Génesis 1
1
Bix úuchic u beeta'al yóokolcaab
1Tu yáax chuune' Junab Kue'#1.1 Junab Ku, bey u ya'ala'al ti' Dios ichil le c úuchben c ch'i'ibalo'obe' u káat u ya'al: Chéen leti' cuxa'an Dios tu beetaj ca'ano'ob yéetel lu'um. 2Chéen ba'ale' le lu'umo' ma' nu'uca'an yanil ca'achi'; tuláacale' t'uubul ichil sen nojoch éekjoch'e'enil, ba'ale' u pixan Kue' ti' cu péec ca'ach pacacbal yanil tu yóokol#1.2 U pacacbal, le t'aana' u káat u ya'al u méekma yéetel xiiko'ob je'el bix le x caax cu júuquic u ye'el u ti'al u tóop'sej. le ja'o'.
3Ca tu ya'alaj Ku: ¡Yanac sáasil!
Ca j yanji sáasil. 4Le ca tu yilaj Ku ma'alob le sáasilo', tu jun páaycuntaj ti' le éekjoch'e'enilo', 5ca tu dzaj u kaaba'int le sáasilo' kiin, ca tu dzaj xan u kaaba'int le éekjoch'e'enilo' áakab. Bey máanic le u yáax jun kiino'.
6Cu dzo'ocole' ca tu ya'alaj Ku: yanac jun p'éel nak ca'an u ti'al u jun páaycunt le ja'obo', u ti'al beyo' ca p'áataco'ob jujun páayil lelo'oba'.
Bey úuchico'. 7Kue' tu beetaj jun p'éel nak ca'an, lela' tu jun páaycuntaj le ja'obo': jun jaatze' j p'áat tu yáanal le ca'ano', u láake' j p'áat tu yóokol. 8Le nak ca'ano' tu dzaj u kaaba'int ca'an. Bey máanic túun le u ca'a p'éel kiino'.
9Ca tu ya'alaj Ku: Le ja' yaan tu yáanal le ca'ano' ca u much'quinticubáa ti' jun p'éelili' cúuchil, u ti'al ca chíicpajac le tiquino'.
Bey úuchico'. 10Kue' tu dzaj u kaaba'int le tiquino' lu'um, u múuch'ul le ja'o' tu dzaj u kaaba'int ka'anab.
Le ca tu yilaj Ku tuláacal ma'alobe', 11ca tu ya'alaj Ku: Le lu'umo' u dzáa tuláacal u jejeláas paakalo'ob; xíiwo'ob ca u dza'ob neek, yéetel che'ob ca u dza'ob ich.
Bey úuchico'. 12Le lu'umo' tu dzaj tuláacal jejeláas paakalo'ob, xíiwo'ob cu dzáico'ob neek yéetel che'ob cu dzáico'ob ich. Ca tu yilaj Ku tuláacal ma'alob. 13Bey túun máanic le u yóox p'éel kiino'.
14-15Ca tu ya'alaj Ku: Ca yanac sáasilo'ob te tu nak ca'ano', u ti'al u sáasilcunto'ob le lu'umo' ca xan u jun páaycunto'ob le kiin ti' le áakabo', ca meyajnaco'ob u ti'al xan u ye'esico'ob le kiino'ob, le ja'abo'ob yéetel le kiinbesajilo'obo'.
Bey úuchico'. 16Kue' tu beetaj le ca'a p'éel sáasilo'obo': le nojocho' u ti'al u sáasilcunaj yéetel kiin, le chichano' u ti'al sáasilcunaj yéetel áakab. Tu beetaj xan le eeko'obo'. 17Kue' tu dzaj le sáasilo'ob te tu nak ca'ano' u ti'al u sáasilcunto'ob le lu'umo', 18bey yéetel kiin, bey yéetel áakab, u ti'al xan u jun páaycunt le sáasilo' ti' le éekjo'och'e'enilo', ca tu yilaj tuláacal ma'alob. 19Bey túun máanic le u can p'éel kiino'.
20Cu dzo'ocole' ca tu ya'alaj Ku: Ca u dzáa le ja'o' tuláacal jejeláas ba'alche'ob, ca yanac xan ch'íich'o'ob ca xiknalnaco'ob yóokol le lu'umo'.
Bey úuchico'. 21Kue' tu beetaj u nucuch ba'alche'ilo'ob le ka'anabo', tuláacal le ba'alche'ob cu dzáic le ja'o' yéetel le cajacbalo'ob ichilo', bey xan tuláacal le ch'íich'o'obo'.
Le ca tu yilaj Ku beyo' ma'alob, 22tu qui'iqui' t'antaj le ba'alche'ob dzo'oc u beetico', yéetel le qui' t'aano'oba': Yanac ya'ab a mejenile'ex, chupe'ex xan le yóokolcaab yéetel ca yanac ya'abcach ch'íich'o'ob yóokolcaab.
23Bey túun máanic le u jo' p'éel kiino'.
24Ca tu ya'alaj Ku: U dzáa le lu'umo' tuláacal u jejeláasil alaktbil ba'alche'ob yéetel káaxil ba'alche'ob, bey xan le cu jíilticuba'ob j lu'umo'.
Bey úuchico'. 25Kue' tu beetaj le ba'alche'obo', ca tu yilaj tuláacal ma'alob.
26Ca tu ya'alaj Ku: Bejela'e' co'ox beetic wíinic. Bíin béeyac je'el bixo'one', u ti'al u yantal páajtalil ti' tu yóokol cayo'ob, ch'íich'o'ob, alaktbil ba'alche'ob, káaxil ba'alche'ob, yéetel yóokol le cu jíilticuba'ob j lu'umo'.
27Kue' tu beetaj wíinic,
tu beetaj je'el bix leti'e';
j xiib yéetel co'olel,
28ca tu dzaj ti'ob u qui'iqui' t'aan:
Ca ya'abchajac a paalale'ex;
chupe'ex le yóokolcaabo', méektáan te'ex xan,
yanac a páajtalile'ex yóokol le cayo'obo', le ch'íich'o'obo'
bey xan yóokol tuláacal le ba'alche'ob cu jíilticuba'obo'.
29Cu dzo'ocole' tu ya'alaj ti'ob: U'uye'ex, ti' te'ex quin dzáic tuláacal u paakalilo'ob lu'um cu dzáico'ob neek, bey xaan le cu dzáico'ob icho'. Tuláacal lelo' u ti'al a tzéenticaba'ex. 30Ba'ale' ti' u ba'alche'ilo'ob le káaxo', ti' le cu jíilticuba'ob yóokol lu'um bey xan ti' le ch'íich'o'obo', quin dzáic le xíiwo'ob u ti'al u tzéenticuba'ob.
Bey úuchico'. 31Kue' tu yilaj tuláacal ba'ax tu beetajo' sen ma'alob. Bey túun máanic le u wac p'éel kiino'.
Currently Selected:
Génesis 1: MAYABI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992