Matiu 3
3
Tioni itema so ilixo so kelele mulanu vaikala
1Xe no voxo anene la Tioni itema so ilixo so kelele muxali mo muxoxolu muvotone'i tamiÂtema no xale lia esi'esi ne Iutea. 2La anu muvivikala lexe, “Ngaxiunu oponÂgengi so susu noxinge mo nga'isaÂlilinoxu no anu Mosinge oponu. Xo voxo so Mosinge molu u'uli laxune'i tamitemaou no tualasou a alaimanasi.” 3Tioni ne anu itema e Mosinge mupala'aÂnixu no anu vaikalaou polopeti Aisaia aloxo 'o, “Ili'i la tamitema ilomuÂsou itema vile u'ava'ava no xale lia esiesi lexe, 'Ngalalaxinu vote'isou Tatananenge, mo nga'iÂsaÂlilinoxu vote'isou.'” 4Tioni ne anu mulavuÂsou usakinu lavalava e mi'itaxu no anu kameli laxusou, ka usinixu no anu laleti. Mo anu ani'anixu ane musia'e xe unuxu.
5Tioni muxolu no xale lia esiesi ne la tamitema Taielusalemo xe tamitema so xale lia ne Iutea xe tatemanu tuala no pa'umolu lexa Tiotani ne mine'ene'e noxou. 6Mine'ene'e noxou xe ane'i ta'ei milamana no anu susu noxi'a la milemolu. Laso Tioni mu'oxo ilixo anene so mukelenixa'a no lexa Tiotani ne.
7Ia anu mumaisi'a tavu'alo noxi'a Tapalisi xe Tasatusi ine'ene'e no apu ne so u'oxonu iloxo so kelele noxi'a la muvikala tatila noxi'a aloxo 'o, “Ngingi ne, ngingi ngaÂxilisi mo nga'oxo loloxa'a tamiÂtema, ia anu loxo lamalasini masua uxolu no anangene a loxo tasineke tamasua to. Ena'ei muvikalanÂgengi so nga'uÂmesou voxo so la'ia e unene'e 'o? 8Loxo ngexiunu opoÂngengi mo nge'iÂslaliÂÂnoxou maniÂnasou la nexi masi tamaisou nene'axu uxali no anu xoluxolu noxinge ane. 9Mamu so nga'itiÂngengi xo ngingi ApaÂla'amu ta'ilusunu. Anene mi vitanisi ane. Eni avikala lexe Mosinge umoÂmomo so uxiunu lavolavo'o uta'olu 'o so ixali ta'ilusunu Apala'amu. 10Laixe so ngingi ngamama'u, xo Tatananenge anu loxo itema a utatavulenu lapemu. Anu a mulaÂlaxi so uxetasou ovuovu aneva ulavusou uxalixu temanu laixe uasi. UxetaÂsou ukalu laso upeinu no navu.
11Eni alavusou a'oxonu ilixo so akelenixa'a tamitema no anu lexa so sosovo lexe ilamana no anu susu noxi'a. Ia itema ane une'e ili'i noxilo ne anu xavinu mutiatila noxilo. Anu itema mutiatila ia eni amitema vitanisi mo alaixe so atavulenu lasuou uasi. Anu itema xavinu mutiatila noxilo mo loxo u'oxonu ilixo so ukelenixa'a tamitema la anu u'oxonu no anu Ulenu Laixe xe navu.
12Anu Tatananenge mulalaxi so utongone'i tamitema mo ukalipaÂlane'i. Ukalipalane'i tamitemaou noxi'a ane'i ane tamitema so susu. Xo anu loxo itema e utetelisou lasovolu so ususunu no anu uiti ka uleanu ulai teitexi. Uleanu ulai teitexi xe sivo uilisou la utavulenu sosou uxexe io ngiaxusi ulapau uai no lia. Mukalu la anu utaxusou uiti ngiaxu mo uta'olunu no tasou u'isalili. Ia sosou ne, anu usi'alonu so u'elaxu no navu ane u'ani'ani mo kaluxu uasi.”
Tioni mu'oxonu ilixo so kelele noxou Iesua
13Ioxe, no voxo anene la Iesua mulutu ne Xalili mo mulai no lexa Tiotani la muxali noxou Tioni. Xo anu mumasaxau so Tioni u'oxonu iloxo so ukelenixu no lexa. 14Ia Tioni mutovonu so lexe u'apixu mo muvikala lexe, “Loxova so nene'e noxilo? Laixe loxo nini mene na'oxo ilixo so nakelenixilo ane.” 15Ia Iesua mukolinu lexe, “Uasi, ta'oxonu loxo elemolu. Ta'oxonu axone so tamulinu mimi mukalusi no anu masaxa noxou Mosinge.” Laso Tioni mumulinu vaikalaou.
16Ioxe, mukelenixu mukalu xe Iesua mulivu muxali no lexa pa'umolu sila loxotolo mua'a la mumaisou Ulenu Laixe noxou Mosinge mulu'e. Anu mulu'e la loxo ngiala e utu la muai noxou. 17Sila xoli vile molu no loxotolo mulu'e lexe, “Ano'o eni alixeli asexelaxu ane. Eni a'osasou misevile.”
Okuqokiwe okwamanje:
Matiu 3: ATA
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright 1999 New Tribes Mission, Sanford, FL 32771-1487
