LUKA 17
17
Pya kudawa
(Mt. 18.6-7, 21-22; Mk. 9.42)
1Yesu adapanga anyakufunzache mbati, “Pinthu pyakudawisa anthu hapinakhonda kudza tayu, pinati pidze, mbwenye dzedze kuna munthu anadza na pyakudawisa anthuyo. 2Mbapidakhala pyadidi kuti munthu weneyo amangirirwe libwe ikulu m'khosi mwache mbaponywa m'nyanza, kusiyana nakuti adawise mbodzi wa anawa. 3Natenepo khalani m'maso na pinachita imwe!
“Mbaleako angadawa, msumulule, iye angatchunyuka, mlekerere.#Mt. 18.15. 4Ngakhala pansiku ibodzi iye anakudawira kanomwe, pontho ndzidzi onsene unakudawira iye, ambalonga kuna iwe kuti, ‘Ndatchunyuka,’ mlekerere.”
Pya chikhulupiro
5Anyakutumwa adapanga Mbuya mbati, “Kulisani chikhulupiro chathu!”
6Mbuya adatawira mbati, “Mbamudakhala na chikhulupiro podi kwene chakuchepa ninga mbewu ya chitowe, mbamudapanga muti wanyongolowu kuti, ‘Dulika mbukabzale m'nyanza!’ Iwo mbudakuveranidi!
Pya basa
7“Tisangize ngakhala unango wa imwe na nyabasache wakulima kumunda penu wakudyesa mabira, angabwera kubasako, ayi ambampanga kuti, ‘Chimbiza dzakhale pansi kuti udye’? 8Nkhabe, hangachite tenepo tayu, mbwenye ambampanga mbati, ‘Ndisasanyire kudya, pontho sasanyika kundifiliviri pandzidzi unadya na kumwa ine. Ndingamala unakwanisambo kudya.’ 9Ayi anapereka takhuta kuna nyabasayo thangwi aphata pidapangwa iye? 10Natenepo na imwe enembo, mungaphata pyonsene pidapangwa imwe, mulonge kuti, ‘Ndife anyabasa ene pyathu; taphata kwene pidathema ife kuphata.’ ”
Yesu awangisa anyamatanya khumi
11Paulendo wa Yesu wakwenda ku Yerusalemu, adafamba na m'madire a Samaria na Galilea. 12Pikhapita iye m'mudzi unango, adagumanikana na anyamatanya khumi. Iwo adaimira kutali 13mbachemera mwakugaluza fala mbati, “Yesu, Mbuya, tiverenimbo nsisi!”
14Pidaaona Yesu, adaapanga mbati, “Ndokoni kuna anyansembe akakuoneni.”
Iwo mbali kwenda, adachena.#17.14 adachena: (Yang'anani 5.12).#Lev. 14.1-32. 15Pidaona mbodzi wa iwo kuti awanga, adabwerera mbakuza Mulungu mwakugaluza fala. 16Iye adapiponya pamanyalo a Yesu mbapereka takhuta kuna iye. Munthu weneyu akhali Msamaria.
17Yesu adalonga mbati, “Anthu akucheneswa akhalipo khumi; anango afemba ale ali kupi? 18Thangwi yache njanji abwerera dzapereka takhuta kuna Mulungu ndi mlendo eneyu basi?” 19Tenepo Yesu adalonga kuna iye mbati, “Lamuka uende. Chikhulupiro chako chakuwangisa.”
Pya mule munafuna dzakhazikisira Mulungu Ufumu wache
(Mt. 24.23-28, 37-41)
20Afarisi anango adavunza Yesu mbati, “Mulungu anakhazikisa lini Ufumu wache padziko yapansi?” Yesu adaatawira mbati, “Mulungu hanakhazikisa Ufumu wache mwakuoneka na maso tayu. 21Nkhabe mbodzi analonga kuti, ‘Ngayang'anani, Ufumu wa Mulungu uli pano,’ penu, ‘Uwo uli ukowo!’ Thangwi Ufumu wa Mulungu uli muna imwe.”#17.21 muna imwe: penu uli pakati panu; penu kabodzi kene unaoneka pakati panu.
22Tenepo Yesu adalonga kuna anyakufunzache mbati, “Ndzidzi unafika wakuti munafuna kuona ibodzi mwa nsiku ya kudza kwa Mwana Munthu, mbwenye nee munaiona tayu. 23Panakhala anthu ale analonga kuna imwe kuti, ‘Ali pano!’ penu, ‘Ali uko!’ Lekani dzaathamangira. 24Thangwi Mwana Munthu angabwera pansiku yeneyo anakhala ninga ching'ani-ng'ani chile chimbang'anima na kuonesa cheza kubulukira khundu kufikirana khundu inango ya thambo. 25Mbwenye chakutoma athema kusanyika pizinji mbakhondwa na mfendu uno. 26Mwana Munthu mbadzati kudza nsiku zinakhala ninga mudakhalira ipyo nsiku za Nowa.#Kut. 6.5-8. 27Anthu akhadya, kumwa, na kusembana kufikirana nsiku idapita Nowa m'chimwadiya. Tenepo, madzi adadzala, anthu onsenewo adavungika.#Kut. 7.6-24. 28Pikhali chibodzi-bodzi nsiku za Loti. Anthu akhadya na kumwa, kugula na kugulisa, kubzala na kumanga.#Kut. 18.20—19.25. 29Pansiku idabuluka Loti kumzinda wa Sodomu, Mulungu adagwisa moto na miyala yakugaka ya sulufule kubulukira kudzulu mbaavunga onsene ale. 30Pinakhala tenepo pansiku yakuoneka kwa Mwana Munthu.
31“Pansiku yeneyo mamuna ule ali pansoyi mbaleke kutchitha mbakapita m'nyumba mwache kakwata pinthu pyache tayu. Chibodzi-bodzi kuna munthu wakukhala m'munda mwache, aleke bwerera kumusa kwache tayu.#Mt. 24.17, 18; Mk. 13.15, 16. 32Kumbukani pya mkazi wa Loti!#Kut. 19.26. 33Munthu wakufuna kupulumusa moyo wache anautaya; mbwenye nyakuutayayo anaupulumusa.#Mt. 10.39; 16.25; Mk. 8.35; Lk. 9.24; Yoh. 12.25. 34Ndikukupangani kuti mosiku wenewo panakhala anthu awiri kugona patalimba ibodzi: mbodzi anakwatwa, unangoyo anasiyiwa. 35Panakhala akazi awiri kupeya mapira palibwe pabodzi: mbodzi anakwatwa, unangoyo anasiyiwa.”#17.35 Panakhala…anasiyiwa: Pyakulembwa pinango pyakale pyathimiza vesi 36: “Panakhala anthu awiri kuphata basa m'munda: mbodzi anakwatwa, unangoyo anasiyiwa.”
37Anyakufunzache adamvunza mbati, “Mbuya, penepi pinachitikira kupi?”
Yesu adalonga mbati, “Konsene kuna chinthu chakufa, malezi anagumanyikana konthoko.”
Okuqokiwe okwamanje:
LUKA 17: SenaMw
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Bible Society of Malawi
