uMataayi 1
1
Uluho ulwa Yeesu
(uLuuka 3:23-38)
1Iga ge mazina aga mu luho ulwa Yeesu Chilisiti,#1:1 UChilisiti: Vhaazya mu Ntantiho izya Mazwi aMajeni. we áfumile mu luho ulwa mwene uDaavhudi#1:1 UDaavhudi: Vhaazya mu Ntantiho izya Mazwi aMajeni. na mu luho ulwa Aabulahamu.#1:1 UAabulahamu: Vhaazya mu Ntantiho izya Mazwi aMajeni.
2UAabulahamu ámupaafile uYisaaka,
uYisaaka ahamupaapa uYaakobu,
woope uYaakobu ahamupaapa uYuuda na vhanine vhaakwe.
3UYuuda ahamupaapa uPeelesi nu Zeela kwa Tamaali.
UPeelesi ahamupaapa uHezelooni,
uHezelooni ahamupaapa uAalamu,
4uAalamu ahamupaapa uAminaadabu,
uAminaadabu ahamupaapa uNaashoni,
uNaashoni ahamupaapa uSalimooni,
5uSalimooni ahamupaapa uBoohasi kwa Laahabu,
uBoohasi ahamupaapa uOobedi kwa Luti,
uOobedi ahamupaapa uYeese,
6woope uYeese ahamupaapa umwene uDaavhudi.
Umwene uDaavhudi ahamupaapa uSolomooni kwa mwantanda we áamile mushi wa Uliya.#1:6 Umushi wa Uliya izina lyakwe wu Batisheeba. Vhaazya 2 uSaamweli 12:24-25.
7USolomooni ahamupaapa uLehobowaamu,
uLehobowaamu ahamupaapa uAabiya,
uAabiya ahamupaapa uAasa,
8uAasa ahamupaapa uYehoshafaati.
UYehoshafaati ahamupaapa uYoolamu,
uYoolamu ahamupaapa uUziya,
9uUziya ahamupaapa uYootamu,
uYootamu ahamupaapa uAahazi,
uAahazi ahamupaapa uHezekiya,
10uHezekiya ahamupaapa uManaase,
uManaase ahamupaapa uAamoni,
woope uAamoni ahamupaapa uYoosiya.
11UYoosiya ahamupaapa uYekoniya na vhanine vhaakwe,
ahavhaliilizyo he avhantu avha mu nsi iya Babeeli
vhávhagomile aVhaisilayeeli nu kuvhatwala mu nsi yaavho.
12Lwe vhaafiha navho ku Babeeli,
uYekoniya ahamupaapa uSheyalitiyeeli,
uSheyalitiyeeli ahamupaapa uZelubabeeli,
13uZelubabeeli ahamupaapa uAbihuudi,
uAbihuudi ahamupaapa uEliyaakimu,
uEliyaakimu ahamupaapa uAzooli.
14Woope uAzooli ahamupaapa uSaadoki,
uSaadoki ahamupaapa uHaakimu,
uHaakimu ahamupaapa uEliyuudi,
15uEliyuudi ahamupaapa uEliyezaali,
uEliyezaali ahamupaapa uMaatani,
woope uMaatani ahamupaapa uYaakobu.
16UYaakobu ahamupaapa uYoosefu, umulume wa Maliiya.
UMaliiya we ámupaafile uYeesu we wu Chilisiti.
17Pe ishi, kufuma kwa Aabulahamu kufishila kwa mwene uDaavhudi kwáli impaapo 14. Havhili, kufuma kwa mwene uDaavhudi kufishila ahavhaliilizyo he avhantu avha mu nsi iya Babeeli vhávhagomile aVhaisilayeeli nu kuvhasaamwa mu nsi yaavho, kwáli impaapo izyamwavho 14. Havhili, kufuma ahavhaliilizyo he vhávhagomile nu kuvhasaamwa kufishila kupaapwa ukwa Chilisiti, kwáli impaapo izyamwavho 14.
Kupaapwa ukwa Yeesu Chilisiti
(uLuuka 2:1-7)
18Kupaapwa ukwa Yeesu Chilisiti kwáli ishi. UMaliiya unyina waakwe ázinjiliilwe nu Yoosefu. Ileelo lwe vhashiili kwimalana, uMaliiya álolesile ali pa vhumwamu. Uvhumwamu uvhwo ávhwazile kwi idala ilya Mupepo uMufinjile.#1:18 UMupepo uMufinjile: Vhaazya mu Ntantiho izya Mazwi aMajeni. 19Ileelo, mwe pe uYoosefu, umulume waakwe áamile muntu mugolosu, atahanza kumupezya insoni uMaliiya. Pe ahasiivha kuuti amuleshe ku vhuzigizigi.#1:19 Kulandatana na maata aga Vhayuuda, inga umwanaavuli nu mulindu vhazinjilana, vhahavhazilwaga fwe vhantu vhe vhimaliine. Ileelo kuhavhanga ahavhaliilizyo aha mwaha wooka aha kugulililana, lwe vhashiili kwimalana. Ahavhaliilizyo honti iho vhatahitishilwaga kutendama pooka fwe vhantu vhe vhimaliine. Imbaatiho izya kulehaana vhe vhazinjiliine, zyáli inza izya kulehaana vhe vhimaliine.
20Lwe asiivha izyo, uhavhizya uwa MWENE uMulungu ahamuloleshela mu njozi. Uhavhizya uyo ahamuvhuuzya ahati, “We Yoosefu, mwana wa Daavhudi, utahoogope kumwimala uMaliiya, mwe pe uvhumwamu vhwe ali navhwo avhwazile kwi idala ilya Mupepo uMufinjile. 21Kwe apaape umwana umwanaavuli, niiwe kwe umwite izina ilya Yeesu,#1:21 UYeesu: Izina ilya Yeesu kwe kuuti, UMwene akupoha, poosye kuuti, UMulungu akupoha. mwe pe umwana uyo alivhapoha avhantu vhaakwe mu vhutalamalandu vhwavho.”
22Zyonti izyo zyávhombesile vhwevhulo, inga izwi liila lye uMWENE uMulungu áyanzile kwi idala ilya mukuvhwi uYisaayi lilunjishe. Átili, 23“Yeenya! Umulindu we atamumanyile umwanaavuli, aliivha pa vhumwamu. Havhili alipaapa umwana umwanaavuli! Pe umwana uyo vhalimwita izina ilya Maanweli.”#1:23 uYisaayi 7:14 Izina ilyo kwe kuuti, “UMulungu ali pooka niiswe.”
24Lwe uYoosefu adaamula mu tulo, ahavhomba inza vwe uhavhizya uwa MWENE ámuvhuziizye, ahamunyatula uMaliiya. 25Ileelo vhatámanyiine fwe vhantu vhe vhimaliine kufishila ahavhaliilizyo he uMaliiya ahapaapa umwana uyo. Pe uYoosefu ahamwita izina ilya Yeesu.
Okuqokiwe okwamanje:
uMataayi 1: nih
Qhakambisa
Dlulisela
Kopisha
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fzu.png&w=128&q=75)
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2021 Wycliffe Bible Translators, Inc.