يُوحَنَّا 5
5
المعْضور في بِرْكة بيت حِسْدة
1وَ بَعَدْ دَا، عِيدْ آخَرْ هَنَا الْيَهُودْ قَرَّبْ وَ عِيسَى مَشَى فِي مَدِينَةْ الْقُدُسْ. 2وَ فِي بِرْكَةْ وَاحِدَةْ قَاعِدَةْ فِي مَدِينَةْ الْقُدُسْ قَرِيبْ لِبَابْ الْغَنَمْ وَ أُسُمْهَا بِكَلَامْ عِبْرَانِي بَيْت حِسْدَةْ. وَ فِي خَمْسَةْ رَوَاكِيبْ جَنْب الْبِرْكَةْ دِي. 3-4وَ فِي الرَّوَاكِيبْ دَوْل رَاقْدِينْ مَعْضُورِينْ كَتِيرِينْ، مِنْهُمْ الْعَمْيَانِينْ وَ الْعُرُجْ وَ الْمُكَرْسَحِينْ.
5وَ فِي الْبَكَانْ دَا فِي نَادُمْ وَاحِدْ مَعْضُورْ مِنْ 38 سَنَةْ. 6وَ عِيسَى شَافَهْ رَاقِدْ فِي الْبَكَانْ دَا وَ عِرِفْ كَدَرْ هُو طَوَّلْ تَعْبَانْ. وَ عِيسَى سَأَلَهْ وَ قَالْ: «تِدَوْر تَلْقَى الْعَافَيْ وَلَّا؟» 7الْمَعْضُورْ رَدَّ لَيَّهْ وَ قَالْ: «السَّيِّدْ، مَا عِنْدِي نَادُمْ مَعَايِ أَشَانْ يِدِسِّنِي فِي الْبِرْكَةْ وَكِتْ الْأَلْمِي قَاعِدْ يِحَرِّكْ. وَكِتْ نِدَوْر نِنْدَسَّ فِي الْأَلْمِي نَادُمْ آخَرْ يِنْدَسَّ قِدَّامِي.» 8وَ عِيسَى قَالْ لَيَّهْ: «قُمّ! شِيلْ بِرْشَكْ وَ أَمْشِي!» 9وَ طَوَّالِي، النَّادُمْ لِقِي الْعَافَيْ. وَ شَالْ بِرْشَهْ وَ قَمَّ رَاغْ. وَ لَاكِنْ الْيَوْم دَا يَوْم السَّبْت.
10وَ كُبَارَاتْ الْيَهُودْ حَجَّوْا لِلنَّادُمْ اللِّقِي الْعَافَيْ وَ قَالَوْا: «الْيَوْم دَا يَوْم السَّبْت. وَ إِنْتَ شَايِلْ بِرْشَكْ وَ دَا مَمْنُوعْ.» 11وَ هُو رَدَّ لَيْهُمْ وَ قَالْ: «النَّادُمْ الشَّفَانِي قَالْ لَيِّ: ‹شِيلْ بِرْشَكْ وَ أَمْشِي.›» 12وَ سَأَلَوْه وَ قَالَوْا: «يَاتُو النَّادُمْ الْقَالْ لَيْك شِيلْ بِرْشَكْ وَ أَمْشِي؟» 13وَ لَاكِنْ النَّادُمْ مَا عِرِفْ يَاتُو الشَّفَاهْ أَشَانْ عِيسَى بَعَدْ مِنَّهْ فِي أُسْط النَّاسْ الْكَتِيرِينْ الْقَاعِدِينْ فِي الْبَكَانْ.
14وَ بَعَدَيْن، عِيسَى لِقِيهْ فِي فَضَايَةْ بَيْت اللّٰهْ. وَ حَجَّى لَيَّهْ وَ قَالْ: «خَلَاصْ، إِنْتَ لِقِيتْ الْعَافَيْ. خَلِّي مِنَّكْ ذُنُوبَكْ أَشَانْ شَيّءْ قَاسِي مِنْ دَا مَا يَجِي فَوْقَكْ.»
15وَ النَّادُمْ مَشَى لِكُبَارَاتْ الْيَهُودْ وَ أَوْرَاهُمْ كَدَرْ النَّادُمْ الشَّفَاهْ، هُو عِيسَى. 16وَ مِنْ الْيَوْم دَا، الْيَهُودْ قَمَّوْا يِسَوُّوا مُشْكِلَةْ لِعِيسَى أَشَانْ هُو قَاعِدْ يِسَوِّي عَمَلْ مِثِلْ دَا فِي يَوْم السَّبْت.
إبْن اللّه عِنْده الحياة
17وَ عِيسَى حَجَّى لِلْيَهُودْ وَ قَالْ: «لَحَدِّي الْيَوْم، أَبُويِ اللّٰهْ قَاعِدْ يَخْدِمْ وَ أَنَا كُلَ قَاعِدْ نَخْدِمْ.» 18وَ الْيَهُودْ زِعِلَوْا مِنَّهْ وَ دَوَّرَوْا يَكْتُلُوهْ أَشَانْ هُو يِخَالِفْ شُرُوطْ يَوْم السَّبْت وَ بِقَوْا زَعْلَانِينْ مِنَّهْ زِيَادَةْ أَشَانْ هُو قَالْ اللّٰهْ أَبُوهْ وَ بَيْدَا، هُو سَوَّى نَفْسَهْ مِثِلْ اللّٰهْ.
19وَ عِيسَى حَجَّى لَيْهُمْ وَ قَالْ: «أَسْمَعَوْا نُقُولْ لَيْكُو الْحَقّ، إِبْن اللّٰهْ مَا يَقْدَرْ يِسَوِّي شَيّءْ بِنَفْسَهْ. هُو مَا يِسَوِّي شَيّءْ إِلَّا الشَّيّءْ الْيِشِيفْ أَبُوهْ قَاعِدْ يِسَوِّيهْ. وَ بِمِثِلْ دَا، أَيِّ شَيّءْ الْاللّٰهْ قَاعِدْ يِسَوِّيهْ، إِبْنَهْ كُلَ يِسَوِّيهْ. 20وَ اللّٰهْ يِحِبَّهْ لِإِبْنَهْ وَ قَاعِدْ يِوَصِّفْ لَيَّهْ كُلَّ شَيّءْ الْهُو قَاعِدْ يِسَوِّيهْ. وَ يِوَصِّفْ لَيَّهْ أَعْمَالْ كُبَارْ زِيَادَةْ مِنْ دَوْل أَشَانْ إِنْتُو تِلْعَجَّبَوْا مِنْهُمْ. 21وَ اللّٰهْ الْأَبُو يَبْعَثْ الْمَيْتِينْ وَ يَنْطِيهُمْ الْحَيَاةْ. وَ بِمِثِلْ دَا، إِبْنَهْ كُلَ يَنْطِي الْحَيَاةْ لِأَيِّ نَادُمْ الْيِدَوْر يَنْطِيهَا لَيَّهْ. 22وَ اللّٰهْ الْأَبُو مَا يِحَاسِبْ أَيِّ نَادُمْ لَاكِنْ هُو كَلَّفْ إِبْنَهْ بِكُلَّ الْحِسَابْ 23أَشَانْ كُلَّ النَّاسْ يِكَرُّمُونِي أَنَا إِبْن اللّٰهْ مِثِلْ يِكَرُّمُوا اللّٰهْ. وَ النَّادُمْ الْمَا يِكَرِّمْنِي أَنَا إِبْن اللّٰهْ، مَا يِكَرِّمْ اللّٰهْ الرَّسَّلَانِي.
24«أَسْمَعَوْا نُقُولْ لَيْكُو الْحَقّ، أَيِّ نَادُمْ الْقَاعِدْ يَسْمَعْ كَلَامِي وَ يِآمِنْ بِاللّٰهْ الرَّسَّلَانِي، النَّادُمْ دَا عِنْدَهْ الْحَيَاةْ الْأَبَدِيَّةْ. هُو مَا يَدْخُلْ فِي الْعِقَابْ لَاكِنْ هُو مَرَقْ مِنْ الْمَوْت وَ دَخَلْ فِي الْحَيَاةْ خَلَاصْ.
25«أَسْمَعَوْا نُقُولْ لَيْكُو الْحَقّ، وَكِتْ وَاحِدْ يَجِي وَ جَاءْ خَلَاصْ. وَ فِي الْوَكِتْ دَا، الْمَيْتِينْ يَسْمَعَوْا حِسّ إِبْن اللّٰهْ وَ كَنْ سِمْعَوْه يَحْيَوْا. 26وَ مِثِلْ اللّٰهْ هُو ذَاتَهْ بَسْ يَنْطِي الْحَيَاةْ، هُو أَنْطَى إِذِنْ لِإِبْنَهْ كُلَ يَنْطِي الْحَيَاةْ مِثْلَهْ. 27وَ اللّٰهْ أَنْطَاهْ إِذِنْ لِيِحَاسِبْ النَّاسْ أَشَانْ هُو إِبْن الْإِنْسَانْ. 28مَا تِلْعَجَّبَوْا فِي الْكَلَامْ دَا. يَوْم وَاحِدْ يَجِي وَ فِي الْيَوْم دَا، كُلَّ النَّاسْ الْقَاعِدِينْ فِي قُبُورْهُمْ يَسْمَعَوْا حِسّ إِبْن اللّٰهْ 29وَ يَمُرْقُوا. وَ النَّاسْ السَّوَّوْا الْخَيْر يَبْعَثَوْا لِلْحَيَاةْ وَ لَاكِنْ النَّاسْ السَّوَّوْا الشَّرّ يَبْعَثَوْا لِلْحِسَابْ. 30أَنَا وِحَيْدِي مَا نَقْدَرْ نِسَوِّي شَيّءْ. أَنَا نَسْمَعْ كَلَامْ أَبُويِ وَ عَلَيْ حَسَبْ كَلَامَهْ بَسْ، نِحَاسِبْ النَّاسْ. وَ نِحَاسِبْهُمْ بِعَدَالَةْ أَشَانْ مَا نِسَوِّي شَيّءْ حَسَبْ فِكْرِي أَنَا بَسْ. لَاكِنْ نِدَوْر نِسَوِّي دَايْماً الشَّيّءْ الْيِدَوْرَهْ اللّٰهْ الرَّسَّلَانِي.»
شهادة اللّه للمسيح
31وَ عِيسَى قَالْ: «كَنْ أَنَا وِحَيْدِي بَسْ شَاهِدْ لِنَفْسِي، شَهَادْتِي دِي مَا تَنْفَعْ. 32فِي شَاهِدْ آخَرْ وَ هُو يَشْهَدْ لَيِّ وَ أَنَا عِرِفْت شَهَادْتَهْ لَيِّ صَحِيحَةْ. 33إِنْتُو رَسَّلْتُوا نَاسْ أَشَانْ يَسْأَلَوْا يَحْيَى وَ هُو رَدَّ لَيْكُو بِشَهَادَةْ صَحِيحَةْ. 34أَنَا مَا نِدَوْر شَهَادَةْ إِنْسَانِيَّةْ لَاكِنْ حَجَّيْت بِشَهَادَةْ يَحْيَى أَشَانْ نِدَوْر كَدَرْ إِنْتُو تَنْجَوْا. 35يَحْيَى هُو بِقِي لَيْكُو مِثِلْ فَانُوسْ مُوَلِّعْ وَ يَنْطِي نُورْ. وَ إِنْتُو فِرِحْتُوا بِنُورَهْ لِمُدَّةْ وَكِتْ. 36لَاكِنْ فِي شَاهِدْ آخَرْ يَشْهَدْ لَيِّ وَ شَهَادْتَهْ أَكْبَرْ مِنْ شَهَادَةْ يَحْيَى. الْأَعْمَالْ الْأَبُويِ اللّٰهْ أَنْطَاهُمْ لَيِّ وَ أَنَا قَاعِدْ نِسَوِّيهُمْ لَحَدِّي نِكَمِّلْهُمْ، دَوْل بَسْ يَشْهَدَوْا لَيِّ أَشَانْ تَعَرْفُوا بِالصَّحِيحْ اللّٰهْ رَسَّلَانِي.
37«وَ أَبُويِ اللّٰهْ الرَّسَّلَانِي، هُو ذَاتَهْ شَهَدْ لَيِّ. حِسَّهْ إِنْتُو أَبَداً مَا سِمِعْتُوهْ وَ صُورْتَهْ أَبَداً مَا شِفْتُوهَا 38وَ كَلَامَهْ مَا قَاعِدْ فِي قُلُوبْكُو أَشَانْ مَا آمَنْتُوا بِالنَّادُمْ الْاللّٰهْ رَسَّلَهْ. 39إِنْتُو قَاعِدِينْ تَقْرُوا الْكِتَابْ كَتِيرْ أَشَانْ فِي فِكِرْكُو إِنْتُو تُقُولُوا تَلْقَوْا الْحَيَاةْ الْأَبَدِيَّةْ. الْكِتَابْ يَشْهَدْ لَيِّ أَنَا 40لَاكِنْ إِنْتُو أَبَيْتُوا مَا تَجُوا لَيِّ أَشَانْ تَلْقَوْا مِنِّي الْحَيَاةْ.
41«أَنَا مَا نِدَوْر شُكُرْ مِنْ النَّاسْ. 42لَاكِنْ إِنْتُو، أَنَا نَعَرِفْ كَدَرْ فِي قُلُوبْكُو مَا تِحِبُّوا اللّٰهْ. 43أَنَا جِيتْ لَيْكُو بِأُسُمْ اللّٰهْ أَبُويِ وَ لَاكِنْ مَا قِبِلْتُونِي. كَنْ نَادُمْ آخَرْ يَجِي بِأُسْمَهْ حَلَالَهْ، هُو بَسْ تَقْبَلَوْه. 44كِكَّيْف تَبْقَوْا مُؤمِنِينْ بِالصَّحِيحْ كَنْ إِنْتُو تِدَوْرُوا شُكُرْ مِنْ أَخْوَانْكُو وَ مَا تِجَاهُدُوا أَشَانْ تَلْقَوْا شُكُرْ مِنْ اللّٰهْ الْوَاحِدْ؟
45«مَا تُخُطُّوا فِي عُقُولْكُو كَدَرْ أَنَا النَّادُمْ الْيَتْهَمْكُو قِدَّامْ اللّٰهْ. دَا النَّبِي مُوسَى بَسْ الْيَتْهَمْكُو وَ هُو النَّادُمْ الْإِنْتُو تُخُطُّوا عَشَمْكُو فَوْقَهْ. 46وَ كَنْ بِالصَّحِيحْ إِنْتُو مُؤمِنِينْ بِمُوسَى، تِآمُنُوا بَيِّ أَنَا كُلَ. أَشَانْ مُوسَى كَتَبْ فِي شَانِي فِي الْكِتَابْ. 47لَاكِنْ كَنْ أَوَّلْ مَا آمَنْتُوا بِالْكَلَامْ الْمُوسَى كَتَبَهْ، كِكَّيْف تِآمُنُوا بِكَلَامِي أَنَا؟»
Okuqokiwe okwamanje:
يُوحَنَّا 5: ع.د.ت19
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
La Bible en arabe tchadien © Alliance biblique du Tchad, 2019
