San Juan 2
2
Naquiꞌyaj Jesús na vinó man na u̱u̱n ga̱a canuû chaꞌanj naraꞌa̱a chumanꞌ Caná a
1Cachén yavíj güii, ga̱a ne̱ canuû chaꞌanj naraꞌa̱a chumanꞌ Caná chumanꞌ na̱j estadó Galilea, ne̱ nu̱u̱ nii Jesús chaꞌanj yoꞌ a. 2Dan me se nacúún nii man Jesús do̱ꞌ, man nij síí tucuꞌyón snana̱ soꞌ do̱ꞌ, caꞌna̱ꞌ nij soꞌ chaꞌanj yoꞌ a. 3Veé dan, ne̱ navij na vinó rihaan nij síí navij rá chaꞌanj yoꞌ, ne̱ cheꞌé dan cataj nii Jesús rihaan Jesús a:
―Taj va̱j na vinó rihaan nij síí navij rá chaꞌanj maꞌ ―taj noꞌ a.
4Ga̱a ne̱ cataj Jesús rihaan nii soꞌ a:
―Taj cheꞌé caꞌmi̱i̱ so̱ꞌ da̱nj rihanj maꞌ. Ni̱ꞌyaj so̱ꞌ, ne̱ ataa quisi̱j güii qui̱ꞌyáj suun sa̱ꞌ noco̱o á ―taj soꞌ rihaan nii soꞌ a.
5Ga̱a ne̱ cataj xnaꞌanj nii Jesús rihaan nij mozó a:
―Quiꞌya̱j soj nu̱ꞌ se vaa cata̱j xnaꞌanj soꞌ rihaan soj á ―taj noꞌ rihaan nij mozó a.
6Veé dan, ne̱ ya̱nj vata̱nꞌ xruj yahi̱j xi̱j a. Xruj nica̱j caꞌa̱nj chiha̱a̱ (80) litró na me xruj yoꞌ, ne̱ xruj araa nij yuvii̱ israelitá na rásuun nij soꞌ naꞌnu̱ꞌ nij soꞌ rasu̱u̱n do̱ꞌ, naꞌya̱ꞌ nij soꞌ do̱ꞌ, nda̱a vaa taj stucua̱nj Moisés me xruj yoꞌ a. 7Ne̱ caꞌneꞌ Jesús suun rihaan nij mozó, cataj soꞌ a:
―Cara̱a soj na rque nij xruj yahi̱j yoꞌ á ―taj soꞌ rihaan nij mozó yoꞌ a.
Ga̱a ne̱ caraa nij mozó na, ne̱ ꞌo̱ caraa nda̱a tuꞌva xruj yoꞌ, quiꞌyaj nij soꞌ a. 8Ga̱a ne̱ cataj xnaꞌanj uún Jesús rihaan nij mozó yoꞌ, cataj soꞌ a:
―Ya̱j roꞌ, quiri̱i̱ soj do̱j na nu̱u̱ rque xruj, ne̱ caꞌa̱nj ni̱caj soj na yoꞌ rihaan síí uun chij rihaan nij mozó anica̱j coꞌoo rihaan nij yuvii̱ á ―taj Jesús a.
Ne̱ da̱nj quiꞌyaj nij soꞌ a. 9Veé dan, ne̱ síí uun chij rihaan nij mozó anica̱j coꞌoo rihaan yuvii̱ me se coꞌo soꞌ do̱j tzínꞌ na yoꞌ, tza̱j ne̱ né na̱ u̱u̱n me yoꞌ a̱ maꞌ. Nu̱ꞌ guun na yoꞌ na vinó na̱nj ado̱nj. Ne̱ ne queneꞌe̱n soꞌ me rej cavii na vinó yoꞌ a̱ maꞌ. ꞌO̱ se ma̱an nij mozó quirii na yoꞌ rque xruj roꞌ, o̱rúnꞌ nij soꞌ me síí queneꞌen me rej cavii na yoꞌ a. Veé dan, ne̱ nacúún síí uun chij yoꞌ man síí naraꞌa̱a caꞌna̱ꞌ síí naraꞌa̱a rihaan soꞌ, 10ne̱ cataj soꞌ a:
―Tucuáán ꞌyaj níꞌ me se asino ya̱a̱n rii níꞌ na vinó sa̱ꞌ doj, ga̱a ne̱ nda̱a cachén coꞌo̱ yuvii̱, ga̱a ne̱ rii níꞌ se nij doj chugua̱nj. Tza̱j ne̱ so̱ꞌ me se nda̱a ya̱j quirii so̱ꞌ na vinó sa̱ꞌ doj asânj ―taj síí uun chij yoꞌ rihaan síí naraꞌa̱a yoꞌ a.
11Nihánj me se guun cheꞌe̱ Jesús quiꞌyaj Jesús suun sa̱ꞌ noco̱o tihaa̱n me síí me ya̱ soꞌ, ne̱ nu̱ꞌ nihánj me se vaa quiꞌyaj soꞌ chumanꞌ Caná chumanꞌ na̱j estadó Galilea a. Da̱nj quiꞌyaj soꞌ, ne̱ queneꞌen yuvii̱ se vaa niꞌndaj ya̱ sa̱ꞌ vaa soꞌ, ne̱ cuchumán rá nij síí tucuꞌyón snana̱ soꞌ niꞌya̱j nij soꞌ man soꞌ a.
12Ga̱a quisíj canuû chaꞌanj naraꞌa̱a yoꞌ, ga̱a ne̱ caꞌanj Jesús do̱ꞌ, nii soꞌ do̱ꞌ, nij tinúú soꞌ do̱ꞌ, nij síí tucuꞌyón snana̱ soꞌ do̱ꞌ, nanij nij soꞌ nda̱a chumanꞌ Capernaum, ne̱ do̱j güii cayáán nij soꞌ chumanꞌ yoꞌ a.
Quirii Jesús man nij síí chiꞌi̱i̱ rej ya̱nj nuvií noco̱o a
13Dan me se ataa doj quisi̱j Chaꞌanj Pascuá chaꞌanj navij rá nij yuvii̱ israelitá, ga̱a ne̱ cavii Jesús caꞌanj soꞌ chumanꞌ Jerusalén a. 14Ga̱a ne̱ rej ya̱nj nuvií noco̱o roꞌ, naj ꞌo̱ yuꞌvee noco̱o ꞌyaj nij yuvii̱ israelitá, ne̱ ma̱an dan mán nij soꞌ tuꞌvéj nij soꞌ scúj do̱ꞌ, matzinj do̱ꞌ, chaꞌaa̱n do̱ꞌ a. Ne̱ vaa síí ya̱nj rihaan chruun mesá, ne̱ síí natuná saꞌanj cheꞌé yuvii̱ atúj rque nuvií me nij soꞌ a. 15Ga̱a ne̱ nica̱j Jesús neꞌ, quiꞌyaj soꞌ cuartá, ne̱ rno soꞌ man nij síí tuꞌvéj xcuu do̱ꞌ, man nij síí natuná saꞌanj do̱ꞌ, ne̱ quirii soꞌ xeꞌ man ta̱ranꞌ nij soꞌ a. Ne̱ rno soꞌ man nij scúj do̱ꞌ, man nij matzinj do̱ꞌ, quirii soꞌ xeꞌ a. Ne̱ tichaꞌnuu̱ soꞌ se‑saꞌa̱nj síí natuná saꞌanj rihaan yoꞌóó, ne̱ tinaxruꞌ soꞌ nij chruun mesá a. 16Ga̱a ne̱ cataj soꞌ rihaan nij síí tuꞌvéj chaꞌaa̱n a:
―Quiri̱i̱ soj rasu̱u̱n nihánj xeꞌ cuaj yanj. Se̱ guun quiꞌya̱j soj yuꞌvee tucuá Réj maꞌ ―taj soꞌ rihaan nij síí tuꞌvéj chaꞌaa̱n ma̱n rá nuvií yoꞌ a.
17Ga̱a ne̱ ninuj rá nij síí tucuꞌyón snana̱ Jesús se vaa nó nana̱ nihánj rihaan Danj Yaꞌanj a: “Cheꞌé se ꞌe̱e̱ ndoꞌo raj veꞌ tucuá so̱ꞌ, cheꞌé dan caꞌnéé nimanj tu̱mé ꞌu̱nj man yoꞌ a.” Yoꞌ me nana̱ nó rihaan Danj Yaꞌanj a.
18Ga̱a ne̱ cataj nij síí uun chij rihaan nij yuvii̱ israelitá rihaan Jesús a:
―Qui̱ꞌyáá so̱ꞌ ꞌo̱ suun sa̱ꞌ noco̱o queneꞌe̱n núj, ga̱a ne̱ gu̱un ya̱ rá núj se vaa no̱ xcúún so̱ꞌ qui̱ꞌyáá so̱ꞌ da̱nj ado̱nj ―taj nij soꞌ rihaan Jesús a.
19Ne̱ cataj Jesús rihaan nij soꞌ a:
―Tiri̱ꞌ soj man nuvií nihánj, ne̱ rque vaꞌnu̱j güii, ne̱ cunu̱u sa̱ꞌ uún nuvií nihánj, qui̱ꞌyáj chugua̱nj ―taj Jesús a.
20Cheꞌé dan cataj nij síí uun chij yoꞌ rihaan Jesús a:
―Vi̱j chiha̱a̱ vata̱nꞌ (46) ya̱ yoꞌ quiꞌyaj suun nij síí cuneꞌ nuvií nihánj, tza̱j ne̱ asa̱ꞌ caꞌve̱e naquiꞌya̱j sa̱ꞌ so̱ꞌ nuvií nihánj rque vaꞌnu̱j güii, rá so̱ꞌ ga̱ ―taj nij soꞌ rihaan Jesús a.
21Tza̱j ne̱ ne caꞌmi̱i̱ Jesús cheꞌé maꞌa̱n nuvií noco̱o maꞌ. Tana̱nj caꞌmii soꞌ cheꞌé nee̱ man maꞌa̱n soꞌ na̱nj ado̱nj. 22Cheꞌé dan, ga̱a quisíj caviꞌ soꞌ ne̱ cunuu iꞌna̱ꞌ uún soꞌ, ga̱a ne̱ nanuj rá nij síí tucuꞌyón snana̱ soꞌ nana̱ nihánj nana̱ a̱j caꞌmii soꞌ a. Ne̱ cuchumán rá nij soꞌ nana̱ no̱ rihaan Danj Yaꞌanj, ne̱ cuchumán rá nij soꞌ nana̱ caꞌmii maꞌa̱n Jesús uún a.
Neꞌen Jesús da̱j vaa nimán yuvii̱ a
23Dan me se ga̱a aranꞌ Jesús chumanꞌ Jerusalén ga̱a canuû Chaꞌanj Pascuá, ne̱ queneꞌen queꞌe̱e̱ ndoꞌo yuvii̱ nij suun sa̱ꞌ noco̱o quiꞌyaj Jesús, ne̱ cuchumán rá nij soꞌ niꞌya̱j nij soꞌ se‑chuvi̱i soꞌ a. 24Tza̱j ne̱ maꞌa̱n Jesús me se ne ga̱a̱ nucua̱j rá soꞌ man nij yuvii̱ yoꞌ maꞌ. ꞌO̱ se soꞌ me síí neꞌen cunuda̱nj, 25ne̱ ne cachi̱in ꞌo̱ síí cata̱j xnaꞌanj rihaan Jesús da̱j vaa nimán yuvii̱ maꞌ. ꞌO̱ se maꞌa̱n soꞌ me síí neꞌen da̱j vaa nimán nu̱ꞌ nij yuvii̱ ado̱nj.
Okuqokiwe okwamanje:
San Juan 2: trc
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. 2024 segunda versión electrónica
