KEJADIAN 3
3
Afuni a'nogo nen Allah ane sagalogo herakfisaluk weak hilingitukwa wene
1At nineisena Allah nen, yi mene ti mene enggi lek mene inom, werek mene inom elalhikhe mene andi mondogat he, we inobabut endebat lioksek meneat he, at kisu andi nek he, obabut mondok weak mene welagaikhe. Obabut a'nogo lagokse'ma re, he andi mel yagatikhe: ”He yi, Allah nen he, hit yabumo e enggen awi yagokwe yoma mondogat enggen ninggi logou fuk, iluk, eberogoat yagahisikhe a?” iluk heinok wokhasikhe.#Why. 12:9, 20:2 2A'nogo wokhasikhemo, at he a'nogo nen he, ”Yabumo e enggen awi yagokwe yoma ero lombok enggen nit higit ninggi logogun enego. 3A'nogo meneat he, Allah nen he, e enggen awi tulem yago ari nek he, hit nogoin mondok lego, nen hinenggi fakhogoin mondok legaro, iluk yaganisikhe. Niren a'nogo hilingisugun halok, nit ninebe wa'lasugun o, yaganisikhe,” iluk yagatikhe.
4A'nogo yagatikhemo, at kisu a'nogo nen he, mel yagatikhe: ”A'nogo lego. Hit nogoin halok he, hinebe hobuk wa'lasugun lek. 5Allah nen a'nogo yagahisikhe andi re, hit e ari enggen palogo nunggunem he, hinobabut hebelasimbik, hinendawinggen kagalek mene hilinglasugun, andi elu logolik yagahisikhe. Hit e enggen ari nunggunem he, hinebe Allah higirat hilinglasimbik wene fano wene weak wene hinelu mondok asugun o,” iluk yagatikhe.
6A'nogo yagatikhemo, at he a'nogo nen e a'nogo eilenggen kwelakhasikhe re, fano mondok were'ma hasikhe. A'nogo hasikhesik, endawimo nen he, ”E ari enggen inendawinggen palu hak werek ari re, afuni inobabut hebelinabu hak higi,” iluk anggasikhesik, e enggen a'nogo palhikhesik he, nasikhesik, fena agun wogetikhemo nasikheat. 7A'nogo nunggu kwelek aremnogoat, inobabut hebelagaikhesik he, ”Nit ninebe ninalfulukwa welago higi,” iluk futfesukwa. A'nogo futfesukwasik he, e ara engga mene lisuba selebenhogo inagap labetukwa.
8A'nogo hilingitukwasik were'ma nen hu'mokwe re inesanggo holhasukwa re, Tuhan Allah e enggen yabumo a'nogo nugunem abolok holhukwasik he, ”Eilenggen nisanogo,” iluk it emberegat e omanogo anggele'ma hina'lagaukwa. 9A'nogo hina'lagaukwa meneat he, at nineisena Tuhan Allah nen ap a'nogo ane fakhikhi logolik he, mel isikhe: ”Hat hebe koma welagen,” iluk ane fakhasikhe.
10Ane a'nogo fakhasikhemo, at ap a'nogo nen he, ”Hat hebe e enggen awi yagokwe nikhi lagen a'naga habolok nesanggo holhirik he, an nalfulukwa welagi yi nenggali nen yoma hinago welagi o,” iluk yagatikhe. 11A'nogo yagatikhemo at Allah nen he, ”Hat halfulukwa welagen, iluk sa nen yagahetemo? An nen, e yi mene enggen nagup iluk yagahisigi a'nogo nenggepma higi,” iluk yagatikhe. 12A'nogo yagatikhemo, at ap a'nogo nen he, ”He Haren an nemberek logouwageluk wo'neten mene a'nogo nen enggen a'nogo palogo wo'netemo ninggi o,” iluk yagatikhe.
13A'nogo yagatikhemo, at nineisena Tuhan Allah nen he, at he a'nogo mel yagatikhe: ”Nenahalok a'nogo hilingiten?” iluk yagatikhemo, aren he, ”At kisu nen eranen lalnafemo enggen andi palogo ninggi o,” iluk yagatikhe.#2Kor. 11:3; 1Tim. 2:14
Allah nen weak onggo inoba fesikhe wene
14A'nogo arat yagaisasikhesigen at kisu a'nogo yagati logolik he, mel yagatikhe: ”Hat a'nogo hilingiten andi nen, wam, sue, paik, yi mene ti mene enggi lek mene inom werek mene inom mondogat homan inoba lek werek kwelek, harenek he, wene hoba fembik yi'nogo hilinglasigin iluk homan hobagakhi lagi o. Huli yogondagen pikhit hebe wa'lasigin huli, kwe halabut oba pololanghogo nikhi logolik, hamburu re, kweang abu'ne mene ninggi logogin o. 15Hat inom, he yi inom, hemberek mondok weak logolik, aren tagongge mene inom, haren tagongge mene inom, hinom weim palek mondok logogun o. A'nogo logolik aren tagongge mene nen he, hat hungguloak sagalogo hoatunem, hat haigen it ineisok onggut libilinafi logogin o,” iluk yagatikhe.#Why. 12:17
16A'nogo yagatikhesik, at he a'nogo mel yagatikhe: ”Omalik ha'ma asimbik mondok enggin-fengginhogo hilingiti logombik, omalik ebe takhikhi logolik he, heinet mondok hokho warogo nen takhikhi logoin o. A'nogo meneat he, hagun awe a'ma logolik, ebe hemberek nogo u hak hilinglaga logogin o,” iluk yagatikhe.
17A'nogo yagatikhesik, Tuhan nen ap a'nogo mel yagatikhe: ”Hat he, hagwe ane holhendik he, E enggen na fuk, iluk wene palhi mene a'nogo nenggen andi. A'nogo hilingiten andi nen, kweang yi arat homan tekhogo figi o. Yabu set kwil-kwalhogo kweangma mene waganogo nen ninggi logogin.#Ibr. 6:8 18Nen, hat faget, e yi agayo ti agayo alok mene inom, yi engga ti engga alok mene inom, kweangma nen fulelhetunem, enggen mene hamburu higit ninggi logoginat. 19Nen, hat hebe kweang mene fanorogo hilingisogo elalhafi andi nen, kweangma yi mene ti mene awi fulelhi logouwageluk yabu likhak yugulogo, set kwil-kwalhogo hilingiti logombik, hebe wa'lasimbik hambotkwe kweang asigin o,” iluk yagatikhe.
20A'nogo yagatikhemo, he a'nogo afuni mondogat inagaisaat hilinglasigin andi nen, Adam en agwe enu, ”Hawa,” salhikhe. 21A'nogo salhikhemo, At nineisena Tuhan Allah nen he, wam agap mene su igisogo Adam agwe emberek inagap labetfisasikhe.
Allah nen, Adam Hawa emberek o Eden yabumo nen mugisogo wulakfisasikhe wene
22At nineisena Tuhan Allah nen a'nogo labetfisasikhesik, mel isikhe: ”Yogondak afuni a'nogo nit ninebe higit agaikhasik, wene weak wene fano wene inelu agaikha. A'nogo agaikhasik, e enggen nunggunem inebe inelugerinaferek mene yi palogo ninggi logolik, inebe ineluk mondok logogun andi nabit,” iluk isikhe.#Why. 22:14 23A'nogo isikhesik, afuni a'nogo e enggen awi yagoma nen mugisogo wulakfisasikhesik he, mel yagaisasikhe, ”Hit hinebe kweang mene hilingi'mo re, hinonggweregen kweang mene sige palogo yabu helikhi logoino o,” iluk mugisogo wulakfisasikhe. 24A'nogo wulakfisasikhesik, yabu enggen awi yagoma a'nogo kwe kwagarek oba mo lagai wagarek higit afuni e enggen nunggunem inebe inelugerinaferek mene a'nogo eroma kwi lanogo iluk malaikat karok endu mene enggat yigit figik-tigit figik, inebe andoma fisasikhemo kagalek welagaikharek. A'nogo welagaikharek andi nen, afuni ekhe nen kuluk, e andi eroma horokhogo logogun lego.
Okuqokiwe okwamanje:
KEJADIAN 3: inohap
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume