Matiye 6
6
Giraaniti Iisa ma gaari ku biraawi
1Gaa Iisa beneyyiɗe payya gaa: «Warroŋ maaƴi! Aɗoŋ leewa ɗa gaari ku ibaadati ku maa gu giimi passalɗitoŋ. Kuu leewa goŋŋa ku akka gassa ɗa haggane saripti Tattoŋ ma aaye samaani.
2«Wikinne maa kii beraa maatiki oko giimi ku saamo, ki aɗikiti hawwiya ɗa birawcum taata aleŋ giimi ma beneyya ma beneeco ka, ka galbigeeco pa kayti. Guta kotti leewa goŋŋa aɗicco gerraco Yawudigeyyo ku giraaniti o bottollo, ku maa gu giimi logiɗiy. Naa pa beneyyatoŋca seene, guta kooko gassica appe hagganco. 3A kii soopa, wikinne maa kii beraa maatiki oko giimi ku saamo, ga piccum ka n̰ugila aɗee lee ɗa kulla kabarre oko maa ga piccum ka tiyaawa beraa. 4Maatikicum maa ki beraa ki birya kiilenta, gaa Mella Taccum ma ella maa ki leewa ma kiilo asiyyamca yooka haggancum.»
Giraaniti Iisa ma gaari ku inniti Mellayi
(Elloŋ Lik 11.2-4)
5Gaa Iisa gaayiɗe payya gaa: «Wikinne maa kuu enaa Mella ku aɗoŋ leewa ɗa aleŋ giimi ma beneyya ma beneeco ka, ka galbigeeco pa kayti. Guta ƴekka gu enewɗo Mella ma warrico aɗicco gerraco Yawudigeyyo ku giraaniti o saripco bottolli ku taatta ku maa gu giimi paracco elelɗiy. Na beneyyatoŋca seene, guta kotti lekkica paaɗe hagganco. 6A kiita soopa, wikinne maa kii aŋka inniti Mellayi, ki un̰n̰u gircum ɗakko, kii agisiyya. Kii leeɗeeca innicum oko Mella Taccum ma aaye were ka kiilenta. Gaa gata pa ma ellaa maa ki leewa aatti were ka kiilenta asiyyamca yooka haggancum. 7Wikinne maa kuu enaa Mella, ku aɗoŋ yaya ɗa beneyyiŋgee maani aleŋ giimi ma ay Yawudigee ɗa, asan gu guta leewe goo walaŋ ga ma beneyyiŋgeeco ku maani kotti ga Mella geeway. 8Aɗoŋgu dalakka ɗa, asan ga Mella Tattoŋ ibinya appe latta ma koyowwitoŋ omma min maa ku alɗiya enaa ɗa missa. 9Kuŋ pa deeɗo enewwo Mella aleŋ teete kuu:
“Tattini ma aaye samaani,
gu giimi paracco ibinu kadar ga kii kaycum ka ay Mella.
10Gi mulunnicum asaani,
o gi aŋkicum dee kiɗaati aleŋ samaani.
11Berewwaniica tiyawtini kulla meene.
12Saamiyaniigu gaartini ku miɗɗa maa ni leyyam
aleŋ nii ma saamayyayo oko giimi ma leewini miɗɗa.
13Aɗaani duwa ɗa ni galɗo sekelkilti,
innasoo ki pirni min miɗɗati.
Ay oko kii gi mulunne o gudirane o darjane diiman diiman. Amin.”
14«A kuu saamayyayo oko giimi ma negekkatoŋ, ga Tattoŋ ma aaye samaani akkitoŋ saamiya kulla oko kuŋ. 15A kuu saamayyayo ɗa soopa oko giimi ma negekkatoŋ, ga Mella Tattoŋ akkitoŋgu saamiya ɗa ta wil nigaakitoŋ.»
Giraaniti Iisa ma gaari ku samkiyti
16Gaa Iisa beneyɗiyo missa gaa: «Wikinne maa kuu samkayya, ku aɗoŋ zorontiya ɗa aleŋ giimi ma beneyya ma beneeco ka, ka galbigeeco pa kayti. Guta kotti magakkay wigisaŋgeeco ku maa gu gaariɗo kadar gu samkayye. Na beneyyatoŋca seene, guta kotti gassica paaɗe hagganco. 17A kii soopa, wikinne maa kii samkayya, ki apiliya wigisancum, kii pooriɗo. 18Aŋka ɗa gu giimi ibinɗum kadar ki samkayye, illa ay Mella Taccum ma aaye aatti were ka kiilenta ma leewa kabarre kadar ki samkayye. Gaa Mella Taccum ma ellaa maa ki leewa ma kiilo asiyyamca yooka haggancum.»
Ayaawi samaani
(Elloŋ Lik 12.33-34, 11.34-36, 16.13)
19Gaa Iisa beneyyiɗe payya gaa: «Aɗoŋ timma ɗa ayaawi iŋee dunuuniti, were maa ga dettuwe o mecemece negeɗɗiya o marŋi nomokkay burgaggi gu masawɗo. 20Timmoŋ soo ayaawi samaani, gonek pa bala ga dettuwe o bala ga mecemece negekkaa o bala gu marŋi nomokkay beneeco burgaggo gu masawɗiya. 21A gata pa were maa ga ayaawuwcum alɗo, gi galbancum kulla ki dowwica pe iŋaakite aɗe.
22«Iɗiicam ay aleŋ lampa ka ziicum. A guu iɗiicam ay aapiya, ga ziicum paratti pacenta. 23A guu iɗiicam ay aapiya ɗa soopa, ga ziicum paratti akka nunta namtuwwi. A gii bahaarancum appe deero namtuwe, ga namtuwe kaaka pa akka dee pe ini me?
24«Lekka ɗa gimu ma gederra ga lubbiyyo oko taattuwee seera. Gata ɗakatta kaƴi, ka kaƴi pa ga ƴekekka, e baŋ pa ga bakamma ƴiila ka kaƴi, ka kaƴi pa ga capakkee. Ku gederra ɗa ku lubbiɗo kaytiŋ ka oko Mellayi o oko guruzzi.»
Moyoowicam paracco ki duweegu oko Mellayi
(Elloŋ Lik 12.22-31)
25Gaa Iisa gaayiɗe payya gaa: «Ay kaaka appe na beneyɗitoŋ naa ku aɗoŋ karriya ɗa oko tiyaw ma nowottikitoŋ e baŋ pa oko kaɗiŋgee ku issiti ku coogiti zeneetoŋ. Hayaatane ƴiilaca ɗa aɗe tiyaw e, o zii ƴiilay ɗa aɗe kaɗiŋgee ku issiti e? 26Elloŋgu ƴa ɗiiɗi, bala gu lowokka o bala gu seɗekka o bala gu dommoyya korƴo urdiŋgeyyo. Gaa ma kaaka aɗe ga Mella Tattoŋ ma aaye samaani rabbayɗiy. A kuŋ pa ƴiilay ɗa pe arro guta e? 27Lekka aɗɗe kaƴi min aattoŋ ma gederra ma karriyti taata ga gaayiɗiy meenitee ma wikinne paalta ka kulla? 28Ayme ku karrayɗo ma gaari ku kaɗiŋgeyyo? Elloŋga ƴa buuyumtí tappa ta kayni maɗaa gaa me, bala ga lobokka o bala ga ɗosaa kaɗiŋgee. 29Na beneyyatoŋ ƴa, ya sultan Suleman kulla ma ayaawuwti paratti, ga isse ɗa kaɗiŋgee ma samaane aleŋ kaƴi min oko buuyumtí tappa taata. 30A gii tappa ta kayni ga Mella issiti buuyumu samaane goŋŋa, oko gita ma aaye meente ka, sokkoŋ pa gi aƴaa, guu sooƴicca okkati gi aggiɗo, ga oko kuŋ pa, ga Mella beraatoŋ ɗa isso ta kaɗiŋgee ma samaane ƴiila arro min oko buuyumtí tappati e? Kuŋ gi amannitoŋ paalta ka missa. 31Aɗoŋ karriya ɗa kuu: Ke teewa ini me, o ke ar̰aa ini me, o ke esekka ini me? 32Giimi ma aabadde ɗa Mella ay guta ma moyaa diiman diiman oko lawwi kooko paracco. A gata pa Tattoŋ ma aaye samaani pa lekkiyoo aɗe kabarre oko lawwi kooko paracco ma koyowwitoŋ. 33Diyyoŋ ƴa omma ku un̰n̰iɗo mulunniti Mellayi o nunto ta ɗayaŋ unti. Guu lawwi kooko pa kulla ga Mella asittoŋgu gaaya ka pe. 34Aɗoŋ karriya ɗa oko ka sokkoŋ. Ka sokkoŋ kaaka gi meenti saa asawki. Diigane ta kulla meene arakke paaɗe meenti.»
Okuqokiwe okwamanje:
Matiye 6: mmy
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2019, Wycliffe Bible Translators, Inc. All rights reserved.
