ꤗꤢꤞꤢꤧ 3
3
ꤖꤚꤢꤩ꤬ꤡꤢꤩ꤬ ꤢꤨ꤭ ꤋꤢꤨ꤭ꤛꤥ꤭ꤟꤢ꤬ ꤢ꤬ ꤒꤢꤩ꤬ꤟꤢꤩꤏꤥ꤬ꤘꤥ꤬ꤔꤢꤧ꤭
(ꤗꤢ꤬ꤊꤢꤨ ꤁:꤁-꤈, ꤜꤢꤨꤊꤢ꤬ ꤃:꤁-꤁꤈, ꤛꤥ꤭ꤟꤢ꤬ ꤁:꤁꤉-꤂꤈)
1ꤔꤢ꤬ꤑꤢ꤭ꤜꤢꤩ꤭ꤑꤢ꤭ ꤟꤢꤧ꤭ꤟꤣꤧ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤥ꤬ꤒꤣ꤬ꤖꤚꤢꤩ꤬, ꤢ꤬ ꤜꤢꤩ꤭ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤒꤢꤩ꤬ ꤘꤣ ꤛꤢꤨꤘꤢ꤬ꤊ꤫ꤢꤩ꤬ ꤊ꤫ꤢꤩ꤬ꤏꤢꤩ꤭ꤓꤣꤧ꤭ꤊꤢꤧ꤬ ꤜ꤫ꤢꤪ꤬ꤒꤣꤧ꤬ꤗꤢꤋꤢꤨ꤬, ꤚꤣꤧ꤬ ꤢꤨ꤭ ꤢꤩ ꤜꤢꤨ꤭ ꤔꤢꤧ ꤖꤚꤢꤩ꤬ꤡꤢꤩ꤬ ꤢꤨ꤭ ꤋꤢꤨ꤭ꤛꤥ꤭ꤟꤢ꤬꤯ 2ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤛꤢꤧ꤬ ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤗꤢꤪꤋꤢꤨ꤬ ꤢ꤬ꤓꤣꤧ꤭ꤢ꤬ꤊ꤫ꤢꤩ꤬ ꤖꤢꤦ꤬ꤓꤢꤧ꤬ꤟꤣꤧ꤯”#ꤗꤢꤞꤢꤧ ꤄:꤁꤇, ꤗꤢ꤬ꤊꤢꤨ ꤁:꤁꤅ 3ꤢ꤬ ꤗꤢ꤬ ꤗ꤫ꤢ꤬ ꤊꤣꤧ꤬ꤛꤢꤧ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤘꤣ ꤖꤚꤢꤩ꤬ꤖꤚꤥ꤬ ꤛꤢ꤬ꤏꤛꤢꤛꤢ꤬ ꤟꤢꤩꤥ꤬ꤔꤢꤩ꤬ ꤜꤢꤨ꤭ꤚꤤ꤬ꤜꤢꤨ꤭ꤊꤢꤧ꤭ ꤔꤢꤧ,
“ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ ꤢꤩꤓꤥ꤭ꤓꤢꤧ꤬ ꤘꤣ ꤊ꤫ꤢꤩ꤬ꤏꤢꤩ꤭ꤓꤣꤧ꤭ꤊꤢꤧ꤬ ꤜ꤫ꤢꤪ꤬ꤒꤣꤧ꤬ꤗꤢꤋꤢꤨ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ, ‘ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤜꤢ꤭ꤋꤢꤧ꤭ ꤊꤜꤢꤧ ꤘꤣ ꤙꤢꤧ꤬ꤡꤢꤩ꤬ ꤢ꤬ꤑꤢꤩ꤭꤯ ꤗꤢꤩ꤬ꤡꤢꤪꤗꤢꤩ꤬ꤕꤢꤩ꤭ ꤜꤢ꤭ꤋꤢꤧ꤭ ꤙꤢꤧ꤬ꤡꤢꤩ꤬ ꤜ꤫ꤢꤩ꤬ꤟꤢꤧ꤭ꤊꤜꤢꤧ ꤢ꤬ꤑꤢꤩ꤭ ꤒꤣ꤬ꤙꤥ꤭ ꤔꤤ꤮꤯’”#ꤛꤢ꤬ꤏꤛꤢꤛꤢ꤬ ꤄꤀:꤃
4ꤋꤢꤨ꤭ꤛꤥ꤭ꤟꤢ꤬ ꤊꤢꤦ꤭ꤞꤢꤧꤓꤢꤧ꤬ꤚꤣꤧ ꤟꤣꤧ꤬ꤡꤢ꤬ ꤘꤣ ꤢꤨ꤭ ꤙꤢꤪ ꤔꤢꤧ ꤒꤣꤧ꤬ꤞꤤꤙꤥ꤭ꤘꤢꤨ꤬ ꤢ꤬ꤏꤢꤦ꤬, ꤚꤣꤧ꤬ ꤢ꤬ ꤚ꤫ꤢꤧ꤬ꤓꤢꤧ꤬ꤚꤣꤧ ꤟꤢꤪꤓꤢꤪꤖꤢ꤯ ꤚꤣꤧ꤬ ꤢ꤬ ꤢꤩ꤬ꤖꤢꤧ ꤒꤣꤧ꤬ꤊꤤ꤭ ꤔꤢꤧ ꤠꤢꤧꤓꤣꤧ꤭꤯#ꤋꤝꤤ ꤔꤣꤧ꤭ꤙꤢ꤬ ꤒꤣ꤬ꤙꤢ꤬ ꤁:꤈ 5ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤢ꤬ꤊꤢꤨ꤭ ꤔꤢꤧ ꤛꤢꤨꤘꤢ꤬ ꤒꤣ꤬ꤊ꤫ꤢꤩ꤬ꤜꤢꤩ꤭ ꤔꤢꤧ ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ ꤒꤣꤧ꤬ꤠꤤ꤭ꤒꤣꤧ꤬ꤠꤢ꤬ ꤚꤝꤢ ꤡꤛꤢꤪ꤬ꤘꤢ꤬ ꤓꤣꤧ꤭ꤊꤜꤥ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ ꤟꤢꤧ꤭ ꤜꤢ꤭ꤋꤢꤧ꤭ ꤘꤣ ꤋꤢꤨ꤭ꤛꤥ꤭ꤟꤢ꤬ ꤢ꤬ ꤥ꤬꤯ 6ꤛꤢꤩ꤬ꤞꤤ꤭ ꤟꤢꤧ꤭ ꤟꤢꤩꤏꤥ꤬ ꤜꤤ꤭ꤜꤢꤪ꤭ ꤢ꤬ ꤒꤢꤩ꤬ꤗꤢꤩ꤬ꤞꤢꤦ ꤒꤣꤧ꤬ꤟꤢꤩ꤬ ꤚꤣꤧ꤬ ꤋꤢꤨ꤭ꤛꤥ꤭ꤟꤢ꤬ ꤡꤢꤩ꤬ ꤛꤢꤩ꤬ꤞꤤ꤭ ꤘꤣ ꤡꤛꤢꤪ꤬ꤘꤢ꤬ ꤓꤣꤧ꤭ꤊꤜꤥ꤭ꤊꤢꤨ꤭꤯
7ꤗꤢ꤬ꤔꤢꤧꤚꤣꤧ꤬ ꤙꤣꤧ ꤋꤢꤨ꤭ꤛꤥ꤭ꤟꤢ꤬ ꤗꤢꤧꤓ꤫ꤣꤧ꤬ ꤖꤢ꤬ꤚꤤ꤬ꤏꤛꤢꤧꤖꤢꤨ ꤔꤢꤧ ꤎꤢ꤬ꤘꤢꤨꤊꤢꤧꤖꤢꤨ ꤒꤣꤧ꤬ꤟꤢꤩ꤬ ꤟꤢꤧ꤭ꤕꤜꤢꤨ꤬ꤟꤢꤧ꤭ꤖꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤟꤢꤧ꤭ꤡꤢꤩ꤬ ꤊꤣꤧ꤭ ꤢ꤬ꤔ꤫ꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤚ꤫ꤢꤨ꤬ꤞꤤꤞꤤ꤭꤮! ꤗꤢ꤬ꤢꤨ꤭ꤕꤢꤩ꤭ ꤒꤣ꤬ꤖꤚꤢꤩ꤬ ꤘꤣꤧꤚꤢꤪ꤬ꤘꤣꤧꤚꤢꤩ꤭ ꤞꤤ꤭ ꤔꤢꤧ ꤞꤤ꤭ ꤊ꤫ꤢꤦ꤬ ꤜꤣꤧ꤬ꤕꤜꤢꤩꤙꤢꤩ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤘꤣꤧꤡꤢ꤭ ꤘꤣ ꤢ꤬ ꤊ꤫ꤢꤦ꤬ ꤟꤢꤧ꤭ꤕꤢ꤭ ꤣꤧ꤭ꤔꤣꤧ꤬ ꤕꤢꤩ꤭?#ꤗꤢꤞꤢꤧ ꤁꤂:꤃꤄, ꤂꤃:꤃꤃ 8ꤞꤤ꤭ ꤊꤢꤩ꤬ ꤛꤢꤧ꤬ ꤚꤣꤧ ꤗ꤫ꤢ꤬ꤔꤤꤔꤢꤧ꤬ ꤟꤣꤧ ꤞꤤ꤭ꤔ꤫ꤢꤩ꤬ ꤟꤣꤧ ꤊꤢꤩ꤬ꤟꤢꤩꤚꤣꤧ꤬ ꤘꤣꤧꤜꤥ꤭ ꤜꤢ꤭ꤋꤢꤧ꤭ ꤞꤤ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ ꤞꤤ꤭ ꤒꤢꤩ꤬ꤘꤢꤧ꤬ ꤞꤤ꤭ ꤞꤤꤕꤜꤢꤪ꤬ꤞꤥ꤬ꤓꤣꤧ꤭ ꤒꤣꤧ꤬ꤟꤢꤩ꤬꤯ 9ꤟꤢꤩꤓꤥ꤭ꤟꤢꤩꤜꤢꤧ꤬ ꤒ꤫ꤢꤧ꤬ ꤞꤤ꤭ꤔ꤫ꤢꤩ꤬ ꤔꤢꤧ, ‘ꤕꤢꤩ꤬ ꤗꤢ꤬ ꤖꤢꤩ꤭ꤢ꤬ꤙꤚꤢ꤬ꤟꤢ꤬ ꤢ꤬ꤊꤜꤝꤤ꤭ꤢ꤬ꤜꤢꤧ꤭’ ꤔꤣꤧ꤬ꤒ꤫ꤢꤧ꤬ꤗꤢꤩ꤬꤯ ꤠꤢꤧ꤭ ꤟꤢꤩ ꤞꤤ꤭, ꤡꤢꤪꤗꤣꤧ꤬ꤚꤢꤧ꤬ ꤗꤢꤩ꤬ꤓꤝꤢ꤭ꤓꤢꤧ꤬ ꤜ꤫ꤢꤪ꤬ꤣꤧ꤭ꤒꤣꤧ꤬ꤟꤢꤩ꤬ ꤔꤢꤧ ꤖꤢꤩ꤭ꤢ꤬ꤙꤚꤢ꤬ꤟꤢ꤬ ꤢ꤬ꤖꤢꤨ ꤗꤢ꤬ ꤢ꤬ ꤗꤢꤩ꤬ꤡ꤫ꤢꤧ꤬ ꤖꤢꤧ꤯#ꤛꤥ꤭ꤟꤢ꤬ ꤈:꤃꤃ 10ꤊꤝꤢ꤭ ꤒꤣ꤬ꤙꤢꤩ꤬ ꤥ꤬ꤟꤣꤧ ꤘꤣ ꤞꤢꤪ꤬ꤊꤢꤧ꤭ꤏꤢꤟꤣꤧ ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤊꤝꤢ꤭ ꤜꤣꤧ꤬ꤋꤢꤦꤟꤣꤧ ꤞꤢꤪ꤬ꤗ꤫ꤢꤪ꤬ ꤒꤣꤧ꤬ꤟꤢꤩ꤬ ꤕꤢ꤭, ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤤ꤬ꤡ꤫ꤥ꤬ꤒꤢꤦ꤭ ꤒ꤫ꤥ꤬ ꤡꤣꤧ ꤘꤣ ꤢ꤬ꤚꤝ꤫ꤤ꤬ꤢ꤬ꤓꤝꤢ꤬ ꤕꤢ꤭꤯ ꤞꤢꤪ꤬ꤗ꤫ꤢꤪ꤬ ꤒꤣ꤬ꤗ꤫ꤢꤪ꤬ꤗ꤫ꤢꤪ꤬ ꤘꤣ ꤢ꤬ꤞꤢꤩ꤬ꤢ꤬ꤖꤥ꤭ ꤒꤝ꤫ꤢ꤬ꤚꤢꤧ ꤒꤥ꤬ ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤊꤝꤢ꤭ ꤜꤣꤧ꤬ꤋꤢꤦꤊꤢꤧ꤭ ꤢ꤬ ꤕꤢ꤭ ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤠꤤ꤭ꤔꤥ꤭ꤊꤢꤧ꤭ ꤢ꤬ ꤘꤣ ꤗꤤ꤬ꤊꤢꤨ꤭ ꤕꤢ꤭꤯#ꤗꤢꤞꤢꤧ ꤇:꤁꤉
11“ꤘꤣ ꤞꤤ꤭ ꤛꤢꤧ꤬ ꤚꤣꤧ ꤞꤤ꤭ꤔ꤫ꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤠꤢꤧ꤭ ꤡꤢꤩ꤬ ꤞꤤ꤭ ꤔꤢꤧ ꤓꤣꤧ꤭꤯ ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤥ꤬ꤒꤣ꤬ꤖꤚꤢꤩ꤬ ꤘꤣ ꤢ꤬ ꤒꤣꤧ꤬ꤚꤣꤧ꤭ꤖꤚꤥ꤬ꤖꤚꤢꤧ꤬ ꤏꤝꤢ꤬ꤏꤢꤪ꤭ ꤜꤣ ꤡꤣꤧ ꤔꤢꤧ ꤠꤢꤧ꤭ ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤊ꤫ꤢꤦ꤬ ꤟꤢꤧ꤭ ꤘꤣ ꤠꤢꤧ꤭ꤋꤛꤢ꤭ ꤕꤢ꤭꤯ ꤢ꤬ ꤊ꤫ꤢꤦ꤬ ꤡꤢꤩ꤬ ꤞꤤ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤔꤢꤧ ꤗꤤ꤬ ꤕꤢ꤭꤯ ꤠꤢꤧ꤭ ꤡꤢꤪ꤭ꤡꤝꤢ ꤕ꤫ꤢꤩ꤬ ꤖꤢꤧ ꤜꤢꤨ꤭ꤋꤢꤧ꤬ꤖꤢ ꤔꤣꤧ꤬, ꤢ꤬ ꤊꤢꤪ꤬ꤔꤢꤧ ꤠꤢꤧ꤭ ꤒꤥ꤬꤯ 12ꤢ꤬ ꤕ꤫ꤢꤦ꤬ꤥ꤬ꤟꤣꤧ ꤘꤢꤪ꤭ꤊꤢꤪ꤬ ꤘꤣ ꤢ꤬ ꤊꤢꤨꤛꤢ꤭ꤊꤢꤨ꤭, ꤚꤣꤧ꤬ ꤢ꤬ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ꤟꤣꤧ ꤘꤣ ꤢ꤬ ꤊ꤫ꤢꤦ꤬ ꤤ꤬ꤋꤚꤢꤩꤏꤢꤩ ꤙꤥ ꤕꤢ꤭꤯ ꤢ꤬ ꤤ꤬ꤋꤚꤢꤩꤏꤢꤩ ꤓꤥ꤭ꤟꤣꤧ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤢꤧ꤬ꤥ꤬ꤕꤜꤢꤪ ꤙꤥꤏꤢꤩ ꤘꤣ ꤡꤢꤧ꤭ꤊꤢꤨ꤭ ꤕꤢ꤭꤯ ꤚꤣꤧ꤬ ꤢ꤬ꤞꤢꤨ꤬ꤢ꤬ꤖꤤ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤊ꤫ꤢꤦ꤬ ꤏꤢꤦꤊꤢꤧ꤭ ꤔꤢꤧ ꤗꤤ꤬ ꤘꤣ ꤢ꤬ ꤕꤤ꤭ꤕ꤫ꤢꤩ꤬ ꤒꤣ꤬ꤖꤥ꤮ ꤒꤥ꤬ ꤔꤣꤧ꤬ꤒꤣ꤬ꤖꤢꤩ꤬ ꤢ꤬ꤊꤢꤨ꤭ ꤕꤢ꤭꤯”
ꤛꤢꤩ꤬ꤏꤛꤢꤨ ꤡꤢꤩ꤬ ꤢ꤬ꤔ꤫ꤢꤩ꤬
(ꤗꤢ꤬ꤊꤢꤨ ꤁:꤉-꤁꤁, ꤜꤢꤨꤊꤢ꤬ ꤃:꤂꤁-꤂꤂)
13ꤓꤥ꤭ꤚꤣꤧ꤬ ꤞꤢꤧꤟꤢꤨ ꤛꤢꤩ꤬ꤏꤛꤢꤨ ꤊ꤫ꤢꤦ꤬ ꤡꤢꤩ꤬ ꤊꤣꤧ꤭ ꤢ꤬ꤔ꤫ꤢꤩ꤬ ꤘꤣ ꤋꤢꤨ꤭ꤛꤥ꤭ꤟꤢ꤬ ꤢ꤬ ꤊꤢꤨꤛꤢ꤭ꤊꤢꤨ꤭ ꤢ꤬ꤑꤢꤩ꤭ ꤔꤣꤧ꤬ ꤢ꤬ ꤥ꤬ꤘꤣ ꤊꤢꤧꤜꤢ꤬ꤜꤤ꤬ꤊ꤫ꤢꤩ꤬ ꤚꤣꤧ꤬ ꤢ꤬ ꤟꤢꤧ꤭ ꤘꤣ ꤡꤛꤢꤪ꤬ꤘꤢ꤬ ꤜꤢꤧ꤭ꤗ꤫ꤥ꤬ ꤢ꤬ ꤥ꤬꤯ 14ꤗꤢ꤬ꤔꤢꤧꤚꤣꤧ꤬ ꤋꤢꤨ꤭ꤛꤥ꤭ꤟꤢ꤬ ꤞꤤꤛ꤫ꤢꤦ꤬ ꤡꤢꤩ꤬ ꤕ꤫ꤢꤩ꤬ ꤜꤢꤨ꤭ ꤒꤥ꤬꤯ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤠꤢꤧ꤭ ꤒꤥ꤭ ꤡꤢꤩ꤬ ꤒꤣꤧ꤬ꤕꤜꤢꤩ꤬꤮ ꤊꤣꤧ꤭ ꤠꤢꤧ꤭ꤔ꤫ꤢꤩ꤬ ꤘꤣ ꤔꤢꤧ꤬ ꤥ꤬ ꤊꤢꤪ꤭ꤊꤢꤪ꤭ ꤚꤣꤧ꤬ ꤔꤢꤧ꤬ ꤡꤝꤢꤟꤢꤧ꤭ ꤡꤢꤩ꤬ ꤕ꤫ꤢꤩ꤬ ꤔꤢꤧ꤬ꤔ꤫ꤢꤩ꤬ ꤘꤣ ꤠꤢꤧ꤭ꤥ꤬ ꤟꤢꤨꤒꤢꤩ꤭?”
15ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤊꤢꤨꤔ꤫ꤢꤧ꤬ ꤚꤣꤧ꤬ ꤒꤣꤧ꤬ꤚꤢꤨ ꤡꤢꤩ꤬ ꤗꤣꤧ꤭ ꤠꤢꤧ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤕꤢꤩ꤬ ꤒꤥ꤭ꤙꤢꤩ꤬ ꤗꤢꤩ꤬ꤜꤣꤙꤢ꤭ ꤜꤢꤪ꤭ ꤜꤢꤪ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤔꤢꤪ꤭ꤗꤢꤩ꤬ ꤕꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬,” ꤢ꤬ ꤟꤢꤩ ꤚꤣꤧ꤬ ꤋꤢꤨ꤭ꤛꤥ꤭ꤟꤢ꤬ ꤞꤤꤕꤜꤢꤪ꤬ꤥ꤬ ꤡꤢꤩ꤬ ꤜꤢꤨ꤭꤯
16ꤙꤣꤧ ꤛꤢꤩ꤬ꤏꤛꤢꤨ ꤡꤢꤩ꤬ ꤓꤥ꤭ ꤢ꤬ꤔ꤫ꤢꤩ꤬ ꤚꤣꤧ꤬ ꤢ꤬ ꤍꤢꤪ꤬ꤊꤣꤧ꤬ꤓꤢꤪ꤬ ꤘꤣ ꤓꤣꤧ꤭ꤋꤢꤨ꤬ꤋꤢꤨ꤬ ꤔꤢꤧ ꤗꤢꤪꤋꤢꤨ꤬ ꤜꤢꤨ꤬ꤗꤥ꤭ꤢꤧ꤭꤯ ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤟꤢꤧ꤭ꤒꤢ꤭ ꤥ꤬ꤘꤣ ꤜꤢꤨ꤭ꤜꤥ꤬ ꤞꤢꤧꤔꤢꤧ ꤓꤢꤨ꤬ꤜꤝ꤫ꤤ꤬ ꤔꤣꤧ꤬꤯ 17ꤓꤥ꤭ꤚꤣꤧ꤬ ꤍ꤫ꤥ꤬ꤖꤚꤢ꤬ꤓꤢꤧ꤬ ꤒꤣ꤬ꤗꤢꤦ꤭ ꤘꤣ ꤗꤢꤪꤋꤢꤨ꤬ꤔꤣꤧ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤣꤧ꤭ꤒꤣ꤬ꤖꤚꤢꤩ꤬ ꤗꤢ꤬ ꤠꤢꤧ꤭ꤖꤢꤨꤖꤚꤢꤩ꤬ꤋꤢꤨ꤭ ꤘꤣ ꤠꤢꤧ꤭ ꤗꤥ꤬ꤚꤣꤧ ꤢ꤬ ꤓꤥ꤭ꤒꤥ꤬ ꤠꤢꤧ꤭ꤖꤢꤨ ꤘꤣ ꤠꤢꤧ꤭ ꤗꤢꤧꤘꤢꤨ꤬ ꤚꤣꤧꤘꤢꤦ꤬ ꤢ꤬ ꤒꤣ꤬ꤖꤚꤢꤩ꤬꤯”#ꤟꤢꤩ꤬ꤋꤢꤨ꤬ꤓꤝꤢ꤭ꤜꤢꤨ ꤂꤂:꤂, ꤓꤢꤨ꤬ꤞꤢꤩꤓꤢꤧ꤬ ꤂:꤇, ꤛꤢ꤬ꤏꤛꤢꤛꤢ꤬ ꤄꤂:꤁, ꤗꤢꤞꤢꤧ ꤁꤂:꤁꤈, ꤁꤇:꤅, ꤗꤢ꤬ꤊꤢꤨ ꤁:꤁꤁, ꤜꤢꤨꤊꤢ꤬ ꤉:꤃꤅
Okuqokiwe okwamanje:
ꤗꤢꤞꤢꤧ 3: eky-Kali-MM
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
