Maki 6:41-43

Nena, ma Tisasi ɂe toɂia nima mani hausuu na ma rua mani marika na, ma ɂe rio hi uru, ma ɂe hoɂa haahia hanara na. Ɂe nisia nima mani hausuu na, ma ɂe haɂe watea hana para ni mane naia hana wate aɂi ɂana taɂaa na. Ma ɂe torinia rua marika, ma ɂe watea hana para ni mane naia hana kira ka watea ɂana taɂaa na. Rikimana noni ɂaiɂene, kira hana, ma kira pote siko. Nena, ma para ni mane naia kira siɂohia hausuu ma marika ɂe ore hi raona awara ni kato mana rua, ma kira honu siko.