Lukas 18
18
Ap owak dilisiga menda, hwa sogwa inim ogagagwa wene
1Anderogo yugirigya lagagirik, avakwa anggon-mbanggon okbigitek samban adigat ogagu dogopwak yiluk, Yesus en wene wakhegek yi At ane welagwi menda ako yugirigya dugwit, 2“O kota ambima ap wene owak dilisiga menda ambi welagagi. Ap andien Ala alon imbita, eke, avakwa enane alon imbita, ogagetek-at welagagi.”
3“Eke, hwa sogwa ambi o kota andoma welagagi. Hwa andien ndugurek-ndagarek ap wene owak dilisiga ako adema yuguri lagek adigat ogagya dugwit, ‘At ninim ogorek akoen ando mbalogo baniliga atma, an ugun ogarit lagya dogogiluk, an nawene hologo banin,’ yiluk, yugugu lagagi.”
4“Yugugu lagagi ako ap owak dilisiga menda ako en endak anggon imbitigi ovara, yuguri lagek adigat ogagya lagagimu, hivis endawi wenggenggu dugwit, ‘An Ala nalon ombasigadek, eke, avakwa ogo enane nalon ombasigadek ovara, 5hwa sogwa yi, hunik adigat yukniri wandiga atma, aburuk okbaninggya haoen, nggatuk erogo awene mbalisogon,’ imbitigi,” yiluk, Yesus en yugeragagi.
6Yugirigya lagagirik, At Nenowa Yesus akoen “At ap wene owak sek erogo dilisigadek menda yagagi ako holes. 7Anderogo ndatak Ala en At aburi miginipigi ako enane hup-dingga At yuguguselok, enowak dilogo enawene nggatuk erogo mbalisogon dek embetep? Dukluk heveretmbo, ndogovitmbo, adigat wolok lagya dugwit, enawene mbalup embetep? 8Dek. Mbikit enowak dilogo enawene nggatuk erogo mbalisogon, yiluk, yukheraliga. Anderogo oginivup ovara, An Ap-At Endaklagagis wagya neyalok, it avakwa wen vaga yoma enendawi novaga vanggabaluk, avyarat numbutu sami a, dek a?” yiluk, yugeragagi.
Ap Varisi inim, ap pemerintah enake yoparip wonggalisiga menda inim, enavok yugeragagi wene
9Yugirigya lagagirik, it avakwa nin enendawi en, “Avakwa nin andi, mondok meyan, eke, nit andi, Ala wene dibaluk, sek adigat ogasagwi o,” umbutu lagagwarikmu, Yesus en wene wakhegek yi yugirigya dugwit, 10“Ap mberen samban ogaruguluk, Ala awi valekma nonggagagwa. Ambi andi, Varisi menda, eke, ambi andi, ap weyak pemerintah enake yoparip wonggalisiga menda. 11Iperen Ala awi valekma nunggugu lagagwarik, ap Varisi akoen mendek yiluk, samban okhidigya dugwit, ‘Ai, Nasin Ala! It avakwa enonggop welagwi menda inim, weyak ogasagwi menda inim, wanggi welagwi menda inim, eke, ap pemerintah enake yoparip wonggalisiga menda yi ako inim, an anderogo hak dek atma, wa yukhisiga. 12An samban ambi vaga ndugwis mberen Ala ake yiluk, erom hunis agirik o. Eke, nangge agarik halok, nin higirogo Hat Ala hake baliga o,’ yiluk, yugogogi. 13Yugogogi ovara, ap pemerintah enake yoparip wonggalisiga menda akoen andi, adumu erogo mendek yi lagya lagagirik, alon en il mbogot vaga ilik lagetek eyave wakhidigya dugwit, ‘Ai, Nasin Ala! An weyak ogasiga menda atma, nabwa ombaru o,’ yiluk, yugogogi.”
14“Iperen samban anderogo ogagagwa ovara, at samban endak ogagagi ako dek. Ata, hivis ogagagi ako adigat Ala en, ‘Ap andi, endawi sek higi o,’ imbita hegek, amwa lagagi. Andi, ap ambi endawi siyabatigya halok, sovabagya, eke, endawi sovabatigya halok andi, siyabagya, ogagya hagup o, yiluk, yukheraliga,” yugeragagi.
Yesus en avyak mariduk adenggen enovaga bogogi wene
(Matius 19:13-15; Markus 10:13-16)
15Andien, hivis avakwa en avyak mariduk Yesus inggis vakbisiluk adenggen enovaga bisapwak yiluk, At adema woginiviluk wagagwa. Woginiviluk wagwi ako, At ane welagwi menda en inigu lagagwarik, mbereragagwa. 16Mberirugu lagagwama, At Yesus en avyak ako warupwak yiluk, yanggup yugirigya lagagirik, wagusigik, At ane welagwi menda ako yugirigya dugwit, “Hekbisines! Ala avema dogop andi, it avyak mariduk yerogo ndatak atma, An nadema wagusim, moga yugerabuk. 17Dibas! It avyak mariduk Ala avema dogopwak yiluk nunggwisagwi anderogo hak, hit anderogo nunggegetek hiniselok andi, nunggusogombuk o,” yiluk, yugeragagi.
Ap inggi werek ambi ogagagi wene
(Matius 19:16-26; Markus 10:17-31)
18It ap Yakuri enasin ambien Yesus yugugu dugwit, “Ngguru wai! Hat sek adigat agindik yi, an mondok-mondok niluk dogogiluk, nggarogo ogarik?”
19Yugugu lagagimu, At Yesus en, “Nano yiluk An sek adigat agirik yiluk, yuknigin? Ap ambi sek adigat agarik andi mondok dek, Ala adigat sek agarik,” yugugu lagagirik, 20“Wene yerogo ogarup, nderogo ogarup, Ala wene dirup warek ako andi, hat ovok hilup. ‘Ap ogwa werek hegek, hwa agun werek hegek, ogarup moga. Ap warup moga. Ap enangge-enangge enonggop waup moga. Henane huluk ap enovaga bisaup andi moga. Hinisa-henasin enagayuk wutu dugwit, enane des erogo hunggu dogones,’ yiluk, wene yagagi dirup warek ako hat ovok hilup.”
21Yugugu lagagimu, ap akoen, “Wene andi an madukma en des erogo ogagya lagagis,” yiluk, yugogogi.
22Yugugu ako At Yesus hunggu lagagirik, “Wene andi ovok erogo ogasiga ovara, ambiat andi, ogagetek heyagi ako yukhisogon. Hat hangge ovok erogo onggo hunbaluk, it ap ininggidek menda ako wogerelak. Wogera lagya heyalok, hivis hangge-hangge eve sek menda mbogot vaga andoma hedelayogon. Anderogo ovok wogera lagya dogomindik, ninim nagu dogoguluk, omano,” yiluk, yugogogi.
23Yesus en ap ako yugogogi aruk hunggu lagagirik, at angge-angge wisane ako vaga endawi hunik atma, wogeraup anggon imbita dugwit, endawi mondok wakhedagagi. 24Endawi wakhidigya hegek, At Yesus en bikhigya lagagirik, at yugugu dugwit, “It ap ininggis werek menda ako, At Ala avema bisaligama andi nggarogo nunggup erek higi o,” yugogogi. 25“Wam unta eyave ombok hegek, yarum elo maduk vodalek andi nunggup ndak ovara, ap ininggis werek halok andi, Ala avema bisaligama nggarogo nunggup erek higi,” yiluk, yugeragagi.
26Yugeragagi it hunggugwa akoen Yesus yugugu dugwit, “Andi halok, it sani enagap wendarimi?” yiluk, yugogogwa.
27Yugugu lagagwama, At Yesus en, “It avakwa en ogarup meyan helagwi ako, Ala en ogarup segat haliga,” yiluk, yugeragagi.
28Yugirigya lagagimu, at Peterus en At yugugu dugwit, “Nit nenangge-nenangge ovok erogo hekbisiluk, hinim nagu dogoguluk, wagyo akora?”
29Yugugu lagagimu, At Yesus en, “At saen Ala avema dugwit Ala eyavup ogarit lagya dogogiluk, awi valek inim, ogwa inim, owa-aot inim, asin-isa inim, aburi inim, ovok erogo hekbisiluk wagya halok, 30yogak avoloma wisane wogirisogon. Eke, hivis atok vaga at mondok-mondok iluk dogosogon o, yiluk, avyarat yukheraliga o,” yugeragagi.
“An narusogom o,” ambi inim yugeragagi wene
(Matius 20:17-19; Markus 10:32-34)
31Yugirigya lagagirik, andien, ap 12 ako woginiviluk enadikmu ari lagu lagagwarik, it yugirigya dugwit, “Avyak yoma wai! Nit o Yerusalem dagasagwi. Dagasagwi atma, it ap Ala yugirigya hegek yugurugu lagagwa navi-navi en An Ap-At Endaklagagis okbanup dirup watugwa ako ovok erogo andoma en atma des iri hasogom. 32An Ap-At Endaklagagis ako narupwak yiluk, avakwa weram Yakuri dek menda wogerasogom. Wogurugu dogomwima, An nanggadi wakbanunggwi, wiyiknom-weyaknom erogo banunggwi, enowaris novaga suvurogo banunggwi, okbaniluk, 33nabirok nggotalogo natu dogomundik, neyave mondok narusogom. Natu dogomwima, ndugwis mberen dukluk ndugwis ambi vaga niluk akluk mendek yisogon o,” yiluk, yugeragagi.
34Wene adem hwilago ovagak yugeragagirikmu, wene ako ovok erogo it yedok hegetek enendawi obak welagagwa.
Ap il mbuk sek ogagagi wene
(Matius 20:29-34; Markus 10:46-52)
35At Yesus o Yeriko horok ari wagya hegek, ap ambi il mbuk atma, sup ombok vaga horaik dugwit ambenggino iri lagagi. 36At ap ako it avakwa wisane enane yagan wagwi aruk hunggu lagagirik, “Yi nano yagan wendagwi?”
37Yugirigya lagagimu, it avakwa en, “Dek! Yesus awi Nasaret menda ako, sup yi vaga wagya halok, yagan wendagwi.”
38Yugugu lagagwama, ap ako ane ombok vaga iri dugwit, “Yesus wai. Daut ombao wagen yi, an nabwa hanen!”
39Yugugu lagagimu, it enendak wagwi akoen ap ako ane mbup yupwak yiluk, mberogogwa ovara, hegek, aren iri dugwit, “Daut ombao wai. Nabwa nombaru o,” yiluk, ane ombok vaga ambi inim yugigik adigat ogagagi.
40Yugigik adigat iri lagagimu, At Yesus mbup iri lagagirik, ap ako At adema wolok warupwak yiluk, yugirigya lagagimu, wolok At adema bawagu lagagwama, Yesus en ap ako yugugu dugwit, 41“An hat nggarogo okbanupwak yiluk, embeten?”
Yugugu lagagimu, ap akoen, “Nasin. Nil sek okbaninok yiluk, yukhisiga.”
42Yugugu lagagimu, Yesus en, “Hil mbuk andi sek aru. Hat henendawi novaga vanggabaluk avyarat nembeten ako vaga hil ovok sek agen.”
43Ako ao yugugu hegek, at il sek agagi. Il sek agya lagagimu, Yesus inim lagu dugwit, Ala inis siyabagek lagagi. Eke, Yesus ogagagi ako it avakwa ovok erogo hugu lagagwarik, Ala siyabagagwa.
Okuqokiwe okwamanje:
Lukas 18: nbq2013
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
