Luka 1
1
1Viikuta muɗǝng Tiyofilus, asum pyak ɓwak warang awenaa ta shii maa awung kǝ wari ta tǝɗoo waraa mang kaa ɓee ɗǝ yis yen. 2A warang awung kǝ wo yiri ta nung maa angaan kǝ a yeni mang kǝ gaat kaa ɓee ɗǝ yis yen pang a ɗǝ kǝ ɓana asum nung Vitor ki. 3Tung ka makghai ɗǝ shii min, ng ɓwak ɓasakghaa kun kun tǝ kaɓa kyaa, Mee ni ryak pang ng ɓee kun kǝng warang yen ku maa gaat ɗǝ gaat. 4Tung kaa sok yokghai ka awung kǝ a makshii kumaa pan, ng duk dukghaa ni.
Yalang Yohana mu Bonza
5Tǝ ayisang kǝ Hirudus, ni mee ruu maa angaa Yahudu, a ɗǝ sungwarin Vitor yen ta mang kaa tokghaa ma ka Zakariya. Ng kǝshiin shamang shii maa sungwarin balkam maa Abija#1.5 Abija ng tǝɗong maa Haruna ni, mee ni mushorin balkam mang kǝ nanas maa sungwarin Vitor. (1Tǝy 24.1-20).. Ng ɗǝ yii mee mang kaa yal ma kǝshii lok maa Haruna ni, tǝsak mee ka Elizabatu. 6Ɓaa yen a ɗaa sum zar ni nggen Vitora, a ɗǝ byaa nzup awung kǝ Mulok Vitor sheeki ɗǝ ˈyeena ˈyaan kǝ Vitor ɓan yen ɗǝ karkǝɗoo gaat, tung ka kǝ tǝsak yen yarshii rak. 7A ɗǝ fan nak, tung ka Elizabatu ng ɗǝ yela rak. Ɓaa yen a ɓwak kaksharaa.
8Vii yena Zakariya ta shaa ɗǝn mee mang maa sungwarin Vitora, tung ka vii kyaa balkam yeni ɗǝ shaa ɗǝn maa sungwarin Vitor. 9Kan kee awung kǝ Asungwarin Vitor shaaki ri, a shii tyan pwari, pang pir shiin Zakariya, ka mee ni lǝra lokng Vitora, kǝ kuɗuk noong ngol. 10Kǝ ng ta kuɗukghaa noong ngol kyaa, ɓum maa sum shambal kaaryaa ka ta kwarsa Vitora.
11Shee fan tokghaan zar Vitor yen taa war ta mee ya, ng Shambalaki ta kwak tǝshen damballa. 12Kǝ Zakariya ɓee ma, awen kyaa ryak pang nyii ndus, pang wop kap ma. 13Nzup ɗǝ kaɓan fan tokghaan Vitor ki ɓan ma ka, “Kaa shii wop rak Zakariya, tung ka Vitor yal kwarsa mu yaa. Yii mu Elizabatu yela ku maa fan. A ryakghang maa tǝsak ka Yohana. 14A shaa katla maa aɗoo ɗǝng tung yalan fan ki. Asum ɓum shaa katla maa aɗoo ng a yeni yal ma. 15Tung ka nakghaa banjin sum nggen Vitora. Swaa nggam koo min nzaram rak. Kǝ yakghai kǝshii teelin nakghai ya, Awurkin pes pesng Vitor shiila ma. 16Mee ni shiiɓǝlla ɗaa Isaraila ɗǝng kaa taa ta Mulok Vitor yena. 17Taa kaa pang Mulok, ɗǝ awurki ɗǝ ɓyakghaa kan kee mang Iliya ri. Kǝ por ɗǝ karkǝɗoo maa daa shii maa wan yen, kǝ shiiɓǝl ɗaa maa angaa shadnan shii kaa bii sakghaɗa maa sum zar. Kǝ kasa aɗoo maa sum kaa shakghaa taang Mulok.”
18Pang Zakariya yiɓǝn fan tokghaan zar Vitor ka, “Ng shaa kacee ni pang kǝng yok awuu mari nakghaa duk dukghaa paa? Meeni ng kakshara, mu kǝshii min maa kaksharaa ket.”
19Pang fan tokghaan Vitor ki pal ma ta ka, “Mani Jibrailu kǝng ɗǝ Shambalaki nggen Vitora. Tok mi ni ka kǝng taa shee ɗǝ wok, kǝng por ɓan ku nung zar mari. 20Zheri, nung mu kaɓak, a shama shee nung nak, shee naskǝng kǝ woni ɓee ɗǝ yis mu, tung ka a yal duk-dukghaa maa wung kǝng shee rak, mang kaa shaa ma ta ayisa kyaa.”
21Asum kaa ta shakghaa Zakariya#1.21 Zakariya: Ng mee kǝshii maa sungwarin Vitor. Ng kishin kǝlakng Lawi ni. yaa, a ta koora maa nɗoo ya ɗǝ fednan kǝ shii lok Vitora. 22Kǝ wari, sham shee nung ɗǝ yen nak, pang yeni aɗoo yokghai nyee kaa amor shee Zakariya yis pǝla kǝshii lok Vitora. Shee ɗǝ kǝ shaa yen kwak, pang ng shee nung nak.
23Ng kǝ Zakariya kǝd shaan ɗǝn mee kǝshii lok Vitora, pang por ma lokghaa. 24Ta dǝbari maa yisan pana ni pang yii mee Elizabatu cir fan teeli, pang ɓuk shii mee mang pee kwen, ng sheeki ka, 25“Kaɓan ni pang Vitor shiing maa awuu zar ta yisan kǝ ɓee mi ɗǝ yisǝng shoor, tung ka kǝ wuporang maa ɗǝ sheerang kaa sum sheerang mi.”
A Shee Yalang Yesu
26Ng kǝ Elizabatu ng ɗǝ fan teeli mang pee shaan, Vitor tok fan tokghaa zar mee Jibrailu kǝ nak Nazarat kǝng kǝshiin ndar Galiliyaa, 27ta fai yena mang kǝ yok morom maa rak, kaa kǝl ma sum yen maa kǝ tǝsak mee ka Yusufu, mang tǝɗong maa Dauda. Tǝsakng fai ki ka Maryamu. 28Pang fan tokghaa zar ki nak ta mee ya pang shee ka, “Ng shee waryaa ɗǝ wok, wokghai kaa mu nggen kal! Mulok ng ɗǝ wok.”
29Wop kap Maryamu ɗǝ nung kǝ fan tokghaan Vitor ki shee, shii ta koora maa ɗoo ka, sheen waryaa maa yeni kan paa? 30Fan tokghaan Vitor ki ɓan ma ka, “Kaa shii wop rak, Maryamu, a mu nggen kal ni nggen Vitora. 31A cira fan teeli, kaa yal fan. Kaa ryak maa tǝsak ka Yesu. 32Nakghaa mu ɓyakghaa, a tokghaa ma ka Fan mu Gakghai. Mulok Vitor shiira ma Ruu lokng dǝ maa daa mee Daudaa. 33Mee ni wura atǝɗong lok Yakub mang ɓetki ɓetki. Tǝruu mee ng mang masala ni rak.”
34Pang Maryamu yiɓǝn fan tokghaan zarng Vitor ki ka, “Kacee ni pang shaak, kǝng yok morom maa rak paa?”
35Fan tokghaan zar Vitor ki pal ma ta pang shee ka, “Awurkin Pes pesng Vitor jira ku maa, ɓyakghan Mu Gakghai taa pukghaa ku, tung kaɓan fan pes pesng kaa yelak, a tokghaa ma ka Fan Vitor. 36Azǝ mu Elizabatu maa cir fan teeli yaa mang kǝ yela fan morom nzup ɗǝ tǝkaksheeri mee, pee mee shaan ni ri ɗǝ fan teeli ki, mee kaa ɓyaaki ka ng ɗǝ yala rak. 37Tung ka, Awuɗakghai ta kǝ ɗakghaa Vitor rak.”
38Pang Maryamu shee ka, “Makghai ri, ng koring Vitor ni. Kǝ nakng ma kan kee mang kaa shee pan.” Pang fan tokghaan Vitor ki niyang kala maa.
Maryamu Lok maa Elizabatwaa
39Ta yisa kyaa Maryamu nanzu nyee, niyang kǝshii ndar yenna kǝshii maa agenakghaa, kǝshii ndar Yahudu. 40Mee kǝ lǝr lokng Zakariya pang shee ɗǝ Elizabatu. 41Kǝ Elizabatu yir waryaang Maryamu, fan kǝng ta kǝshii teeli myaa zhigǝt ndus, pang Awurkin Vitor shiil Elizabatu. 42Pang foo nung shadshan, shee ka, “A mu nggen kal ni kǝshii maa yii yaa ˈyaɓat, fan kǝng ta kǝshii teeli mwaa ng mu nggen kal ni! 43Ka ce ni pang awuu zar mari sok mi, kǝ nakng Mulok min taa ta makghaa paa? 44Kǝng yir gyerng waryaa mu ta kutu minaa nyee, pang fan kǝng teeli mina zhigǝt ndus tung katla maa ɗoo. 45Mu katla maa ɗoo ni mung kǝ yal ˈyee kaa a shiila awunan kǝ Mulok Vitor shee.”
Maryamu Shi Nɗurng Makghaa
46Pang Maryamu shee ka,
“Karkǝɗoo min mak Mulok,
47Ng shaa katla ma ɗoo tung ka Vitor mu ɓwakghaa min ni,
48Tung ka Vitor rikǝnaa ɗǝ makghai kori mee
kǝng muɗakghai ni rak kǝshii maa sumaa.
Kǝ kap ta zheryaa, nzup maa sum tokghaa mi ka, mu nggen kal.
49Tung ka Vitor mu byakgha ni, awuna maksar kǝ shiing maa,
tǝsak mee ng pespes ni.
50Ng ɗǝ ɓyaa shoor maa angaan kǝ a yira wop mee
nzup maa yisa.
51Shi awu maksar ɗǝ kwak mee,
mbasak angaan kaa ɗǝ ciran shii ɗǝ nzup maa awung kaa ˈyaa shii ta aɗoo yena.
52Ɓashii aruu taa tǝruu yena,
pang mak angaa kaa ɗaa awen nak kǝshii maa sumaa.
53Angaa ɗamaa a naa yen awuna mang kun kun,
pang pun angaa maa awuu kwak kaa niyang kwak koori.
54Ɓwak akori mee angaa Isaraila
pang ng gidaki ɗǝ shoor mee ta yenaa,
55kan kee mang kǝ ɓan mee adaa maa daa war,
Ibrahim ɗaa tǝɗong mee, mang ɓetki ɓetki.”
56Pang Maryamu ɗa ɗǝ Elizabatu ta tang mang pee taat, pang por ma lokghaa.
Yelan Yohana Mu Bonza
57Kǝ, ayisang yelan Elizabatu shii, pang yel fan morom. 58Pang angaa kaa pyet ɗǝ mee ɗaa tǝɗong mee kaa yir awung kǝ Mulok Vitor shiing ma, pang a taa ɓwak ma katla maa ɗoo.
59Kǝ gang yisa nanas pang a tari kaa ˈyii fan ki twar. A mee ruɗa ryakghaa fan ki ma tǝsakng dǝ mee Zakariya ni. 60Pang nakghai shee ka, “O oi, ka tok maa ka Yohana.”
61Pang a ɓan ma ka, “Muɗakghai ta kǝshii ma tǝɗong yinaa kǝng ɗǝ tǝsak kaɓan nak.”
62A shee nung ɗǝ dǝ ki ɗǝ kwak, a yera tǝsakng kǝng ruɗaki ka kaa ryak fan ki maa. 63Pang kwarshii ka kaa na ma pwarin min, pang warang ta ka, “Tǝsak mee ka Yohana.” Nzup yen awen ki shiishii yen ma ndus. 64Pang nung mee pǝl nyee, tǝlǝm mee bun, pang lǝr sheen nung, ng makghaa Vitor. 65Pang wop mok angaa kaa pyet ɗǝ yen. A shii ta basakgha nung ki koo pee, ta nzup maa ndar kaa agenakng Yahudiya. 66Nzup maa angaan kaa yiri a gidaki ta aɗoo yaa, pang a sheeki ka, “Yeni pang fan mari nakghaa paa?” Tung ka kwakng Mulok Vitor ng ta shii myaa.
Nɗurng Zakariya
67Pang Awurkin Vitor shiil Zakariya, shee foo nung ɓan asum awung kǝ Vitor ɓan ma, sheeki ka,
68“Wo mak Mulok Vitor maa Isaraila,
tung ka tari ka kǝ ɓwak aswaa mee.
69Nanzu ɗǝ mu shadnan kǝ ɓwakghaa war,
kǝshii lokng kori mee Daudaa,
70kan kee mang kǝ shee yongaa yongaa nung maa awan zarng fwaa nung mee yaa ka,
71ɓwak war ta kwak maa angaa vana waraa,
nzup ɗaa angaan kaa ruɗa ɓyaa war rak.
72Shee ka ɓyaa shorng maa daa maa daa war,
kǝ gidak ɗǝ ˈyeenan ˈyaa mang zar kǝ shii yen maa ya yongaa yongaa.
73Ɓan mee dǝ maa ɗaa war Ibrahim ket ka,
74ɓwak war ta kwak maa angaan kaa vana waraa,
koo nak angaa makghaa mee ɗǝ wop rak,
75ɗǝ ɗaan zar ɗǝ shaa maa wuu zar ta nggen myaa, nzup maa yisan koo shaa taa apar ryaa.
76Wokghai fan min, a tokghaa ku ka mu fwan nung Vitor Mugakghai,
tung ka a laksa nggen Mulokghaa, tung kaa kasang maa shii.
77Woni ɓaa aswaa mee ka Vitor porsa aram yen furayang,
ɗǝ kaɓan ni pang a ɓwakghaa yen ta.
78Tung ka Vitor war ng mu ɓyaan shoor ni ng ruɗa war, ton war maa mung kǝ taa ɓwakghaa war,
kǝ taa kan kee warang vii ɗǝ kanas ri,
79tung kǝ taa katli angaan kaa ɗaaki ta ara shiiryaa
ɗǝ Wopng kwaa,
tung kǝ bii ɗǝ war kǝshii gwarshii ɗaan wusungaa.”
80Shee Fan ki mak, shadn kǝshii Awurki Vitora. Shee ɗa kǝshii ma pokghaa kaapang ta zhak shii mee ta angaa Isaraila.
Okuqokiwe okwamanje:
Luka 1: (Boi) Tiyaa
Qhakambisa
Dlulisela
Kopisha
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fzu.png&w=128&q=75)
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
©️2022 Luke Initiative for Scripture Translation