إنجيل متّى 5
5
الفصل الخامس
1ملّي شاف يَسوع بزّاف د الناس، طلَع نالجّبل. وْملّي ݣلس، جاو نْعندو التلامد ديالو.#5:1 التلامد د يسوع المسيح معروفين عند البعض بالِاسم د الحواريين. 2وْفتَح دُقمو وْعلّموم، كيقول: 3"مبْروكين المساكن في الروح، حيت مُلك السماوات ديالوم. 4مبروكين الّي كينوحو، حيت هُمَ غادي يتعزّاو. 5مبروكين المتواضعين، حيت هُمَ غادي يوَرتو الأرض. 6مبروكين الجيعانين والعطْشانين على التقوى، حيت هُمَ غادي يشبعو. 7مبروكين الّي كيرحمو، حيت هُمَ غادي يتّرحمو. 8مبروكين الّي عندوم القلب نقي، حيت غادي يشوفو اللّٰه. 9مبروكين الّي كيصالحو بين الناس، حيت غادي يتسمّاو أُوْلاد اللّٰه. 10مبروكين المضْطَهدين بْسباب التقوى، حيت مُلك السماوات ديالوم. 11مبروكين أنتُمَ ملّي كيعايروكُم وْكيمرْمدوكُم وْكيزبّلو فيكُم بْكُل كلمة قبيحة بالكدوب بْسبابي. 12فرحو وْنشطو، حيت الأجر ديالكُم كبير في السما، حيت هَيداك مرْمدو الأَنْبياء الّي كانو قبل منكُم.
13"أنتُمَ الملاح د الأرض. وَلكن إدا فسد الملاح، باش غادي يتملّح عاود؟ ما بقا كيصلح نْحتّى شي حاجة، غير يتسيّب على برّا ويعفسو عليه الناس. 14أنتُمَ ضَو الدنيا. ما تقدر شي تخبّع واحد المدينة مبْنيّة على الجّبل. 15ما كيشعلو شي اللامْبة باش ينزّلوها تحت السطل، وَلكن كيعملوها على المرْفع وْكتضوّي على الناس كاملين الّي في الدار. 16خلّيو الضَّو ديالكُم يضوّي هَيدا قدّام الناس باش يشوفو الحسنات ديالكُم ويمجّدو باباكُم الّي في السما.
17"ما تظنّو شي بلّي أنا جيت باش نحيّد الشريعة أَوْلا التعْليم د الأَنْبياء. ما جيت شي باش نحيّدوم، وَلكن باش نكمّلوم. 18حيت كنقول لكُم الحقّ، حتّى تتحيّد السما والأرض، ما غادي شي يتحيّد حرف واحد ولا نُقْطة واحدة من الشريعة حتّى يتحقّق كُل شي. 19إدَن، أَي واحد الّي كيبطّل واحد الوَصيّة سْتيتوة من هَد الوَصايا، وْكيعلّم الناس هَيدا، غادي يتسمّى الصغير في مُلك السماوات. أمّا كُل واحد الّي كيعمل وْكيعلّم بِهُم، هَدا غادي يتسمّى كبير في مُلك السماوات. 20حيت كنقول لكُم، إدا ما كتزيد شي التقوى ديالكُم على التقوى د المُعلّمين د الشريعة والفرّيسيين، ما عُمركُم غَد تدخلو نْمُلك السماوات.
21"سمعْتو بلّي تقال نالناس د زمان: «ما تقتل شي،»#5:21 هَد الاقتباس من سفر الخروج 20:13. «والّي قتل، واجب عليه الحُكم.» 22أمّا أنا كنقول لكُم بلّي كُل واحد الّي كيغضب على خاه، واجب عليه الحُكم. والّي كَيْسبّ خاه، لازم عليه يوقف في المحْكمة. والّي كيقول: «آ الحماق» كيسْتاهل النار د جهنّم. 23إدَن، إدا جيبْتِ الهديّة ديالك نالمَدْبح وْتمّاك تفكّرْتِ بلّي خاك عندو شي حاجة عليك، 24خلّي تمّاك الهديّة ديالك قدّام المَدْبح، وْمْشي في الُوّل وْتصالح مع خاك، وْديك الساعة آجي وْقدّم الهديّة ديالك. 25اتَّفق مع صاحب الدعْوة ديالك دغيا وانتينا باقي معاه في الطريق. عندَك يدّيك صاحب الدعْوة ديالك نالقاضي ويدفعك القاضي نالمخزني وْتتسيّب في الحبس. 26كنقول لك الحقّ، ما غادي شي تخرج من تمّاك حتّى تخلّص الدرهم الاخّري.
27"سمعْتو بلّي تقال نالناس د زمان: «ما تزني شي.»#5:27 هَد الاقتباس من سفر الخروج 20:14. 28أمّا أنا كنقول لكُم بلّي كُل واحد الّي كيشوف في شي مراة وْكيشهاها، راه زنى بِها في قلبو. 29وِادا كانت عينك د الّيمين كتعتّرك، قلّعاْ وْسيّباْ عليك. حيت حْسَن لك يتّهلك واحد الطرف من الجسد ديالك وْما يتسيّب شي الجسد ديالك كامل في جهنّم. 30وِادا كانت يَدّك د الّيمين كتعتّرك، قطّعاْ وْسيّباْ عليك. حيت حْسَن لك يتّهلك واحد الطرف منّك وْما يدخل شي الجسد ديالك كامل في جهنّم.#5:30 قال هَد الشي بْصيغة المبالغة باش نفهمو قباحة الدنوب الشديدة قدّام اللّٰه. ما قصد شي نقطّعو طراف الجسد في الحقيقة.
31"تقال: «الّي بغى يطلّق مراتو، لازم يعطيها الكاغط د الطلاق.»#5:31 هَد الاقتباس من سفر التثنية 24:1-3. 32أمّا أنا كنقول لكُم بلّي الّي كيطلّق المراة ديالو على شي سبّة من غير الزِّنا، كيدفعاْ تزني. والّي كَيْجوِج بالمطلّقة، راه كيزني.
33"عاود سمعْتو بلّي تقال نالناس د زمان: «ما تحلف شي باطل،»#5:33 هَد الاقتباس من سفر اللاويّين 19:12. «وَلكن كمّل نالرَّبّ حلوفك.» 34أمّا أنا كنقول لكُم، ما تحلفو شي بالمرّة، لا بالسما حيت هي عرش اللّٰه، 35ولا بالأرض حيت هي الموطَع د رِجلو، ولا بأُورُشَليم حيت هي مدينة المَلِك العظيم. 36ما تحلف شي بْراسك، حيت ما تقدر شي تبدّل شعْرة واحدة بيطة أَوْلا كحْلة. 37وَلكن يكون الكلام ديالكُم إيّاه إيّاه، لا لا. والّي زِدْتِ على ديك الشي راه هُوَ من الشرّير.
38"سمعْتو بلّي تقال: «العينينة بالعينينة والسنّة بالسنّة.»#5:38 هَد الاقتباس من سفر الخروج 21:24. 39أمّا أنا كنقول لكُم، ما تقاومو شي الّي تقبّح عليكُم، وَلكن الّي عْطاك طرْشة على خدّك د الّيمين، دوّر لو يَخرى حتّى هِيَ. 40والّي بغى يدعيك ويدّي لك الجلّابة ديالك، خلّيه يدّي حتّى السلْهام. 41والّي فرَض عليك تمشي معاه كيلومتر واحد، مشي معاه جوج د الكيلومترات. 42الّي طلب منّك، عْطي لو. وْما تعطي شي الطهر نلّي بغى يتسلّف منّك.
43"سمعْتو بلّي تقال: «عزّ جارك وْكرَه العدو ديالك.»#5:43 "عزّ جارك": هَد الاقتباس من سفر اللاويين 19:18. الناس زادو الكلمات "وْكرَه العدو ديالك،" واخّا ما كاينين شي في الاقتباس الأصلي. 44أمّا أنا كنقول لكُم، عزّو العدْيان ديالكُم. وْدْعيو من جهة الناس الّي كيمرْمدوكُم 45باش تكونو أُوْلاد باباكُم الّي في السما. حيت هُوَ كيآمر الشمس تشرق على القباحين وْعلى المزيانين وْكيعطي الشتا نالمتّاقيين وْنالظالمين. 46حيت إدا كتعزّو غير هَدوك الّي كيعزّوكُم، شْمِن أجر عندكُم؟ واش ما كيعملو شي ديك الشي حتّى القبّاطة د الضرائب؟ 47وِادا سلّمتو على الخوت ديالكُم وْكان، شنّو كتعملو كتَر من يَخرين؟ واش ما كيعملو شي هَيداك حتّى الوَتَنيّين؟ 48كونو أنتُمَ كاملين فحال باباكُم الّي في السما هُوَ كامل.
Okuqokiwe okwamanje:
إنجيل متّى 5: ary
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Instituto de Asistencia Teológica (IAT)
