Mateus 8
8
Jesus tỹ ũn kaga kren vãnh tỹ há' he
(Mc 1.40-45; Lc 5.12-16)
1 Jesus tỹ ag mỹ tó kãn kar kỹ tóg pãnónh ẽn to tére mũ sir. Kỹ ũn e ẽn ag tóg, ti nón mũ mũ sir, fag ke gé. 2Kỹ vãhã ũ tóg ti tá jun mũ. Vẽnh kaga kren vãnh han kỹ tóg nĩ, vẽnh kaga tỹ lepra he mũ ẽn. Kỹ tóg ti krẽm grĩnh ke kỹ ti mỹ: “Senhor,” he mũ. “Ã mỹ isỹ há' he sór tũ'? Ã hã tóg isỹ há henh ke mũ, ã tỹ isỹ há' he sór kỹ,” he tóg ti mỹ.
3Kỹ Jesus tóg ti mỹ: “he,” he mũ. “Há' he ja há ã tóg nĩ,” he tóg ti mỹ. Kỹ tóg ti kaga kren vãnh ẽn tỹ há' he mũ vẽsỹmér. Jãnhkri' he tóg mũ, ti fár ti. 4Kỹ Jesus tóg ti mỹ: “ker ũ mỹ tó hẽ',” he mũ. “Ha tĩg. Topẽ tũ ki rĩr tĩ hã mỹ tóm nĩ. Kỹ Topẽ mỹ Moisés tỹ vãsỹ ẽg mỹ nén tó ja ẽn nĩm nĩ. Hã tugrĩn vẽnh kar vỹ ã tỹ há' he mũ tag ki kanhrãn mũ,” he tóg ti mỹ. Kỹ tóg tĩ mũ sir.
Jesus tỹ pã'i mág camarada tỹ há' he
(Lc 7.1-10)
5Kỹ Jesus tóg kejẽn ẽmã tỹ Cafarnaum tá jun mũ. Kỹ fóg tỹ capitão tóg, ti venh kãtĩ mũ. 6Kỹ tóg ti mỹ: “Senhor,” he mũ. “Inh camarada tóg nỹ nĩ, inh ĩn tá. Kãnhgrĩn kãn kỹ tóg nỹ, hã ra tóg kaga jagy nỹ gé,” he tóg. 7Kỹ tóg ti mỹ: “kỹ inh hỹn ã mré ti venh tĩg mũ ha, sỹ ã mỹ ti tỹ há' he jé,” he mũ. 8Hã ra tóg: “ã mỹn hỹn jagy nĩ, ã tỹ inh ĩn kã ki sãn ke ti, isỹ tỹ fóg nĩn kỹ,” he mũ. “Ã vĩ pir ki tóg há' henh mũ. Ã vĩ hã tỹ ã tóg ti tỹ há' henh ke mũ,” he tóg. 9“Ha vé, tỹ sóg pã'i krẽm ke nĩ gé, kỹ soldado ag tóg tỹ inh krẽm ke nỹtĩ gé. Hã kỹ sóg pã'i jykre ki kanhró nĩ. Isỹ soldado ũ mỹ: kutĩg, hen kỹ tóg tĩ mũ. Sỹ ti mỹ: kunĩg, hen kỹ tóg kãtĩ mũ gé. Isỹ inh camarada mỹ: tag han ra, hen kỹ tóg han tĩ. Inh vĩ tỹ sóg ag jẽgnẽg tĩ. Ã vĩ hã tỹ ã tóg ti tỹ há' henh ke mũ,” he tóg. 10Kỹ tóg ti mỹ e tĩ. Kỹ tóg ti mré mũ ag mỹ: “ha mẽ, Israel ag vỹ ti ri ke tũ nỹtĩ,” he mũ. “Ki kanhró tóg nĩ mỹr, kỹ tóg inh ki rã kỹ jẽ. Ge ve ja tũ sóg nĩ,” he tóg. 11“Ha vé, ũ tỹ hẽn ri ke ag vỹ kãmũnh ke mũ, rã jur ja tá, rã pur ja tá ke gé. Abraão mré ag tóg ũ tỹ kanhkã tá nĩ ẽn tỹ tỹ ẽg pã'i nĩ venh ke mũ, Isaque mré, Jacó mré ke gé. Topẽ tóg ag ki rĩr ke mũ. 12Ag jãvo Israel krẽ'krẽ ag tóg, kuty ki vár ke mũ. Ag tỹ ũ tỹ kanhkã tá nĩ ẽn tỹ tỹ ẽg pã'i nĩ venh ke vẽ vẽ, hã ra ag tóg venh ke tũ nĩ. Kỹ ag tóg vẽsỹrénh ke mũ, ag jã tỹ ag tóg gángán kenh mũ, vẽso jũn kỹ, fag ke gé,” he tóg, Jesus ti.
13Kỹ tóg capitão mỹ: “Inh ki rã kỹ ã tóg jẽ nĩ,” he mũ. “Hã kỹ ã tóg venh ke mũ sir. Ã camarada tỹ inh hur há' hé,” he tóg. Kỹ tóg tĩ mũ sir. Jesus tỹ ti mỹ tó mũ ẽn hã kã tóg há' he ja nĩ.
Jesus tỹ ũn kagyga tỹ hághá' he
(Mc 1.29-34; Lc 4.38-41)
14Kỹ Jesus tóg sir Pedro ĩn kã ra rã mũ. Hã ra ti prũ fi mỹnh fi tóg kaga nỹ nĩ, rỹg kỹ. 15Kỹ tóg fi nĩgé mẽg mũ sir. Kỹ fi rỹg ẽn tóg tũ' he mũ sir. Kỹ fi tóg nĩ kỹ ag ki rĩr mũ sir. 16Kuty ẽn kã ag tóg ũn jagrẽ kórég ag tatĩ kãmũ mũ, ti to. Kỹ tóg ag mỹ vĩ mũ, kỹ ag jagrẽ tóg pa kãn mũ sir. Ũn kagyga ag tỹ há' há' he tóg mũ gé sir, fag ke gé. 17Hã ra tag tóg rán kỹ nĩ gé. Vãsỹ Topẽ vĩ tó tĩ tỹ Isaías vỹ tag rán ja nĩ, ha mẽ: “ẽg kaga nỹtĩn kỹ tóg ẽg tỹ há' há' he tĩ, ti tỹ ẽg jagfy jagtar tugrĩn,” he ja tóg nĩ.
Ũ tỹ Jesus mré mũ sór mũ ag
(Lc 9.57-62)
18Kejẽn ag tóg, Jesus pénĩn e nỹtĩ, fag ke gé, hã kỹ tóg ti mré mũ tĩ ag mỹ: “mũ jé ha,” he mũ. “Goj kafã ũ ra ẽg tóg mũnh mũ,” he tóg.
19Ag mũnh ke to hã Topẽ vĩ to ẽg kanhrãn tĩ ũ tóg, ti mré vĩnh kãtĩ mũ. “Senhor,” he tóg. “Sỹ ã mré tĩg há tóg tĩ. Ã tỹ hẽ ra tĩg kỹ sóg, ã mré tĩg mũ,” he tóg. 20Hã ra Jesus tóg ti mỹ: “hã ra tóg jagy tĩ,” he mũ. “Ðn tũ sóg nĩ. Mĩg vỹ kré nỹgtĩ. Sẽsĩ vỹ jagfe nỹgtĩ gé. Ag jãvo isỹ hẽ tá nũr ke tóg tũ tĩ. Tỹ sóg ẽprã ke fi kósin nĩ,” he tóg.
21Kỹ Jesus mré tĩ ũ tóg ti mỹ: “ã mré sóg tĩ sór mũ, hã ra sóg ver inh panh ter kỹ ga ki ti fón sór mũ,” he mũ gé. 22Kỹ tóg ti mỹ: “vó,” he mũ. “Ti kénh tĩ tũg,” he tóg. “Inh mré kãtĩg. Inh ki ge tũ ag vỹ ã panh kej han mũnh mũ,” he tóg. 23Kỹ tóg canoa kã ra rã mũ sir. Kỹ ti mré mũ tĩ ag tóg ti mré ki ge mũ gé, ag tỹ goj kafã ũ ra mũ jé.
Jesus tỹ kóho jũ tỹ tũ' he
(Mc 4.35-41; Lc 8.22-25)
24Ag tỹ goj nig mág ẽn kã mĩ mũ ra kóho jũ tóg krog he kãtĩ mũ sir, ha mẽ. Kỹ goj tóg canoa kã ki krém krém ke mũ, ti fãn sór tóg mũ. Hã ra Jesus tóg nũr nỹ. 25Kỹ ag tóg ti rĩn kỹ ti mỹ: “Senhor, ẽg krenkren han nĩ, ẽg kãgter ha mẽ tóg tĩ,” he mũ.
26Kỹ tóg ag mỹ: “ãjag tỹ nejé mũmẽgmẽg nẽ? Ãjag mỹ inh ki ge há han tũ'?“ he mũ. Kỹ tóg nĩ mũ sir, jẽgnẽ kỹ tóg goj mỹ vĩ mũ, kóho mỹ. Kỹ tóg tũ' he mũ sir. Katy' he tóg mũ, katy tãvĩ tóg tĩ mỹr, ha mẽ. 27Kỹ tóg vẽnh kar mỹ e tĩ gé. “Ti jykre tóg ẽg mỹ e tĩ,” he ag tóg mũ. “Kóho tóg ti vĩ han mũ, goj ti ke gé,” he ag tóg, fag ke gé.
Jesus tỹ vẽjagrẽ kórég pan
(Mc 5.1-20; Lc 8.26-39)
28Kỹ Jesus tóg ti mré mũ tĩ ag mré fĩn rãm kỹ kafã ũ tá jun mũ sir, Gadara tá. Kỹ ũn régre ag tóg ti kato tẽgtẽ mũ, ũn jagrẽ kórég ag. Vẽnh kej tá ag tóg kãmũ mũ. Ag jamã vẽ, vẽnh kej ti. Jũgjũ mẽ ag tóg nỹtĩ, kỹ ũ ag tóg hẽn ra mũ vãnh nỹtĩ, ag kamẽg kỹ. 29Jesus kato ag tóg kãmũ mũ. Ti ve kỹ ag tóg prẽnprẽr mũ sir, ha mẽ. “!..Ã hỹn ẽg tỹ hẽ ri kenh mũ, Topẽ kósin'..!“ he ag tóg mũ. “!..Ã mỹ ẽg vóg kónãn sór mũ ha, ẽg kurã to hã..!“ he ag tóg.
30Hã ra porko tóg tá e nỹtĩ. Kakó tá ag tóg jẽg nỹtĩ. 31Kỹ Nén-Kórég ag tóg Jesus mỹ: “ã tỹ ẽg pan kỹ tóg ã tỹ porko to ẽg jẽgnẽnh há tĩ,” he mũ. 32Kỹ tóg ag mỹ: “he,” he mũ. Kỹ ag tóg porko ag ki ge mũ, Nén-Kórég ag. Kỹ vãhã porko ag tóg, rán ki re kãn mũ sir, goj nig mág ki ag tóg vár mũ. Nãgnãr kãn ag tóg mũ sir, tũ' he ag tóg mũ sir, mỹr, ha mẽ. 33Kỹ porko ki rĩr tĩ ag tóg, pétẽ kãn mũ sir, ẽmã ra, kamẽg kỹ. Tá ag tóg kãmén kãn mũ, Jesus tỹ ũ ag ki vẽjagrẽ kórég pan ja ẽn ti.
34Kỹ vãhã ẽmã tá ke kar ag tóg, Jesus venh kãmũ mũ. Kãmũ kãn ag tóg mũ sir. Kỹ ag tóg tá junjun kỹ Jesus mỹ to vĩ mũ, ti tỹ tá kutẽ jé, ti tỹ ag rã hã nĩ mãn tũ nĩ jé.
Okuqokiwe okwamanje:
Mateus 8: kgp
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
