Matta 2
2
Njir Zəndə Sasəlga
1Nja yah Yesu avu Baitalami atə hə'i Yahudiya, aku bəji nda təl Hiridus ku dzəga təlkur ti. Kəl ngə alenya njir zəndəbiya sasəlga tə hya'ati təwa zədər pəchi tə dzəva Urshalima, 2ngə nda jawa, “Aman ngə zər ngə nja yah təl njir Yahuda nga? Aka a la'atə ea sasəlga nyi təwa zədər pəchi, na cha nə ea shili ka ea hətə nyi səli.”
3Ɓwanya nga tə wendə təl Hiridus kəɓanghəu, ana dəhə njir Urshalima. 4Ngə cha tsəmtə dəhə wawa'ar fərist ka maləm gadlagadla, ga jau nda, aman ngə njo yah Kəristi Ndər Dləuya?
5Nda nar nyi, “Avu Baitalami atə hə'i Yahudiya, əngə sənda ndər mətakər tə tsəfa.
6‘Nakə Baitalami atə hə'i
Yahuda,
a da kə mələm təutətəutə
tə hə'i Yahudiya wa.
Aka aku ka njo yah təl dəgal
nda kwa nəu na
na'ana nji, Isra'ila.’ ”
7Kəl ngə Hiridus tə nganda njir zəndə sasəlga inda, aka ga cha zəndə təkəɗər bəji nda sasəlga nda tə biya ti. 8Ngə cha sə nda gwa Baitalami abəra, “Ma'i ma hya ki gwa'a zər ngə na sənam, ma hya uya nyi hya shili nar ɗa aka ma'a naya ya yi hətə nyi səli.”
9Manda nda ngatə ɓwanya təl, ngə nda dləutsə laku. Kəl janə sasəlga nda nda la'a təwa zədər pəchi nda kwa təra manə nda, na nda tsəu kwa nəu hi nyi kəl sakanda cha yi ta'i gya kəra vi nda zər nda kwa. 10Nda nda la'a sasəlga nda, kəl nda mər hirgyaɗi gagaɗa. 11Ngə nda gwa ku ki nda, ngə nda la'a zər nda ana ama nyi Maryamu, ngə nda uzhi ga hətə nyi səli. Ngə nda pəliya mbəl kənda ga fa'abiya ga'a nə bəjingha, ana sə'inda kwa shi'uni kwitəkwitəu.#2:11 Sə shi'uni kwitəkwitə ina sə pampam mətlə inga, “Frankinsens ana mur.” Tangərmanyi nga njo ngi ka cha mərtə vi shi'uni məsəɗakəu. Mətləkunyi nga njo haɗə ndə ni, ana kuzəkə cha tsəu nja ɗəl na kwaba 'ualəu.
12Kəl ngə nda ɓəl ta nda ya tə hə'i kənda təwa vanya laku paməu, manda Hyel tə nar nda ku shi'uni gwa tsəu nda yi təwa təl Hiridus wa.
Yusufu ana Maryamu tə Hwi yi Masar
13Manda njir zəndə sasəlga inda tə təra, ngə Chama Tlakə tə chabiya nyi dzə nə Yusufu ku shi'uni ga nar nyi, “Hiridus kwa gwa'a zər ngə ka tsa. Aka ənga, hya'ati! Ka hətə zər nga ana Ama nyi ka hwi yi Masar, ka ngya vu nda kəl sakanda ya nar nghə ka ɓəl shili ti.”
14Ngə Yusufu tə hya'ati ga hətə zər nda ana Ama nyi əvu'i ga təra yi Masar. 15Nda ngya hinda kəl sakanda təl Hiridus tə nda tah. Sə ngə tə ɗa ka ga cha nyabiya sə nda Tlakə tə na təwa nya ndər mətakər bəra, “Avu Masar ya ngabiya zər ɗa.”
Hiridus tə Kuɗənda Ngulisha'a Shiɗəɗəu
16Sakanda Hiridus tə nda zəndəbiya ənda njir zəndə sasəlga inda shandənyi tə kər, ngə ɗufwa cha nginyi. Ngə cha sə ləvaləva nda ki kuɗənda dəhə ngulisha'a shili nda vu Baitalami ana mələm nda lələhəu, ghəya tə nguli fa mətlə səya tə inda shiɗəɗə matsa nda, wi nda ngabiya cha tsa njir zəndə sasəlga inda.
17A təwa ənga sənda Irmiya ndər mətakər tə na, tə nyabiyadza, 18“Nja ngatə kurakə avu Rama, kurakər tiwi ana huɗətla. Rahila kwa tiwi ka nguli nyi, a ndə nda kwa nau fətənyi ɗufəu wa, aka nda kuɗa.”
Ɓəl Shili Nazarat
19Ahir nda Hiridus tə tah, ngə Chama Tlakə tə shili da Yusufu ku shi'uni avu Masar, 20ga na, “Hya'ati ka hətə zər nga ana Ama nyi, hya ɓəl ya ti hə'i Isra'ila, aka nji'inda kwa gwa'a zər ngə ka tsa nda, a kuɗəti.” 21Kəl ngə cha hya'atə ga hətə zər nda ana Ama nyi ga ɓəl yatə hə'i Isra'ila.
22Kəl ja, nda cha ngatə ənda Arkilayus zər Hiridus ngə tə dləu cha ada nyi na təlkur vu Yahudiya, ngə ləvər tə səya nyi tsa yi nda. Ngə nja ɓəla tsakətə təɗəhimi nənyi ku shi'uni, ngə cha tərata nyi yatə hə'i Galili. 23Ngə cha yi ngyata nyi ku mələm nda njo nga Nazarat, ga nja nyabiya sənda njir mətakər tə na, “Njo nga nyi ndər Nazarat.”#2:23 Takər na, təkəra Yesu nda njo nga Kəristi ni.
Okuqokiwe okwamanje:
Matta 2: hbbNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. and © The Nigeria Bible Translation Trust 2018
