Lug 17
17
Lɔɔ ɨsɨna bɨ kuduroy jalɨwa bɨ
(Matɨyo 18:6-7; Marg 9:42)
1Jesu yen̰ ka-aye-cay-tɨbayi yege hɨn̰: «Naa wa wa kalɨn̰ ma hɨnga ga pɨna ga kɨya lɔɔ gɨ kalaŋ kɨya laydaŋ boy ɨsɨna gɨŋ le, kɨya nale naŋ. Ama hɨn̰ gɨ ungo na laa hɨnga ga nee le na, cɨn̰-n̰age kɨya bɔɔ cayi. 2Hɨn̰ gɨ ungo na saɗa garma gɨ gumu kordi ungo gɨ nee le bɨ, kan na ayayi dɨbii ɗurɔm duroy kuray gɨ gumu taa taa gɨŋ coŋ na, golgo kɨya cayi, ɗɨn̰ gɨ ban na sɨma bɨ layda kan ga aye kudurɔ koge ɓala naŋ. 3Naa hɨn̰ wo̰ na, ɗagɨŋ muɗɔlɛ cay gusɨgɨŋ gɨŋ!
«Hɨn̰ gɨ kurdɨn̰ na laa ɨsɨna na, ɗalayi! Bɨ hɨn̰ gɨ ban na bɨl gɨye-lɔɔdi na, ɗa kuduron̰ jala cayi. 4Hɨn̰ gɨ kurdɨn̰ na laan̰ ɨsɨna tɨba jurgum duroy wɔlɛ gɨ pɨna gɨŋ, ma na bɨl jɨge gusɨn̰ tɨba jurgum duroy wɔlɛ gɨ pɨna gɨŋ yan̰ hɨn̰: “Ɨŋ bɨle gɨye-lɔɔ nɨ yɔd na”, ɗa kuduron̰ jala cayi.»
Aye kudurɔ
(Matɨyo 17:20)
5Ka-gɨre-gɨye ga da Jesu yeyige hɨn̰: «Ba-gulɔŋ laa gɨ ɗe aye kudurɔ koni say cay mɨgayi gɨŋ.»
6Ba-gulɔŋ jɨga dɨbɨge cay nee yege hɨn̰: «Hɨn̰ gɨ aye kudurɔ kogɨŋ na gumu hɨn̰ cɨn̰ hɨnga ga n̰ən̰əŋ ga kan teege naa mutardɨ wo̰ na, kɨŋ kɨya yon̰ ɓolin̰ gɨ ba kɛ le yɔ hɨn̰: “Duroŋ dan̰ sarɨnan̰ ɨra bɨsana gusɨn̰ a duroy kuray gɨ gumu taa taa gɨŋ na”, ban kɨya lɔɔ te tumoygɨŋ.»
Ka-gɨye kɨya lɔɔ gɨye gɨ ojɨ cayge ƴɔbɨ
7«Na waŋ duroy gɨŋ ma na ɨran̰ dan̰ guyɔŋ koyi ma ban na ɨra coŋ yagayi yage, wala ɨra amayi nare ma na saa te coŋ jɨge na, ban kɨya yoyi hɨn̰: “Ɨre haw sɨma dugo kɨbɨ dɔɔ gɨŋ ga?” 8Naŋ! Ban kɨya yɔ hɨn̰ wo̰ naŋ, ama ban kɨya yoyi hɨn̰: “Kɨlanga badɨge kan̰ bɨ, n̰ana cay dɔɔ hɨnge bɨ, bəŋ dɔɔ bɨ, laan̰ gɨye bɨrɨŋ gɨ ɨŋ kɨya dɔɔ bɨ, sɔɔ bɨ, pa dɨm ma mɨn̰ kɨya dɔɔ bɨ, sɔɔ bɨ ƴee.” 9Kɛ ban kɨya hɨrame guyɔŋ koyi le kɨya gɨye gɨ ban yeyi na laa le ga? Naŋ. 10Kɨŋ gandi kalɨn̰ ma: Kɨɗɨn̰ ga kɨŋ na laa hɨnga nɔm ga kan yəgɨŋge gɨ kɨŋ na laa ɨni na, yaagɨŋ hɨn̰: “Ni na gɔyɔŋ ƴɔbɨ. Ni lee na gɨye gɨ ojɨ gɨ ni gɨ lɔɔ ƴɔbɨ.”»
Jesu poɗɨ ka-mada ga mɔjɨ
11Jesu or dan̰ cɨndi jɨn̰ cay ƴaa-di-gumu di Jerusalɛm na, ban ay te kɨɗɛlɛ gɨ gay cay gɨsəŋ ga Samari dan̰ Galile duroy nee. 12Kɨɗɨn̰ ga ban baa mɨnde gɨ kɨya bugoŋ a cay karɨn̰ ƴaa ga pɨna wo̰ na, ka-mada won̰ mɔjɨ yalge cɨndi. Kan ɨrege hen̰ 13bɨ gosge ye hɨn̰: «Gumu koni, Jesu, sɨla cɨn̰-n̰age toni!» 14Jesu solge bɨ yege hɨn̰: «Ɨragɨŋ gɨle gusɨgɨŋ a da ka-bɔgɛ kɨbar» ɗe kan kobɨge sol kɛ mada le duroŋ gusɨgɨŋ leen̰ cɨndi haa bɨ ga?
Kɨɗɨn̰ ga kan ba or na, mada le duroŋ gusɨge. 15Ban gɨ pɨna duroyge kɨɗɨn̰ ga ban ba sol gɨ mada le duroŋ gusi na, bɨlgɨ jɨga cay tɨbayi dɨŋ. Ban ay te hɨrame Kumu dan̰ tumoyi di daa pəŋ. 16Ban baa tumoy Jesu ɨmbe cɨndi dugo leeyi ho’o. Gɨlmi gɨ nee le na gɨ Samari. 17Ɨni na, Jesu ye hɨn̰: «Kɛ kan ga mɔjɨ le, mada duroŋ gusɨge nɔm naŋ ga? Bɨ kan ga dɨngɛsɨ le ba ani ga? 18Ungo pɨna kalɨn̰ ma ɨrɨm gɨ ni jɨga dɨbe gusoŋ-tɔgɛ cay Kumu naŋ, na kɨrga gɨ ba kɛ le kan̰di hayi ba lɔɔ.»
19Kardi nee, Jesu jɨga yeyi hɨn̰: «Saa daa, ɨra. Aye kudurɔ kon̰ poɗɨn̰.»
Kɔl gɨ ojɨ cay dɔɔ-ƴaa gɨ da Kumu gɨ kɨya caga
20Wɔlɛ gɨ pɨna wo̰, Parɨsɨn̰an̰əŋ ɨngɨrge Jesu kɛ na wɔlɛ gɨ ani ma dɔɔ-ƴaa di da Kumu kɨya cagan̰ ga? Jesu dɨbɨge cay nee ye hɨn̰: «Dɔɔ ƴaa di da Kumu le, kɨya ɨrga na hɨn̰ hɨnga ga ka-gɨle gusɨge cɨn̰ kalaŋ wo̰ naŋ. 21Ungo kɨya ɓale yɔ hɨn̰: “Sɨla! Hɨndi ba kɛ” naŋ le “hɨndi ba nii” naŋ. Sɨlagɨŋ kuɗa gɨ dɔɔ-ƴaa di da Kumu woy a duroy gɨŋ.»
22Kardi nee, Jesu yen̰ ka-aye-cay-tɨbayi ye hɨn̰: «Wɔlɛ kɨya caga gɨ kɨŋ kɨya orɨn̰ dan̰ tabɨlaŋ di sɔlɔŋ, ɨŋ-bandi Kurɨn̰-ungo le gɨ ni wɔlɛ pɨna nɛŋ ƴɔbɨ. Ama kɨŋ kɨya sɔlɔŋ dan̰ cɨndɨgɨŋ naŋ. 23Kan kɨya yogɨŋ hɨn̰: “Sɨlagɨŋ! Ban ba kɛ” naŋ le, “Sɨlagɨŋ! Ban ba ni kɔ.” Ama sɔgɨŋ ɔrɛgɨŋ nee naŋ bɨ, gɨre gɨŋ ɔrɛ nee naŋ bɨ. 24Hɨn̰ gɨ Kumu ba wɨlɨn̰ a te kumu gɨŋ, ma asɨn̰ a kɨwa gɨ pɨna gɨŋ bɨrɨŋ andɨn̰ kɨwa gɨ ɗaŋ gɨŋ le, wɔlɛ caga hɨnge ɨŋ-bandi Kurɨn̰-ungo le kalɨn̰ ma, kɨya wɔyɛ na hɨn̰ wo̰ bɨ. 25Ama, pa dɨm ma ɗe wɔlɛdi gɨ nee le na caga ƴee na, ɨŋ kɨya wɔɔ cɨn̰-gɨle-cɨn̰ tɔgɨ bɨ, kalaŋ ga haw kɛ kɨya kan̰aŋge bɨ. 26Wɔlɛ gɨ ɨŋ-bandi Kurɨn̰-ungo ɨŋ kɨya cagan̰ le, hɨnga kɨya lɔɔ gusɨge na hɨn̰ gɨ naa ba won̰ a boy ɨlge gɨ da Nɨwe#17:26 Sɨlagɨŋ: Genèse 6:5-12. gɨŋ wo̰. 27Boy ɨlge gɨ da Nɨwe gɨŋ le, kalaŋ diige bɨ, siige bɨ, ban̰aŋ ƴeege kandɨ bɨ, kandɨ ƴeege ban̰aŋ bɨ, bɨrɨŋ gɨsɨn̰ wɔlɛ gɨ Nɨwe san̰ andɨn̰ a boy koburo gɨ gumu taa taa hɨn̰ ƴaa wo̰. Ɨni na, kaŋdi Kumu ga kondi ongɨ bɨrɨŋ ƴen̰ cay gɨsəŋ pɨl pɨl bɨ, mondɨn̰ kalaŋ muɗɔgɨ coŋ. 28Boy wɔlɛdi gɨ da Lotɨ gɨŋ le, woy na hɨn̰ wo̰ bɨ: Kalaŋ diige bɨ siige bɨ, kɨlge hɨnga dan̰ gusɨge bɨ, orɨn̰ge dan̰ hɨnga kɨle bɨ, busoŋge bɨ gaɗɨge bɨ, 29ama, kɨɗɨn̰ ga Lotɨ say ɗe Sɔdɔm coŋ ɨni na, Kumu ɗe tɨwa ongɨ hɨn̰ kaŋdi Kumu wo̰ bugoŋ a cayge bɨ, kɨrbaŋdi hɨnga ga ƴee hɨn̰ tɨwa wo̰ sugudoŋ a cayge ulge gurɔɗɨ coŋ bɨ.#17:29 Sɨlagɨŋ: Genèse 18:20–19:25. 30Wɔlɛ gɨ ɨŋ-bandi Kurɨn̰-ungo kɨya andɨn̰ le, kɨya wɔyɛ na hɨn̰ wo̰ bɨ.
31«Boy wɔlɛdi gɨ nee gɨŋ le, waŋ waŋ gɨ na ɨr doŋ na, ɗɔɔ gɨ ban jɔgɛ duroy ƴaadi dɨŋ lɔbɛ hɨnga kayi naŋ. Bɨ waŋ waŋ gɨ na ɨr duroy yagegɨŋ kalɨn̰ ma, ɗɔɔ gɨ ban jɔgɛ duroy ƴaadi dɨŋ naŋ bɨ. 32Hɨngɨŋ cay tam Lotɨ.#17:32 Sɨlagɨŋ: Genèse 19:26. 33Waŋ waŋ gɨ na pɨɗa gusi na kɨya mɔndɛ gusi. Ama waŋ waŋ gɨ na mɨnda gusi coŋ kɨya canɨ na, kɨya pɔɗɛ. 34Aŋ yəgɨŋ daa waŋ, duroy son̰do di nee le, kalaŋ sɔɔ kɨya wɔyɛge cay gasɨlaŋ ga pɨna gaŋ na: Gɨ pɨna kɨya ayige bɨ, gɨ pɨna kɨya bɔɔ-dugo bɨ. 35Kandɨ sɔɔ kɨya ɨrege yee yee na: Di pɨna kɨya ayooge bɨ, di pɨna kɨya bɔɔ-dugo bɨ. 36[Ban̰aŋ sɔɔ kɨya ɨrege boy yagegɨŋ na: Gɨ pɨna kɨya ayige bɨ, gɨ pɨna kɨya bɔɔ-dugo bɨ.»]
37Ka-aye-cay-tɨbay Jesu ɨngɨriige hɨn̰: «Ba-gulɔŋ, kɛ hɨnga le kɨya lɔɔ gusɨge na ani ga?» Bɨ Ban dɨbɨge cay nee ye hɨn̰: «Kɨɗɨn̰ ga tɨmay-hɨnga woy nee na, tonun̰əŋ dayge nee.»
Okuqokiwe okwamanje:
Lug 17: gab
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Association pour la Promotion de la Langue Gabri Darbé-Dormon (APLGD) en coopération avec
© 2023, Wycliffe Bible Translators, Inc.
