Lug 12
12
Jesu hal ka-aye-cay-tɨbayi gɨ kan na gɨ yɔɔ kɔl kɨbɨge sɔɔ sɔɔ hɨn̰ Parɨsɨn̰an̰əŋ naŋ
(Matɨyo 10:19-20,26-33)
1Wɔlɛdi gɨ nee le, dɨmdɨrdi kalaŋ ɨrgage gusi Jesu jɨn̰ nee nee, ɓalge kalaŋ aru mɔjɨ dan̰ kardɨge nee. Dayge gusii jɨŋ jɨŋ gɨ baa mɨnde gɨ kan kɨya ɗɔdɨrdɛ gusɨge dugo. Jesu ay te yon̰ ka-aye-cay-tɨbayi tumɔ pa dɨm ye hɨn̰: «Ɗagɨŋ muɗɔlɛ cay gusɨgɨŋ kɨya cay subugu di da Parɨsɨn̰an̰əŋ. Subugu di da Parɨsɨn̰an̰əŋ le, na kɔl gɨ kan ye-kɨbɨge-sɔɔ-sɔɔ. 2Hɨnga nɔm ga woy a kɨɗɨn̰ ɓurɔŋgɛdɨge gaŋ ga kan kɨya dɔrɛ toyge daa naŋ le unɔ bɨ, hɨnga nɔm ga woy a kɨɗɨn̰ wɔsɛdɨge gaŋ ga kan kɨya dɨle sɔlɛ naŋ le unɔ bɨ. 3Na toy di hɨn̰ wo̰ ma, hɨnga ga kɨŋ kɨya yɔ koldɨge duroy dɨlɨm dɨŋ na, kan kɨya jɔɔ koldɨge duroy tɨwa di ɨni dɨŋ. Hɨnga nɔm ga kɨŋ kɨya n̰ame koldɨge sɨmay ungo duroy ƴaa dɨŋ le, kan kɨya nan̰ daa togɨn̰ bɛrnɛ.
Ungo gɨ ojɨ gɨ kan kɨya hɨndari
4«Ka-pogɨn̰ɨnɨ, aŋ yəgɨŋ daa waŋ: Kalaŋ ga ɓalge dɨɗe kuyoŋdi-gusɨgɨŋ, ama kardi nee kɨya ɓalege lɔɔ hɨnga ga ɗaŋ naŋ le, kɨŋ hundɔrge naŋ. 5Aŋ gɨlgɨŋ na waŋ ma magɨŋ kɨya hundori leen̰ cɨndi ga: Hɨndaragɨŋ na Kumu. Ban ɓal gɨ kɨya dɨɗɨgɨŋ bɨ, ban orɨn̰ dan̰ dɔnɔ di ni dɨbɨgɨŋ duroy tɨwa di ƴee dan̰ tumɔ di ni gehɛn dɨŋ bɨ. Ho’o na ban ma, magɨŋ kɨya hundori leen̰ cɨndi.
6«Kɛ, kan kɨl mɔrɔŋ won̰ bay dan̰ gursu sɔɔ naŋ ga? Ama naa hɨn̰ wo̰ kalɨn̰ ma, Kumu ɗa kuduroy hala gɨybəŋ cay mɔrɔŋ pɨna naŋ. 7Teɗi caygɨŋ kalɨn̰ ma, Kumu ɗongɨsɨ pɨna pɨna nɔm. Hundɔrɔ gɨŋ naŋ: Kɨya wa kɨŋ-gandi le, kɨledɨgɨŋ ɗɨn̰ ga da mɔrɔŋ ga kondi ɗɨgɨ ɗɨgɨ.»
Yɔɔ kɔl tumoy kalaŋ gɨ ɨŋ naa gɨ da Jesu-Kɨris
8Jesu ye hɨn̰: «Aŋ yəgɨŋ waŋ waŋ gɨ na ya tumoy kalaŋ gɨ ɗi naa ungo hɨnge na, ɨŋ-bandi Kurɨn̰-ungo kalɨn̰ ma, ɨŋ kɨya yɔ tumoy ka-ƴɔbɛ ga da Kumu, gɨ ban na ungo hɨnge bɨ. 9Ama waŋ waŋ gɨ na ya naji tumoy kalaŋ gɨ ɗi na sɨlaŋ naŋ na, ɨŋ-bandi kurɨn̰ ungo kalɨn̰ ma, maŋ kɨya yɔ tumoy ka-ƴɔbɛ ga da Kumu gɨ ɨŋ na sɨlayi naŋ bɨ.
10«Waŋ waŋ gɨ na ya kolnɨ ɨŋ-bandi Kurɨn̰-ungo ɨsɨn na, Kumu kɨya ɗɔɔ kuduroy jalɨwa a cayi, ama waŋ waŋ gɨ na yagɨda Turnɔ ɗe-kuduroy-bɛrɛ na, Kumu kɨya ɗɔɔ kuduroyi jalɨwa a cayi naŋ bɨrɨŋ.
11«Kɨɗɨn̰ ga kan kɨya ƴomgɨŋge orɨn̰ danagɨŋ duroy ƴaa-daye-di-da-Jubɨn̰əŋ wala, tumoy kɛrɨmbɛlɛŋ wala, tumoy ka-dɔɔ cay ƴaa na, ɗɔɔgɨŋ ɗugoygɨŋ algɨŋ cay kɔl gɨ kɨŋ kɨya dɔrɛ gɨ ni ƴon̰ caygɨŋ naŋ bɨ, a cay kɔl gɨ kɨŋ kɨya dɨbɨge cay nee naŋ bɨ, 12Kɨya wa na Turnɔ ɗe-kuduroy-bɛrɛ le ba kɨya gɨlgɨŋ kɔl gɨ kɨŋ kɨya yɔ a boy tɨwadi di nee le.»
Kɨradi-kɔl gɨ da ba wɔɔ hɨnga
13Ungo gɨ pɨna wo̰ duroy dɨmdɨrdi kalaŋ yen̰ Jesu hɨn̰: «Ba gɨl ni kɔl, yan̰ kurnɨ ɗe gosɨn hɨnga ga ni ban̰di-gulɔŋ kange bəŋ.» 14Jesu dɨbii nee yeyi hɨn̰: «Ba-pogɨnɨ, na waŋ ba seŋ gɨ ɨŋ na ba-bɔyɛ duroy kɔl kogɨŋ wala, ba-gɔsɨnɛ hɨnga wɔɔdɨgɨŋ bɨ ga?» 15Bɨ ban yen̰ dɨmdɨrdi kalaŋ le ye hɨn̰: «Ɗagɨŋ muɗɔlɛ a cay gusɨgɨŋ bɨ, orɨn̰gɨŋ dan̰ tabɨlaŋ di ni wan̰ hɨnga nɔm naŋ bɨ, kɨya wa ungo kɨya sɔmɛ-bɨra a cay gɨsəŋ gaŋ, kɨya cay hɨnga wɔɔdi ga kondi naŋ.»
16Ɨni na, Jesu ay kɨradi-kɔl yege hɨn̰: «Bara gɨ pɨna wo̰, na ba wɔɔ gɨ way gasa kondɨ duroy yage koyi gɨŋ. 17Ban ɨrɨm kuduroy ye hɨn̰: “Kɛ ɨŋ kɨya lɔɔ na mɨna ga? Kɨya wa ɨŋ wa kɨɗɨn̰ ga ɨŋ kɨya bogɨn̰ cɨn̰ gasa kange ga ɨŋ ba wal le nee naŋ.” 18Bɨ ban yen̰ gusi ɗaŋ coŋ ye hɨn̰: “Sɨla! Hɨnga ga ɨŋ ba kɨya lɔɔ ba kɛ: Haw kɛ ɨŋ kɨya dɔsdɛ tugulun̰əŋ kange ga tumɔ coŋ bɨ, ɨŋ kɨya jɔgɛ gaɗɨde ga ɗaŋ ga gɨmdəŋ dayɨn̰ cɨn̰ gɛmɛ kange dan̰ wɔɔ hɨnge ga ɗaŋ nee. 19Kardi nee, ɨŋ kɨya yon̰ gusɨnɨ yɔ hɨn̰: Sɨla! Hɨnga wɔɔdɨn̰ woy bajag bajag ɓal lɔɔ ɨlge kondɨwa danan̰. Jɨga sɔmɛ kɔj kɨɗɨn̰ pɨna dɨran̰ gɨlale, daa bɨ, saa bɨ, sɨman̰ laan̰ bayda bɨ.” 20Ama Kumu yen̰ bara le ye hɨn̰: “Ba matɨr! A duroy son̰do di labɨde dɨŋ le habedin̰ kɨya duroŋ. Ɨni na, hɨnga nɔm ga ji ba day amɨn̰ gusɨn̰ le kɨya woyɨn̰ na waŋ ga?”»
21Ɨni na, Jesu jɨga yege ɗaŋ coŋ hɨn̰: «Kɨya wɔyɛ na hɨn̰ wo̰ kɨya cay ungo gɨ dayde hɨnga wɔɔdi kɨya gusi koyi ƴɔbɨ, ama ɨran̰ dan̰ wɔɔ a boy hɨnga ga ƴa cɨn̰ Kumu gaŋ naŋ.»
Kɔl gɨ ojɨ cay aye kudurɔ
(Matɨyo 6:25-33)
22Ɨni na, Jesu yen̰ ka-aye-cay-tɨbayi hɨn̰: «Sɨlagɨŋ! Na toy di hɨn̰ wo̰ ma maŋ yəgɨŋ: Sɔlɛgɨŋ kɨya cay hɨnga ga ni dɔɔ poɗɨn̰ bɨ, kɨya cay badɨge ga ni tɔbɛ tolɨn̰ gusɨgɨŋ bɨ naŋ. 23Habe gɨ kɨŋ ba somɨn̰-bɨra le ɗɨn̰ hɨnga ga ni dɔɔ bɨ, kuyoŋdi-gusɨgɨŋ kalɨn̰ ma ɗɨn̰ badɨge ga kɨŋ tobɨ bɨ. 24Sɨlagɨŋ, hangan̰əŋ: Kan gɨsge gasa naŋ bɨ, walage gasa naŋ bɨ. Kan ɨran̰ dan̰ umboŋ gɨ ni amɨn̰ hɨnga naŋ bɨ, dan̰ tugulu naŋ bɨ. Ama Kumu ba abɨge! Kɨŋ-gandi le, kɨledɨgɨŋ kondɨ tɔgɨ ɗɨn̰ ga da cɨɗəŋ. 25Na waŋ duroy gɨŋ ba kɨya ɓale dan̰ sɔlɛ koyi sɨye wɔlɛdi gɨ ban kɨya somɨn̰ a cay gɨsəŋ gaŋ tumɔ dḛ ga? 26Hɨn̰ gɨ kɨŋ na ɓala lɔɔ hɨnga ga dḛ ga hɨn̰ wo̰ naŋ na, na kɨya wa ma magɨŋ ɗa ɗugoygɨŋ baa dugo kɨya cay hɨnga ga baa naŋ ga? 27Ɗagɨŋ cɨndɨgɨŋ dɨŋdɨn̰gɨŋ bɨn̰e hɛɗɨmɛ: Kan laage gɨye naŋ bɨ, cɨngɨɗage badɨge naŋ bɨ. Ama aŋ yəgɨŋ: Kɨlma Salomo dan̰ sɔmɛ duroy ɗarwa toy dɨŋ kalɨn̰ ma, tɨba badɨge ga ɗari ɗɨn̰ bɨn̰e hɛɗɨmɛ naŋ. 28Kɨŋ ga aye kudurɔ kogɨŋ ɓala hɨnga naŋ: Hɨn̰ gɨ Kumu na tɨban̰ hɛɗɨmɛ ga wan̰do kan kɨya bɔgɛ duroy tɨwa dɨŋ ɗɔɔ tɨwa ulge coŋ, badɨge ga kuɗa na, kɛ na kɨŋ ma ban kɨya bɨgɨŋ badɨge ga ni dɔbɛ naŋ ga? 29Ama kɨŋ-gandi na, kɨŋ ɗɔɔ ba sɔlɛ kɨya cay hɨnga ga ni dɔɔ bɨ, sɔɔ bɨ naŋ, bɨ kun̰degɨŋ kol cayge naŋ. 30Kɨya wa na te kalaŋ ga toyge na Jubɨ naŋ ga a cay gɨsəŋ gaŋ kɛ ma na ka-male hɨnga ga nee le nɔm dan̰ wɔlɛ pɨna pɨna. Ama kɨŋ-gandi na baygɨŋ sol gɨ tabɨlaŋdi hɨnga ga nee le na ləgɨŋ. 31Sɨgɨŋ kuduroygɨŋ cay dɔɔ-ƴaa di da Kumu cay wase pa dɨm ma, Kumu kɨya bɨgɨŋ hɨnga toyge ga baa le cay nee ƴee.
Kandi-wɔɔ ga a daa nii
32«Ay gamge kange ga lagɨɗe, hundɔrɔ gɨŋ naŋ! Kɨya wa Baygɨŋ ay noyi gɨ ɗi na kɨya bɨgɨŋ dɔɔ-ƴaa toyi. 33Kɨlgɨŋ kandi-wɔɔdɨgɨŋ coŋ, ɗagɨŋ gursudɨge gusɨnan̰gɨŋ ka-n̰age. N̰anagɨŋ magɨla kogɨŋ gɨ ni bogɨn̰ gursu di kɨya mundoŋ naŋ bɨrɨŋ. Dayagɨŋ hɨnga wɔɔdɨgɨŋ a daa nii gusi Kumu. Gursu di nee le, kɨya mundoŋ naŋ bɨ, ka-hase kɨya bugoŋ mɨnde durdi nee naŋ bɨ, yulmu kɨya tale naŋ bɨ. 34Kɨya wa kɨɗɨn̰ ga kandi-wɔɔdɨgɨŋ woy a nee le, ɗugoygɨŋ kalɨn̰ ma woy na a nee bɨ.
Ka-aye-cay-tɨbay Jesu kɨya sɔmɛge cay tɨbayge dɨŋ
(Matɨyo 24:43-51)
35«Tɨbagɨŋ badɨge ga ni gɨye bɨ, ɗagɨŋ lamba togɨŋ ɗe ƴee bɨ. 36Wɨyagɨŋ hɨn̰ gɔyɔŋ ga gamge ba-ƴaadɨge wo̰. Kɨɗɨn̰ ga ban na jɨge te gɔrɛ ƴaa gɨŋ ma na dɨga kɨbɨ ƴaa na, kan kɨya andaŋ cɛd haŋge kɨbɨ ƴaa bii. 37Gɔyɔŋ ga ba-ƴaadɨge na jɨge wayage te sɔmɛ-bɨra na, tumoy wolwa kɨya wɔyɛ kol cayge! Aŋ yəgɨŋ daa waŋ na cɨndi: Ban kɨya dɔbɛ badɨge kayi ga ni gɨye bɨ, bɨge kɨɗɨn̰ somɨn̰ kɨbɨ dɔɔ gɨŋ bɨ, sɔɔ bɨge dɔɔ bɨ. 38Hɨn̰ gɨ ba-ƴaadɨge na jɨge dan̰ duroy kɨɗɨn̰ bɔb, naŋ le dan̰ te kɨɗɨn̰, ma na wayage te sɔmɛ-bɨra gɨŋ na, tumoy wolwa kɨya wɔyɛ kol cayge!
39«Sɨlagɨŋ kuɗa, ba-ƴaa kɨya sɔlɛ tɨwa di ba-hase kɨya ɨrgan̰ a duroy ƴaadi dɨŋ naŋ. Hɨn̰ gɨ ban na sɨla na, ban kɨya ɗoyi andaŋ a ƴen̰ ƴaadi dɨŋ naŋ. 40Kɨŋ-gandi kalɨn̰ ma, sɨmagɨŋ cay tɨbaygɨŋ gɨŋ, kɨya gɨ ɨŋ-bandi Kurɨn̰-ungo le, ɨŋ kɨya caga na boy tɨwa di kɨŋ sɨla naŋ dɨŋ.»
Lɔɔ gɨye gɨ ba-can̰ gey
41Ɨni na, Pɨyɛr yey hɨn̰: «Ba-gulɔŋ, kɨradi-kɔl gɨ ji ba ye kɛ le, ojɨ na cayni ni-gandi ka-aye-cay-tɨban̰ jaŋ ƴɔbɨ wala, ji ye na kɨya cay kalaŋ nɔm ga?» 42Ɨni na, Ba-gulɔŋ dɨbɨge nee yege hɨn̰: «Waŋ ma na ba-sɔlɛ kardi hɨnga gɨ ba ɨre a cay tɨbayi dɨŋ bɨ, gɨ cɨndi arɨn̰ bɨ, gɨ ba-ƴaadi kɨya ayi si cay kalaŋ ga duroy ƴaa toyi dɨŋ, kɨya gosɨnɨn̰ dɔɔ dan̰ tɨwadi bɨn̰ kamdi gɔyɔŋ ga ɗaŋ kobi ga? 43Kɨɗɨn̰ ga ba-ƴaadi na jɨge tayi ma na wa guyɔŋ koyi a kɨbɨ gɨye gɨŋ na, tumoy wolwa kɨya wɔyɛ kol cayi! 44Aŋ yəgɨŋ na cɨndi: Guyɔŋ gɨ na laa hɨn̰ wo̰ na, ba ƴaadi kɨya ayi si cay hɨnga wɔɔdi gaŋ nɔm. 45Ama hɨn̰ gɨ guyɔŋ le na ɨrɨm kuduroy ya hɨn̰: “Ba-ƴaanɨ kɨya jɨga haw kɛ naŋ.” Ma na aya te dɔɔ dɔɔ bɨ, sɔ cɛrɛ kɔyɛ bɨ, ban na baa cay kamdi gɔyɔŋ ga ban̰aŋ dan̰ ga kandɨ tɨgɨdage bɨ na, 46ba-ƴaadi le kɨya andaŋ cay dus dan̰ wɔlɛ gɨ ban sɨla naŋ bɨ, dan̰ tɨwa di ban ɨrɨm cay nee naŋ bɨ. Ban kɨya ɗəndɨri si kɨbɨ tɨma dɨŋ bɨ, kɨya looyi hɨnga ga kan leen̰ge gɔyɔŋ ga laage gɨye dan̰ kuduroyge ga pɨna naŋ.
47«Kɨɗɨn̰ ga guyɔŋ gɨ na sɨla hɨnga ga ba-ƴaadi na gey gɨ ban na laa, ma na ƴɨma cay tɨbay hɨnga pɨna naŋ bɨ, laa hɨnga dan̰ kuduroy geye gɨ nee le naŋ bɨ na, ban kɨya togii ɓale kɔl. 48Ama guyɔŋ gɨ na sɨla hɨnga ga ba-ƴaadi na gey naŋ, ma na laa hɨnga ga wɨn̰an̰ tɔgɛ na, kan kɨya togii lagɨɗe. Waŋ waŋ gɨ kan na biige hɨnga kunda na, kan kɨya ɨngɨriige kardɨge tɔgɨ bɨ. Waŋ waŋ gɨ kan na bɨgayge hɨnga kunda kobi na, kan kɨya ɨngɨriige kardɨge tɔgɨ bɨ.
Caga gɨ da Jesu na te puyoŋ gɨ da kalaŋ
49«Ɨŋ caga dɨbɨ na tɨwa a cay gɨsəŋ gaŋ. Ɨŋ gey gɨ tɨwa di nee le, na ƴa haw kɛ! 50Ama tumɔ pa dɨm na, ɨŋ kɨya wɔɔ batɛm di kɨya dɔbɔŋ boy gɨle-cɨn̰ dɨŋ. Ɨrɨmenɨ kɨya bɔɔ cay mɨgayi gɨŋ naŋ bɨrɨŋ gɨsɨn̰ gɨ hɨnga ga nee le kɨya lɔɔ gusɨge. 51Kɛ kɨŋ ɨrɨm hɨn̰ gɨ ɨŋ na ɨrgan̰ na dan̰ gusi-dɔbɛ a cay gɨsəŋ gaŋ ga? Naŋ, na hɨn̰ wo̰ naŋ! Ɨŋ ɨrga na gɨ ɗe kalaŋ na puyoŋge dan̰ gusɨge. 52Ay toy haw kɛ bɨrɨŋ jɨn̰ tumɔ na, kɨɗɨn̰ ga kalaŋ bay na sɨmage duroy ƴaa dɨŋ na, kan ga sɨbɨ duroyge kɨya puyoŋge dan̰ kan ga sɔɔ bɨ, kan ga sɔɔ duroyge kɨya puyoŋge dan̰ kan ga sɨbɨ bɨ. 53Kɨya canɨ na, kɨye dan̰ bayi bɨ, turmɔ dan̰ ƴɔɔ bɨ, tama dan̰ malgoo bɨ, kɨya puyoŋge.»
Sɔlɛ te hɨnga ga Jesu lee haw kɛ
(Matɨyo 16:2-3)
54Jesu yen̰ dɨmdɨrdi kalaŋ ɗaŋ coŋ hɨn̰: «Kɨɗɨn̰ ga kɨŋ ba sol kumu say te Kumu gɨŋ na,#12:54 A cay gɨsəŋ ga Ɨsɨrayɛl gaŋ na hɨn̰ gɨ kumu na sa a kɨɗɨn̰ ɗɔbɛ ga da tɨwa gaŋ na, kan sol gɨ kumu na kɨya ɔngɛ. Ama a tana Cadɨ na, na kumu gɨ say a te kumu gɨŋ ba ɨrgan̰ dan̰ kaŋdi kumu. kɔl gɨ kɨbɨna kɛ bɨ, kɨŋ ye hɨn̰: “Kaŋdi kumu na kɨya ɔngɛ” bɨ, kaŋdi kumu ongɨ leen̰ cɨndi bɨ. 55Kɨɗɨn̰ ga kɨŋ ba sol kal ye jɨn̰ te golo na,#12:55 A cay gɨsəŋ ga Ɨsɨrayɛl gaŋ na hɨn̰ gɨ kal na ya jɨn̰ kɨwa gɨ manga gɨŋ na, kan sol gɨ kɨɗɨn̰ na kɨya ɨlwa tɔgɨ. Ama a tana Cadɨ na hɨn̰ gɨ kal na ya jɨn̰ kɨwa gɨ ɗɔbɛ gɨ da tɨwa gɨŋ na, na sol gɨ kɨɗɨn̰ kɨya ɨlwa tɔgɨ bɨ. kɨŋ ye hɨn̰: “Kɨɗɨn̰ na kɨya ɨlwa” bɨ, kɨɗɨn̰ ɨl leen̰ cɨndi bɨ. 56Kɨŋ ka-yɔɔ-kɔl-kɨbɨgɨŋ-sɔɔ-sɔɔ le! Kɨŋ sol dɔrɛ cɨn̰ hɨnga ga gɨɗɨgɨ-Kumu gaŋ dan̰ ga cay gɨsəŋ gaŋ. Ama na kɨya wa ma magɨŋ sɨla wɔlɛ gɨ kɨŋ ba somɨn̰ nee haw kɛ naŋ ga?
Bugoŋ pɨna dan̰ ka-baadɨgɨŋ
(Matɨyo 5:25-26)
57«Kɨya wa ma kɨŋ ɓala sɔ dan̰ cay gusɨgɨŋ kogɨŋ lɔɔ hɨnga ga dan̰ durɔ ɗɨngar naŋ ga? 58Hɨn̰ gɨ ji na ɨra dan̰ ba-baadɨn̰ tumoy ba-bɔyɛ kɔl na, bɨya gusɨn̰ cɛd ɗe agɨŋ bugoŋ pɨna kɨɗɨn̰ ga kɨŋ ba baa a te gɨyəŋ gɨŋ ƴee. Naŋ na, ban da orɨn̰ danan̰ tumoy ka-bɔyɛ kɔl bɨ, ba-bɔyɛ kɔl da ƴomɨn̰ dobɨn̰ kobi ka-ƴɔmɛ kalaŋ bɨ, ba ƴɔmɛ kalaŋ da dobɨn̰ dangay dɨŋ bɨ. 59Aŋ yen̰ daa waŋ: Kan kɨya dorɨn̰ dangay dɨŋ naŋ bɨrɨŋ gɨsɨn̰ gɨ ji kɨya bon̰ tugɨla ton̰ nɔm coŋ, ɗɔɔ sɨle pɨna kalɨn̰ ma kɨya bɔɔ can̰ naŋ.»
Okuqokiwe okwamanje:
Lug 12: gab
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Association pour la Promotion de la Langue Gabri Darbé-Dormon (APLGD) en coopération avec
© 2023, Wycliffe Bible Translators, Inc.
