Lukas 24
24
Yesus iluk akluk mendek yagagi wene
(Matius 28:1-10; Markus 16:1-8; Yohanes 20:1-10)
1Andi en, it Yakuri samban okbaluk, nogo yiluk hari minggu vaga hutun erogo it akwa en amburup vipuk erogo bagagwa ako, wolok wimu akoma lagagwa. 2Lagu lagagwarik, helep sup larik ako sigilogo lagagi hugu lagagwarik, 3nonggagagwa ovara, Nenowa Yesus eyave warek bagagwa ako inil hegetek. 4Eyave dek halok, “Yi nggarogonggan oklaga?” yiluk, werekma, yukdekma ap mberen enasum mudu amumulip digavok ovagak yirik enadema mendek yi wagu sogogwa. 5Inigu lagagwarik, enalon wisane oginipu dugwit, enelese wen vaga samulik inigik, it ap akoen akwa ako yugurugu dugwit, “At iluk agarik ako it hombagagwa menda enanggelekma agarik haoen yiluk, belalubuk. 6-7Eyave yoma dek. At vage iluk akluk, mendek yagas. At o Galilea dugwit, ‘An Ap-At Endaklagagis ako narupwak yiluk, neyave vagarogo it ap weyak menda wogirigya dogomima, yo winik vaga lobalogo banungguselok, ndugwis mberen dukluk ndugwis ambi vaga Ala en niluk erogo mondok okbanisogon o,’ yiluk, wene yukheragagi ako henape wenggeles.” 8Yugurugu lagagwama, At endak yagagi ako enape wenggelagagi.
9Wenggenggu lagagwarik, wimu en eneyami vaga wunggu lagagwarik, inil hagagwa ako ovok erogo it ap 11 inim, enaswei inim nagu lagagwa ako ovok erogo inim, mbilinogo yugeragagwa. 10It akwa en ap lakbigik menda mbilinogo yugeragagwa ako andi, hwa Maria awi Makdalena menda inim, hwa Yohana inim, Yakobus isa Maria inim, it akwa adik inim, iren mbilinogo yugeragagwa.
11Yugeragagwa ako, it lakbigik menda en, “It akwa yi wes ovagak yagalagwi,” yiluk, it avyarat embetetek welagagwa ovara, 12At Peterus, mendek yiluk, vupuk wimu akoma lagya lagagirik, ambot seve yiluk, il malhigya lagagirik, yum nggolalek ako adigat andenam hagagi. Higya lagagirik, “Yi nggarogonggan aga wi!” yiluk, endawima wenggelit amwa winggigi.
Sup o Emaus vaga lagu dugwit, ogagagwa wene
13Ndugwis andi vaga Yesus ane welagwi menda mberen o Yerusalem en o ambi inis Emaus lagagwa. O kota Yerusalem en o Emaus laup andi, o adumu 11 kilometer atma, lagu dugwit, 14oklagya hagagwa ako ovok erogo mbilinit lagagwa. 15Mbilinggu dugwit, wene nidi-hidi mbalit lagusim, Yesus adik enadema lagya lagagirik, inim lagagi ovara, 16At yedok haguven yiluk, enendawi apik erogo bogogi.
17Enendawi apik erogo bogogi inigik, At Yesus en it yugirigya dugwit, “Hit suvaga lagu dugwit, wene ngga mbalit lendagwi?”
Yugirigya lagagimu, enelese enabwa edok erek mbup yugu lagagwarik, 18iperen ako ambi inis Keliopas en At Yesus yugugu dugwit, “It ap huru yi awi ndi awi en o Yerusalem nunggu wagao agarwik ako yogak ogaga yi, ovok erogo inilup ovara, Hat hadik hinggutmu wagya lagindik, yegen yi?”
19Yugugu lagagimu, At Yesus en, “Nggarogo agarikmu yegep?”
Yugirigya lagagimu, iren, “Ap Yesus awi Nasaret menda. At andi, Ala en yugugu hegek yugeraliga menda navi dugwit, wene yugirigya laga inim, ogagya laga inim, andi Ala ogo, nit avakwa ovok erogo ogo, ninivaga mondok anye iya erogo ogarit lagya hugu lagyo. 20Andi ovara, it ap imam-imam nenasini inim, nit Yakuri nenasini inim, iren warup wene mbabaluk, yo winik vaga lobalogo bapwak yiluk, wogirugu lagaoma, yo winik vaga lobalogo bagao ako. 21Nit avakwa Iserali menda visilogo bininup ako Arat imbitoma, ai. Anderogo ovara, okbagao hegek, yogak ndugwis mberen welagyo. 22Eke, ambi, it akwa nit ninisai akoen nenanggela wibininggao. It akwa ako o hutun erogo wimu akoma lagu lagarwik, 23At eyave warek dek hagao. Eyave dek halok, wagu lagarwik, nit yuknirugu dugwit, ‘It malaikat menda en, “Dek. At iluk agarik,” yiluk, nogo heda nenabi heda higyo,’ yuknirugu sugup. 24Yuknirugu lagaoma, it nin ninim welagyo en wimu bikha lagu lagarwik, akwa yukneragao ako ndatak hagao ovara, At eyave andi, dek hagao,” yiluk, Yesus adema mbilinogo yugogogwa.
25Yugugu lagagwama, At Yesus en it yugirigya dugwit, “Hit henendawi wes yundup erek higi. It ap navi-navi Ala en yugirigya hegek henombawi yugurugu lagagwa ako ovok erogo henendawi obak avyarat embetetek nggarogo yiluk agipik? 26At Ala en denogo mondok okbagagi Keretus ako anggin-mbanggin ovaga bagao yegep ako, ovaga bagetek hegek, At siyabaup embetep? Dek. Ovaga baup agarikmu, bagao,” yiluk, yugirigya lagagirik, 27At Ala en denogo mondok okbagagi ako wagya halok, “Anderogo ogasogon,” yiluk, Musa wene dirup watigi ako hudien it ap navi-navi Ala en yugirigya hegek yugurugu lagagwa dirup watugwa ako ovok erogo mbilinogo yugeragagi.
28Mbilinogo yugirigya hegek, o it laup umbutugwarikmu akoma ndan yi lagu lagagwarik, At mbikit layogon yiluk, ogagagi ovara, 29sovabaluk, yugugu dugwit, “Mo il huruk iri dugwit o hup asogon atma, ninim dogosogom o,” yugugu lagagwama, inim dogogiluk, enamwa nonggagagi.
30Nunggwigya lagagimu, inim erom naguluk, hora yiluk, erom inggimu wigya lagagirik, “Nasin Ala wa,” yiluk, ugurogo wogeragiluk ogagya lagagimu, 31“At ako yiat higyo o,” yiluk, yedok hagagwa. Yedok hugu lagagwama, inil inigik, enanggelekma andenam en dek agagi.
32Enanggelekma en dek agya lagagimu, iperen wene mbanggu dugwit, “Avyak! Suvaga wagu dugwit, wene yuknirigya, Ala wene dirup warek mbilinogo yuknirigya, ogagya hegek, nit nenendawi mondok adenggen wisane okninivit nunggwigya higyo ako ai?” yiluk, yagagwa.
33-34Yugu lagagwarik, andi hudi mbikit mendek yiluk, eneyami vaga o Yerusalem wagagwa. Wagu lagagwarik, it ap 11 inim, avakwa nin inim, homakbaluk dugwit, “Nenowa Yesus avyarat iluk akluk, mendek iri lagarik, eyave ap Simon adema sigam ari waga o,” yiluk, mbilinggu sogogwa.
35Inigu lagagwarik, it ap mberen ako suvaga lagu dugwit, ogagagwa inim, erom ugurogo wogirigya hegek At yedok hagagwa ako inim, ovok erogo mbilinogo yugeragagwa.
At ane welagwi menda ovok erogo enadema sigam agagi wene
(Matius 28:16-20; Markus 16:14-18; Yohanes 10:19-23; Lakbogogi Wene 1:6-8)
36Mbilinogo yugurugusim, supuk erogo, Yesus adik enanggelekma mendek yi nunggwigya lagagirik, “Henalon habuk, henendawi sek vaga dogones,” yugeragagi.
37Yugirigya lagagimu, inil hugu lagagwarik, enanggela wunggu dugwit, “Yi madis ai?” yiluk, enalon wisane agagwa. 38Enalon wisane agu lagagwama, Yesus en it yugirigya dugwit, “Hit nggarogo yiluk henendawi anggin dugwit, henendawi yunggup yegek yagalagwi? 39Hit Anat yedok neyaguluk, ninggis-nisok yi, bikneyanes. An ninyo-nowak werek neyagep ndatak it madis andi ininyo-enowak werek dekma, An vaknitu dugwit, An neyave-at nombares,” yugeragagi.
40Yugirigya lagagirik, inggis-isok sigam inuk eragagi. 41Inuk irigya lagagimu, enendawi adenggen en, “Wi, nenalon! Yi nggarogonggan oklaga!” yiluk, umbutu dugwit, “Yi At eyave-at,” ao embetetek inigik, it yugirigya dugwit, “Erom ambi werek a, dek a?” 42Yugirigya lagagimu, ikan isogo ambi wogugu lagagwama, 43hidigya lagagirik, it inil inigik ninggigi.
44Ninggya lagagirik, yugirigya dugwit, “Ninim dugwit, An ogarup wene ako Ala wene Musa en dirup watigi ako inim, it ap Ala en yugirigya hegek yugurugu lagagwa navi-navi dirup watugwa inim, mbuku Ndawi Wene dirup warek inim, ovok erogo atma des yisogon o, yiluk, yukhirigya lagi ako yiat okbenanggao o,” yiluk, yugeragagi.
45Yugirigya lagagirik, Ala wene sigam hapwak yiluk, enendawi awiya okbogogi. 46Enendawi awiya erogo okbugu lagagirik, yugirigya dugwit, “Ala wene dirup warek vaga iri dugwit, ‘At Ala en denogo mondok okbagagi Keretus ako edup-mbedup ovaga baguselok, ndugwis mberen dukluk, ndugwis ambi vaga hambuluk bisa lendagwima en iluk agya dogomindik, mendek yisogon. 47Hit weyak ogasagwi ako henasam helok, henomaduk mbobagu hiniselok, Ala en henomaduk degerogo bigigayogon o,’ yiluk, wene ako At inis vaga, eve endak o Yerusalem en yi awi ndi awi ovok erogo yugeregek wunggu dogosogom o, yiluk, Ala wene dirup watugwa ako yiat okbenanggao. 48Ogagya neyagep yi ako, ovok erogo vagalogo yugeregek nagu dogop andi hiratma, 49Nasin en wokheraup avok yukheragagi ako, Anen henovaga wombabigiga wasogon. Wombabigiga wasogon atma, Ala anye eloma en henovaga mondok dikduk okba wagetek hegek, o kota yoma dogop,” yiluk, yugeragagi.
Yesus mbogot vaga wolok inggigi wene
50Yugirigya lagagirik, o kota en wunggu lagagwarik, woginiviluk o Betania horok andoma ari lagu lagagwarik, inggis ilik bagya dugwit, adenggen enovaga bogogi. 51Adenggen enovaga ao bugu hegek, At eyave wolok mbogot vaga inggya hagagwa. 52Inggya hugu lagagwarik, Ala avema seve yiluk inis siyabagu lagagwarik, enadenggen wisane embetek eneyami vaga o Yerusalem lagagwa. 53Wunggu lagagwarik, Ala awi valekma akoma adigat dugwit, enendawi adenggen en Ala inis siyabagu lagagwa.
Okuqokiwe okwamanje:
Lukas 24: nbq2013
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
