ማርቈስት ወንጌል 6
6
ፈወነ 6
እየሱስት ናዝሪትቍ እቅድ ለምጠቅ ይጘጘ
(ማቲ. 13፡53-58፤ ሉቃ. 4፡16-30)
1እንዝ ግረ እየሱስ ጝጊስ ጕ ጝኻግር ፊሩ፤ ጝክንደጥድም ጝት ቲክንⶖ። 2ቅዳምሲንቭት ችጛንድም ምኵራቪል ኣቕ ክንስጠ ኪርሙ፤ ወሸቍ ንቕፀቍ እቅድም ዲንቅሽ፤ ጛይም፦ «እኒን እጅርድ እንዛይ ዊቅድዛት ኣዊስ ችጙ? እኒን ጝጭስ ይውሽተው ጥቨቭድስ ወረጘ የጝ? እንዛይ ታምራንድዛትስ ፃቨውድ ኣወሸ የጝ? 3እኒን ቃነ ፃርቨተ ኣቐው ማርያምት ዅር ኣየውቀ? ያይቈቭ፣ የውሳ፣ ይዅዳ፣ ስሙንታዝን ኣየውቀ? ጝፅን እቍንድስ እንል ይናጅቅ ፅበቍድ ኣየቍቋ?» ይ፤ ጝቊዝም ፅጋርⶖ።
4እየሱስም፦ «ነቭይ ኪብራውድ በገዘ ጝኻግርስ፣ ጝዚምዳኒስ፣ ጝበተሰቪስም ጭቝ የጝ» ዩ።#ይዃ. 4፡44። 5ጝጊስም ዊትቍ ፅውዝጅንጢል ጝናንድ እቝር ቓዙጚ ላጥ ታምራን ፃቭጠ ቸሊየውም። 6ኣምናቍ ኣጘጘም ቓል ጊርምሹ፤ ጝዝለም ኪው ጨቨቅ ጅልዋⶖ ክንስጠ ኪርሙ።
እየሱስ ፅጭ ሊጘድ እፃቐጘ
(ማቲ. 10፡5-15፤ ሉቃ. 9፡1-6)
7ፅጭ ሊጘድዛትም ጭጝ ሊጘ ሊጘ ፃቫⶖ እፃቑ፤ ርኵሳን መንፈሳንድዛት ፊስጛንስም ስልጣን ይዉ። 8እንት የውም ኣዙ፦ «ክታጒደነይዝ ግብ ኣቕሽጚ ሊቈ ዊንም ሳንጠ ዊንም ክታከምሸነይል ጊንዝቭ ፃይትርነ።#ሉቃ. 10፡4-11። 9ፃብ ፃብጥን፤ ዊገድ ግን ሊጘትረ ኣልቨ ሲርትርነ። 10ኣውማው ጝንልቅ ጥውርናንድ ኻትመይስ ፍትርኒስቅ ጘጝ ጝኒል ጐይጥን። 11ኣውማው ስፈረይስም እቅ ክታት ለምራቍ ዊንም ወሻቍ ኣጘውዝየ ጘጝ ስፍረይስ ፍርናንድ ጛጭስ ሚዝር ኣቓንስ ማጥን ክታልኵጣኒዙ ኣወረድየንት ጝግል ኣርግፍጥን።»#ኻወ. 13፡51።
12ጛይም ጝጊስ ፍጝ እቅድቅ ንስኻ ጥውጥጘ ማጥን ሲቭክ። 13ንቕፀቍ ጋኒናንም እቂስ ፊስⶖ፤ ንቕፀቍ እቅም ዘይት ቓስጛⶖ ቓዝⶖ።#ያይ. 5፡14።
ጣምቀተ ይዃንስ ክረጘ
(ማቲ. 14፡1-12፤ ሉቃ. 9፡7-9)
14እየሱስት ሽⶖድ ኣርቕሽታⶖ ፊራንስቅ፣ ንጕስ ኺረውድስ እኒንት ወሹ፤ ላው ላው እቅድም፦ «ጣምቀተ ይዃንስ ክርጘይስ ጕኩ፤ ዲንቅሰቍ ታምራን ጝግዝ ፃቭሽትጘውድም እንዝ ማጥን የጝ» ይ።#ማቲ. 16፡14፤ ማር. 8፡28፤ ሉቃ. 9፡19። 15ላጥድም፦ «ይልያስ የጝ» ይⶖ፤ ላጥድ ቈሽ፦ «ኽፅምትቍ ነቭያታኒስ ላዊዝጘ የጝ» ይጛ ዊን።
16ኺረውድስ ግን ዊገድየንት ወሻንድ፦ «እኒን ያን ጝቕልመድ ቀቭሰው ይዃንስ የጝ፤ እንወ! ክርጘይስ ጕኩ» ዩ። 17ኺረውድስ ጝዝን ፊልበውስት እውነ ኺረውድያደት ድዋንስቅ፣ ይዃንስት ጝርማጥን ፃይስ ወኽኒ ጝንል እፁስ ዊኑ።#ሉቃ. 3፡9-20። 18እንም ይዃንስ ኺረውድስት፦ «ክዝንት እውነት ድውተ ወሪትት ኽግድ ፊቅዳውም» ያ ዊናንስቅ የጝ። 19ኺረውድያደም እን ዊገይዝ ቅይምሽር ይዃንስት ቍውስተ በንራ ዊንች፤ ዊገድ ግን ቍውስተ ቸሊረይም። 20ምላሰንድም ይዃንስ ፃድቅ ቅዱስም እጅር ኣቐጘ ኺረውድስ ኣርቓንስቅ ጐውት ሊሚዳ ዊኑ፤ ኺረውድስም ይዃንስ ዊግተውድየንት ወሻንድ ጭቕጘ ኻውክሻ ዊኑ፤ ኣነጚ ዲስተዝ ዊኑ ወሸውድ።
21እንዝ ግረም ኺረውድስ ጝእዅርሸው ግርየድ ኪብርዝጠ፣ ስልጣን ጒጢዝ፣ ጠውር ኣዘቲዝ፣ ላው ላው ኣርቕሽተቍ ገሊለትቍ እቂዝ ድግስ ኣስል ጭጙ፤ እንም ኺረውድያደስ ቀሰው ኣጋል ኣቑ። 22ኣይንድም ኺረውድያደት ቝረ ድግሲል ጥውር ዚቨነውዝ ኺረውድስስመ ድግሲል ዊነቍ ኣብኒዝ ዲስ ሽች፤ ንጕስ ኺረውድስም እፈረየንት፦ «በንረውድቅ ዋቕር ነቅጭር» ዩ። 23ቈሽም፦ «ይምጝግስቲስ ግቨርድ እኳ ዋቕርድሽ ነቀኵን» የው ቃል ጥዉ። 24እፈረየንም ጝርኘትል ፊትር፦ «ወረጘ ጨውጫ?» ይች፤ ጝርኘም፦ «ጣምቀተ ይዃንስት ኣውርድ» ይች። 25እፈረየንም በውዝ ንጕሲል ዋጥርድር፦ «ጣምቀተ ይዃንስት ኣውርድየንት ነን ሽኻንል ፃቭር ነቅ» ይች።
26ንጕስድም እን ዊገይዝ ጭቕጘ ኻዝኑ፤ ጭጘቍ ኣብኒዝ በዊል ጥወው ቃልድየንት ግን ኣፅቭጠ በኒየውም። 27እንዝ ማጥን ላው ዊተድረ በውዝ እፃቕ ይዃንስት ኣውርድ ቀቭ ነሳንስ ኣዙ፤ ዊተድረድም ወኽኒ ጝኒል ፊር ይዃንስት ኣውርድ ቀቩ። 28ሽኻንልም ፃቭ እፈረየንስ ይዉ፤ እፈረየንም ጝርኘስ ፊስር ይውች። 29ይዃንስት ክንደጥድም እኒንት ወሽጘጘ በውዝ ተርጝ እርሸድየንት ፊስጝ ዲቭⶖ።
እየሱስ ኣኰ ሽኽ እቅ ታምርዝ ሚግቨጘ
(ማቲ. 14፡13-21፤ ሉቃ. 9፡10-17፤ ይዃ. 6፡1-14)
30ኻወርየታንድም እየሱስት ጋቢል ኣኽቭሽጝ ፃቭጘውድየንት ክንስጘውድየንትም እጝቅትቅ ጝጭስ ድቍⶖ። 31ንቕፀቍ እቅ ዋጥርጥርጛⶖ ዊንጛንስቅ ዅረ ዀነው ሰት እኳ ችጝየቍም፤ ኣቓንስቅም፦ «ላቝጥን ገለል የው ስፍረል ፊርነነ ጝግል ዊቱ ፈውጥን» ዩ። 32እንዝ ማጥን ጝታለ ገለል የው ስፍረል ታኰዝ ፊርⶖ።
33ኣነጚ ጛይ ፊርጛንድ ንቕፀቍ እቅ ቓልጝ ጛይ ኣጘጘ ኣርቕጛንስቅ ኻትምጢስቅ ፍጝ ጝታሊኲዝ ውጢጛⶖ ቃውስⶖ። 34እየሱስም ታኰይስ ጊማንድ ንቕፀው ኽዝቭ ኣኽቭሽ ቓሉ፤ ምቓ እጀቍ ቢቂዝጘ ኣጘጘ ቓልም ጛጭስ ኻዝኑ፤ ንቕፀቍ ዊቅም ክንስጠ ኪርሙ።#ዘዅ. 27፡17፤ 1ነገ. 22፡17፤ 2ዚመ. 18፡16፤ ኽዝ. 34፡5፤ ማቲ. 9፡36። 35ኣይንድ ግርየድ ኵናⶖ ፊራንስቅ ጝክንደጥድ ጝጐ ኣልትጝ፦ «እኒን ስፍረድ በራኸ የጝ፤ ግርየድም ኵንኩ። 36እንዝ ማጥንም ኽዝቭድ ጣቀቲዝቍ ኪቊል ፊር ጝዅረ ጅቫንስ ማጥን ሲነቭሽ» ይ።
37እየሱስ ግን ዊስ፦ «ክትን ዀነው ይውጥን» ዩ፤ ጛይም፦ «እደስለ ፊርን ዅጛንስ ማጥን ሊጘ ላ ዲናርዝ ሚ ጅቭን ይውነመ?» ይⶖ። 38እየሱስም፦ «ዋቐ ምጭ ፃይርንኵርኑ? እስቲ ፊትርን ቓልጥን» ዩ፤ ጛይም ፊርጝ ቓልጝ፦ «ኣኰ ምጭዝመ ሊጘ ኻዝዝ እኵ» ይⶖ።
39እንዝ ግረም ጝክንደጥድዛት ኽዝቭድየንት ቡድን ቡድንዝ ኣድልጝ ለምለም ፃቀይል ጐይስጛንስ ኣዙ። 40ኽዝቭድም ላ ላዝመ ኣኵርጝን ኣኵርጝንዝ ኣቓ ቡድን ቡድንዝ ጐዩ። 41ጘጝም ኣኰ ምጪዝመ ሊጘ ኻዚዝ ፃይ ሲመይ ትጐ ቓለነውዝ በርኩ፤ ኽዝቪዝም ኣድልጛንስ ሚድየንት ቈርስ ጝክንደጢዝ ይዉ፤ ሊጘ ኻዝድዛትም እጝቅዝቅ ኣድሉ። 42እጝቅቅም ዅጝ እፍትⶖ። 43ጝክንደጥድም ቲርፈውድየንት ፅጭ ሊጘ ሚስቫን ምሉ ጕይ። 44ዀቍ ግልቍድም ኣኰ ሽኽ ዊንⶖ።
እየሱስ ባኽር ዲጊል ልኵዝ ፃጘጘ
(ማቲ. 14፡22-33፤ ይዃ. 6፡15-21)
45በውዝም እየሱስ ኽዝቭድየንት ሲነቭሳⶖ ጝክንደጥድዛት ታኰዝ በተሰይደ ቃውስጝ ከርጛንስ ኣዙ። 46ጝጊስም ጛት በር ፃልይጠ ኣበል ፉ። 47ኵናንድም ታኰየን ባኽር ማኽሊል ዊንች፤ ጘጝም ጝለ ዝቨይል ዊኑ። 48ጝክንደጥድም ጝታበዊል ጐው ፊግየድ ኻይልድ ዊናንስቅ ቀዝፈነውዝ ቺግርሽጝ ጋጥምጛ ቓሉ፤ ኻሪዙ ፃይጨ ሳድ ዲቈት ግረ ባኽርድ ደዳ ጝታጐ ተሩ፤ ጛትም ዲቍ ፊርጠ በን ዊኑ። 49ዊገድ ግን ባኽርድየንት ደዳ ጝታጐ ተራንድ ቓልጝ ምታት ተካንስቅ ጐውትጝ ቓፅⶖ። 50እጝቅም ጝት ቓልጛንድ ዳጝግፅⶖ፤ እየሱስ ግን በውዝ፦ «ኣይዝዀጥን! ያን የጝ ጐውትርነ!» ዩ።
51ጘጝም ታኰይል ፍ ጛጅቅ ላብጠ ኣቑ፤ ፊግየድም ችብሩ፤ ጛይም ጭቕጘ ዲንቅሽⶖ። 52ምላሰንድም ሚዙ ታምርድየንት ኣስትውሊየቍም ዊን፤ ጝታዘንድም ዲንድን ዊኑ።
53ባኽርድም ከርጝ ገንሰሪጥ ችጝ፤ ታኰድየንትም ዝቨይዝጐ ኣልስጝ እፅቍⶖ። 54ጊምጘጘም ኽዝቭድ እየሱስት ኣርቑ። 55ጅልወይልቅ ውጥየነውዝም ፅውዝጅንጥድዛት ኣረትዝ መውርጝ ጘጝ ችጝሸው ስፍረይዝጐቅ ነስ። 56ጘጝ ችጘው ኪዊል ዊንም ኻትመይል ዊንም ገጠሪልቅ ፅውዝጅንድዛት ኣደቫቫይ ጨቨቅ ጐይስጛⶖ ጝኣልቨይዙ ጫፍድ እኳ ዳቕጥጘ ማጥን ጝት ጨውጛⶖ ዊንⶖ፤ ዳቐቍድም እጝቅቅ ቓድጛ ዊን።
Okuqokiwe okwamanje:
ማርቈስት ወንጌል 6: ኽምጣኣኪ
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
