Matiye 4
4
Seetanne cokokkaa Iisa
(Elloŋ Mark 1.12-13, Lik 4.1-13)
1Maa ga Yaaya pa batisiyyiya Iisa ammo, gii Ruuhanti Mellayi kaatikkiki Iisa kayni ku maa ga Seetanne deeɗiya sekelkila. 2Gaa nuntiɗe orooruwee pooɗi meene paato o aandoŋ bala tiyaw. Gii maya deeɗiya.
3Gaa Seetanne gata kee ma ay milti sekelkilti saapiyyee katta. Gaa beneyyiyyee gaa: «Gaa ay ma seene aɗe goŋŋakite ki ay Runti Mellayi, ki beneyyayo oko dambee ku rootta kooko gu deeɗo mappa.» 4Gaa Iisa tiiliyyee gaa: «Kitamniti Mellayi beneyye gee: “Gimu nowotta ɗa ma mappa ka, innasoopa ga nowotta ma beneyyi paratti maa ga Mella beneyye#4.4 Elloŋ Ɗillico Hukumnigeyyo 8.3..”»
5Gaa Seetanne icciyya ma gata, gaa kaatikkiki geegarti Mellayi ma ay Zerizalem. Gaa deeɗiya wirra curumti girti Mellayi. 6Gaa beneyyiyyee gaa: «Kii ay Runti Mellayi aɗe goŋŋakite, ki loogu kiɗaati, asan gi Kitamniti Mellayi beneyye gee ga Mella beneyyayo oko malaykatnigeetee gu acipiɗum picco, ku maa ga asincum alɗo ɓaaca ɗa dambi#4.6 Elloŋ Soom 91.11-12..» 7Gaa Iisa tiiliyyee gaa: «Kitamniti Mellayi beneyye kulla gee: “Ki cokokka ɗa Mella Milcum#4.7 Elloŋ Ɗillico Hukumnigeyyo 6.16..”»
8Gaa Seetanne kaatikkiki payya Iisa dambu ka siƴƴa ta kaw. Iŋaa pa ga gaariyeegu mulunnigee paracco ku dunuuniti ma ayaawuwco. 9Gaa beneyyiyyee gaa: «Kii darse untu ki aabidinno, na beramgu kooko paracco.» 10Gaa Iisa pa tiiliyyee gaa: «Addo gonek Seetanne, asan gi Kitamniti Mellayi beneyye gee: “Ki aabidu Mella Milcum o ki lobokkee oko gata ka#4.10 Elloŋ Ɗillico Hukumnigeyyo 6.13..”» 11Gaa Seetanne cappiyyee. Guu malaykatnigee asiɗe saripti Iisa gu asiyya lee samaane.
Iisa delaa lubbiti kiɗa ta Galilee
(Elloŋ Mark 1.14-15, Lik 4.14-15)
12Yaaya ma batasayya giimi pa, gu baamiya daŋayi. Maa ga Iisa giyyiɗe kadar gu baamiya, gaa tirriyɗe kiɗa ta Galilee. 13Geegar ka Nazaret, soopa ga cappiyee gaa deeɗe nunta geegar ka Kaparnawom ma aaye biití baharre ta yaata ta Galilee, kiɗaaco giimi ku Zabilon o ku Neptali. 14Keeke pa deero, ku maa ga beneyti Mellayi maa ga nabiinice Esaya beneyye asiɗo butulti. Gata pa beneyye gaa:
15«Giyyoŋ, kuŋ giimi ku kiɗa ta Zabilon
o ta Neptali ma aaye sariptí baharre ta Galilee.
Kuŋ aaye nussanti katik oko ƴiiro ta Yurden,
kiɗa ta Galilee maa gu giimi ma ay Yawudigee ɗa nowottiti.
16Kuŋ ma nowotte aatti namtuwwi elle bahaarane yaata.
Oko kuŋ ma nowotte keleemo ta muuti,
ga Mella cimmitoŋca bahaaranti#4.16 Elloŋ Esaya 8.23–9.1..»
17Gaa min oko wikinne kaaka saa ga Iisa diiliɗe ga tasawɗo beneyti Mellayi gaa: «Meeloŋgu gaartoŋ ku miɗɗa asan gi mulunniti Mellayi aseero katta.»
Iisa kolaa ɗebeekee ku buuso pooɗi
(Elloŋ Mark 1.16-20, Lik 5.1-11)
18Meene kaƴi, maa ga Iisa tan̰awɗo biití baharre ta yaata tee ta Galilee, gaa elliɗe seneeta seera ma ay ɗebeekee ku buuso, guu dawakkaca sippaco baharriti. Guta pa ay ini Simo maa gu kolaa goo Piyer ma sinti kee Andire. 19Gaa Iisa beneyyiyyoo gaa: «Jobbino naa leeɗitoŋ ku deeɗo ɗebeekee ku giimo.» 20Gaa koɗokka saa gu uttiyyoo oko sippanigeeco, guu jobbiyya. 21Maa ga ƴiiliɗe omma, gaa elliɗe payya seneeta daare seera, Zak runti Zebedee ma sinti kee Yaaya. Guta pa nowotte markabaco ma tacco kee Zebedee gu panaɗɗiy sippanigeeco. Gaa Iisa kolliɗiy. 22Gaa koɗok gu uttitti oko markabati o oko tacco. Guu jobbiyya Iisa.
Iisa garkayyay o ga rayyadday giimi
(Elloŋ Mark 1.39, Lik 6.17-19)
23Gaa Iisa tan̰awɗo oko wereeriyee paracco ku kiɗa ta Galilee. Gaa garawɗiyo gaartee Mellayi oko giimo aɗicco gerraco Yawudigeyyo ku giraaniti, o ga tasaaca kabarre ta daana ta mulunniti Mellayi, o ga rayyadday paraayi paracco pay pay ku giimo o madurgee. 24Guu giimi ku kiɗa ta Sirii parattí giyyikki. Ay kaaka appe gu itiriyyeegu giimi paracco ma parayya paraayi pay pay o ma deegeyye diigaŋgee pay pay: ma awaaradgee o ma matakka pumpul o ma roŋgoyye, gaa Iisa rayyaɗɗiy. 25Guu giimi maani maani joboɗɗiya. Guta pa asaa min kiɗa ta Galilee, o min kiɗa ta Gawaagargee ku Orro, o min Zerizalem, o min kiɗa ta Yudee, o min kiɗa ma aaye ta nussanti katik oko ƴiiro ta Yurden ma sorotta diiman.
Okuqokiwe okwamanje:
Matiye 4: mmy
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2019, Wycliffe Bible Translators, Inc. All rights reserved.
