Lug 14
14
Jesu poɗɨ ba hɔmɨn̰ɛ
1Wɔlɛ gɨ pɨna wo̰ gɨ na wɔlɛ gɨ ni dorɨn̰ gɨlale, Jesu or a da ba cay Parɨsɨn̰an̰əŋ gɨ pɨna wo̰ kɨya dɔɔ dɔɔ danayi. Parɨsɨn̰an̰əŋ ga somge kɨbɨ dɔɔ gɨŋ danayi le, sɨge cɨndɨge cayi jɛr jɛr soliige. 2Ɨni na, bara gɨ pɨna wo̰ gɨ gusi ɨbɨrde ɨre tumoyi. 3Jesu ay kɔl ɨngɨrɨn̰ ka-gɨlɨn̰ kalaŋ gasɨn̰-kɔl kɔl gɨ da Moyis bɨ dan̰ Parɨsɨn̰an̰əŋ bɨ, yege hɨn̰: «Kɛ gasɨn̰-kɔl kɔl kana ye gɨ dan̰ wɔlɛ gɨ ni dorɨn̰ gɨlale le, na na gɨ pɔɗɛ ungo wala, na na gɨ pɔɗɛ ungo naŋ ga?»
4Ama kan som kɨbɨge munduŋ. Ɨni na, Jesu ba sol hɨn̰ wo̰ na, ɨsɨbɨ ba hɔmɨn̰ɛ le poɗii bɨ yeyi hɨn̰, ɨra ɨndi. 5Kardi nee ban yege hɨn̰: «Kɛ na waŋ duroygɨŋ ma kɨyeyi wala si koyi na baa kɨlma gɨŋ dan̰ wɔlɛ gɨ ni dorɨn̰ gɨlale ma kɨya dorii daa kɨɗɨn̰di ga nee gaŋ le naŋ ga?» 6Bɨ kan wayage kɔl pɨna gɨ ɗaŋ gɨ ni dɨbii cay nee naŋ.
Kɔl gɨ ojɨ cay dare kɨɗɨn̰ ga ni somɨn̰
7Jesu ay kɨradi-kɔl yen̰ kalaŋ ga kan molge kɨɗɨn̰ dɔɔ gɨŋ le, kɨya gɨ ban sol gɨ kan ɨre mal kɨɗɨn̰ ga ni gusoŋ-tɔgɛ. Ɨni na ban yege hɨn̰: 8«Kɨɗɨn̰ ga kan na mɨlan̰ ɔrɛ kɨɗɨn̰ ga ni gɔrɛ ƴaa gɨŋ na, ɗa baa ɔrɛ sɔmɛ a kɨɗɨn̰ ga ni gusoŋ-tɔgɛ gɨŋ. Gajanaŋ kan gɨ da mɔlɛ mɨgan̰ gɨ gumu ɗɨn̰ coŋ, 9bɨ ban gɨ ba molgagɨŋ sɔɗɨmɔŋ le, kɨya ɨrga yon̰ hɨn̰: “Ɗa kɨɗɨn̰ ga kɛ le bɨn̰ ungo gɨ ba kɛ.” Bɨ ɨni na, ji kɨya sɔ dan̰ dasi ɔrɛ sɔmɛ karu. 10Ama kan na mɨlan̰ na ɨra sɔmɛ karu. Hɨn̰ wo̰ na, kɨɗɨn̰ ga ban gɨ ba molɨn̰ le na ɨre gusɨn̰ na, ban kɨya yon̰ hɨn̰: “Ay ba-pogɨnɨ, ɨŋ olɨn̰ se daa ɨre sɨma kɨɗɨn̰ ga ɗari gaŋ.” Hɨn̰ wo̰ na, can̰ kɨya ayaŋ daa tumoyi kalaŋ nɔm ga ba somge danan̰ a kɨbɨ dɔɔ gɨŋ. 11Kɨya wa waŋ waŋ gɨ na laa gusi laan̰ ungo gɨ gumu na, Kumu kɨya bɨlii loon̰ ungo gɨ dḛ bɨ, ban gɨ na laa gusi laan̰ ungo gɨ dḛ na, Kumu kɨya bɨlii loon̰ ungo gɨ gumu bɨ.»
12Kardi nee Jesu yen̰ dan̰ ban gɨ ba moli le hɨn̰: «Kɨɗɨn̰ ga ji na mɨla kalaŋ dɔɔ gɨ ni tɨwa di ɨni wala gɨ ni son̰do na, mɔlɛ ka-pogɨn̰ɨn̰ naŋ bɨ, karmɨn̰ naŋ bɨ, ka-wandɨ kan̰ naŋ bɨ, ka-durdin̰ ga ka-wɔɔ hɨnga naŋ bɨ. Hɨn̰ gɨ ji na mɨla na kalaŋ ga nee le na, gajanaŋ kan kɨya mɔlɨn̰ ɔrɛ dɔɔ dɔɔ ban̰di nee. Bɨ hɨn̰ gɨ kan na laa hɨn̰ wo̰ na, na cay kobɨn̰ gɨ ji way ba kɔ ɨni. 13Ama kɨɗɨn̰ ga ji na mɨla kalaŋ dɔɔ dɔɔ gusi-mɔwa gɨ gumu na, kuɗa gɨ ji mɨla na kalaŋ ga wɔɔdɨge unɔ bɨ, ga kɨwayge sumbɨdoŋ bɨ, ka-modoŋ dan̰ ka-bɨbe bɨ. 14Hɨn̰ gɨ ji na laa hɨn̰ wo̰ na, tumoy wolwa woy kol can̰, kɨya gɨ kan le kɨya ɓale molɨn̰ ɔrɛ dɔɔ dɔɔ ban̰di nee naŋ. Ama Kumu ba kɨya bɨn̰ cay kobɨn̰ wɔlɛ gɨ kalaŋ ga ka-lɔɔ hɨnga ga dan̰ durɔ ɗɨngar kɨya bɔyɛ lɨbe duroy kalaŋ ga madɨrdaŋ gaŋ.»
Kɨradi-kɔl gɨ ojɨ cay hɨnga ga ni dɔɔ ga kondi
(Matɨyo 22:1-10)
15Ungo gɨ pɨna wo̰ duroy kalaŋ ga somge danayi kɨbɨ dɔɔ gɨŋ le, kɨɗɨn̰ ga je kɔl gɨ da Jesu le na, yeyi hɨn̰: «Ungo gɨ na sɨma kɨbɨ dɔɔ gɨŋ a boy dɔɔ-ƴaa di da Kumu dɨŋ na, tumoy wolwa woy kol cayi.»
16Jesu jɨga dɨbii cay nee ye hɨn̰: «Ungo gɨ pɨna wo̰, wɔlɛ gɨ pɨna gɨŋ lee mɔlɛ gɨ gumu gɨ ni dɔɔ teen̰ kalaŋ kondɨ. 17Kɨɗɨn̰ ga tɨwa di da mɔlɛ le ɓal ɨni na, ban gɨy guyɔŋ koyi ɗe na or yon̰ kalaŋ ga ban molge le, yege hɨn̰: “Ɨregɨŋ kɨya gɨ dɔɔ le woy dugo ɨni.” 18Ama kalaŋ ga nee le, waŋ waŋ kalɨn̰ ma ay te lɔɔ jɨba. Ban gɨ cay wase ye hɨn̰: “Ɨra yon̰ Ba-gulɔŋ na ɗa kuduroy jala canɨ, kɨya gɨ ɨŋ kɨl kɨɗɨn̰ yage, ma ojɨ gɨ ɨŋ kɨya ɔrɛ sɔlɛ.” 19Ban gɨ cay sɔɔdɨge ye hɨn̰: “Ɨra yon̰ Ba-gulondɨn̰ na ɗa kuduroyi jala canɨ, kɨya gɨ ɨŋ kɨl sɨn̰əŋ sɔɔ sɔɔ kɨɗɨn̰ bay bɨ, ɨŋ kɨya ɔrɛ gɨwasɨge sɔlɛ.” 20Ban gɨ cay sɨbɨdɨge ye hɨn̰: “Ni gandi dan̰ tamnɨ ni ƴee gusɨni na hɨrɨwa ƴee, na ban ma ɨŋ kɨya ɓale ɔrɛ naŋ.” 21Guyɔŋ le jɨga gusi Ba-gulondi dor kɔl le nɔm bii. Kɨɗɨn̰ ga ban je kɔl gɨ nee le hɨn̰ wo̰ ɨni na, kuduroy-hɔmɛ ayi bɨ, ban yen̰ guyɔŋ koyi le, yeyi hɨn̰: “Jɨga cay tɨban̰ dɨŋ, ɨra kɨɗɨn̰ ga woli gaŋ bɨ, te gɨyəŋ ga boy cay ƴaa-di-gumu dɨŋ bɨ le, ɨra ɨren̰ dan̰ kalaŋ ga wɔɔdɨge unɔ bɨ, ga kɨwayge sumbɨdoŋ bɨ, ka-bɨbe dan̰ ka-modoŋ bɨ.” 22Kardi nee sɨm wo̰, guyɔŋ le jɨga yeyi hɨn̰: “Ba-gulonɨ ɨŋ lee hɨnga ga ji ba yəŋ le. Ama kɨɗɨn̰ baa nee ƴee.” 23Ɨni na, Ba-gulondi le yen̰ dan̰ guyɔŋ le hɨn̰: “Andaŋ ɨra a te gɨyəŋ ga a cay karɨn̰ ƴaa gaŋ, dan̰ kɨbɨ jaŋ gaŋ. Bɨ kalaŋ nɔm ga ji na wayage na, ɨren̰ danage dan̰ osɨwa ɗe duroy ƴaa tɨnge walɨn̰ daa jɨŋ jɨŋ. 24Aŋ yəgɨŋ da waŋ, duroy kalaŋ ga ɨŋ ba molge nɔm le, ungo pɨna kalɨn̰ ma a duroyge kɨya cɨle dɔɔ gɨ ni mɔlɛ hɨnge a kɨbi naŋ.”»
Hɨnga ga ungo kɨya lɔɔ kɨya kobɨn̰ kardɨ Jesu
25Dɨmdɨrdi kalaŋ ƴomge gɨyəŋ dan̰ Jesu. Bɨ Ban pɨlɨn̰ bɨ yege hɨn̰: 26«Hɨn̰ gɨ ungo na gey ɨrga gusɨnɨ ma na gey bayi dan̰ ƴoyi bɨ, tamdi dan̰ karɨndi bɨ, karmii ga ban̰aŋ dan̰ ga kandɨ bɨ, gusi koyi gaŋ bɨ ɗəŋ coŋ na, kɨya ɓale bɨle ba-aye-cay-tɨbanɨ naŋ. 27Ungo gɨ na aya sɨya-gɨ-dagɨli koyi dɨgan̰ nərɨn̰ naŋ bɨ, kɨya marɨn̰ naŋ bɨ na, kɨya ɓale bɨle ba-aye-cay-tɨbanɨ naŋ.
28«Kɛ, na waŋ duroy gɨŋ ma na gey gaɗe ƴaa di gumu di sɨngɨɗɨ daa, ma kɨya sɔmɛ dugo cay wase kɨya ɗɔngɨsɛ gursudi woy a kobi sɔlɛ kɛ, gursu di kɛ le kɨya ɓale loon̰ ƴaa le dɨɗe naŋ ga? 29Naŋ na, kɨɗɨn̰ ga ban na ɗa te ƴaa di gumu di sɨngɨɗɨ daa le ɨni ma, gursu di na wɨy cay nee na, kalaŋ nɔm ga ba solge kɨbɨ gɨye gɨ ba baa da le, kɨya asiige 30yɔ hɨn̰: “Sɨlagɨŋ ungo gɨ pɨna gɨ ay te gaɗe ƴaa ma, ɓala dɨɗe kɨbi naŋ.”
31«Naŋ le na kɨlma gɨ ani ma, kɨɗɨn̰ ga ban na gey ɔrɛ dɨbe kɨmbɨl dan̰ kɨlma gɨ ɗaŋ, ma kɨya sɔmɛ dugo ƴɔmɛ cay tɨbay sɔlɛ kɛ, ɗi na gɨ ɓale dan̰ kalaŋ kay ga aru-mɔjɨ-kɨɗɨn̰-mɔjɨ dɨbe kɨmbɨl dan̰ ba-baadi gɨ yal cɨndi dan̰ kalaŋ kayi ga aru-mɔjɨ-kɨɗɨn̰-toyge-sɔɔ naŋ ga? 32Naŋ na, kɨɗɨn̰ ga mɨgayi le ba baa hen̰ ƴee na, ban kɨya gɨye dan̰ ka-ƴɔbɛ ɗe kan na or gusi ɨngɨrii hɨnga ga ni lɔɔ ɗe gusi-dɔbɛ na won̰ duroyge. 33Woy na hɨn̰ wo̰ kol caygɨŋ bɨ, ungo gɨ na sɨma cay tɨbayi dɨŋ kɨya ɗon̰ hɨnga wɔɔdi nɔm coŋ naŋ na, kɨya ɓale bɨle ba-aye-cay-tɨbanɨ naŋ.»
Ɗɔɔgɨŋ ɗɔgɔ le man̰edo duroŋ naŋ
(Matɨyo 5:13; Marg 9:50)
34«Ɗɔgɔ le na hɨnga ga ɗari. Ama hɨn̰ gɨ ɗɔgɔ le, man̰edo na duroŋ coŋ na, na wa ba kɨya jɨgan̰ dan̰ man̰edo le ga? 35Ɗɔgɔ di hɨn̰ wo̰ le, kuɗan̰ gɨsəŋ naŋ bɨ, kuɗan̰ gasɨn̰-nare naŋ bɨ. Kalaŋ kɨya bɔgɔ na coŋ. Ungo gɨ sɨmayi na wɨya nee na, kuɗa gɨ ban ɨrɨm cay kɔl gɨ ban ba je le.»
Okuqokiwe okwamanje:
Lug 14: gab
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Association pour la Promotion de la Langue Gabri Darbé-Dormon (APLGD) en coopération avec
© 2023, Wycliffe Bible Translators, Inc.
