التكوين 20
20
بركة النبي إبراهيم
مولانا يسلك أعيال النبي إبراهيم
النبي إبراهيم يصلي من أجل اسلاكة شيخ الفلسطينيين
1وارحل النبي إبراهيم من فم واعد ارض النقب اللي فالجنوب واسكن امبين مدينة قادش ومدينة شور وقضا شي من الوقت فمدينة جرار. 2وفم ڮال النبي إبراهيم عن سارة أعيالو: هاذي اختي. وارسل أبيمالكك ملك جرار امراسيل يجيبولو سارة . 3واتجلا مولانا لأبيمالك فحلم فالليل وڮالّو: انتا لاهي اتموت بسبب اعلنك اڮبظت امرة متخيمة . 4يغير أبيمالك لحڮو ذا مافات امسها وڮال لمولانا: لاهي تكتلني وتكتل أمة بريئة؟ 5امالو ڮالّي اعلنها اختو وهي املي ڮالتلي اعلنو خوها؟ ما عدلت ذا اللي عدلت يكون شاك اعلنو صالح ونيتي كانت زينة . 6وڮالّو مولانا: آنا نعرف اعلنك نيتك كانت زينة ، ولذاك امنعتك من اطيح فالمعصية واتمس سارة. 7ظرك اصا رجع للراجل أعيالو بيهلي هو نبي، اياك يطلبك مولانا وتحيا. وإلى ما رجعتها اعرف اعلنك انتا وذا اللي لك ميتين قطعا.
8وبكر أبيمالك امع الصباح وعيط لعبيدو كاملين، ورد اعليهم ذا اللي اخلڮ، وانخلعو كاملين خلعة امتينة. 9وعيط أبيمالك للنبي إبراهيم وڮالّو: اللي عدلتنا شنهو؟ شنهو الخطأ اللي عدلتلك اياك اتجيبلي واتجيب لمملكتي هاذا الذنب لكبير؟ انتا عدلتلي شي خاسر ما كان يالتك اتعدلولي. 10وسول أبيمالك النبي إبراهيم: اشخلاك اتعدل هاذا ؟ 11وڮالّو النبي إبراهيم: آنا عدلت ذا اللي عدلت بيهلي شكيت اعلن هاذي لبليدة ما فيها حد خايف من مولانا، وخفتكم تكتلوني اعلى أساس أعيالي. 12وفلحقيقية هي اختي منت بويَ ولا هي منت أمي واتعرست امعاها. 13وإلين ادعاني مولانا اياك نمشي عن دار بويَ، ڮتلها: بل امنين نمشو ڮولي اعلني خوك واتعودي عدلتيلي غاية اكبيرة.
14واڮبظ أبيمالك اغنم وابڮر واعبيد واخدم واعطاهم للنبي إبراهيم، ورجعلو سارة أعيالو. 15وڮال أبيمالك: هاذي ارضي ڮدامك واسكن بل امنين تبغي فيها. 16وڮال لسارة: اراني اعطيت لخوك ألف ڮطعة من الفظة . انبرئك بيها من لإساءة ڮدام الناس اللي امعاك، وانتي بريئة ڮدام كل واحد. وابهاذي الطريڮة اتعود رجعتلك كرامتك. 17واطلب النبي إبراهيم مولانا اياك يشفي أبيمالك. وابرات أعيالو وخدمو 18بيهلي مولانا ابلا أعيال وكل اخدم أبيمالك بلعڮار بسبب سارة أعيال النبي إبراهيم.
Okuqokiwe okwamanje:
التكوين 20: الحسانية
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/