Lucas 9
9
Jesús Jëjo Saoye I̱ Ye'yacohua'ire
(Mt 10.5-15; Mr 6.7-13)
1Jesupi i̱ doce ye'yacohua'ire tsi'soni i̱sipi, i̱ tuture cua̱ñecohua'i pa'ija̱jë coa si'aye ti̱ñe pa'i co'a joñoare eto saojë cui'ne ju̱'icohua'ire jujujë yo'o ja̱'ñere. 2Maija'quë cua̱ñe te̱'tena cacani pa'iyere quëaja̱'cohua'ini cui'ne si'a ju̱'iñere jujucaija̱'cohua'ini jëjo saopi. 3Ja̱je jëjo saoquë capi:
“Tupë, turupë a̱o, curiquë sama'pë pa'ijë̱'ë. Ma'a sajë te'e ju'i ca̱ sajë̱'ë, cayaye sama'pë, peojë saijë̱'ë. 4Te'e daripë yo'oye pa'ina, te'e huë'ena pëajë̱'ë, mësarute sihuacohua'i pa'ito. 5Yeque mësaruni coecohua'i pa'ito etani saijë ya'o si'si pa'iyere ti̱'to to̱jë'ë. Ja̱je yo'ojë ja̱pi i̱ñoñe pa'iji, i̱ohua'ire sa̱ñope Maija'quë yo'o ja̱'ñere.”
6Ja̱je caëna, etani sateña, si'a hue̱'ña pa̱i pa'i hue̱'ñana, huaso cocare quëajë cui'ne ju̱'icohua'ini jujujë.
Juan Ti Doquëre Huaiye
(Mt 14.1-12; Mr 6.14-29)
7-8Ja̱je Jesús yo'oquëna, yecohua'ipi Juan huëisiquëpi huëni yo'oji, cajëna, cui'ne yecohua'ipi Maija'quë jëjo daoquë Elíaspi ñaipi cahuë. Cajëna, yecohua'ipi ai tsoe Maija'quë jëjo daoquë pa'isiquëpi huëni yo'oji, cahuë. Ja̱je cajëna, Galilea ëjaë Herodespi asaquë cui'na ja'yese'e cuasa huesëpi. 9Ja̱je pa'iquëta'a Herodespi capi:
“Yë'ëpi Juan si̱opëre yëto tëajë̱'ë caquë cua̱ñehuë. Ja̱je pa'ito ¿i̱queipi jaiye co'amaña yo'oquërepa pa'ina, cajëna, asaye'ni?”
Ja̱je pa'ina, Jerodespi i̱te ñasi'i caquë yo'opi.
Cinco Mil Ë̲mëohua'ire A̲oñe
(Mt 14.13-21; Mr 6.30-44; Jn 6.1-14)
10I̱ jëjo saosicohua'ipi co'ini Jesure quëahuë, i̱ohua'i yo'oroja̱ise'ere. Quëa tëjijëna, ja̱ jeteyo'je sai sapi, ja̱ohua'ire, pa̱i peo hue̱'ñana, Betsaida daripë quë'rona. 11Ja̱je saicohua'ita'are pa̱ipi asani tuë'ë. Tuijëna, Jesús sihuaquë pëpani Maija'quë te̱'te ayere quëani cui'ne ju̱'icohua'ire jujupi.
12Neato de'o huëoquëna, i̱ doce ye'yacohua'ipi tsio dani Jesure cahuë:
“Ja'ye huë̱'ña pa'i hue̱'ña i̱ño ti peoji. Pa̱ire quëajë̱'ë, saija̱jë, sani huajëja̱jë, cui'ne pa̱i daripëna sani a̱o hueroni a̱ijajë.”
13Ja̱je cajëna, Jesupi capi:
“Mësarupi a̱ojë'ë, ja̱ohua'ire.”
Caquëna, i̱ohua'ipi sehuohuë:
“Coa cinco pan pë̱a cui'ne caya tsiaya hua'ire pare payë. Ja̱je pa'ina, si'ahua'ire a̱oñe cani sani hueroyese'e pa'iji.”
14Cinco mil ë̱mëohua'i paë'ë. Ja̱je pa'ijëta'are Jesupi i̱ ye'yacohua'ire capi:
“Cincuenta pa̱ise'ere te'e macana ño'e saojë̱'ë. Ja̱re ja̱ so̱cohua'ise'ere si'ahua'ire huahuejë̱'ë.”
15I̱ case'eje̱ yo'ojëna, si'ahua'i ja'ru sahuë. 16Ja̱ maca Jesús cinco pan cui'ne caya tsiaya hua'ire i̱mani ma'tëmona ñaquë de'oji iye më'ë i̱sise'e payë caquë Maija'quëre pëpapi. Pëpani jë'yeni i̱ ye'yacohua'ina i̱sipi, pa̱ire a̱ojë'ë caquë. Ja̱ maca ja̱ohua'ipi pa̱ire a̱ohuë. 17Si'ahua'i i̱ohua'i yëse'ere ti̱'asicohua'i paë'ë. A̲ni tëjisi jeteyo'je i̱ti nëase'ere doce do'rohuë̱a aya ti̱mëhuë.
Pedropi Jesús Ayere Caye
(Mt 16.13-19; Mr 8.27-29)
18Yequë mu'se Jesús te'ipi Maija'quëre se̱ji'i, pa̱i peo hue̱'ñana. Se̱ina, i̱ ye'yacohua'i datena, se̱ji'i, ja̱ohua'ire:
“¿I̱queipi caye'ni, pa̱i yë'ëre?”
19Caquëna, i̱ohua'ipi sehuohuë:
“Yecohua'ipi cayë, më'ëre Juan oco doquë api. Yecohua'ipi Elíaspi cayë. Yecohua'ipi më'ëre cayë, ai tsoe Maija'quë jëjo daoquë pa'isiquëpi huëji'i.”
20Ja̱je cajëna, se̱ji'i, i̱ohua'ini:
“¿Cui'ne mësaruta'a yë'ëre i̱queipi caye'ni?”
Caquëna, Pedropi capi:
“Më'ë cato Cristo, maire huasoquë, Maija'quë tse̱quëre pa'ë.”
Jesupi Capi, Ju̱'ija'quë A'ë
(Mt 16.20-28; Mr 8.30–9.1)
21Ja̱je asajëna, Jesupi ja̱ohua'ire ai cua̱ñepi: Quëama'pë pa'ijë̱'ë, yecohua'ire caquë, 22cani capi, ja̱ohua'ire:
“Pa̱i Mamaquë ai yo'oja̱'quë api, aiohua'i, Maija'quë huë'e ñacaicohua'i ëjaohua'ije̱, cua̱ñese'e ye'yacohua'ije̱ yë'ëre coejë huani je̱oja'cohua'i a'ë. Ja̱je yo'osiquëta'a toaso̱ mu'seña pa'i maca huëija̱'quë api.”
23Ja̱ jeteyo'je si'ahua'ire capi:
“Pa̱ipi yë'ëre tuiye yëni je̱oñe pa'iji, i̱ohua'i yë'ë tse̱ a'ë cuasase'ere, yë'ëse'e cuasase'ere. Je̱oni yë'ëre tuiye pa'iji, si'a mu'seña ai yo'oye pa'itoje̱. 24Ja̱je pa'ina, i̱ pa'iyere de'oye pasi'i cuasaquë pani, coa ne huesoye pa'iji. Ja̱je pa'ina, yë'ë do'ire i̱ pa'iye ne huesosiquëpi ja̱ëpi huasosiquë pasipi. 25¿Te'ipi yo'oni si'aye iye yeja co'amañare hueroni paquëpi ja̱ yë'ta'a i̱ joyo i̱se'e ne huesëquëna, pa'ito de'oquë? 26Ja̱je pa'ina, yë'ë mamire cui'ne yë'ë cocare asaquëta'a pa̱ini ca'raquë yë'ë yo'oye ayere quëama'ë pa'isiquëre cui'ne i̱teje̱ yë'ë Pa̱i Mamaquëpi ëjaë de'oni, ja'quë pa'iyepi cui'ne hui̱ñaohua'i co̱ni dai maca ca'raja̱'quë a'ë, ja'quëna quëayere. 27Ja̱je nuñerepa cayë. Iye maca pa'icohua'ipi Maija'quë te̱'te ayere ñama'pë pa̱ja'cohua'i a'ë. Maija'quë te̱'te ayepi daina, ñajëna, jeteyo'je ju̱'iñe pa'iji.”
Jesús Ti̱ñe Pa'i Po̱nëse'e
(Mt 17.1-8; Mr 9.2-8)
28Iye case'e pa'i maca ocho mu'se jeteyo'je Jesupi saji'i, ai cu̱tihuëna Maija'quëre se̱si'i caquë. Saina, co̱ni saë'ë, Pedro, Jacobo cui'ne Juan. 29Ja̱ maca sani Jesupi Maija'quëre ja̱ se̱i ti̱ñe pa'i tsiarepa po̱nëpi, cui'ne i̱ ju'i ca̱je ai miacore papi ña ti̱'añe peocorepa po̱nëpi. 30Po̱në maca Jesuje̱ pa'iohua'ipi ñaini caya hua'i so'oja̱'a miañerepa nëcajë Jesús ja̱'re cocare cahuë. Ja̱ohua'i cato Moisés cui'ne Elías paë'ë. 31Jesús Jerusalénna sani ai yo'oquë ju̱'i ja̱'ñere cahuë. 32Ja̱ maca ai huëo ca̱'añe Pedrore cui'ne i̱ cajeohua'ire nëise'epi peo hue̱'ñarepa to̱meina, sëtasicohua'ipi ñahuë, Jesús i̱repa pa'iyere, cui'ne cayahua'i i̱ ja̱'re nëcajëna. 33Ja̱ maca Jesús quë̱no maca pa'isicohua'i je̱o saijëna, Pedropi capi:
“Ye'yaquë, i̱ño pëato de'oji. Toaso̱ huë̱'ña ne'ñe pa'io; më'ë huë'e, Moisés huë'e, cui'ne Elías huë'e.”
Ja̱je caquëta'a Pedro coa huesë capi, cuasama'ë. 34Ja̱je ja̱ yë'ta'a caquëna, siriopi nëca meni si̱o huesopi. Si̱o huesoquëna, ai quëquëhuë, sirio sa̱'nahuëre pa'ijë. 35Ja̱je pa'ijëna, siriopi yë'ose'e caye asahuë:
“Iquë yë'ë mamaquë yë'ë oiquëre papi i̱ cayere asajë̱'ë.”
36Ja̱je casi jeteyo'je ñajëna, te'i Jesuse'e paji'i. Pa'ina, ñani ja̱ohua'i ti cama'cohua'i jo'cua paë'ë. Cui'ne yecohua'ireje̱ i̱ohua'i ñase'e ti quëama'pë paë'ë.
Jesupi Huatire Eto Saoye
(Mt 17.14-21; Mr 9.14-29)
37Se ñatasi mu'se ai cu̱tihuëpi cajejëna, jai pa̱i Jesure sa̱ñope ti̱'ahuë. 38Ja̱ maca pa̱i jopo aquëpi te'i tutu capi:
“Ye'yaquë, ñacaijë̱'ë, care payë yë'ë mamaquë te'i macapi. 39Huatire hue'equëna, ja̱ëpi jo̱sa yo'oquëna, cui'ne cuiquë yo'oji, cui'ne hue'hue nequëna, yë'opoja̱'a siri etoquë yo'oji, co'aye yo'oquë ti je̱oñe coeji, i̱te. 40Tsoe më'ë ye'yacohua'ire se̱i'ë, huatire eto saojë̱'ë caquë. Ja̱je caëna, coa yo'o jujahuë.”
41Caquëna, Jesupi asani i̱ ye'yacohua'ire capi:
“Maija'quë necaiquë api cuasama'cohua'ipi ti̱ñere cuasacohua'i. ¿Je yëhuarepa tsoe mësaru ja̱'re co̱ni pa'i yo'oquëna, ñani Maija'quëpi nequë api cuasaja̱'cohua'i a'ni, mësaru? Ja̱je cani dajë̱'ë, më'ë mamaquëre i̱ñona.”
42Ja̱je caëna, tsihua'ëpi i̱ quë'rona ja'ye tsioja̱ina, huatipi yeque hue'hue ne co̱quëna, ta̱ji'i, yejana. Ja̱je yo'oquëna, Jesupi huatire yo'oma'ë cani eto saoni tsihua'ëre jujuni pëca ja'quëna i̱sipi. 43Ja̱ maca si'a pa̱i ai cuasahuë, Maija'quë jaiye yo'oyere ñani.
Ti̱jupë Jesús Capi, I̱ Ju̱'iñe Ayere
(Mt 17.22-23; Mr 9.30-32)
Cui'ne si'ahua'i Jesús yo'ose'ere ñani ai cuasajëna, Jesupi i̱ ye'yacohua'ire capi:
44“De'oye asajë̱'ë, iyere. Hua̱nëyema'pë pa'ijë̱'ë. Yë'ëre Pa̱i Mamaquëre pa̱i jë̱ñana i̱siye pa'iji. Ja̱je pa'ina, i̱ohua'i yëyeje̱ yo'oja̱'cohua'i a'ë, yë'ëre.”
45Ja̱je caquëna, i̱ ye'yacohua'i ti asa ti̱'añe pa̱huë, i̱ caye. Ja̱re ja̱je asaye paja̱jë i̱pi cuasaye sëte. Ja̱je pa'ina, i̱ohua'i ca'racohua'ipi se̱ni asaye pa̱huë, i̱ case'ere.
Nepi Jerepa Do'i Pa'iquë
(Mt 18.1-5; Mr 9.33-37)
46Ja̱ maca i̱ ye'yacohua'i sa̱'ñe cahuë, i̱ohua'ija̱'a nepi airepa pa'iohua'i pa'iohua'i a'ni, cajë. 47Ja̱je cuasajëna, Jesupi i̱ohua'i cuasaye asani ja̱ maca tsihua'ëre i̱ quë'rona dani nëcopi. 48Dani ja̱ohua'ire capi:
“Iquë tsihua'ëre yë'ë mamipi cuasajë ñacaini yë'ëni ñacaiyë. Cui'ne yë'ëre ñacaicohua'i pani yë'ëre jëjo daosiquëreje̱ cui'ne ñacaiyë. Ja̱je pa'ina, i̱ti mësaru aquëpi yecohua'ire ai jerepa ñacaiquë pani ai jerepa pa'i pa'ija̱'quë api.”
Sa̱ñope Yo'oma'quë Caye Ayere
(Mr 9.38-40)
49Caquëna, Juan capi, i̱te:
“Ye'yaquë, yëquë te'i ë̱më më'ë mamipi caquë huatire eto saoquëre yo'oma'ë pa'ijë̱'ë cajë ë̱sehuë, yëquë ja̱'re co̱ni cu'ima' do'ire.”
50Caquëna, Jesupi capi:
“¿Me neñu'ju ë̱sere'ni? Maire sa̱ñope cama'quë pani mai yo'oye yo'o co̱cohua'i a'ë.”
Que Joyo Pa'iquë
51Jesús ma'tëmo mëiñe ti̱'añe ja'i maca pa'ina, Jerusalénna sai huëoni saji'i, i̱ cuasa nëose'ere yo'osi'i caquë. 52Saija̱'quëpi jëjo saopi, i̱ du'ru sani i̱ pëaja̱to co'eja̱'cohua'ire, Samaria pa̱i quë'rona. 53Ja̱je pa'iquëta'are Jerusalénna saiye nëina, Samaria pa̱i coehuë, pëa hue̱'ña i̱siye. 54Ja̱ maca ja̱je ë̱sejëna, asani i̱ ye'yacohua'i Juan cui'ne Jacobo cahuë:
“Ëjaë, yëquë më'ë ja̱ohua'ire toapi cua̱ñerena, ma'tëmopi to̱meni peo hue̱'ñarepa ëo huesoye. Tsoe Maija'quë jëjo daoquë Elías yo'oquë pa'ise'eje̱ yo'oñu'u.”
55Ja̱je cajëna, Jesús ñani ja̱ohua'i case'ere coequë sa̱ñope capi:
“¿I̱que joyore hue'eye'ni, mësaru? 56Yë'ë Pa̱i Mamaquë cato daima'ë paji'i, pa̱i joñoare nejosi'i caquë. Coa ai jerepa pa̱ini huasosi'i caquë daë'ë.”
Ja̱je cani je̱oni yequë pa̱i pa'i hue̱'ñana saë'ë.
Jesús Pe'teye Yëcohua'i Ayere Quëaye
(Mt 8.19-22)
57Ma'aja'a ja̱ohua'i saijëna, te'i ë̱më Jesure capi:
“Ëjaë, më'ë ja̱'re co̱ni saiye yëyë. Coa si'a hue̱'ña më'ë saitoje̱.”
58Jesupi sehuopi:
“Airo jo'ya mañaje co̱ña pacohua'i a'ë cui'ne pi̱'a mañaje tsiaro pacohua'i a'ë. Pa̱i Mamaquë cato ti peoquë api, i̱ si̱opë tëo paquë u̱i mañaque.”
59Jesupi yequëre capi:
“Yë'ëre tuijë̱'ë.”
Ja̱je caquëna, i̱pi capi:
“Ëjaë, utejë̱'ë. Yë'ëta'a du'ru ja'quëre ta̱jasi'i.”
60Jesupi sehuopi:
“Yë'ëre cuasama'cohua'i ju̱'isicohua'ije̱ pa'iohua'i pa'iyë. Ja̱ohua'ipi cui'neje ju̱'isicohua'ini ta̱jajë. Më'ë cato daijë̱'ë, Maija'quë pa'iyere yecohua'ire quëaja̱'quëpi.”
61Ja̱ maca yequëpi capi:
“Ëjaë, tuiye yëyë. Utejë̱'ë. Du'ru macarepa yë'ëta'a huë'e pa'icohua'ire pëpa tëjisi'i.”
62Jesupi i̱te capi:
“Yë'ë co'amañare ne huëosiquëpi, jaiye yeque yo'oyere cuasaquë yo'oquë pani yë'ë co'amaña ne ti̱'añe peoji.”
Okuqokiwe okwamanje:
Lucas 9: sey
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2012, Wycliffe Bible Translators, Inc. All rights reserved.
