinee Faraoona afeekaikammasee qimamiananoo qini faiqí anaasee idukusainaqa fifaranoo. Sia kaqi idukuannoo qinee qiananoo idukuseenoo fuki faaki qinaqa mina maqasaaqari quqasee fifaranoo.
Anutufa kafaa Mooseena aaranau.
2Anutufa kafaa Mooseena qimaminoo qinau. Qinee Yaaweesa maridaqa. 3Qinee Abarahaamana faqa Isakeena faqa Yakooboona faqa misa nifusaa aiqama afeeka faqaa Anutusa qeeqa duqu kooroo iqiafana. Qinee sia qeeqa fuka naaquqara duqu Yaaweesee qirana qimannimi qiafana. 4Qinee qeeqa moodaanaki kira ufa misa faqa qidaqa Kannaana maqa maqa misa nimiraree qima afeekaikiqiafana. Misa minaki asaqiraa faira foora mariunaki quqannisaanauranoo fee qiqiafana. 5Qinee maqee Isaraee maqannaasa Isipa maqanaasa karafusaki maridaqa aupuraida annada annada imarianara iriseeqa qinee qeeqa moodaanaki kira ufara oonu mafi iriqa.
6Moosee anee Isaraee maqannaasa maaqi qimasee qini ufa qimannimia, qinee Yaaweesa maridaqa. Innee Isipa maqannaa rumbaranaki mariana qinee inni idukeeqee asumu mariranaki quqannisaanaura. Qinee afeeka qisaukunnai manda aupurarana Isipa maqannaasasaa quqaanaura. Quqaseeqa inni Isaraee maqannaasa asumu maraanaura. 7Qinee inni qeeqa faiqí aanaaseekammaseeqa qinee inni Anutusa marianaura. Qinee inni Isipa maqannaa karabusa kinaana iduku nisaanaqa miqoo innee qini Anutusara irifaranoo. 8Qinee inni nifieeqee kuqaa qima afeekaikammasee Abarahaammana faqa Isakeena faqa Yakooboona faqa nimianauree qiafannaqoo quqannisaanaura. Qinee inni nimiananoo mi maqafa innindi kammiannoo. Qinee Yaaweesa qidaqa. 9Mooseefa Isaraee maqannaasa qima nimufaqa misa sia mina ufa iriqau. Misa firaa ummaara maree marufa mifa misa naaqoo nifu furufara masoofaqa sia iriqau.
10Anutufa kafaa Mooseena qimaminoo qinau. 11Anee Isipa maqannaa karaambaiqa Faraoo finnai oonuree Isaraee maqannaasara qimamia. Misa karafusaki mariana idukusaina fuaqa. 12Mooseefa mi ufana iriseenoo Yaaweena qimaminoo qinau. Isaraee maqannaasa ririmma sia qini ufa iria naqaa fee masee Faraoofa iriannoo fee. Qinee ufa qirara mamma qimarunausa maridaqa. 13Yaaweefa Mooseena faqa Aaroona faqa qimanniminoo qinau. Inneeqara Isaraee maqannaasa faqa Faraoona faqa maaqi qimasee qimannimiaqa, qinee ani Mooseenara Isaraee maqannaasa Isipa maqa maaqaindaraana nifiqee fuannee qunnanara qimannimia.
Mosseesa Aaroonasa niku nisauku nuqu.
14Yakooboona indaaruqaa faiqi Reeubeenafa qaara faqa qaara faqa 4 faiqi maqanau. Misa nuqu Hanookafa faqa Paruafa faqa Heesaroona faqa Karamifa faqa minamusa mariqau. Misa nári nifaafaurara maqa maaqakina marusa ninaakusa mara mariqau. 15Simeeoonafa qisauku dinni taikasee dinni ani moodaa marasee 6 faiqi maqanau. Misa nuqu Yeemueerafa faqa Yaminafa faqa Ooqadafa faqa Yakinafa faqa Sooqarafa faqa Sauroofa faqa mariqau. Sauroona anoofa Kannaa anaasee marinau. Misa nári nifaafau rara maqa maaqakina marusa ninaakusa mara mariqau. 16Reefifa qaara moo faiqi maqanau. Misa nuqu Keerasoonafa faqa Kooqatafa faqa Meerarifa faqa mariqau. Misa nikoofa Reefifa 137 aukuana maraseenoo kuqinau. Misa nári nifaafaurara maqa maaqakina marusa ninaakusa mara mariqau. 17Keerasoonafa qaara faiqi maqanau. Miqanda nuqu Ribinifa faqa Simeeifa faqa mariqau. Miqandasaaqari moomoo kambiaqau. 18Kooqatafa qaara faqa qaara faqa 4 faiqi maqanau. Misa nuqu Amarammafa faqa Isaqaranafa faqa Heebaroonafa faqa Usieerafa faqa mariqau. Misa nikoofa Kooqatafa 133 aukuana marasee kuqinau. 19Meerarifa qaara faiqí maqanau. Miqanda nuqu Maqarifa faqa Musaqifa faqa mariqau. Reefina faiqi namu anaiqi mara miqimmiqa mariqau.
20Amarammafa narí akoona auna narí amaamuna Yookeebeeda nammarina maraseenoo Aaroona faqa Mooseena faqa maqanau. Amarammafa 137 aukuana maraseenoo kuqinau. 21Isaqarafa qaaramoo faiqi maqanau. Misa nuqu Kooraafa faqa Neefeekafa faqa Sikirifa faqa mariqau. 22Usieerafa faqa qaaramoo faiqi maqanau. Misa nuqu Misaeerafa faqa Eerasafanafa faqa Sitirifa faqa mariqau. 23Aaroonafa Aminadafana araamuna Nasoona asookina Eeriseepa nammarina maraseenoo minasaa Nadabana faqa Abiquna faqa Eeriasarana faqa Itamarana faqa maqanau. 24Kooraafa qaaramoo faiqi maqanau. Misa nuqu Asirafa faqa Eerakanafa faqa Abiasafa faqa mariqau. Misa Kooraanasaa ani aruaki kambiqainausa ninaakusa mara mariqau. 25Aaroona amaaku Eeriasarafa Putieerana araamuna maraseenoo Fineeasana maqanau. Miqimmasee doo Reefinakiqari ani aruaki faiqí oosana oosana mariqau.
26Yaaweefa Aaroonasa Mooseesara kai qufaqa Isaraee maqannaasa Isipa maqannaasa rumbarana kinaana nifiqa maree aniaqee qimaqoo qanda mariqau. 27Miqanda kai Isipa maqannaa karaambaiqa Faraoona Isaraee maqanaasa idukuanifeera qimamiqau.
Yaaweefa Mooseena faqa Aaroona faqa ufa niminau.
28Yaaweefa Isipa maqa maaqaki maaqi qimasee Mooseena qimaminau. 29Qinee Yaaweesa maridaqa. Anee Isipa maqanna kaaraambaiqa Faraoona aiqama qinee qunnufana qimamia. 30Mooseefa iriseenoo Anutuna qimaminoo qinau. Qinee ufa qirara mamma qimarunausa maridaqa. Faraoofa naqifee masee qini ufa iriannoo fee.
Okuqokiwe okwamanje:
Rafudoo Akarafa 6: bjr
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2017 Wycliffe Bible Translators, Inc. All rights reserved.