أعمال الرُسُل 3
3
المعْضور اللِقي العافي
1وَ يَوْم وَاحِدْ، بُطْرُسْ وَ يُوحَنَّا مَاشِينْ فِي بَيْت اللّٰهْ أَشَانْ يِصَلُّوا صَلَاةْ هَنَا السَّاعَةْ تَلَاتَةْ. 2وَ نَادُمْ وَاحِدْ قَاعِدْ جَنْب بَابْ هَنَا بَيْت اللّٰهْ الْأُسْمَهْ الْبَابْ الْجَمِيلْ. وَ مِنْ وِلْدَوْه، هُو مَعْضُورْ. وَ كُلَّ يَوْم أَخْوَانَهْ يِوَدُّوهْ وَ يُخُطُّوهْ هِنَاكْ أَشَانْ يِهَجِّرْ وَ يَلْقَى صَدَقَةْ مِنْ النَّاسْ الْيِنْدَسَّوْا فِي بَيْت اللّٰهْ. 3وَ وَكِتْ هُو شَافْ بُطْرُسْ وَ يُوحَنَّا جَايِينْ يَدْخُلُوا، هُو سَأَلْ مِنْهُمْ صَدَقَةْ.
4وَ وَقَفَوْا وَ شَافَوْه عَدِيلْ وَ بُطْرُسْ قَالْ لَيَّهْ: «حَمِّرْنَا عَدِيلْ!» 5وَ هُو شَافَاهُمْ وَ فِي فِكْرَهْ، هُمَّنْ يِدَوْرُوا يَنْطُوهْ صَدَقَةْ. 6وَ بُطْرُسْ قَالْ: «مَا عِنْدِي فُضَّةْ وَ مَا عِنْدِي دَهَبْ لَاكِنْ نَنْطِيكْ الشَّيّءْ الْعِنْدِي. بِأُسُمْ عِيسَى الْمَسِيحْ الْمِنْ النَّاصِرَةْ، نُقُولْ لَيْك قُمّ وَ رُوغْ!»
7وَ بُطْرُسْ كَرَبَهْ مِنْ إِيدَهْ الزَّيْنَةْ وَ سَاعَدَهْ لِيُقُمّ. وَ طَوَّالِي كَيْ، هُو لِقِي قُدْرَةْ وَ رِجِلَيْنَهْ أَلْفَرْتَقَوْا وَ بِقَوْا ثَابْتِينْ. 8وَ نَطَّ فَوْق وَ قَمَّ يُرُوغْ وَ دَخَلْ مَعَاهُمْ فِي بَيْت اللّٰهْ. وَ قَاعِدْ يُرُوغْ وَ يِنَطِّطْ وَ يَشْكُرْ اللّٰهْ.
9وَ كُلَّ النَّاسْ هِنَاكْ شَافَوْه رَايِغْ وَ يَشْكُرْ اللّٰهْ. 10وَ عِرْفَوْا دَا بَسْ الْمَعْضُورْ الْيِهَجِّرْ كُلَّ يَوْم فِي الْبَابْ الْجَمِيلْ هَنَا بَيْت اللّٰهْ. وَ أَلْعَجَّبَوْا مَرَّةْ وَاحِدْ وَ خَافَوْا مِنْ الشَّيّءْ الْبِقِي. 11وَ بُطْرُسْ وَ يُوحَنَّا جَوْا فِي بَكَانْ وَاحِدْ فِي فَضَايَةْ بَيْت اللّٰهْ الْأُسْمَهْ رَاكُوبَةْ سُلَيْمَانْ وَ الرَّاجِلْ قَاعِدْ يَمْسُكْهُمْ وَ نَاسْ كَتِيرِينْ لَمَّوْا فَوْقهُمْ وَ أَلْعَجَّبَوْا مَرَّةْ وَاحِدْ.
بُطْرُس حجّى للناس في بيت اللّه
12بُطْرُسْ شَافْ كُلَّ النَّاسْ اللَّامِّينْ وَ حَجَّى لَيْهُمْ وَ قَالْ: «يَا بَنِي إِسْرَائِيلْ، مَالْكُو عَجَّبْتُوا فِي الشَّيّءْ دَا؟ وَ مَالْكُو تِحَمُّرُونَا؟ فِي فِكِرْكُو، الرَّاجِلْ دَا قَمَّ رَاغْ بِقُدْرِتْنَا أَنِحْنَ؟ وَلَّا أَشَانْ أَنِحْنَ صَالِحِينْ زِيَادَةْ وَلَّا؟ 13اللّٰهْ رَبّ جُدُودْنَا إِبْرَاهِيمْ وَ إِسْحَاقْ وَ يَعْقُوبْ رَفَعْ عَبْدَهْ عِيسَى وَ خَطَّاهْ فِي مَجْدَهْ. وَ دَا بَسْ النَّادُمْ الْإِنْتُو سَلَّمْتُوهْ لِلْمَوْت. قِدَّامْ بِلَاطُسْ نَكَرْتُوهْ وَكِتْ هُو دَوَّرْ يَطِلْقَهْ. 14إِنْتُو أَبَيْتُوا مَا دَوَّرْتُوا النَّادُمْ الصَّالِحْ وَ قُدُّوسْ. وَ طَلَبْتُوا مِنْ الْوَالِي يَطْلِقْ لَيْكُو كَتَّالْ الدِّمَمْ فِي بَدَلَهْ. 15وَ خَلَاصْ، كَتَلْتُوا النَّادُمْ الْيَنْطِيكُو الْحَيَاةْ. وَ لَاكِنْ اللّٰهْ بَعَثَهْ مِنْ أُسْط الْمَيْتِينْ وَ أَنِحْنَ شُهُودْ لِبُعَاثَهْ. 16وَ بِسَبَبْ إِيمَانَّا بِأُسُمْ عِيسَى، الرَّاجِلْ التِّشِيفُوهْ وَ التَّعَرْفُوهْ دَا لِقِي قُدْرَةْ. وَ فِي شَانْ الْإِيمَانْ بِأُسُمْ عِيسَى بَسْ، هُو لِقِي الْعَافَيْ مَرَّةْ وَاحِدْ وَ كُلُّكُو شِفْتُوهْ بِعُيُونْكُو.
17«يَا أَخْوَانِي، أَنَا نَعَرِفْ إِنْتُو وَ كُبَارَاتْكُو أَبَيْتُوا الْمَسِيحْ أَشَانْ مَا عِرِفْتُوهْ. 18مِنْ زَمَانْ، اللّٰهْ كَلَّمْ بِوَاسِطَةْ كُلَّ الْأَنْبِيَاء وَ قَالْ كَدَرْ الْمَسِيحْ يَتْعَبْ وَ خَلَاصْ دَا بَسْ الشَّيّءْ الْبِقِي. 19وَ هَسَّعْ تُوبُوا وَ قَبُّلُوا لِلّٰهْ أَشَانْ هُو يَمْحَا ذُنُوبْكُو! 20وَ اللّٰهْ يَنْطِيكُو سَلَامْ فِي قُلُوبْكُو وَ يِرَسِّلْ لَيْكُو مَرَّةْ تَانِيَةْ عِيسَى الْهُو عَزَلَهْ لَيْكُو قُبَّالْ وَ هُو الْمَسِيحْ. 21وَاجِبْ يَقْعُدْ فِي السَّمَاءْ لَحَدِّي يَوْم الْفَوْقَهْ اللّٰهْ يِجَدِّدْ كُلَّ شَيّءْ. وَ دَا مِثِلْ هُو قَالَهْ مِنْ زَمَانْ بِوَاسِطَةْ الْأَنْبِيَاء الصَّالِحِينْ الرَّسَّلَاهُمْ. 22وَ النَّبِي مُوسَى قَالْ: <اللّٰهْ إِلٰـهْكُو يِقَوِّمْ لَيْكُو مِنْ أَخْوَانْكُو نَبِي مِثْلِي أَنَا. أَسْمَعَوْا كَلَامَهْ وَ سَوُّوا كُلَّ شَيّءْ الْيُقُولَهْ لَيْكُو.>#3:22 الكلام دا تلقوه في تَثْنِية 18:15. 23<وَ أَيِّ نَادُمْ الْمَا يَسْمَعْ كَلَامَهْ، وَاجِبْ يَفْصُلُوهْ مِنْ شَعَبْ اللّٰهْ وَ يَهْلَكْ.>#3:23 الكلام دا تلقوه في لاوِيِّين 23:29.
24«بِمِثِلْ دَا، كُلَّ الْأَنْبِيَاء حَجَّوْا بِوَكِتْنَا دَا، مِنْ النَّبِي صَمُوِيلْ وَ كُلَّ الْأَنْبِيَاء الْجَوْا وَرَايَهْ. 25وَ إِنْتُو عِيَالْ الْأَنْبِيَاء دَوْل وَ أَهَلْ الْمُعَاهَدَةْ الرَّبُّكُو اللّٰهْ سَوَّاهَا مَعَ جُدُودْكُو وَكِتْ هُو قَالْ لِإِبْرَاهِيمْ: <بِذُرِّيّتَكْ بَسْ نِبَارِكْ كُلَّ الْأُمَمْ فِي كُلَّ الْأَرْض.>#3:25 الكلام دا تلقوه في تكوين 12:3. 26وَ اللّٰهْ رَسَّلْ عَبْدَهْ عِيسَى لَيْكُو إِنْتُو أَوَّلْ، قُبَّالْ الْأُمَمْ الْآخَرِينْ، أَشَانْ يِبَارِكُّو وَ يِقَبِّلْ أَيِّ وَاحِدْ مِنْ الدَّرِبْ الْفَسِلْ.»
Okuqokiwe okwamanje:
أعمال الرُسُل 3: ع.د.ت19
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
La Bible en arabe tchadien © Alliance biblique du Tchad, 2019